Ang Gamay nga Salapi sa Biyuda

Katuyoan

Aron sa pag-awhag sa matag bata sa pagbayad og usa ka matinuoron nga ikapulo ug sa ubang mga halad.

Pagpangandam

Sa mainampoon nga paagi pagtuon sa Marcos 12:41–44, 3 Nephi 24:10, ug Doktrina ug mga Pakigsaad 119:4. Dayon pagtuon sa leksyon ug paghukom unsaon nimo sa pagtudlo sa mga bata sa mga asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Dugang nga mga basahonon: Lucas 21:1–4 ug Doktrina ug mga Pakigsaad 64:23.
Pagpili og mga pangutana sa panaghisgutan ug mga kalihokan sa pagpalambo nga makapaapil sa mga bata ug labing makatabang nila sa pagkab-ot sa katuyoan niini nga leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Napulo ka mga sinsilyo (o pagdibuho og napulo ka mga lingin diha sa pisara nga nagrepresentar nga mga sinsilyo).
3. Papel ug mga lapis alang sa matag bata.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Pagpakita og napulo ka mga sinsilyo ngadto sa klase.

Pang-atensyon nga Kalihokan

Kinsa ang gustong makaangkon niining mga sinsilyo?
Kon ako mohatag kaninyo niining tanang mga sinsilyo, andam ba kamo nga mouli kanako og usa? Ngano man? Kamo ba andam nga mouli og duha o tulo o bisan ang tanan niini?

Ipasabut nga ang Langitnong Amahan mimando kanato sa pagbayad og ikapulo, diin paghatag og balik ngadto kaniya sa ikanapulo sa bisan unsa nga atong kinitaan. Siya usab mihangyo kanato sa paghatag sa ubang mga hinabang, sama sa mga halad sa pagpuasa ug mga hinabang ngadto sa pundo sa misyonaryo, aron sa pagpadayon sa iyang buhat dinhi sa yuta.

Pahinumdumi ang mga bata nga ang tanang butang dinhi sa yuta gilalang sa Langitnong Amahan ug ni Jesukristo. Ang Langitnong Amahan mipanalangin kanato sa atong mga lawas ug sa atong mga hunahuna aron kita makabuhat ug makahunahuna. Ang atong tanan nga kinitaan o nadawat dinhi sa yuta gasa gikan kaniya. Ang Langitnong Amahan buot nga kita mopakita og pasalamat, hugot nga pagtuo ug pagkamasulundon pinaagi sa pagbayad og ikapulo ug paghatag sa ubang mga halad ngadto sa Simbahan.

Asoy sa Kasulatan

Itudlo ang sugilanon sa gamay nga salapi sa biyuda (Marcos 12:41–44). (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Ipasabut nga ang Langitnong Amahan ug si Jesus sa kanunay nagmando sa mga katawhan sa pagbayad og ikapulo ug usab mihangyo nila sa paghimo og ubang hinabang aron sa pagtabang sa pagtagana sa mga panginahanglan sa Simbahan.

Mga Pangutana sa Panaghisgutan ug Paggamit

Tun-i ang mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

Unsa ang gibutang sa dato nga tawo sa tipiganan sa bahandi sa simbahan? (Marcos 12:41.) Unsa ang gibutang sa biyuda ngadto sa tipiganan sa bahandi? (Marcos 12:42. Ipasabut nga ang diyutay nga salapi gamay gayud kaayo nga kantidad sa salapi.) Ngano nga si Jesus labaw nga nalipay uban sa halad sa biyuda kaysa sa dato nga tawo? (Marcos 12:43–44.)
Pila ang gisugo sa Langitnong Amahan nato ibayad sa ikapulo? (D&P 119:4. Ipasabut nga ang “tubo” nagpasabut sa bisan unsa nga atong kita. Ginamitan sa papel ug mga lapis, ipakita sa mga bata unsaon sa pagsulbad sa mga kantidad sa ikapulo.) Unsa ang gipasabut sa pagbayad sa matinuoron nga ikapulo?
Pila ang gisugo sa Langitnong Amahan nga atong bayaran sa mga halad sa pagpuasa? Pila ang iyang gisugo nga atong ibayad ngadto sa pundo sa misyonaryo? Tabangi ang mga bata nga makasabut nga, dili sama sa piho nga kantidad sa ikapulo nga kita gisugo nga atong ibayad, kita ang maghukom pila ang atong iamot ngadto sa mga halad sa puasa ug sa pundo sa misyonaryo basi sa unsay anaa nato ug unsa ang atong panginahanglan. Ang Langitnong Amahan nagsugo lamang nga kita magmanggihatagon, tungod kay kon kita labaw nga mohatag, kita labaw nga nagpakita nga kita mipasalig sa pagbuhat sa buluhaton sa Langitnong Amahan.
Unsa ang laing paagi nga kita makatabang sa pagpadayon sa buluhaton sa Langitnong Amahan? (Exodo 25:1–8; D&P 124:26–27.) Ipasabut nga ang mga sakop sa tanang mga panahon gisugo sa pag-amot ngadto sa pagtukod og mga templo. Karon ang mga templo gipangtukod sa tibuok kalibutan, ug kita mahimong makadawat og daghang mga panalangin pinaagi sa pagtabang kon kita anaa sa usa ka distrito diin ang usa ka bag-o nga templo gitukod.
Ngano nga ang Ginoo mimando nato sa pagbayad og ikapulo? Unsa nga mga panalangin ang atong madawat sa panahon nga kita nagbayad og hingpit nga ikapulo? (3 Nephi 24:10.) Unsa ang gipasabut sa pagbukas sa mga bintana sa langit alang nato? Unsa nga mga matang sa mga panalangin ang atong madawat sa panahon nga kita nagbayad sa ubang mga halad?

Hisguti ang mosunod nga pamahayag gikan ni Presidente Spencer W. Kimball, ikanapulog duha nga Presidente sa Simbahan:

“Ang Ginoo misaad nga siya mobukas sa mga bintana sa langit sa panahon nga kita magmasulundon ngadto sa iyang mga balaod. Siya makahimo sa paghatag nato og labaw ka maayo nga mga suhol, siya makahimo sa paghatag nato og labaw nga paghukom sa paggasto sa atong salapi. Siya makahatag nato og labaw ka maayo nga panglawas, siya makahatag og labaw nga pagsabut aron kita makakuha og labaw ka maayo nga mga posisyon. Siya makatabang nato aron kita makabuhat sa mga butang nga buot natong buhaton” (The Teachings of Spencer W. Kimball, p. 212).

Hatagi og gibug-aton nga ang labing dako nga panalangin nga atong madawat gikan sa pagbayad sa ikapulo ug ubang mga halad mao ang espirituhanon. Ang atong hugot nga pagtuo molambo nga labaw kalig-on sa matag higayon nga kita magpili sa pagsunod sa balaod sa ikapulo ug sa pagkamanggihatagon sa atong mga amot ngadto sa mga halad sa pagpuasa ug sa pundo sa misyonaryo.

Mga Pangutana sa Panaghisgutan ug Paggamit

Sa unsang paagi nga kamo o inyong kaila napanalanginan pinaagi sa pagbayad sa ikapulo ug ubang mga halad? Ipakigbahin sa mga bata ang ehemplo gikan sa imong kaugalingon nga kasinatian ug dapita ang mga bata sa pagpakigbahin og mga kasinatian diin sila napanalanginan tungod sa ilang mga halad.
Kanus-a kita angay nga mobayad sa atong ikapulo? (Kita mahimong mobayad sa ikapulo bisan unsa nga panahon sulod sa tuig, apan kini labing maayo inig dawat nato sa bisan unsa nga kinitaan.) Ngadto kang kinsa nato ihatag ang atong ikapulo ug ubang mga halad? (Ngadto sa obispo o sa iyang mga magtatambag. Ang obispo mopadala sa ikapulo nga salapi ngadto sa mga punoang buhatan sa Simbahan, diin ang mga pangulo sa Simbahan moila unsa ang labing maayo nga paggasto niini sa pagpadayon sa buluhaton sa Ginoo. Ang mga halad sa puasa ug mga pundo sa misyonaryo gamiton diha niana nga dapit diin kini nakolekta; ang kapin nga mga pundo ipadala sa punoang buhatan sa Simbahan.)
Giunsa paggamit ang atong mga ikapulo? (Tan-awa sa kalihokan sa pagpalambo 2.) Giunsa paggamit ang mga halad sa puasa? (Ang mga halad sa puasa nag-abag sa programa sa kaayohan sa Simbahan.)
Unsa ang husay sa ikapulo? Usa ka tigum nga atong himoon makausa matag tuig uban sa obispo. Kita motan-aw og balik sa mga talaan sa ikapulo ug ubang mga amot nga atong gibayad ug magsulti niya kon kita hingpit ba nga tigbayad sa ikapulo. Kita mahimong mopahayag nga kita hingpit nga tigbayad sa ikapulo kon kita mibayad og ikapulo nga bahin sa tanan nato nga kinitaan ngadto sa Ginoo.)
Ngano sa inyong hunahuna nga mahinungdanon alang nato nga mobayad sa ikapulo nga kinasingkasing? (Moroni 7:6–8.) Kon ang atong mga kita gamay ra, kita ba gipaabut nga mobayad sa ikapulo? Ngano?

Hisguti ang mosunod nga pamahayag ni Presidente Spencer W. Kimball: “Adunay mga tawo kinsa mag-ingon nga sila dili makahimo sa pagbayad sa ikapulo tungod kay ang ilang mga kinitaan diyutay ra…. Walay bisan kinsa nga hilabihan ka kabus sa pagbayad sa ikapulo” (The Teachings of Spencer W. Kimball, p. 212).

Mga Pangutana sa Panaghisgutan ug Paggamit

Ngano nga mahinungdanon man ang pagbayad sa ubang mga halad? Sa unsa nga paaagi kita makagamit sa amot sa biyuda nga usa ka ehemplo sa paghatag og amot sa Simbahan? Tabangi ang mga bata nga makasabut nga sa umaabot kita mahimong pangayoan sa paghatag sa tanan nga ania kanato ngadto sa Simbahan. Apan sa pagkakaron kita gipangayoan lamang kon unsa ang atong maabut sa pag-amot ug sa gihapon makakab-ot sa atong kaugalingon nga mga panginahanglan.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsang higayon sulod sa leksyon o ingon nga usa pagribyu, katingbanan, o hagit.

Ginamit ang usa ka mini nga salapi (ikaw mahimong maghimo sa imong kaugalingon), tuguti ang mga bata sa pagpakaaron-ingnon nga usa ka banay ug maghimo og usa ka badyet alang sa kantidad sa salapi nga imong ihatag kanila. Tuguti sila sa pagbadyet alang sa pagkaon, abang, mga gamit, saput, ug kalingawan. Dayon sultihi sila sa pagdugang sa ikapulo ug ubang mga halad nganha sa ilang badyet pinaagi sa pagbutang niini sa unahan sa ilang listahan. Ipasabut sa mga bata nga kita kinahanglang mobayad kanunay sa atong ikapulo og una tungod kay kana iya sa Ginoo nga ikanapulo.
Lakaw libot sa lawak ug hangyoa ang matag bata sa paghingalan og usa ka piho nga paagi nga ang iyang ikapulo gigamit. Paghatag og mga sugyot gikan sa mosunod nga listahan kon gikinahanglan:

Itukod og mga balay-tigumanan, mga templo, mga seminaryo ug mga institute sa relihiyon, mga sentro sa pagbansay sa misyonaryo, ug mga sentro sa family history.

Ibayad alang sa mga kalihokan sa ward ug stake ug mga manwal sa pagtudlo ug mga kagamitan.

Ibayad alang sa pag-atiman sa balay-tigumanan ug mga gamit. Ibayad ang mga galastoan sa panaw ug mga kagamitan alang sa mga misyonaryo.

Ibayad sa mga galastoan sa panaw ug uban pa alang sa mga General Authority.

Ipalit og mga kompyuter nga magamit sa templo ug sa buhat sa family history.

Itabang sa pagmantala sa mga magasin sa Simbahan.

Ibayad alang sa satellite nga mga pagsibya sa Simbahan.

Ibayad alang sa paghubad ug pagmantala sa mga kasulatan.
Hatagi ang matag bata og usa ka piraso sa papel ug usa ka lapis ug tuguti sila sa paglakaw ngadto sa usa ka bintana o ubang mga dapit diin sila mahimong motan-aw sa gawas. Hangyoa sila sa pagsulat sa hilom sa labing daghang mga butang nga ilang makita sulod sa pipila ka mga minuto. Human ang mga bata nakabalik sa ilang mga lingkuran, hangyoa sila sa paghingalan sa mga butang nga ilang nakita. Ipasabut nga ang Langitnong Amahan mihatag nato sa tanang butang nga ania kanato, ug ang pagbayad sa ikapulo ug mga halad usa ka paagi nga kita makapakita sa atong gugma ug pasalamat kaniya.
Isaysay ang mosunod nga sugilanon ni Presidente Ezra Taft Benson, ug hisguti ang hugot nga pagtuo nga gikinahanglan alang sa pagbayad sa ikapulo ug ang mga panalangin nga moabut gikan sa pagkamasulondon sa balaod:

“Sa usa ka higayon sa dihang ako usa pa ka tin-idyer, ako nakadungog nila ni Papa ug Mama nga nagsultihanay mahitungod sa ilang mga panalapi ingon nga pagpangandam sa husay sa ikapulo pagkasunod nga adlaw. Si Papa [utangan] og biente-singko ka mga dolyares sa bangko, diin gitagal niana nga semana. Sa husay sa ilang ikapulo, siya utangan pa og dugang biente-singko ka mga dolyares. Siya adunay usa ka hay derrick [butang nga gamiton sa pang-aswat og dagami ngadto sa usa ka pundok sa dagami] nga iyang hinimo. Siya…misulay sa pagbaligya niini, apan wala gayud magmalampuson.

“Unsa ang angay nilang buhaton—[mobayad] sa bangko, mobayad sa ilang ikapulo sa ulahi, o bayaran ang ilang ikapulo ug maglaum nga sila makahimo sa [pagbayad sa bangko] sulod lamang sa pipila ka mga adlaw? Human hisguti ang maong butang, ug ako sigurado nga sa pag-ampo og dungan sa wala pa sila mipahulay, si Papa mihukom sa pagkasunod adlaw pag-adto ngadto sa husay sa ikapulo ug pagbayad sa biente-singko ka mga dolyares, nga maoy makahimo niya nga hingpit nga tigbayad sa ikapulo. Sa dihang siya mipauli sakay sa kabayo, ang usa sa iyang silingan mipahunong kaniya ug miingon, ‘George, ako nakasabut nga ikaw adunay usa ka hay derrick nga baligya. Pilay imong pangayoon alang niadto?’

“Si Papa miingon, ‘Biente-singko ka mga dolyares.’ Ang silingan miingon, ‘ako wala pa makakita niini, apan sa kasayuran sa paagi sa imong paghimo, ako sigurado nga kini balor og biente-singko ka mga dolyares. Kadiyot lang ug ako moadto sa balay ug maghimo og tseke alang niini. Ako nagkinahanglan niini. Kini ang usa ka leksyon nga wala nako kalimti” (The Teachings of Ezra Taft Benson, pp. 471–72).
Isaysay ang mosunod nga sugilanon:

“Sa dihang ako mga lima o unom ka tuig ang panuigon, ako milingkod sa talad kan-anan uban sa akong dakong pamilya ug naminaw samtang ang uban naghisgot sa ikapulo. Sila miingon nako nga ang ikapulo mao ang ikanapulo sa tanan nato nga kinitaan ug nga kini ibayad ngadto sa Ginoo niadtong kinsa naghigugma Kaniya.

“Pagkahuman sa panihapon ako mipagawas sa gamay nga kantidad sa kwarta nga akong gitigum ug mikwenta pila ang akong utang sa Ginoo sa ikapulo. Ako sa dayon miadto sa bugtong nga lawak sa balay nga adunay trangka sa pultahan—ang banyo—ug didto miiuhod tupad sa bathtub. Gikuptan ang tulo o upat ka mga sinsilyo sa akong gipataas nga mga kamot, ako mihangyo sa Ginoo nga dawaton kini—masaligon nga siya modawat gayud. Ako mihangyo sa Ginoo sulod sa pila ka gutlo, apan ang kwarta nagpabilin nga anaa sa akong mga kamot. Walay laing bata nga gibati og labaw nga pagsalikway kay kanako. Ang Ginoo midawat sa ikapulo gikan sa akong mga ginikanan ug gikan sa akong mga magulang nga lalaki. Nganong wala man ang gikan kanako? Sa dihang ako mibarug gikan sa akong pagluhod, ako gibati pag-ayo og pagka-dili takus nga ako dili makahimo sa pagsulti kang bisan kinsa og unsa ang nahitabo. Bugtong ang Ginoo lamang ang nasayud.

“Human sa pila ka mga adlaw didto sa Primarya ang magtutudlo nag-ingon nga siya mibati mosulti mahitungod sa usa ka butang nga wala sa ieksyon. Ako gibati og katingala sa dihang siya mitudlo namo kon unsaon sa pagbayad sa ikapulo. Apan ang akong nakat-unan mas labaw pang kamahinungdanon kay sa unsaon sa pagbayad sa ikapulo. Ako nakat-on nga ang Ginoo maminaw ug motubag sa akong pag-ampo, nga siya naghigugma kanako, ug nga ako mahinungdanon ngadto kaniya” (Ariel Ricks, “Coins for the Lord,” Ensign, Dis. 1990, p. 47).

Panapos

Pagpamatuod ug hagit

Ipamatuod ang kamahinungdanon sa pagbayad sa ikapulo. Ipaambit ang imong pagbati mahitungod sa kahigayunan nga atong naangkon aron sa pagbayad sa atong ikapulo ingon nga paagi sa pagpadayag sa atong pasalamat sa Langitnong Amahan ug ni Jesukristo. Pagpaambit, o pagdapit og laing sakop sa pagpaambit, og bisan unsa nga kasinatian nga imong naangkon sa dihang ang imong hugot nga pagtuo sa Langitnong Amahan ug ni Jesus milambo sa dihang ikaw mibayad sa imong ikapulo.

Ihatag sa mga bata ang tagsa ka resibo sa amot ug sobre ug hagita sila sa pagbayad og matinud-anon nga ikapulo sa matag dawat nila og bisan unsa nga kinitaan.

Gisugyot nga Basahonon sa Panimalay

Isugyot nga ang mga bata magtuon sa Marcos 12:41–44 sa panimalay ingon nga usa ka balik pagtuon niini nga leksyon.

Pagdapit og usa ka bata nga mohatag sa panapos nga pag-ampo.