Si Jesukristo ug ang Igpapahulay nga Adlaw

Katuyoan

Aron sa pagtabang sa matag bata nga buot magbuhat og mga butang sa adlaw nga Igpapahulay aron sa pagpasidungog ug paghinumdom kang Jesukristo ug sa Langitnong Amahan.

Pagpangandam

Sa mainampoon nga paagi pagtuon sa Juan 5:2–16, Mateo 12:1–13, Lucas 13:11–17, 14:1–6, Genesis 2:1–3, Exodo 20:8–11, ug Doktrina ug mga Pakigsaad 59:9–14. Dayon pagtuon sa leksyon ug paghukom unsaon nimo pagtudlo ang mga bata sa mga asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Dugang mga basahonon: Marcos 2:23–28, 3:1–6, ug Lucas 6:1–11.
Pilia ang mga pangutana sa panaghisgutan ug mga kalihokan sa pagpalambo nga maoy makapalakip sa mga bata ug labing makatabang nila sa pagkab-ot sa katuyoan sa leksyon.
Mga materyal nga gikinahanglan: Usa ka Biblia o usa ka Bag-ong Tugon alang sa matag bata.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pagdapit niadtong mga bata kinsa buot mosulti giunsa nila pagpadayag ang ilang gugma ug pag-alagad sa uban niana nga semana. Tuguti sila sa pagsulti mahitungod sa ilang mga kasinatian.

Pang-atensyon nga Kalihokan

Hangyoa ang mga mga bata sa pagpataas sa ilang mga kamot kon sa ilang pagtuo sila nasayud sa tubag sa mga mosunod nga mga tigmo:

Pang-atensyon nga Kalihokan

Kini nahisgutan sa makadaghan nga higayon diha sa mga kasulatan.
Ang Langitnong Amahan ug si Jesus nag-ingon nga kini mahinungdanon kaayo.
Kini balaan.
Ang mga tawo kinsa nagbalaan niini nagpakita nga sila naghigugma sa Langitnong Amahan ug ni Jesus.
Kini usa sa pito.
Kini lahi kay sa unom.
Niini kita nagsimba sa Langitnong Amahan ug magpahulay sa atong mga gimbuhaton.
Kini usa ka adlaw sa semana.

Tubag: Ang Igpapahulay.

Mga Asoy sa Kasulatan

Itudlo ang mga asoy sa pag-ayo ni Jesus atol sa Igpapahulay nga Adlaw gikan sa mga kasulatan nga nasulat sa “Pagpangandam” nga seksyon. (Alang sa gisugyot nga mga paagi sa pagtudlo sa mga asoy sa kasulatan, tan-awa sa “Pagtudlo gikan sa mga Kasulatan,” p. viii.)

Samtang ikaw nagtudlo niining mga asoy, tabangi ang mga bata nga makasabut nga ang mga Judeo sa panahon ni Jesus wala motuman sa Igpapahulay ingon nga sila gimandoan. Sila naghimo og estrikto nga mga lagda nga wala makatabang nila sa pagsimba sa Langitnong Amahan. Pananglitan, ang usa ka higot nga mahubad pinaagi sa usa lamang ka kamot pinasubay sa balaod sa Igpapahulay, apan kon kini nagkinahanglan og duha ka mga kamot sa paghubad, kini supak sa balaod. “Ang pagdagkot o pagpalong sa kalayo atol sa Igpapahulay [supak sa balaod]. Kini gidili… ang pag-ayo sa nabali nga bukog, o pag-uli sa nalisa nga lutahan.… Ang usa nga nalubong ilalom sa mga guba atol sa Igpapahulay, mahimong habwaon ug ipagawas, kon buhi pa, apan, kon patay na, siya ipabilin diha sa dapit diin siya anaa, hangtud ang Igpapahulay human na” (James E. Talmage, Jesus the Christ, pp. 215–16).

Si Jesus mitudlo sa mga Judeo nga kining mga lagda sayop. Siya mipakita pinaagi sa iyang panig-ingnan nga ang Igpapahulay adlaw sa pagpasidungog kaniya ug sa iyang Amahan pinaagi sa pagbuhat og maayo ug mahinungdanon nga mga butang, sama sa pagtabang sa mga tawo.

Mga Pangutana sa Panaghisgutan ug Paggamit

Pagtuon sa mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan.

Mga Pangutana sa Panaghisgutan ug Paggamit

Unsa ang gisugo nga atong buhaton sa Igpapahulay nga Adlaw? (Exodo 20:8–11.) Ngano nga kita gisugo sa pagbuhat niini? (Genesis 2:1–3.)
Unsa ang gibuhat ni Jesus atol sa Igpapahulay sa pag-ayo sa tawo nga piang? (Juan 5:6, 8); sa tawo nga adunay dauton nga kamot? (Mateo 12:13); sa masakiton nga babaye? (Lucas 13:13); sa lalaki nga adunay panghupong? (Lucas 14:4. Ipasabut nga ang panghupong usa ka sakit nga makapamaga sa lawas.) Kana ba nga mga kalihokan mahimong madawat alang sa Igpapahulay sa pagkakaron? Ngano?
Ngano man nga ang mga tinun-an nagsanggi og mais sa Igpapahulay? (Mateo 12:1.) Unsa nga mga butang ang gikinahanglan nga buhaton sa matag adlaw, bisan sa Igpapahulay?
Giunsa ni Jesus pagtuman ang Igpapahulay? Giunsa sa mga Judeo pagtuman niini? (Tabangi ang mga bata nga makasabut nga si Jesus migamit sa Igpapahulay aron sa pagtabang sa mga katawhan ug sa pagbuhat sa ingon nagpasidungog sa Langitnong Amahan.)
Unsa ang duha ka mga hinungdan nga ang mga pangulo sa mga Judeo nasuko kang Jesus? (Juan 5:18.)
Kinsa ang naghimo sa mga balaod kabahin sa Igpapahulay nga adlaw gikan sa sinugdanan sa kalibutan? (Mateo 12:8; Genesis 2:1–3. Ipahinumdom sa mga bata nga si Jesukristo milalang sa kalibutan ubos sa mando sa Langitnong Amahan.) Unsa sa inyong hunahuna ang gibati ni Jesus sa dihang siya nagtan-aw giunsa sa mga Judeo pag-usab ang mga balaod nga iyang gihimo?
Unsa kaha sa inyong pagsabut ang gibati sa piang nga lalaki sa lim-aw sa Bethesda, sa masakiton nga babaye, sa lalaki nga adunay dauton nga kamot, ug sa lalaki nga adunay panghupong sa dihang sila giayo? (Lucas 13:13.) Giunsa ni Jesus pagpasidungog ang iyang Amahan pinaagi sa pagbuhat niini nga mga butang atol sa Igpapahulay nga adlaw?
Unsa sa inyong hunahuna ang gipasabut ni Jesus sa dihang siya miingon nga kini pinasubay sa balaod ang pagbuhat sa maayo atol sa Igpapahulay nga Adlaw? (Mateo 12:12.) Unsaon nimo pagkasayud unsa ang maayo nga buhaton atol sa Igpapahulay nga Adlaw? (Exodo 20:8–11; D&P 59:9–14.)
Unsa nga mga butang ang kinahanglan nga dili nato buhaton atol sa Igpapahulay? Hisguti ang pamahayag gikan sa Unang Kapangulohan: “Kita kinahanglan nga magpugong sa pagpamalit atol sa Igpapahulay ug sa pagsalmot sa uban nga sa patigayon ug sa paugnat sa kusog nga mga kalihokan” (Ensign, Ene. 1993, p. 80).

Hisguti kining kinutlo gikan ni Presidente Spencer W. Kimball: “Ang pagtuman sa Igpapahulay usa ka timailhan sa sukod sa atong gugma alang sa atong Langitnong Amahan” (The Teachings of Spencer W. Kimball, p. 218). Pahisguti sa mga bata ang angay nga mga paagi nga sila makapakita sa ilang gugma alang sa Langitnong Amahan sa Igpapahulay, sama sa pagtambong sa simbahan, pagbasa sa mga kasulatan, pagsulat sa ilang mga inadlaw nga talaan, pagduaw sa mga kabanay ug sa mga masakiton, pagpaminaw og makapabayaw nga musika, pagsimba, pag-alagad sa uban, ug pagsalmot sa mapahulayon nga mga kalihokan sa banay. Kon kaduhaduhaan nga kalihokan ang mahisgutan, hangyoa ang mga bata sa paghukom kon kana nga kalihokan maayo ba nga paagi sa pagpakita nga sila naghigugma ug nagpasidungog sa Langitnong Amahan ug ni Jesukristo o kon kini angay ba nga buhaton sa lain nga adlaw.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa leksyon o ingon nga usa ka pagribyu, katingbanan, o hagit.

Patun-i sa mga bata ang Doktrina ug mga Pakigsaad 59:9–23 ug ipasulat ang pipila ka mga kalihokan nga gisugo sa Ginoo nato nga buhaton sa Adlaw nga Igpapahulay ug ang mga panalangin nga iyang gisaad nato sa pagsunod sa maong mga sugo.
Pahinganli sa mga bata ang pipila ka mga kalihokan nga ilang nakita nga gibuhat sa mga katawhan atol sa Adlaw nga Igpapahulay. Paghukom kon kini nga mga kalihokan mao ba ang angay alang sa Igpapahulay pinaagi sa pagpangutana sa mosunod nga mga pangutana:

Kini makatabang ba nako sa pagpasidungog sa Langitnong Amahan ug ni Jesukristo?

Kini nagsunod ba sa mga sugo sa Langitnong Amahan nga iyang gihatag nato alang sa Igpapahulay?

Kini mapahulayon ba?

Kini alang ba sa pag-alagad sa bisan kinsa?

Awhaga ang mga bata sa paghimo og mga piano alang sa pagbalaan sa Igpapahulay nga Adlaw.
Hisguti kining mga pahayag gikan sa Unang Kapangulohan: “Kami nagawhag sa tanang mga Santos sa Ulahing mga Adlaw sa pagtagana niining balaan nga adlaw gikan sa mga kalihokan sa kalibutan ug ipahinungod ang ilang mga kaugalingon pinaagi sa pagsulod ngadto sa espiritu sa pag-ampo, pagpasalamat, pag-alagad, ug pangbanay nga mga kalihokan nga angayan alang sa Igpapahulay nga Adlaw. Samtang ang mga sakop sa Simbahan naningkamot sa paghimo sa ilang kalihokan sa Adlaw nga Igpapahulay nga mahiuyon sa tinguha ug sa Espiritu sa Ginoo, ang ilang mga kinabuhi mapuno sa kalipay ug kalinaw” (Ensign, Ene. 1993, p. 80).
Ipasulat sa mga bata ang mga pulong Ako maghimo sa Igpapahulay nga Adlaw nga balaan sa usa ka piraso nga papel ug padayandayani kini og krayola o mga marker.

Panapos

Pagpamatuod

Pagpadayag sa imong pagpamatuod sa bili sa pagbalaan sa Igpapahulay nga adlaw pinaagi sa pagbuhat og maayo ug mahinungdanon nga mga butang ug sa mga panalangin nga imong nadawat ingon nga sangputanan. Awhaga ang mga bata sa pagbuhat sa mga butang sa Igpapahulay nga makapasidungog sa Langitnong Amahan ug kang Jesukristo.

Gisugyot nga Basahonon sa Panimalay

Isugyot sa mga bata nga magtuon sa Juan 5:2–16 sa panimalay ingon nga usa ka ribyu niini nga leksyon.

Pagdapit og usa ka bata nga mohatag sa panapos nga pag-ampo.