Si Jesukristo Mipabangon kang Lazaro gikan sa mga Patay

Katuyoan

Aron sa pagtabang sa mga bata sa pagsabut nga tungod kay si Jesukristo mao ang Anak sa Dios, siya adunay gahum ibabaw sa kamatayon.

Pagpangandam

Sa mainampoon nga paagi pagtuon sa Juan 11:1–46. Dayon pagtuon sa leksyon ug paghukom sa unsaon nimo pagtudlo sa mga bata ang mga asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Ribyuha ang Lucas 7:11–17; 8:41–42, 49–56.
Pilia ang mga pangutana sa panaghisgutan ug paggamit og mga kalihokan sa pagpalambo nga makapaapil sa mga bata ug labing makatabang nila sa pagkab-ot sa katuyoan niini nga leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Usa ka bag-ong pinutol nga sanga o dahon ug usa ka laya (o usa ka hulagway sa matag usa niini).
3. Mga hulagway 7-27, si Jesus nga Mipabangon kang Lazaro gikan sa mga Patay (Pakete sa mga Hulagway sa Ebanghelyo 222; 62148), ug 7-18, Si Jesus Nagpanalangin sa kang Jairus nga Anak nga Babaye (Pakete sa mga Huiagway sa Ebanghelyo 215; 62231).

Gisugyot nga Kalamboan sa Leksyon

Dapita ang usa ka bata nga mohatag sa pagsugod nga pag-ampo.

Pang-atensyon nga Kalihokan

Ipakita sa mga bata ang bag-ong pinutol nga sanga o dahon ug sa laya Hangyoa ang mga bata sa pagsulti mahitungod sa kalainan tali sa duha.

Pang-atensyon nga Kalihokan

Aduna ba kitay mabuhat aron sa paghimo sa usa ka laya nga sanga nga susama tan-awon sa bag-ong pinutol nga sanga?
Karon nga ang bag-ong pinutol nga sanga naputol na gikan sa tanom, unsa ang mahitabo niini?
Kinsa ang adunay gahum sa pagpabalik sa kinabuhi ngadto sa usa ka butang nga patay na?

Ipasabut nga si Jesus adunay gahum ibabaw sa kamatayon. Siya midala og pipila ka mga tawo kinsa namatay ngadto sa kinabuhi.

Asoy sa Kasulatan

Ribyuha sa makadiyot ang mga asoy sa pagpabangon ni Jesus sa anak sa biyuda sa Nain (Lucas 7:11–17) ug sa babaye nga anak ni Jairo (Lucas 8:41–42, 49–56). Dayon itudlo sa mga bata ang asoy sa pagpabangon ni Jesus kang Lazarus gikan sa mga patay sama sa makita sa Juan 11:1–46. Ipakita ang mga hulagway sa tukmang mga panahon. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Ipasabut nga sa dihang si Jesus mipabangon og mga tawo gikan sa mga patay, siya mihimo og mga milagro nga nagpamatuod nga siya ang Anak sa Dios ug adunay gahum ibabaw sa kamatayon. Ipasabut sa mga bata nga tungod sa usa ka naandan sa mga Judeo diin ang mga silingan ug mga higala nagbangutan uban sa banay sa sulod sa pipila ka mga adlaw human sa usa ka kamatayon, daghang mga tawo nga uban nila ni Martha ug Maria human si Lazarus namatay ang nakasaksi niini nga milagro nga gihimo ni Jesus.

Mga Pangutana sa Panaghisgutan ug Paggamit

Tun-i ang mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila sa pag-angkon og mga pagpasabut sa mga kasulatan.

Mga Pangutana sa Panaghisgutan ug Paggamit

Sa dihang si Jesus nakadawat og balita nga si Lazaro nasakit, unsa kadugay si Jesus nga naghulat sa wala pa siya moadto sa Bethany? (Juan 11:6.) Unsa kadugay nga si Lazaro diha sa lubnganan sa dihang si Jesus miabut? (Juan 11:17.) Ngano sa inyong hunahuna nga si Jesus mihulat og dugay usa pa miadto? (Aron ang tanan masayud sa walay pangutana nga si Lazaro namatay, ug ang pagpabangon kaniya mahimong usa ka labaw ka lig-on nga saksi sa sagrado nga gahum ug misyon ni Jesus [Juan 11:4, 15].)
Unsa ang gisulti nila ni Martha ug ni Maria kang Jesus sa dihang siya miabut? (Juan 11:21–22, 32.) Unsa ang gihunahuna ni Martha sa dihang si Jesus miingon kaniya nga si Lazaro mobangon pag-usab? (Juan 11:23–24.) Unsa ang pagpamatuod ni Martha bisan sa wala pa siya makakita sa iyang igsoon nga mibangon gikan sa mga patay? (Juan 11:27.)
Ngano nga si Jesus nag-ampo ngadto sa Langitnong Amahan sa wala pa niya gipabangon si Lazaro? (Juan 11:41–42.) Unsa ang buot ni Jesus nga masabtan sa mga tawo? (Nga siya gipadala sa Langitnong Amahan.)
Unsa ang gisulti ni Jesus ngadto kang Lazaro? (Juan 11:43.) Unsa ang nahitabo? Unsa ang gisul-ob ni Lazaro? (Juan 11:44.)
Unsa sa inyong hunahuna ang gibati nila ni Maria, Martha, ug sa ubang katawhan sa dihang ilang nasaksihan kining milagro? Unsa sa inyong hunahuna ang inyong bation kon kamo tua didto? Unsa ang gibuhat sa katawhan human nila nakita ang milagro? (Juan 1:45–46.) Sa unsa nga paagi nga ang pagkakita sa paggawas ni Lazaro gikan sa lubnganan magkabig sa inyong pagtuo kang Jesus?
Ngano nga si Jesus nakahimo sa pagpabangon kang Lazaro gikan sa mga patay? Unsa ang inyong bation sa pagkasayud nga si Jesus adunay gahum sa pagpabangon og usa ka tawo gikan sa mga patay? Sa unsa nga paagi nga kining milagro nakatabang nato nga masayud nga si Jesus mao ang Anak sa Dios? (Juan 11:4.)
Unsa ang gibuhat ni Jesus sa kaulahian nga nagpamatuod sa iyang gahum batok sa kamatayon? (Siya nabanhaw. Tabangi ang mga bata nga makasabut nga sa dihang si Lazaro nabanhaw gikan sa mga patay, siya mortal pa gihapon ug mahimo pang mamatay pag-usab. Kon ang mga tawo mabanhaw, sila dili na mamatay pag-usab. Sila mabuhi sa hangtud.)
Unsa ang gipasabut ni Jesus sa dihang siya miingon nga siya mao “ang pagkabanhaw ug ang kinabuhi”? (Juan 11:25.) Unsa ang buot ipasabut niini alang nato?

Ipasabut nga si Jesus dili lamang adunay gahum sa pagpabalik sa usa ka tawo ngadto sa mortal nga kinabuhi, sama sa iyang gibuhat kang Lazaro, apan siya adunay labaw nga mahinungdanon nga gahum sa pagpabangon sa tanan gikan sa mga patay ngadto sa pagkaimortal. Ang tanang tawo nga natawo sa kalibutan mahimong mabanhaw. Ingon man, pinaagi sa iyang pagtubos si Jesus adunay gahum sa paghatag og kinabuhing dayon niadtong kinsa motuman ug mosunod kaniya. Siya ang tinubdan sa pagkabanhaw ug sa kinabuhing dayon alang sa matag usa kanato.

Hagit

Hagita ang mga bata sa pagsaysay sa sugilanon ni Jesus nga mipabangon kang Lazaro gikan sa mga patay ngadto sa lain sa moabut nga semana.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa panahon sa leksyon o ingon nga usa ka pagribyu, katingbanan, o hagit.

Hangyoa ang mga bata sa pagpakaaron-ingnon nga si Maria, si Martha, si Lazaro, ug ang mga Judeo kinsa anaa sa dihang si Jesus mipabangon kang Lazaro gikan sa mga patay. Hangyoa ang laing bata sa paghisgot sa mga katawhan aron pagsusi kon unsa ang nahitabo, unsa ang ilang nasaksihan, unsa ang ilang gibati sa dihang ilang nakita nga si Lazaro nga migawas gikan sa langob, ug kon unsa ang ilang gibati mahitungod kang Jesus.
Pag-andam og mga piraso sa papel nga naghulagway sa mga panghitabo, sama sa mosunod, kon ang usa ka tawo nakasaksi nga si Jesukristo mao ang Anak sa Dios. Pag-andam og laing han-ay sa mga papel nga adunay mga kasulatan nga naghulagway niana nga panghitabo:

Panghitabo: Si Jesus natawo.

Kasulatan: Usa ka anghel nag-ingon, “Nganha kaninyo natawo niini nga adlaw sa siyudad ni David ang usa ka Manluluwas, kinsa mao si Kristo ang Ginoo” (Lucas 2:11).

Panghitabo: Si Jesus gibunyagan.

Kasulatan: Adunay usa ka tingog gikan sa langit nga nag-ingon, “Ikaw ang akong Hinigugmang Anak”; ang Espiritu sa Dios mikunsad sama sa usa ka pati (Marcos 1:9–11).

Panghitabo: Si Jesus milakaw sa ibabaw sa tubig.

Kasulatan: Ang mga tinun-an ni Jesus diha sa barko miingon, “Sa kamatuoran ikaw mao ang Anak sa Dios” (Mateo 14:25–27, 32–33).

Panghitabo: Si Jesus nag-ayo og usa ka lalaki nga natawo nga buta.

Kasulatan: “Ug [ang lalaki] miingon, Ginoo, ako mituo nga [ikaw ang Anak sa Dios]. Ug siya misimba kaniya” (Juan 9:32, 35–38).

Panghitabo: Si Pedro mipamatuod kang Kristo.

Kasulatan: Sa dihang si Jesus nangutana sa iyang tinun-an kinsa siya sa ilang hunahuna, si Pedro miingon, “Ikaw ang Kristo, ang Anak sa buhi nga Dios” (Mateo 16:13–16).

Panghitabo: Si Joseph Smith midawat sa iyang unang panan-awon.

Kasulatan: Ang Langitnong Amahan miingon, “Kini ang akong Hinigugmang Anak. Paminaw kaniya!” (Joseph Smith—Kasaysayan 1:17).

Ibutang ang mga papel nga nagkulob sa salog o sa lamesa sa dili tinuyo nga pagkahimutang. Paduola ang usa ka bata ug magbali og duha ka mga papel ug mosulay sa pagparespares sa mga panghitabo sa tukma nga asoy sa kasulatan. Kon ang duha ka papel wala magkauban, baliha pagbalik ang mga papel ug tuguti ang laing bata sa paghimo sa ingon. Kon ang tanan nga mga papel napares na nga wala makasulay ang tanang mga bata, dulaa ang dula pag-usab.
Tabangi ang mga bata sa pagsag-ulo sa Juan 11:25.

Panapos

Pagpamatuod

Ipakigbahin ang imong pamatuod nga si Jesukristo mao ang Anak sa Dios ug adunay gahum batok sa kamatayon. Ipadayag ang imong gugma alang sa Manluluwas ug ang imong pasalamat ngadto kaniya alang sa iyang pagtubos, nga makapahimo nato nga mabanhaw ug makaangkon og kinabuhing dayon.

Gisugyot nga Basahonon sa Panimalay

Isugyot nga ang mga bata magtuon sa Juan 11:39–46 sa panimalay ingon nga usa ka pagribyu niini nga leksyon.

Pagdapit og usa ka bata nga mohatag sa panapos nga pag-ampo.