Leksyon 18

Si Jesukristo Nag-ayo sa usa ka Lalaki nga Natawo nga Buta

Katuyoan

Aron sa pagtabang sa matag bata sa pagsabut nga kita makabuntog sa mga pagsulay ug sa mga hagit pinaagi sa pagpaduol kang Jesukristo.

Pagpangandam

1. Sa mainampoon nga paagi pagtuon sa Juan 9. Dayon pagtuon sa leksyon ug paghukom unsaon nimo pagtudlo ang mga bata sa asoy sa kasulatan (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.) Pahinumdom: Samtang nag-andam ug nagtudlo niini nga leksyon, pagmabination ngadto ni bisan kinsang mga bata sa imong klase kinsa dili makakita.

2. Pilia ang mga pangutana sa panaghisgutan ug mga kalihokan sa pagpalambo nga maoy makapalakip sa mga bata ug labing makatabang nila sa pagkab-ot sa katuyoan sa leksyon.

3. Mga materyal nga gikinahanglan:

   1. Usa ka Biblia o usa ka Bag-ong Tugon alang sa matag bata.

   2. Usa ka piraso nga panapton nga himoong usa ka taptap sa mata.

   3. Hulagway 7-14, Si Jesus Nag-ayo sa Buta (Pakete sa mga Hulagway sa Ebanghelyo 213; 62145).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Taptapi ang mga mata sa usa ka bata, ug hangyoa siya sa pagdibuho og bahin sa usa ka butang, sama sa bahin sa usa ka sakyanan, diha sa pisara. Tuguti ang ikaduha nga bata sa pagduol, taptapi ang mata, ug ipadibuho ang laing bahin sa sama nga butang. Padayona hangtud nga pipila sa mga bata makadibuho sa bahin sa maong butang. Hisguti uban sa mga bata ngano nga kini malisud nga tahas.

Pang-atensyon nga Kalihokan

• Sa unsang paagi nga kon dili makakita lisud ang pagdibuho sa hulagway?

• Unsa ang imong bation kon ikaw dili na makakita pag-usab?

Sultihi ang mga bata nga ikaw mamulong sa duha ka matang sa pagkabuta. Hangyoa sila sa pagpaminaw sa mga nagkalain-laing matang sa pagkabuta samtang ikaw nagtudlo nila sa asoy sa kasulatan.

Asoy sa Kasulatan

Ipakita ang hulagway nga si Jesus Nag-ayo sa Buta. Itudlo ang asoy sa Juan 9 sa pag-ayo ni Jesus sa usa ka tawo kinsa natawo nga buta. (Alang sa gisugyot nga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Samtang ikaw nagtudlo sa sugilanon, tabangi ang mga bata sa pagsabut nga ang mga Pariseo (ang relihiyoso nga mga magmamando sa mga Judeo) nangabalaka nga sila mawad-an sa ilang pagkainila kon ang mga katawhan motuo kang Jesukristo. Busa, sila sa makadaghan misulay nga ang mga katawhan magduhaduha kang Jesus ug sa mga butang nga iyang gibuhat ug gitudlo. Sila wala nakaila sa mga kamatuoran sa ebanghelyo nga gitudlo ni Jesus ug busa sila sa espirituhanon nga paagi buta. Ipasabut nga kon pasagdan nato ang atong hakog nga mga kaikag mobabag sa dalan sa pagsunod sa Manluluwas, kita mamahimong buta sa espirituhanong paagi.

Mga Pangutana sa Panaghisgutan ug Paggamit

Pagtuon sa mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan.

Mga Pangutana sa Panaghisgutan ug Paggamit

• Unsa ang gipangutana sa mga tinun-an kang Jesus mahitungod sa lalaki nga gipakatawong buta? (Juan 9:2) Ngano kaha nga ang mga tawo usahay maghunahuna nga ang sakit ug kalisdanan moabut tungod kay ang usa ka tawo nakasala? Unsa ang gisulti ni Jesus nga hinungdan sa pagkabuta sa iaiaki? (Juan 9:3.)

• Sa unsang paagi nga ang mga Pariseo nahimong espirituhanon nga buta? (Juan 9:16.) Unsa ang ilang gipamasangil kang Jesus? Ngano sa inyong pagtuo nga sila wala miila ni Jesus ingon nga Anak sa Dios?

• Sa dihang ang mga Pariseo unang nangutana sa lalaki kinsa natawo nga buta kon unsa ang nahitabo, giunsa niya paghisgot ang mahitungod ni Jesus? (Juan 9:11.) Sa ikaduhang higayon nga sila nangutana sa iaiaki, matud niya kinsa si Jesus? (Juan 9:17.)

• Unsay nahitabo sa espirituhanon ingon man sa pisikal nga panan-aw sa lalaki? Unsa ang gisulti sa lalaki sa dihang siya gipangutana sa ikatulo nga higayon mahitungod kang Jesus? (Juan 9:30–33.)

• Unsa ang nahitabo sa lalaki tungod kay siya mipamatuod bahin ni Jesus? (Juan 9:22, 34.) Sa dihang si Jesus nakadungog nga gipapahawa ang lalaki sa sinagoga (usa ka relihiyoso nga balay-tigumanan sa mga Judeo), unsa ang iyang gibuhat? (Juan 9:35.) Unsa sa inyong pagtuo ang gibati sa lalaki sa dihang si Jesus miadto sa pagpangita kaniya? Unsa ang katapusang pagpamatuod sa lalaki bahin ni Jesus? (Juan 9:35–38.) Unsa ang nahitabo sa iyang espirituhanon nga panan-aw?

• Ngano sa inyong pagtuo nga ang Langitnong Amahan ug si Jesus mitugot nato nga makabaton og mga pagsulay ug mga suliran sa atong mga kinabuhi? Sa unsa nga paagi nga kining mga pagsulay ug mga suiiran makatabang sa pag-ayo sa atong espirituhanon nga pagkabuta? Unsaon kaha sa Langitnong Amahan ug ni Jesus pagtabang nato sa atong mga pagsulay ug mga suliran? (Tan-awa sa kalihokan sa pagpalambo 4.)

• Sa unsang paagi ikaw ug ang imong banay napanalanginan sa mga pagsulay? Awhaga ang mga bata sa paghisgot niining maong pangutana, apan siguroa nga ang mga bata dili mohisgot mahitungod sa kinaugalingong mga butang sa banay nga angay nga tipigan.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa leksyon o ingon nga usa ka pagribyu, katingbanan, o hagit.

1. Bahina ang klase ngadto sa mga pundok. Hatagi ang matag pundok og usa sa mosunod nga mga kasulatan nga basahon. Tuguti sila sa pagsultihanay diha sa ilang pundok ug dayon sa pagtaho sa klase giunsa sa tawo o sa katawhan sa kasulatan pag-atubang sa ilang mga pagsulay.

   Daniel 3:17–18, 23–25, 28

   1 Nephi 18:16, 20–22

   Mosiah 24:13–16

   Alma 14:8–11

2. Tabangi ang mga bata sa pagsabut sa kamahinungdanon sa pagmatikod niadtong adunay mga kakulangan. Ikaw mahimong mohangyo sa usa ka hamtong nga adunay kakulangan sa pisikal (o sa ginikanan sa usa ka bata nga adunay kakulangan) sa pag-anha sa klase ug sa paghisgot sa mga paagi sa pagkamabination niadtong kinsa adunay mga kakulangan. Hatagi og gibug-aton nga kita dili magbugal-bugal sa mga tawo nga may kakulangan; kita dili magkomedya nila. Kita makatabang nila kon sila nagkinahanglan og tabang; kita mahimong magdapit nila sa pagdula uban nato; kita mahimo nga ilang higala. Kita angay gayud nga moapil nila ug magtugot nila nga makasalmot uban kanato sa atong mga kalihokan.

3. Basaha ug hisguti ang asoy gikan ni Presidente Spencer W. Kimball:

   “Kon ang tanang mga pag-ampo angay nga tubagon sa dayon… aduna lama’y dyutay o walay pag-antus, kasubo, kahigawad, o bisan kamatayon, ug kon kini wala, wala usab ang kalipay, kalampusan, pagkabanhaw, ni kinabuhing dayon ug pagkadios” (Faith Precedes the Miracle, p. 97).

Panapos

Pagpamatuod

Ipaambit ang imong pagpamatuod nga ang Ginoo manalangin nato ug motabang nato sa atong mga suliran ug mga pagsulay kon kita motuman sa iyang mga sugo, magbaton og hugot nga pagtuo kang Jesukristo, ug maningkamot nga mahimong labaw nga sama kaniya.

Gisugyot nga Basahonon sa Panimalay

Isugyot nga ang mga bata magtuon sa Juan 9:1–38 sa panimalay ingon nga usa ka pagribyu niini nga leksyon.

Pagdapit og usa ka bata nga mohatag sa panapos nga pag-ampo.