Leksyon 21

Si Jesukristo Nag-ayo sa Napulo ka mga Sanglahon

Katuyoan

Aron sa pag-awhag sa matag bata sa pagpasalamat sa Langitnong Amahan alang sa daghang mga panalangin nga iyang nadawat.

Pagpangandam

1. Sa mainampoon nga paagi pagtuon sa Lucas 17:12–19 ug Doktrina ug mga Pakigsaad 59:7. Dayon pagtuon sa leksyon ug paghukom unsaon nimo pagtudlo ang mga bata sa asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)

2. Pilia ang mga pangutana sa panaghisgutan ug mga kalihokan sa pagpalambo nga makapalakip sa mga bata ug maoy labing makatabang kanila sa pagkab-ot sa katuyoan niini nga leksyon.

3. Pagsulat og usa ka mubo nga sulat-pasalamat alang sa matag bata, aron gamiton sa panahon sa leksyon, nga nagpadayag sa imong pasalamat alang sa usa ka butang nga ang bata nagbuhat o alang sa pila ka kinaiya nga iyang gipakita.

4. Isulat sa usa ka kard alang sa matag bata ang mga pulong nga Hinumdumi ang Pagpasalamat sa Langitnong Amahan.

5. Mga materyal nga gikinahanglan:

   1. Usa ka Biblia o usa ka Bag-ong Tugon alang sa matag bata.

   2. Usa o labaw pa nga mga kopya sa Doktrina ug mga Pakigsaad.

   3. Hulagway 7-23, Ang Napulo ka mga Sanglahon (Pakete sa mga Hulagway sa Ebanghelyo 221; 62150).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Ihatag ang mga sulat-pasalamat nga imong gisulat ngadto sa matag bata. Human nila mabasa ang mga sulat, hisguti uban kanila kon unsa ang atong bation kon ang katawhan mopadayag og pasalamat nato. Ikaw mahimong mopaambit og usa ka kasinatian sa dihang usa ka tawo naghimo og usa ka talagsaon nga paningkamot sa pagpasalamat nimo ug ihulagway kon unsa ang imong gibati. Dapita ang mga bata sa pagpaambit og bisan unsa nga mga kasinatian nga ilang nabatonan.

Asoy sa Kasulatan

Magpakita sa hulagway sa Ang Napulo ka mga Sanglahon, itudlo ang sugilanon ni Jesus nga nag-ayo sa napulo ka mga sanglahon nga makita sa Lucas 17:12–19. (Alang sa gisugyot nga mga pagtudlo sa asoy sa kasulatan tan-awa sa “Pagtudlo gikan sa mga Kasulatan,” p. viii.) Pahinumdumi ang mga bata nga ang sangla usa ka makalilisang nga sakit sa panit. Ang katawhan niana nga panahon nagtuo nga kini dali kaayong makatakod. Sa panahon ni Jesus ang mga sanglahon gidid-an sa pagsulod sa mga siyudad ug dili mahimong moduol sa ubang mga tawo.

Mga Pangutana sa Panaghisgutan ug Paggamit

Tun-i ang mosunod nga mga pangutana ug ang mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan.

Mga Pangutana sa Panaghisgutan ug Paggamit

• Unsa ang gihimo sa mga sanglahon sa dihang ilang nakita si Jesus? (Lucas 17:13.) Sa inyong pagtuo sila ba nakaila kon si kinsa si Jesus ug nagtuo kaniya?

• Unsa ang gisugo ni Jesus sa mga sanglahon nga buhaton aron mamaayo? (Lucas 17:14.)

• Pila ka buok mga sanglahon ang mibalik aron sa pagpasalamat kang Jesus? (Lucas 17:15–16.) Unsa ang gisulti ni Jesus mahitungod sa mga sanglahon ? (Lucas 17:17–19.)

• Ngano sa inyong pagtuo nga ang siyam sa mga sanglahon wala mobalik aron sa pagpasalamat ni Jesus?

• Unsa ang inyong bation kon kamo mitabang og napulo ka mga tawo ug usa lamang ang mibalik aron sa pagpasalamat kaninyo?

• Unsa nga mga butang ang atong angayan nga pasalamatan sa Langitnong Amahan? Basaha o ipabasa sa usa ka bata ang Doktrina ug mga Pakigsaad 59:7. Ngano nga mahinungdanon ang pagpasalamat sa Langitnong Amahan sa piho nga panalangin nga atong nadawat?

• Unsaon nato sa paghatag sa atong pasalamat sa Langitnong Amahan?

Hatagi ang matag bata og usa sa mga kard nga imong giandam. Dapita ang mga bata sa pagsulti sa pila ka mga butang nga angay nilang pasalamatan ngadto sa Langitnong Amahan. Ikaw mahimong mohimo og katingbanan sa ilang mga tubag diha sa pisara.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa leksyon o ingon nga usa ka pagribyu, katingbanan, o hagit.

1. Tabangi ang mga bata sa pagsag-ulo sa Doktrina ug mga Pakigsaad 59:7. Ipasulat nila kining kasulatan diha sa luyo sa ilang mga kard nga “Hinumdumi ang Pagpasalamat sa Langitnong Amahan”, ug awhaga sila sa pagbutang niini nga kard sa dapit diin ilang makita kini matag adlaw.

2. Isulat ang Pasalamat diha sa pisara. Tuguti ang mga bata sa paghingalan og mga butang nga sila mapasaiamaton nga nagsugod sa matag letra niini nga pulong. Tabangi sila nga makaamgo nga kita nagsalig sa Ginoo sa tanan nga ania nato.

3. Paghimo og diagram nga susama sa mosunod diha sa pisara:

   Pasalamat

   Pagsulti

   • Mga ginikanan

   • Mga higala

   • Pagkaon

   • Panapot

   Ipakita

   • Pagtuman sa mga sugo

   • Pag-alagad sa Uban

   • Pag-ampo

   Tuguti ang mga bata sa paghingalan sa pihong mga butang nga sila makasulti sa Langitnong Amahan og “salamat”. Ilista kini ubos sa Pagsulti. Dayon tuguti sila sa paghunahuna og mga paagi nga sila makapakita niya sa ilang pasalamat mahitungod niining mga panalangin. Ilista kini ubos sa Ipakita. Hatagi og gibug-aton ang kamahinungdanon sa pagsulti ug sa pagpakita sa pasalamat.

4. Ipakita ang mga hulagway sa mga matahum nga mga talan-awon ug ihalas nga mga mananap. Ribyuha ang Paglalang ug tabangi ang mga bata sa pagsabut kon unsa kita ka angay nga magpasalamat sa Langitnong Amahan ug ni Jesus alang sa yuta ug alang sa tanan nga ilang gilalang alang nato.

5. Hatagi ang matag bata sa usa ka piraso nga papel ug usa ka lapis ug pasulata sila og usa ka sulat-pasalamat alang sa usa ka tawo, sama sa usa ka ginikanan, usa ka higala, usa ka silingan, usa ka magtutudlo, sa obispo, ug uban pa. Awhaga ang mga bata sa paghatud sa mga sulat, o pagtanyag sa paghatud niini kon gikinahanglan.

6. Basaha ang Mosiah 2:19–24 ug hisguti kon unsa ang gisulti ni Haring Benjamin. Tabangi ang mga bata sa pagsabut nga kita dili gayud makahimo sa pagbayad sa Langitnong Amahan sa tanang iyang gibuhat alang nato; siya may katungod sa tanang pasalamat nga atong mahimo nga ihatag kaniya.

Panapos

Pagpamatuod

Ipadayag ang pasalamat nga imong gibati ngadto sa Langitnong Amahan ug ni Jesus. Ingon man ipadayag ang imong pasalamat ngadto sa mga bata alang sa kahigayunan nga mahimong ilang magtutudlo ug sa pagtabang nila nga makat-on sa ebanghelyo ni Jesukristo.

Gisugyot nga Basahonon sa Panimalay

Isugyot nga ang mga bata magtuon sa Lucas 17:12–19 sa panimalay ingon nga usa ka pagribyu niini nga leksyon.

Pagdapit og usa ka bata nga mohatag sa panapos nga pag-ampo.