Si Jesukristo Nag-ayo sa Masakiton

Katuyoan

Aron sa pagtabang sa matag bata nga magtinguha sa pagpakita og gugma ug kapuangod alang sa uban sama sa gibuhat ni Jesus sa dihang siya miayo sa mga masakiton.

Pagpangandam

Sa mainampoon nga paagi pagtuon sa Mateo 8:5–10, 13; 25:34–40; Marcos 1:40–45; Lucas 4:38–40; 7:11–17; ug Juan 4:46–54; 13:34–35. Dayon pagtuon sa leksyon ug paghukom unsaon nimo pagtudlo ang mga bata sa asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii).
Pilia ang mga pangutana sa panaghisgutan ug mga kalihokan sa pagpalambo nga maoy makapalakip sa mga bata ug labing makatabang nila sa pagkab-ot sa katuyoan sa leksyon.
Mga materyal nga gikinahanglan: usa ka Biblia o usa ka Bag-ong Tugon alang sa matag bata.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Isaysay ang mosunod nga sugilanon mahitungod kang Heber J. Grant, kinsa sa ulahian nahimong ikapitong Presidente sa Simbahan.

Si Heber miputos sa iyang manipis nga kupo libot kaniya ug nagkurog sa ka-bugnaw. Hapit na iyang adlaw nga natawhan, ug tanan nga iyang buot maangkon mao ang mainit nga kupo. Apan sila kabus kaayo nga makapalit og kupo. Usahay sila sayo nga mangatulog tungod kay wala nay sugnod nga ikapainit sa balay, ug usahay siya gutom tungod kay walay igo nga pagkaon. Aron makakwarta, ang inahan ni Heber sa kasagaran motrabaho hangtud sa gabii, magtahi og mga saput alang sa uban.

Sa adlaw nga natawhan ni Heber ang iyang inahan mihatag kaniya og usa ka maanindot nga kupo nga hinimo gikan sa mga biya nga mga materyal. Si Heber dili na hapit makahulat nga mogawas ug mobati sa kainit niini.

Pipila lamang ka mga semana ang milabay, si Heber nakakita og usa ka batang lalaki nga sama niya ka dak-on nga naghilak. Siya nagsul-ot lamang og suweter, ug si Heber nasayud unsa siya ka tugnaw. Ang batang lalaki mitan-aw nga naghinamhinam sa kupo ni Heber. Si Heber mihunong ug, sa walay paghunahuna, mihukas sa iyang kupo ug mihatag niini ngadto sa batang lalaki.

Nianang pagkahapon ang inahan ni Heber nakakita kang Heber nga nagsul-ot sa iyang daan nga kupo. Siya nangutana, “Unsay imong gibuhat sa imong bag-ong kupo?” Si Heber naghunahuna kon unsaon sa pagtug-an niya. Dayon siya miingon, “Nakakita ako og usa ka batang lalaki kinsa nagkinahanglan niadto labaw pa kay kanako, busa ako mihatag niini kaniya.”

“Dili ba unta angay nga ikaw mihatag sa imong daan?” siya nangutana.

Si Heber mitan-aw sa iyang inahan, nanghinaut nga siya makasabut, ug nakakita sa iyang mga mata nga napuno sa mga luha. Siya migakos sa iyang inahan samtang siya mitubag sa iyang kaugalingon nga pangutana. “Sigurado gayud nga ikaw dili makahimo, Heber,” siya miingon. “Sigurado gayud nga ikaw dili makahimo.” (Gikuha gikan sa “The Coat,” gisaysay pag-usab pinaagi ni Lucile C. Reading, Children’s Friend, Nob. 1966, p. 5.)

Hangyoa ang mga bata sa paghunahuna unsa kaha ang gibati ni Heber sa dihang siya nakakita sa batang lalaki nga naghilak tungod sa katugnaw. Ipasabut nga si Heber adunay gugma ug kapuangod alang sa batang lalaki. Si Jesus buot nga kita mahigugma sa uban sama sa gibuhat ni Presidente Grant. Ipasabut nga kini nga Seksyon nagpakita giunsa ni Jesus paghatag og panig-ingnan sa gugma ug kapuangod pinaagi sa pag-ayo sa masakiton.

Ikapuli nga Pang-atensyon nga Kalihokan

Isulat ang matag pulong gikan sa Juan 13:34 diha sa laing mga piraso nga papel. Sagula ang mga papel ug hangyoa ang mga bata sa paghimutang niini sa tukma nga pagkahan-ay. Tuguti sila sa paggamit sa ilang mga kasulatan kon sila nagkinahanglan og tabang.

Mga Asoy sa Kasulatan

Itudlo ang mosunod nga mga asoy sa milagroso nga mga pag-ayo ni Jesus. (Alang sa gisugyot nga mga paagi sa pagtudlo sa mga asoy sa kasulatan, tan-awa sa “Pagtudlo gikan sa mga Kasulatan,” p. viii.) Tabangi ang mga bata nga makasabut nga si Jesus adunay dakong gugma ug kapuangod alang sa masakiton.

Mga Asoy sa Kasulatan

Ang pag-ayo sa sulugoon sa senturyon (Mateo 8:5–10, 13). Ipasabut nga ang senturyon usa ka opisyal sa sundalo sa Roma kinsa mimando og daghang mga sundalo. Siya nakabati mahitungod kang Jesus ug adunay hugot nga pagtuo diha kaniya.
Ang pag-ayo sa sanglahon (Marcos 1:40–45). Ipasabut nga ang mga sanglahon nag-antus og makalilisang nga matang sa sakit sa panit. Tungod kay ang sangla gituohan nga kusog kaayo manakod, kadtong aduna niini nga sakit sa kasagaran wala tugoti nga mopuyo sa mga siyudad ug sila gilikayan niadtong walay sangla.
Ang pag-ayo sa ugangan ni Pedro ug daghan pang uban (Lucas 4:38–40).
Ang pagbangon sa anak nga lalaki sa biyuda gikan sa patay (Lucas 7:11–17).
Ang pag-ayo sa anak nga lalaki sa dungganan nga tawo (Juan 4:46–54).

Mga Pangutana sa Panaghisgutan ug Paggamit

Pagtuon sa mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan.

Mga Pangutana sa Panaghisgutan ug Paggamit

Ngano sa inyong pagtuo nga si Jesus nagbuhat niining mga milagro? (Marcos 1:41; Lucas 7:13; Juan 9:1–3.)
Sa unsang paagi nga kini nga mga pag-ayo nakapanalangin sa mga kinabuhi sa mga tawo nga nalakip? (Lucas 7:2, 12; Juan 4:52–53.)
Unsa nga mga kinaiya ang atong gikinahanglan nga ugmaron sa atong mga kinabuhi kon kita mosunod sa mga panig-ingnan sa Manluluwas niining mga asoy? (Juan 13:34–35. Ikaw mahimong mohatag sa mga bata og higayon sa pagbadlis niining mga bersikulo.) Unsaon nato sa pagpakita og gugma, kapuangod, ug pagpakabana ngadto sa mga tawo nga nagkinahanglan? Pagdapit sa mga bata sa pagpakigbahin sa ilang mga kasinatian kon unsa ang ilang gibati sa dihang ang laing tawo mitabang kanila.
Si Jesus ba nakaila sa tanang mga tawo nga iyang giayo? (Mateo 8:5–8.) Unsa ang gisulti niini ngari nato kon si kinsa ang atong angay nga tabangan kon kita makakita og usa ka tawo nga nanginahanglan?
Human si Jesus miayo sa sanglahon, unsa ang lyang gimando kaniya nga buhaton? (Marcos 1:43–44.) Unsa ang gisulti niini ngari nato kon unsaon nato pagtabang sa uban?
Sa unsang paagi nga ang pagtabang sa uban makadala nato nga labaw nga mahiduoi ngadto sa Langitnong Amahan ug ni Jesus? (Mateo 25:45.) Unsa ang inyong bation kon kamo makatabang sa uban? Dapita ang mga sakop sa klase sa pagpaambit og mga kasinatian sa dihang sila mitabang sa uban nga nagkinahanglan o sa dihang sila nakadawat og panabang gikan sa laing tawo.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan sa bisan unsang higayon sa leksyon o ingon nga usa ka pagribyu, katingbanan, o hagit.

Ipabasa sa usa ka bata ang 1 Juan 3:18. Ipasabut nga kini nga bersikulo nagsulti nato nga kita dili lamang mosulti sa mga tawo nga kita nahigugma nila, kita kinahanglan nga mopakita sa atong gugma pinaagi sa atong mga lihok. Unsa ang atong gibuhat alang sa uban ang nagpakita nga kita nahigugma nila. Ipabuhat sa mga bata ang mga paagi nga sila makapakita og gugma alang sa ilang mga banay ug mga higala.
Ipabasa sa usa ka bata kining kinutlo gikan kang Presidente Spencer W. Kimball: “Ang Dios nakakita gayud nato, ug siya nagbantay nato. Apan kini sa kasagaran pinaagi sa ubang tawo nga siya naghatag sa atong mga panginahanglan” (“Small Acts of Service,” Ensign, Dis. 1974, p. 5). Hangyoa ang matag bata sa pagsulti mahitungod sa usa ka kahimtang diin ang Langitnong Amahan mitubag sa mga panginahanglan sa bata pinaagi sa laing tawo. Ikaw mahimong mosulti sa mga bata kabahin sa usa ka tawo nga imong nahibaloan nga mitabang sa laing tawo nga nanginahanglan. Hatagi og gibug-aton nga kining tawhana nakapaugmad og gugma, kapuangod, ug pagpakabana alang sa uban ug nagpakita niana nga gugma pinaagi sa mga buhat sa pag-alagad.
Ipabasa sa mga bata ang mga mosunod nga mga kasulatan mahitungod sa pag-alagad sa uban: Mateo 25:34–40 ug Mosiah 2:17–18, 4:14–15. Pagdungan og himo og lista sa mga butang nga gihisgutan sa mga kasulatan kon unsa ang angay natong buhaton alang sa uban. Tuguti ang mga bata sa pagpili og usa ka buhat sa pag-alagad nga ilang mahimong buhaton sulod sa umaabot nga semana.
Bahina ang klase ngadto sa gagmay nga mga pundok ug ihatag sa matag pundok ang usa o kapin pa sa mosunod nga mga kahimtang. Ikaw usab makahimo og imong kaugalingon nga mga kahimtang. Ipabuhat sa mga bata ang mga paagi nga sila makapakita og gugma ug kapuangod ug makaalagad niining mga tawo.

Usa ka bata misulod sa Primarya ug wala makaila ni bisan kinsa.

Usa ka bata sa klase sa Primarya nasakit.

Imong higala dili sakop sa Ang Simbahan ni Jesukristo sa mga Santos sa Ulahing mga Adlaw

Usa ka tawo diha sa inyong ward o branch gimingaw.

Ang imong mga ginikanan may buhat ug naghangyo nimo sa pagtabang og bantay sa imong gagmay nga igsoong lalaki o igsoong babaye.

Ang usa ka tawo nagsulti og dili maayo nga butang ngadto sa imong higala.

Panapos

Pagpamatuod

Pagpadayag sa imong pasalamat sa kinabuhi ug panig-ingnan sa Manluluwas. Pagpamatuod nga kita nagsunod sa mga pagtulun-an ni Jesus kon kita nagpakita og kapuangod ug gugma niadtong anaa sa atong palibot. Isugyot ngadto sa mga bata nga sa mosunod nga semana sila kinahanglan nga maninguha sa pagpakita og gugma ug magbuhat og ginagmay nga mga buhat sa pag-alagad alang sa ilang mga banay ug sa uban.

Gisugyot nga Basahonon sa Panimalay

Isugyot nga ang mga bata magtuon sa Marcos 1:40–45 ug Lucas 7:11–17 sa panimalay ingon nga ribyu niini nga leksyon.

Dapita ang usa ka bata nga mohatag sa panapos nga pag-ampo.