Ang Pagbudhi, Pagdakop, ug Paghusay kang Jesukristo

Katuyoan

Aron sa pagpalig-on sa pasalig sa matag bata nga magmatinuoron sa iyang pagpamatuod kang Jesukristo.

Pagpangandam

Sa mainampoon nga paagi pagtuon sa Mateo 26:14–16, 47–27:31 ug Lucas 22:47–23:25. Dayon pagtuon sa leksyon ug paghukom unsaon nimo pagtudlo ang mga bata sa mga asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Pilia ang mga pangutana sa panaghisgutan ug paggamit ug mga kalihokan sa pagpalambo nga makapaapil sa mga bata ug labing makatabang kanila sa pagkab-ot sa katuyoan niini nga leksyon.
Isulat ang mosunod nga mga pulong ug mga hugpong sa mga pulong sa lahi nga mga kard: Anaksa Dios, Manluluwas, Manunubos, sagrado, hingpit, makagagahum sa tanan, mahigugmaon, Tiglalang, magtutudlo, mananambal, giluwaan, gibudhian, gipasanginlan og bakak, gipakasad-an, gikastigo (gibunalan), gihapak, gihampak (gilatigo), gihigot, gibiaybiay, gikoronahan og mga tun ok, gihukman nga mamatay.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Ipapilit o uban nga mga paagi sa pagpadayag sa mga kard.
3. Mga hulagway 7-31, Ang pagbudhi kang Jesus (Mga Hulagway sa Ebanghelyo 228; 62468), ug 7-32, Ang Paglimud ni Pedro (Mga Hulagway sa Ebanghelyo 229; 62177).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Sagula ang mga kard nga imong giandam ug ibutang kini nga nagkulob diha sa lamesa o sa salog. Ipasabut sa mga bata nga ang pipila niini nga mga kard naghulagway ni Jesus ug ang uban naghulagway kon unsa ang gibuhat ngadto kaniya sa hapit na ang katapusan sa iyang kinabuhi. Tuguti ang mga bata sa pagahin og higayon sa pagpili og usa ka kard, pagbasa niini, ug pagbutang niini sa usa sa duha ka mga hapnig. Sa unang hapnig sila angay nga mobutang sa mga pulong nga naghulagway kang Jesus, ug kanus-a sila angay nga mobutang sa mga pulong nga naghisgot kon unsa ang gibuhat ngadto niya sa hapit na ang katapusan sa iyang kinabuhi.

Ribyuha sa makadiyot ang mga panghitabo nga nahinabo sa Tanaman sa Getsemani ug sultihi ang mga bata nga niini nga leksyon sila makakat-on mahitungod sa mga panghitabo nga nahitabo human si Jesus mag-ampo didto sa Getsemani.

Asoy sa Kasulatan

Itudlo sa mga bata ang asoy sa pagbudhi, pagdakop, ug paghusay ni Jesus (Mateo 26:14–16, 47–27:31 ug Lucas 22:47–23:25). (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,”p. viii.) Hangyoa ang mga bata sa pagpaminaw sa mga pulong nga naghulagway kon unsa ang gibuhat ngadto ni Jesus. Tabangi sila nga makasabut nga si Jesus mahimo untang mogamit sa iyang gahum sa pagpanalipod sa iyang kaugalingon gikan niining mga pang-abuso, apan siya nasayud nga kini kalabut sa kalisdanan nga iyang angay nga sagubangon aron sa pagtuman sa iyang misyon sa yuta ug paghimo sa Pagtubos (tan-awa sa Mosiah 15:5).

Mga Pangutana sa Panaghisgutan ug Paggamit

Pagtuon sa mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan.

Mga Pangutana sa Panaghisgutan ug Paggamit

Kinsa ang nagbudhi kang Jesus? (Mateo 26:14–16.) Giunsa siya ni Hudas sa pagbudhi? (Mateo 26:48.) Unsa ang nahitabo kang Hudas? (Mateo 27:3–5.)
Ngano nga si Jesus mipahunong sa iyang mga Apostoles sa pagpanalipod kaniya? (Mateo 26:51–54; Lucas 22:49–51.) Unsa nga mga leksyon sa inyong hunahuna ang nakat-unan sa iyang mga tinun-an sa dihang si Jesus miayo sa samaran nga dunggan sa lalaki? Ngano sa inyong hunahuna nga ang mga Apostoles midagan ug mibiya kang Jesus? (Mateo 26:56.) Unsa sa inyong hunahuna ang mahimong mahitabo kon ikaw tua didto?
Ngano nga si Jesus wala motubag sa iyang mga tigpasangil atol sa iyang paghusay? (Mateo 26:62–63; 27:12–14; Lucas 23:9.) (Tan-awa sa kalihokan sa pagpalambo 3.) Ipasabut nga sa dihang si Jesus gipangutana kon siya ba ang Kristo, ang Anak sa Dios, o Hari sa mga Judeo, siya mitubag (tan-awa sa Mateo 26:63–64; 27:11). Ipakita nga si Jesus wala molimod sa iyang pagkatawo o misulay sa pagluwas sa iyang kaugalingon. Si Jesus nasayud nga siya kinahanglan nga ilansang sa krus aron sa pagtuman sa iyang misyon sa yuta.
Balika pag-usab ang lista sa pang-atensyon nga kalihokan nga naghulagway kon unsa ang gibuhat sa katawhan kang Jesus? Unsa ang inyong gihunahuna samtang kamo nagbasa niining mga pulong? Unsa ang inyong gibati mahitungod sa makalilisang nga mga butang nga gibuhat sa mga katawhan ngadto ni Jesus? Aduna bay usa ka tawo nga nagmalupigon kaninyo tungod kay kamo nagtuo kang Jesukristo o tungod kay kamo miadto sa simbahan? Unsa ang inyong gibuhat?
Pila ka higayon nga si Pedro milimod nga nakaila kang Jesus? (Lucas 22:54–60.) Ngano sa inyong pagtuo nga si Pedro mibuhat niini? Unsa ang gibati ni Pedro sa dihang siya nakaamgo kon unsa ang iyang nabuhat? (Lucas 22:61–62.) Tabangi ang mga bata nga makasabut nga si Pedro wala pa makadawat sa gasa sa Espiritu Santo. Si Pedro usa ka halangdong tawo kinsa sa ulahi nahimong Presidente sa Simbahan ug mihatag sa iyang kinabuhi alang sa iyang pagpamatuod. Unsaon nato nga magmaisugon ang atong mga pagpamatuod kang Jesukristo bisan unsa pa nga mga hagit nga ang atong giatubang? (Tan-awa sa mga kalihokan sa pagpalambo 5.)

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsang panahon sa leksyon o ingon nga usa ka pagribyu, katingbanan, o hagit.

Tuguti ang mga bata matag usa sa paghingalan sa usa sa mga kalidad o hiyas ni Jesus nga ilang gilabi pagtamud.
Ribyuha ang una ug ikatulo nga mga artikulo sa hugot nga pagtuo. Tabangi ang mga bata sa pagsabut nga kini nga mga artikulo sa hugot nga pagtuo nagpahinumdom nato sa pagkasagrado ni Jesukristo ug sa kamahinungdanon sa iyang misyon.
Ibutang ang mosunod nga mga pulong sa karatula: Caipas, Pilato, ug Herodes. Ihatag kini nga mga karatula ngadto sa tulo ka mga bata ug ipasabut nga ang matag usa niini nga mga magmamando adunay nagkalainlain nga mga kaakohan sa nasud. Tuguti ang mga “magmamando” sa pagbarug sa nagkalainlain nga mga dapit sa lawak ug tuguti ang nahibilin sa klase sa pagduol nila samtang ang tulo ka mga bata nagbasa sa mosunod nga mga pamulong. 0 tuguti ang tulo ka mga bata sa pagbarug sa atubangan sa klase aron sa pagbasa sa ilang bahin:

Caipas: Ang akong ngalan si Caipas. Ako usa ka Judeo nga halangdong pari, diin nagpasabut nga ako usa ka relihiyoso nga pangulo sa mga Judeo. Ako buot nga si Jesus pahamtangan sa kamatayon, apan ako kinahanglan nga mangayo og pagtugot gikan sa Romano nga magmamando, busa ako mipadala kaniya kang Pilato.

Pilato: Ang akong ngalan si Ponso Pilato. Ako usa ka gobernador nga Romano, diin nagpasabut nga ako ang politikanhong pangulo sa Judea. Ang mga Judeo buot kanako nga mopahamtang kang Jesus og kamatayon, apan ako wala makakita og kasaypanan diha kaniya. Ako mipadala kaniya kang Herodes.

Herodes: Ang akong ngalan si Herodes. Ako usa ka Judeo, ug ang mga Romano naghimo kanako nga usa ka hari ibabaw sa Galilea. Si Pilato mipadala kang Jesus kanako tungod kay ako ang hari ibabaw sa dapit diin si Jesus nagtubo. Ako naghinamhinam nga makita kining tawo nga gihinganlan og Jesus. Ako nakadungog mahitungod kaniya ug buot nga makakita kaniya nga magbuhat og milagro, apan siya midili sa pagpakigsulti kanako o sa pagtubag sa akong mga pangutana. Ako mipadala kaniya og balik kang Pilato.

Pilato: Ako sa gihapon wala makakita og hinungdan sa pagsilot niining tawhana nga mamatay, apan ang mga katawhan namugos. Ako sa katapusan mthunong sa pagsulay sa pagsulti sa mga katawhan nga ako wala makakita og kasaypanan diha ni Jesus ug nagtugot sa mga katawhan sa pagdala kaniya aron sa ilansang siya.

Pagkahuman sa tulo ka mga bata pagbalik ngadto sa ilang mga lingkuranan, paghisgot kon unsa kaha kini sama alang kang Jesus nga kinahanglan gayud nga moatubang sa matag usa niining mga tawhana ug pagasukton nila.
Pagsulat diha sa mga piraso sa papel og pila ka mga kahimtang, sama sa mosunod, nga mahimong malisod alang sa mga bata nga atubangon (paggamit og mga kahimtang nga mahimong tukma alang sa imong klase):

Ang usa ka tawo mikatawa kanimo tungod sa imong pag-adto sa simbahan.

Ang usa ka tawo misulay pagdapit kanimo ngadto sa pagtilaw og pipila ka mga druga o pagtabako og sigarilyo.

Ikaw nakakita og usa ka kauban sa tulunghaan nga nagmalupigon sa lain nga bata.

Ang imong dili sakop nga higala naghangyo kanimo sa pagpatin-aw sa imong mga pagtuo.

Ang usa ka kauban sa tulunghaan naghangyo kanimo sa pagsulti og usa ka bakak aron sa paglikay kaniya gikan sa kasamok.

Hatagi ang mga bata og higayon sa paghulbot og usa ka piraso sa papel ug sa pagbasa niini. Tuguti ang klase nga hisgutan ang matag kahimtang ug pmohukom kon unsa ang tukmang butang nga buhaton. Hatagi og gibugaton nga usahay malisud ang pagpakamaisug sa atong mga pagpamatuod kang Jesukristo, apan kita mahimong mapanalanginan sa hilabihan kon kita ingon niana.
Hatagi ang matag bata og usa o duha sa mga kard nga naghulagway ni Jesus (ikaw mahimong mogamit og lain nga mga pulong o hugpong sa mga pulong nga naghulagway ni Jesus). Hangyoa ang mga bata sa pagsulti nimo kon unsa ang ilang gihunahuna sa dihang sila nagbasa sa mga pulong sa ilang mga kard. Hangyoa sila sa paghukom sa ilang hunahuna kon sila nasayud ba gayud nga si Jesus mao ang Anak sa Dios, ang Manluluwas, ang Manunubos, ug uban pa. Dapita ang mga bata sa paghulagway kon sa unsang paagi nga ang kahibalo ug pagpamatuod kang Jesukristo nakapanalangin kanila.
Ipaawit sa klase o pagdapit og usa ka tawo sa pag-anha sa klase ug pagawit sa “Kita Mag-awit og Himaya sa Ngalan ni Jesus” (Mga Baruganan sa Ebanghelyo, 31110).

Panapos

Pagpamatuod

Ipamatuod ang pagkasagrado ni Jesukristo, ug pagpaambit uban sa mga bata kon unsa ka mahinungdanon kini nga pagpamatuod alang kanimo. Ipadayag ang imong pasalamat sa kang Jesus nga kinabubut-ong pag-antus ug pagkamatay aron nga kita mahimong mabanhaw ug makabaton og kinabuhing dayon.

Gisugyot nga Basahonon sa Panimalay

Isugyot nga ang mga bata magtuon sa Mateo 26:47–54 sa panimalay ingon nga usa ka pagribyu niini nga leksyon.

Dapita ang usa ka bata nga mohatag sa panapos nga pag-ampo.