Lesson 19

Ang Nasalaag nga Karnero, ang Nawala nga Sinsilyo, ug ang Mausikon nga Anak

Katuyoan

Aron sa pagtabang sa matag bata sa pagbaton og tinguha nga makatabang niadtong dili kaayo aktibo nga mobalik sa pagkaaktibo diha sa Simbahan ni Jesukristo.

Pagpangandam

1. Sa mainampoon nga paagi pagtuon sa Lucas 15, Mateo 18:12–14, ug Doktrina ug mga Pakigsaad 18:10–11). Dayon pagtuon sa leksyon ug paghukom unsaon nimo pagtudlo ang mga bata sa mga asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)

2. Pilia ang mga pangutana sa panaghisgutan ug mga kalihokan sa pagpalambo nga maoy makapalakip sa mga bata ug labing makatabang nila sa pagkab-ot sa katuyoan sa leksyon.

3. Mga materyal nga gikinahanglan:

   1. Usa ka Biblia o usa ka Bag-ong Tugon alang sa matag bata.

   2. Huiagway 7-19, Ang Maayong Magbalantay, ug 7-20, Ang Mausikon nga Anak (62155).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Ipaambit sa mga bata ang usa ka higayon nga ikaw o usa ka tawo nga imong nailhan nawad-an og usa ka butang nga mahinungdanon ug nakit-an kini pag-usab. Ihulagway ngadto sa mga bata ang bili sa butang, unsay imong gibati sa pagkawala niini, unsa ang imong gibuhat sa pagkaplag niini, ug unsa ang imong gibati sa dihang nakit-an kini. Kon angay, ikaw mahimong magdala sa butang aron ipakita ngadto sa klase. Hangyoa ang klase sa pagsaysay og bisan unsa nga mga hitabo sa ilang mga kinabuhi sa dihang sila nawad-an og usa ka butang nga bililhon ug nakit-an kini pag-usab.

Mga Asoy sa Kasulatan

Ginamit ang mga huiagway sa tukma nga panahon, itudlo ang mga sambingay sa nahisalaag nga karnero, ang nawala nga sinsilyo, ug ang mausikon nga anak lalaki. (Alang sa gisugyot nga mga paagi sa pagtudlo sa mga asoy sa kasulatan, tan-awa sa “Pagtudlo gikan sa mga Kasulatan,” p. viii.) Ipasabut ngadto sa mga bata nga kining mga sambingay, sama usab sa sambingay sa magpupugas ug sa trigo ug sa mga sagbut, nagtudlo og usa ka mahinungdanon nga baruganan sa ebanghelyo.

Mga Pangutana sa Panaghisgutan ug Paggamit

Tun-i ang mosunod nga mga pangutana ug ang mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

1. Ang Nahisalaag nga Karnero ug ang Nawala nga Sinsilyo

   • Ngano nga ang magbalantay sa karnero nabalaka pag-ayo sa usa ka karnero gikan sa usa ka gatus o ang babaye sa usa ka sinsilyo gikan sa napulo? (Lucas 15:4, 8.) Ipasabut nga ang mga tawo kasagaran nga pobre ug ang usa ka sinsilyo o karnero bililhon kaayo alang kanila. Sa samang paagi, ang tanang mga anak sa Langitnong Amahan bililhon alang kaniya. Ngano sa inyong pagtuo nga ang matag usa kanato bililhon ngadto sa Langitnong Amahan?

   • Ngano sa inyong pagtuo nga ang karnero nahisalaag? Sa unsang paagi sa inyong pagtuo nawala ang sinsiiyo? Sa unsang paagi nga kita o usa ka tawo nga atong nailhan mahimong mahisalaag? Tabangi ang mga bata nga makasabut nga ang pagkahisalaag nagtumbok usab niadtong mga tawo kinsa wala magtuman sa mga sugo ug nagbuhat og mga butang nga nakahimo nila nga dili takus sa pagbalik ngadto sa Langitnong Amahan.

   • Unsa ang gibuhat sa magbalantay sa nahisalaag nga karnero sa dihang iya kining nakaplagan? (Lucas 15:5.) Sa unsa nga paagi nga nakita sa iyang mga lihok nga siya naghigugma sa karnero? Kinsa ang girepresentar sa magbalantay? Kinsa ang girepresentar sa karnero?

   • Unsa ang gibuhat sa babaye aron makit-an ang nawala nga sensilyo? (Lucas 15:8.) Unsa ang nabuhat ni Jesukristo aron pagtabang niadtong kinsa nahimong nawala ug wala magtuman sa mga sugo? (D&P 18:10–11.) Unsaon nato pagtabang niadtong kinsa nawala?

   • Unsa ang gibuhat sa magbalantay ug sa babaye sa dihang sila nakakita sa karnero ug sa sinsilyo? (Lucas 15:6, 9.) Unsa kaha ang imong bation kon ikaw nakatabang sa usa ka tawo nga maghinulsol ug mobalik ngadto kang Jesukristo?

   • Ngano sa inyong pagtuo nga ang langit ug ang mga anghel mobati og kalipay sa panahon nga ang usa ka tawo maghinulsol? (Lucas 15:7, 10.)

2. Ang Mausikon nga Anak nga Lalaki

   • Unsa ang gipasabut sa mausikon? (Pagkamasukulon ug pagkausikan.)

   • Unsa ang gibuhat sa mausikon nga anak nga lalaki sa iyang kabilin? (Lucas 15:12–13.) Unsa sa inyong pagtuo ang gipasabut sa “gubot nga pagpuyo”? Ngano sa inyong pagtuo nga ang ubang mga tawo mopili nga magpuyo sa ingon niini nga paagi? Unsa man kaha sa inyong pagtuo ang gibati sa amahan samtang ang iyang anak nga lalaki milakaw? Unsa ang inyong bation kon ang usa ka sakop sa inyong banay mahisama sa mausikon nga anak nga lalaki? (Magmabination ngadto sa mga bata kinsa adunay mga sakop sa banay kinsa wala magsunod sa mga sugo.)

   • Unsa ang gibuhat sa mausikon nga anak nga lalaki aron sa pagpangita og pagkaon sa dihang ang iyang kwarta nahurot na? (Lucas 15:14–16.)

   • Unsa ang gipasabut sa “sa dihang siya nakaamgo sa iyang kaugalingon”? (Lucas 15:17.) Unsa sa inyong pagtuo nga ang pag-antus ug kaguol sa anak nga lalaki nakatabang kaniya nga buot maghinulsol?

   • Ngano sa inyong pagtuo nga ang anak nga lalaki mihukom sa pagbalik ngadto sa iyang amahan? (Lucas 15:17–19.) Unsa nga matang sa agalon ang iyang amahan? (Lucas 15:17.)

   • Unsay gibati sa amahan sa dihang ang iyang anak nga lalaki mipauli? (Lucas 15:20.) Unsa ang iyang gibuhat alang sa iyang anak nga lalaki? (Lucas 15:22–24.)

   • Unsay gibati sa magulang nga anak sa dihang siya nakahibalo nga ang iyang manghud nga lalaki mipauli? (Lucas 15:28–30.) Ngano nga mahinungdanon nga magpadayon sa paghigugma sa mga sakop sa banay kinsa wala mosunod sa mga sugo?

   • Unsa ang gisaad sa amahan ngadto sa magulang nga igsoon? (Lucas 15:31.) Unsa nga panig-ingnan ang gihatag sa amahan kon unsaon sa pagtagad niadtong kinsa nakasala apan naghinulsol? (Lucas 15:32.) Unsay inyong bation kon kamo makakita og usa ka tawo nga naghinulsol ug nag-usab gikan sa sayop ngadto sa matarung? Unsaon nato pagtagad ang mga tawo kinsa wala magsunod sa mga sugo apan kinsa tinud-anay nga nagmahay?

Mga Kalihokan sa Pagpalambo

Ikaw mahimong mogamit og usa o daghan pa sa mosunod nga mga kalihokan bisan unsa nga higayon sa leksyon o ingon nga usa ka pagribyu, katingbanan, o hagit.

1. Tuguti ang mga bata sa paghunahuna og mga paagi nga sila mahimong makatabang sa usa ka dili kaayo aktibo nga bata. (Ang mga tubag mahimong maglakip sa pagkamahigalaon, pagkamaayong ehemplo, pagdapit nila sa mga kalihokan sa Simbahan, pagtinabangay sa paghimo og mga butang, ug uban pa.)

2. Isaysay ang mosunod nga sugilanon:

   Ang napulo ka tuig nga si Joshua Dennis miadto uban sa iyang amahan ug mga kuyog sa pag-usisa sa usa ka biniyaan nga minahan. Siya nag-amping sa minahan apan nabulag gikan sa uban nga mga batang lalaki ug nahisalaag sa kangitngit nga walay pagkaon o tubig. Sa dihang ang uban nakamatikod nga siya nawala, sila misugod dayon sa pagpangita kaniya. Sa wala madugay gatusan ka mga katawhan ang miabut aron sa pagpangita kang Joshua. Liboan ang nagpuasa ug nag-ampo nga siya makit-an nga luwas. Ang mga tigpangita nangita kaniya sa sulod sa lima ka adlaw, apan wala gayud sila makakaplag kaniya. Adunay usa ka tawo nga suheto sa minahan nga nakadungog sa pagpangita ug miboluntaryo sa pagtabang. Siya nasayud pag-ayo sa minahan nga siya nakakaplag kang Joshua sa usa ka dapit nga ang uban wala magtuo nga siya atua didto. Sa dihang nakaplagan niya si Joshua, dili makatukib ang kalipay nga iyang gibati. Ang tanang katawhan nga diha sa minahan ug linibo ka lain mihilak sa kahupayan ug kalipay sa dihang ilang nasayran nga si Joshua buhi ug luwas (gikan sa “Making Friends: Joshua Dennis—A Treasure of Faith,” Friend, Nob. 1990, pp. 20–22).

   Hisguti ang kalainan taliwala sa pisikal nga pagkahisalaag ug espirituhanon nga pagkahisalaag. Ipasabut nga kita angay nga maningkamot pag-ayo sa pagluwas niadtong kinsa nahisalaag sa espirituhanong paagi sama niadtong kinsa pisikal nga nahisalaag.

3. Dulaa ang Pangitaa ug Kaplagi. Hangyoa ang mga bata sa paghunahuna og usa ka dapit diin siya mahimong mahisalaag ug isulat kini sa usa ka piraso nga papel o ihunghong kini sa magtutudlo. Tuguti ang ubang mga bata sa pagpangutana og “oo” o “dili” nga mga pangutana alang sa pag-ila asa ang bata nahimutang (Kini anaa ba sa usa ka dasok nga dapit? Kini anaa ba sa mga bukid? Kini anaa ba sa ilalom sa usa ka butang?). Tabangi ang mga bata nga makasabut nga nagkinahanglan og panahon ug paningkamot sa pagpangita sa usa ka tawo kinsa nahisalaag, ilabi na ang usa ka tawo kinsa espirituhanong nahisalaag.

4. Tabangi ang mga bata sa pagsag-ulo sa Doktrina ug mga Pakigsaad 18:10.

Panapos

Pagpamatuod

Ipaambit uban sa mga bata ang imong pagtuo nga ang Langitnong Amahan naghigugma sa matag usa sa iyang mga anak ug nga kitang tanan mahinungdanon ngadto kaniya. Hatagi og gibug-aton nga ang Langitnong Amahan ug si Jesukristo buot nga motabang niadtong nahisalaag sa pagbalik ngadto kanila.

Gisugyot nga Basahonon sa Panimalay

Isugyot nga ang mga bata magtuon sa Lucas 15:11–32 sa panimalay ingon nga usa ka balik pagtuon niini nga leksyon.

Pagdapit og usa ka bata nga mohatag sa panapos nga pag-ampo.