Leksyon 3

Si Juan Bautista Miandam sa Agianan alang kang Jesukristo

Katuyoan

Aron sa pagtabang sa mga bata nga makasabut nga sila gi-orden nang daan nga mobuhat og usa ka mahinungdanon nga bahin sa buhat sa Langitnong Amahan dinhi sa yuta.

Pagpangandam

1. Sa mainampoon nga paagi pagtuon sa Lucas 1:5–25, 57–80; Mateo 3:1–6; ug Doktrina ug mga Pakigsaad 84:27–28. Dayon pagtuon sa leksyon ug paghukom unsaon nimo pagtudlo ang asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)

2. Pilia ang mga pangutana sa panaghisgutan ug mga kalihokan sa pagpalambo nga maoy makapaapil sa mga bata ug labing makatabang kanila sa pagkab-ot sa katuyoan sa leksyon.

3. Mga materyal nga gikinahanglan:

   1. Usa ka Biblia o usa ka Bag-ong Tugon alang sa matag bata.

   2. Usa ka papel uban ang mga pulong Ako usa ka pinili nga espiritu nga gisulat niini alang sa matag bata.

   3. Hulagway 7-2, Si Juan Nagsangyaw didto sa Kamingawan (Pakete sa mga Hulagway sa Ebanghelyo 207; 62132).

Gisugyot nga Kalamboan sa Leksyon

Sa dili pa ang klase hangyoa sa tago ang usa sa mga bata sa paghatag sa mga papel nga imong giandam ngadto sa ubang mga bata human dayon sa pagsugod nga pag-ampo.

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Ipaapud-apod sa bata ang mga papel ngadto sa mga sakop sa klase. Ipasabut nga sa wala pa magsugod ang klase ikaw mipili og usa ka bata nga moapudapod sa mga papel sa paghimo niini nga pag-alagad. Ang pagkaorden nang daan ingon niini. (Isulat ang Pag-orden nang daan diha sa pisara.) Ang Langitnong Amahan miorden nang daan nato didto sa kinabuhi nga wala pa dinhi sa yuta sa dihang siya mipili kanato sa pagbuhat og linain nga buhat alang kaniya dinhi sa yuta. Ingon nga gi-orden nang daan wala nagpasabut nga kita kinahanglan gayud nga mohimo sa buhat; kita sa gihapon adunay kagawasan o kabubut-on apan ang kahigayunan atua kon kita mopili. Ipasabut nga niini nga leksyon ang mga bata makakat-on mahitungod kang Juan Bautista, kinsa giorden nang daan o gipili sa pagpatuman sa mahinungdanon nga misyon dinhi sa yuta. Ipabasa og kusog sa mga bata ang mga pulong diha sa ilang mga papel. Sultihi sila nga ang mga kasulatan nga ilang tun-an nagpasabut nga si Juan Bautista usa ka pinili nga espiritu, gipili didto sa kinabuhi nga wala pa dinhi sayuta aron sa pag-andam sa dalan alang ni Jesukristo.

Asoy sa Kasulatan

Itudlo ang sugilanon sa pagkatawo, pagkabata ug misyon ni Juan Bautista, gikan sa mga kasulatan nga gilista diha sa seksyon sa “Pagpangandam”.Ipakita ang hulagway ni Juan nga Nagsangyaw didto sa Kamingawan sa tukma nga panahon. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Tabangi ang mga bata nga makasabut nga si Juan Bautista gi-orden nang daan alang sa pagandam sa mga katawhan sa pagpaminaw ngadto kang Jesukristo.

Mga Pangutana sa Panaghisgutan ug Paggamit

Tun-i ang mosunod nga mga pangutana ug ang mga pakisayran sa kasulatan samtang ikaw mag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

• Unsa ang atong nahibaloan bahin sa mga ginikanan ni Juan Bautista? (Lucas 1:5–7.)

• Ngano nga si Zacarias naamang nga siya dili na makahimo sa pagsulti? (Lucas 1:18–20.)

• Ngano nga sila si Zacarias ug Elisabet mihingalan sa ilang anak nga lalaki og Juan? (Lucas 1:13.)

• Unsa ang atong nahibaloan bahin sa pagkabata ni Juan? (Lucas 1:80; D&P 84:27–28.)

• Unsa ang gi-orden nang daan nga buhaton ni Juan Bautista?(Lucas 1:15–17, 76–77.)

• Giunsa pagtuman ni Juan Bautista sa iyang gi-orden nang daan nga misyon sa pag-andam sa dalan alang ni Jesukristo? (Mateo 3:1–6.)

Ipasabut nga sama kang Juan Bautista nga usa ka pinili nga espiritu alang sa pagtabang pagtukod sa gingharian sa Langitnong Amahan pinaagi sa pag-andam sa agianan alang ni Jesukristo, kita mga pinili nga mga espiritu nga gipili sa pagtabang sa pagtukod sa gingharian sa Langitnong Amahan pinaagi sa pagtabang sa mga katawhan nga masayud mahitungod kang Jesukristo.

Basaha kining kinutlo gikan ni Presidente Ezra Taft Benson: “Kamo pinili nga mga espiritu, daghan kaninyo gitagana hapit 6,000 ka mga tuig aron moanhi niini nga adlaw, niini nga panahon, diin ang mga tintasyon, mga responsibilidad, ug mga kahigayunan hilabihan kaayo” (sa Taho sa Komperensya, Okt. 1977, p. 43; o Ensign, Nob. 1977, p. 30).

Mga Pangutana sa Panaghisgutan ug Paggamit

• Unsa ang inyong gibati nga nasayud nga ang Langitnong Amahan nakaila kaninyo sa tagsatagsa ug mipili kaninyo nga moanhi sa yuta niining panahona?

• Unsa kaha ang pipila ka mga butang nga gi-orden nang daan nga atong buhaton aron sa pagtabang sa pagtukod sa gingharian sa Langitnong Amahan? (Pag-alagad og mga misyon, pagpakita og maayo nga ehemplo pinaagi sa pagtuman sa atong mga pakigsaad, paghupot sa pagkapari, pag-ugmad og matarung nga mga pamilya, pagtuman sa balaang mga tawag sa Simbahan.)

• Unsaon ninyo pagkahibalo kon unsa ang gusto nga ipabuhat ninyo sa Langitnong Amahan dinhi sa yuta? (Pag-ampo mahitungod sa mga paghukom, paminaw sa Espiritu.) Ipasabut nga ang Langitnong Amahan usab mihatag nato og kahigayunan sa pagdawat og patriyarkal nga mga panalangin gikan sa patriyarka sa stake kon kita anaa na sa husto nga pangidaron. Ang patriyarkal nga panalangin sa kasagaran nagtimaan unsa nga mga balaan nga tawag ang atong madawat o unsa ang buot sa Langitnong Amahan nga atong buhaton sa atong mga kinabuhi. Unsaon ninyo pag-andam ang inyong kaugalingon sa pagbuhat sa gusto nga ipabuhat sa Langitnong Amahan kaninyo?

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan sa bisan unsang higayon sa panahon sa leksyon o ingon nga usa ka ribyu, katingbanan, o hagit.

1. Pag-andam og usa ka papel uban ang mosunod nga mga pamahayag diha niini (walay mga tubag) alang sa matag bata, o isulat ang pamahayag diha sa pisara:

   Si Juan Bautista:

   1. Nagpuyo sa .

   2. Magulang og ( ka mga bulan kay ni Jesus.

   3. Nagsul-ob og saput nga hinimo sa ug .

   4. Mikaon og ug .

   5. Miandam sa dalan alang kang .

   Mga tubag: a. kamingawan; b. unom; c. balahibo sa kamelyo, panit; d. dulon, dugos nga lasangnon; e. Jesukristo.

   Ipabasa sa mga bata ang Lucas 1:26–27, 35–36, 76 ug Mateo 3:1, 4 aron masulatan ang mga blangko. (Kon ang mga bata wala masayud unsa ang dulon, ipasabut nga sila dagko nga mga insekto nga molupad.) Tabangi sila nga makahibalo nga bisan og si Juan Bautista mipuyo og yano, ubos nga kinabuhi didto sa kamingawan, siya matinud-anon nga mituman sa iyang misyon ug miandam sa dalan alang kang Jesukristo.

2. Ipabasa sa mga bata ang mosunod nga mga kasulatan aron mahibaloan ang uban kinsa gitawag nang daan alang sa ilang kalibutanon nga mga misyon:

   Jeremias 1:5—Jeremias

   1 Nephi 11:18—Maria, ang inahan ni Jesus (panan-awon nga gihatag ngadto ni Nephi)

   Ether 3:14—Jesukristo

   Doktrina ug mga Pakigsaad 138:53, 55—Joseph Smith ug uban

   Abraham 3:23—Abraham

Panapos

Pagpamatuod

Ipamatuod nga sama kang Juan Bautista nga gi-orden nang daan sa pag-andam sa dalan alang kang Jesukristo ug mahimong usa ka saksi alang kaniya, mao usab ang matag usa kanato nga gitawag nang daan alang sa atong misyon dinhi sa yuta. Ipadayag ang imong mga pagbati mahitungod sa kamahinungdanon sa pagpuyo sa ebanghelyo ug magpakatakus nga mobuhat bisan unsa ang gitawag nang daan sa Langitnong Amahan kanato.

Gisugyot nga Basahonon sa Panimalay

Isugyot nga ang mga bata mobasa sa Lucas1:5–23, 57–80 and Mateo3:1–6 sa panimalay isip usa ka pagribyu niini nga leksyon.

Dapita ang usa ka bata nga mohatag sa panapos nga pag-ampo.