Ang Pagkabanhaw ni Jesukristo

Katuyoan

Aron sa pagtabang sa matag bata nga makasabut nga si Jesukristo nabanhaw gikan sa pagkamatay ug nga kitang tanan mahimong mabanhaw.

Pagpangandam

Sa mainampoon nga paagi pagtuon sa Mateo 27:52–53; 28:1–15; Lucas 24; Juan 20; Mga Buhat 1:3, 9–11; ug 1 Mga Taga Corinto 15:5–6, 22. Dayon pagtuon sa leksyon ug paghukom unsaon nimo sa pagtudlo ang mga bata sa mga asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Dugang basahonon: Marcos 16.
Pilia ang mga pangutana sa panaghisgutan ug paggamit ug mga kalihokan sa pagpalambo nga makapaapil sa mga bata ug labing makatabang kanila sa pagkab-ot sa katuyoan niini nga leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Mga piraso sa papel nga adunay usa sa mosunod nga mga pulong o mga hugpong sa mga pulong diha sa matag usa: panaptong lino, lamas, tanaman, mga sundalo, bato.
3. Mga huiagway 7-35, Lubnganan ni Jesus (62111); 7-36, Si Maria ug ang Nabanhaw nga Ginoo (Mga Huiagway sa Ebanghelyo 233; 62186); ug 7-37, Ang Nabanhaw nga si Jesukristo (Mga Huiagway sa Ebanghelyo 239; 62187).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Ibutang ang mga piraso sa papel nga nalista sa seksyon sa “Pagpangandam” ngadto sa usa ka sudlanan, ug hatagi ang mga bata og higayon sa pagpili og usa ka piraso sa papel. Hangyoa sila sa paghulagway kon unsa ang nalista, ug dayon pangutan-a sila kon sila makahimo ba sa pagsulti kon sa unsa nga paagi nga kana nga pulong o hugpong sa mga pulong may kalabutan sa paglubong ni Jesus. Gamita ang igo nga mga pulong o hugpong sa mga pulong aron ang matag bata adunay higayon.

Hangyoa ang mga bata sa paghunahuna nga kana sayo sa Domingo sa buntag human sa pagkalansang sa krus ug paglubong ni Jesus. Tuguti sila sa paghunahuna nga sila uban sa mga tinun-an, kinsa nagmasulub-on sa kamatayon ni Jesus. Sila naglaum nga si Jesus moluwas kanila gikan sa paghari sa mga Romano ug magtukod sa iyang gingharian diha sa ibabaw sa yuta sa gahum ug himaya. Apan karon siya namatay. isulti sa mga bata nga ikaw maghisgot kon unsa ang nahitabo niana nga kabuntagon sa Domingo didto sa Jerusalem.

Asoy sa Kasulatan

Ginamit ang mga hulagway sa tukmang panahon, itudlo sa mga bata ang mga asoy sa pagkabanhaw ni Jesus nga makita sa Mateo 27:52–53, 28:1–15, Lucas 24, ug Juan 20. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Ipasabut nga bisan si Jesus misaysay sa iyang mga tinun-an sa makadaghang higayon nga siya mabuhi pag-usab human nga siya mamatay, ang iyang mga tinun-an wala gayud makasabut kon unsa ang iyang gipasabut. Wala pa gayuy nahitabo kaniadto nga adunay nabanhaw, ug sila wala makasabut sa unsang paagi nga si Jesus mahimong mabuhi pag-usab. Bisan sa dihang ang mga tinun-an nakadungog gikan sa mga anghel nga si Jesus mibangon gikan sa mga patay ug nakakita sa mibangon nga Ginoo, lisud pa gihapon alang nila sa pagtuo kon unsa ang nahitabo.

Mga Pangutana sa Panaghisgutan ug Paggamit

Tun-i ang mosunod nga mga pangutana ug mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa makagamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

Ngano nga si Maria Magdalena ug ang ubang mga babaye miadto sa lubnganan pagka-Domingo sa buntag? (Marcos 16:1.) Kinsa ang nakit-an sa mga babaye sa dihang sila miadto sa lubnganan? (Lucas 24:4.) Unsa ang gisulti sa mga anghel ngadto sa mga babaye? (Lucas 24:5–6.) Unsa ang gipasabut sa nabanhaw? (Ang espiritu nga lawas nahiusa pag-usab uban sa iyang lawas sa unod ug mga bukog, dili na gayud mabulag pa pag-usab.)
Unsa ang gibuhat sa mga babaye human sila makakita sa walay sulod nga lubnganan? (Lucas 24:8–12.) Ngano nga ang mga tinun-an wala motuo sa asoy sa mga babaye kon unsa ang gisulti sa mga anghel? (Lucas 24:11; Juan 20:9.) Unsa sa inyong hunahuna ang inyong mahunahunaan kon kamo usa pa sa mga tinun-an ug nakadungog niini nga balita?
Unsa ang nakit-an nilang Pedro ug sa laing mga tinun-an sa dihang sila miadto sa lubnganan? (Juan 20:3–7. Ipasabut nga “ang laing tinun-an” siguro mao si Juan.) Ngano nga sila mituo nga si Jesukristo nabanhaw? (Juan 20:8.)
Ngano nga si Maria masulub-on lamang gihapon bisan human ang mga anghel misulti kaniya nga si Jesus mibangon? (Juan 20:11–13.) Unsa ang nahitabo aron sa pagtabang kang Maria nga masayud nga si Jesus nabanhaw? (Juan 20:14–16.) Ngano nga si Jesus misulti kang Maria nga dili mohikap kaniya? (Juan 20:17.)
Kinsa pa ang laing nabanhaw nianang adlawa nga si Jesus nabanhaw? (Mateo 27:52–53.) Kinsa sa inyong banay ang mabanhaw? Kinsa pa ang mabanhaw? (1 MgaTaga Corinto 15:22.)
Unsa nga sugilanon ang gi-imbento sa halangdong mga pari aron sa pagpasabut sa walay sulod nga lubnganan? (Mateo 28:11–15.) Ngano nga ang mga sundalo miuyon sa pagsulti niini nga sugilanon, bisan tuod sila nakakita sa mga anghel? (Mateo 28:12, 15.)
Kinsa ang milakaw kuyog sa mga tinun-an diha sa karsada ngadto sa siyudad sa Emmaus sa adlaw nga si Jesus nabanhaw? (Lucas 24:13–16.) Mahitungod sa unsa ang gipanaghisgutan sa tulo ka mga lalaki diha sa ilang paglakaw? (Lucas 24:17–27.) Unsa ang gibati niining mga tinun-an diha sa ilang mga kasingkasing sa dihang sila nakigsulti uban kang Jesus? (Lucas 24:32.) Unsa man ang nakapainit sa ilang mga kasingkasing? (Ang Espiritu Santo.) Sa unsang paagi kamo o ang mga sakop sa inyong banay nakadawat og pagdasig gikan sa Espiritu?
Unsa ang gibuhat ni Jesus nianang gabii sa adlaw sa iyang pagkabanhaw? (Lucas 24:36–48.) Ngano nga ang mga tinun-an misira sa pultahan sa dihang si Jesus nagpakita kanila? (Juan 20:19.) Unsa ang reaksyon sa mga tinun-an sa dihang ilang nakita si Jesus? (Lucas 24:37.) Unsa ang gibuhat ni Jesus aron sa pagpamatuod sa iyang mga tinun-an nga siya nabanhaw? Unsa ang nakat-unan sa mga tinun-an mahitungod sa usa ka nabanhaw nga lawas? (Lucas 24:39–43.)
Ngano nga wala motuo si Tomas nga si Jesus nabanhaw? (Juan 20:24–25.) Unsa kadugay kadto una pa si Tomas makakita kang Jesus? (Juan 20:26.) Unsa ang gisulti ni Jesus kang Tomas sa dihang siya nagpakita kaniya? (Juan 20:29.) Unsa ang nakapalig-on sa inyong pagpamatuod nga si Jesukristo nabanhaw?
Kang kinsa pa si Jesus nagpakita human sa iyang pagkabanhaw? (Mateo 28:9; 1 Mga Taga Corinto 15:6.) (Ikaw mahimong mogamit sa kalihokan sa pagpalambol aron sa pagribyu sa tanang mga pagpakita ni Jesus human sa iyang pagkabanhaw.)
Unsa kadugay nagpabilin si Jesus uban sa iyang mga tinun-an human sa iyang pagkabanhaw? (Mga Buhat 1:3.)
Sa unsa nga paagi si Jesus mikayab ngadto sa langit? (Mga Buhat 1:9–11.) Kinsa ang miabut sa pagpasabut sa mga tawo kon unsa ang nahitabo? Unsa ang gitudlo niini nga asoy kanato mahitungod sa ikaduhang pag-anhi ni Jesus?

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa panahon sa leksyon o ingon nga usa ka pagribyu, katingbanan, o hagit.

Ihatag sa matag bata ang usa sa mosunod nga mga timailhan ug tuguti sila sa pagbasa niini ngadto sa klase. Tuguti ang mga sakop sa klase sa pagtagan sa tubag sa matag timailhan. Kon sila wala masayud sa usa ka tubag, tuguti ang bata nga naghatag sa pangutana sa paghatag sa pakisayran aron ang mga bata mangita og tubag sa mga kasulatan.

Ako ang unang tawo nga gipakitaan ni Jesus human sa iyang pagkabanhaw. Kinsa ako? (Maria Magdalena. Juan 20:1, 16.)

Si Jesus mipakita kanamo, ug kami mihikap sa iyang mga tiil. Kinsa kami? (Laing mga babaye. Mateo 28:5, 9.)

Ako ang unang Apostole nga misulod sa bakante nga lubnganan. Kinsa ako? (Pedro. Juan 20:6.)

Ako usa ka Apostol kinsa midagan kuyog ni Pedro ngadto sa bakante nga lubnganan. Sa dihang ako nakakita, ako mituo nga si Jesus nabanhaw. Kinsa ako? (Juan. Juan 20:8.)

Ang akong higala ug ako naglakaw kuyog ni Jesus hangtud ngadto sa Emmaus, gani ako wala gayud makaila kaniya. Kinsa ako? (Cleopas. Lucas 24:18.)

Si Jesus nagpakita namo samtang kami nagtigum sa usa ka lawak nga gisiradohan ang pultahan. Kinsa kami? (Mga tinun-an. Juan 20:19.)

Ako wala mokuyog sa ubang mga Apostoles sa dihang si Jesus unang mipakita ngadto kanila. Ako wala motuo nga si Jesus mibangon gikan sa mga patay hangtud nga ako nakakita kaniya pinaagi sa akong kaugalingong mga mata ug mibati sa mga agi sa mga lansang sa iyang mga kamot ug mga tiil. Kinsa ako? (Tomas. Juan 20:24.)

Kami diha sa dihang ang mga anghel miligid sa bato gikan sa pultahan. Ang labawng mga pari misoborno namo sa pagpamakakak mahitungod kon unsa ang among nakita. Kinsa kami? (Mga sundalong Romano. Mateo 28:12.)
Pagsulat sa mga pulong nga nagsulti kon unsa kaha ang gibati sa mga tinunan niana nga adlawa nga si Jesus namatay— sama sa kasakit, kasubanan, kaguol, ug kawalay-paglaum—sa usa ka kolum diha sa pisara. Pasugyuta ang mga bata sa kaatbang niadtong mga pulong—sama sa kalipay, hingpit nga kalipay, paglaum, ug hugot nga pagtuo—ug isulat kini sa lain nga kolum. Ipasabut nga kini nga mga pagbati mao tingali ang mga gibati sa mga tinun-an sa dihang ilang namatikdan nga si Jesus nabanhaw na. Hisguti kon unsa kamahinungdanon ang paglaum sa pagkabanhaw alang sa matag usa nato.
Uban sa pagtugot sa kapangulohan sa Primarya, sa mainampoon nga paagi pagpili ug pagdapit og usa ka sakop kinsa adunay hinigugma nga namatay kaniadto sa pagpakigbahin uban sa mga bata kon unsa kamahinungdanon alang kaniya ang Pagkabanhaw.
Awita o basaha ang mga pulong sa “Ako Nasayud Nga Akong Manunubos Buhi” (Mga Baruganan sa Ebanghelyo (31110).

Panapos

Pagpamatuod

Ipadayag sa imong pagbati mahitungod sa pagkabanhaw sa Manluluwas ug sa kamahinungdanon niini nganha kanimo. Ipamatuod nga ang pag-antus ni Jesus sa tanaman, ang iyang kamatayon, ug ang iyang pagkabanhaw mao ang labing mahinungdanon nga mga butang nga nahitabo sa yuta.

Gisugyot nga Basahonon sa Panimalay

Isugyot nga ang mga bata magtuon sa Lucas 24 sa panimalay ingon nga usa ka pagribyu niini nga leksyon.

Pagdapit og usa ka bata nga mohatag sa panapos nga pag-ampo.