Ang Misyon ni Jesukristo

Katuyoan

Aron sa pagtabang sa mga bata nga makasabut sa misyon ni Jesukristo.

Pahinumdom alang sa magtutudlo: Kini nga leksyon usa ka kinatibuk-ang paghulagway sa kang Jesus nga kinabuhi nga wala pa dinhi sa yuta, mortal nga kinabuhi ug kinabuhi human dinhi sa yuta. Kini gituyo alang sa pagtabang sa mga bata nga makasabut sa hingpit sa misyon ni Jesus. Tungod kay ang leksyon usa ka kinatibuk-ang paghulagway, ang mga pangutana halapad. Samtang ikaw naghisgot kanila, labing maayo nga magpunting diha sa mga kinamaayohan sa mga hitabo sa matag bahin sa pagpangalagad sa Manluluwas kaysa mosulay sa paghisgot sa detalye nga bahin.

Pagpangandam

Sa mainampoon nga paagi pagtuon sa Moises 1:33, 39; 4:2; Lucas 24:27; Juan 3:16; 15:9–13; 1 Mga Taga Corinto 10:4; Mosiah 13:33; 3 Nephi 11:7–10; Ether 3:14; Doktrina ug mga Pakigsaad 138:30; ug Joseph Smith—History 1:17. Dayon pagtuon sa leksyon ug paghukom unsaon nimo sa pagtudlo ang mga bata sa mga asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Dugang mga basahonon: Baruganan sa Ebanghelyo, mga kapitulo 3, 11, ug 43.
Pilia ang mga pangutana sa panaghisgutan ug paggamit ug mga kalihokan pagpalambo nga makapaapil sa mga bata ug maoy labing makatabang kanila sa pagkab-ot sa katuyoan niini nga leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Mga ginunting nga mga mga pulong (tan-awa ang nagsunod nga tsart).
3. Mga hulagway 7-1, Si Jesus ang Kristo (Mga Hulagway sa Ebanghelyo 240; 62572).

Pahinumdom: Sa panahon sa leksyon ikaw mokompleto sa tsart sama sa mosunod (o ikaw makasulat sa materyal diha sa pisara). Ipadayag “Ang Misyon ni Jesukristo” ug unya ang tulo ka labing mahinungdanong mga ulohan pinahigda ubos niana nga ulohan. Ipabutang sa usa ka bata ang usa ka ginunting nga mga pulong ubos sa tukma nga ulohan samtang ikaw naghisgot niana nga bahin sa misyon ni Jesus.

Ang Misyon ni Jesukristo

Kinabuhi ni Kristo sa Wala pa Dinhi sa Yuta

Miboluntaryo nga mahimong atong Manluluwas
Milalang sa yuta
Mao ang Jehova sa Daang Tugon
Mihatag og pagpadayag ngadto sa mga propeta

Kang Kristo nga Mortal nga Kinabuhi

Mitudlo sa ebanghelyo
Miayo sa mga masakiton
Mitukod sa iyang Simbahan
Miula sa atong mga sala
Namatay alang kanato

Ang Kinabuhi ni Kristo human dinhi sa Yuta

Miduaw sa kalibutan sa espiritu
Nabanhaw
Miduaw sa mga Nephite
Mitukod sa iyang simbahan alang kanato pinaagi ni Propeta Joseph Smith
Mihatag og pagpadayag ngadto sa mga pangulo sa Simbahan karon
Naghigugma ug nagtabang kanato
Moanhi pag-usab

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Ipahingalan sa mga bata kutob sa ilang mahimo ang mga pulong nga ilang mahulagway kon si kinsa sila, sama sa anak nga lalaki, anak nga babaye, apo, estudyante, magdudula og soccer, ug uban pa. Isulat kini diha sa pisara. Sa lain nga kolum diha sa pisara (o paggamit og mga ginunting nga mga mga pulong) isulat ang pipila sa mga ngalan nga magamit ngadto kang Jesus (tan-awa sa ‘Jesukristo” diha sa Giya ngadto sa mga Kasulatan), magsugod sa mga dili sinati ngadto sa mga bata, sama sa Panig-ingnan, Maghuhukom, Lig-on nga Sukaranan, Tigpataliwala, ug magpadayon ngadto sa mga pulong nga sila malagmit nasayud, sama sa Manluluwas, Manunubos, Tiglalang, ug uban pa. Ipaisa sa mga bata ang ilang mga kamot sa higayon nga sila nasayud kon kinsa ang gipasabut niining mga ngalan.

Mga Asoy sa Kasulatan

Ipakita ang huiagway ni Jesus ang Kristo. Ipasabut nga si Jesus nakabuhat og daghang talagsaon nga mga butang alang kanato, dili lamang sa dihang siya dinhi pa sa yuta apan sa wala pa siya natawo ug human sa iyang kamatayon ug pagkabanhaw. Tabangi ang mga bata nga makasabut nga si Jesus nakabuhat niining mga butanga aron sa pagtuman sa laraw sa kaluwasan sa Langitnong Amahan alang kanato. Kita motawag niini nga laraw sa kaluwasan tungod kay pinaagi niini ug uban sa tabang ni Jesus kita makahimo sa pagbalik aron magpuyo pag-usab hangtud sa kahangturan uban sa Langitnong Amahan ug ni Jesus (tan-awa sa Moises 1:39). Ipabasa sa mga bata ang Juan 3:16 sa makusog. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.)

Mga Pangutana sa Panaghisgutan ug Paggamit

Tun-i ang mosunod nga mga pangutana ug sa mga pakisayran sa kasulatan samtang ikaw mag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa kiase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

Unsa ang uban sa mga butang nga gibuhat ni Jesus sa wala pa siya natawo dinhi sa yuta?
Kinsa ang miboluntaryo nga mahimong atong Manluluwas? Kanus-a siya miboluntaryo? (Ether 3:14; Moises 4:2.) Kinsa ang mipili kang Jesus aron mahimong atong Manluluwas? (Juan :16; Abraham 3:27.)
Kinsa ang milalang sa yuta? Kanus-a gilalang ni Jesus ang yuta? (Genesis 1:1; Moises 1:33.)
Kinsa si Jehova, o ang Ginoo sa Daang Tugon? Kinsa ang mihatag og mga pagpadayag ngadto sa mga propeta sa Daang Tugon, sama kang Moises ug Abraham? (Jesukristo. Tan-awa ang “Jehova” diha sa Giya ngadto sa mga Kasulatan.) Kinsa ang gipamatuod nilang Moises ug sa tanang mga propeta? (Lucas 24:27; Mosiah 13:33.)
Unsa ang gibuhat ni Jesus samtang dinhi siya sa yuta? Ipalista sa mga bata kutob sa ilang mahinumduman ang mga butang mahitungod sa yutan-on nga pagpangalagad ni Jesus. Ngano nga gibuhat ni Jesus kining mga butanga alang kanato? (Juan 15:9, 11.)
Unsa ang gibuhat ni Jesus human siya namatay? (1 Pedro 3:18–20; D&P 138:30; siya miduaw sa mga espiritu didto sa bilangguan.) Unsa ang gibuhat ni Jesus human siya nabanhaw? (3 Nephi 11:7–10, 3 Nephi 27:8: miduaw sa mga Nephite sa America ug mipakita kanila sa iyang lawas; Joseph Smith— Kasaysayan 1:17: miduaw ni Joseph Smith aron sa pagpahiuli sa kamatuoran; D&P 115:4: mitukod sa iyang simbahan alang kanato.)
Giunsa ni Jesus pagtabang ang matag usa kanato karon? (Amos 3:7; Mateo 28:20.) (Tan-awa ang pagpalambo nga mga kalihokan 2.)
Unsa ang dakong hitabo ang gipaabot natong tanan? Unsa nga mga panagna ug mga saad ang gipadayag ni Jesus mahitungod sa iyang ikaduhang pag-anhi? (Mateo 24:30–31; D&P 29:11.)
Unsaon nato pagpakita kang Jesus nga kita mapasalamaton tungod sa tanan nga iyang nabuhat alang kanato? (Juan 15:10, 12.) Tabangi ang mga bata sa paghunahuna sa mga sugo nga ilang matuman aron sa pagpakita kang Jesus nga sila mapasalamaton.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sulod sa leksyon o ingon nga usa ka pagribyu, katingbanan, o hagit.

Pangitaa ang “Jesukristo” diha sa Giya ngadto sa mga Kasulatan aron sa pagtan-aw sa daghang mga titulo ug mga papel ni Jesus. Pagpili og pipila niini nga mga titulo aron hisgutan.
Tabangi ang mga bata nga makasabut nga si Jesus naghigugma nato ug naggiya sa Simbahan karon. Isaysay ang mosunod nga sugilanon ni Presidente Lorenzo Snow, ang ikalimang Presidente sa Simbahan, nga nakakita kang Jesus sa Templo sa Salt Lake:

Usa ka gabii ang usa sa mga apo nga babaye ni Presidente Snow miduaw uban kaniya sa Templo sa Salt Lake. Sa dihang siya mobiya na, si Presidente Snow misunod kaniya ngadto sa koridor. Sa kalit lamang siya miingon, “Hulat og kadiyot, Allie, ako buot nga mosulti nimo og usa ka butang. Dinhi niining dapita nga ang Ginoong Jesukristo mipakita kanako sa panahon sa pagkamatay ni Presidente Woodruff.” Siya mihimo og usa ka lakang, migunit sa iyang walang kamot, ug mipadayon, “Siya nagbarug dihang dapita, mga tulo ka piye ibabaw sa salog. Maora gayud nga tan-awon og nagbarog siya diha sa usa ka palid sa tinuod nga bulawan.” Si Presidente Snow milarawan dayon sa panagway sa Manluluwas ug sa iyang maanindot nga puting mga kupo. (Tan-awa sa LeRoi C. Snow, “An Experience of My Father’s,” Improvement Era, Sept. 1933, p. 677.)
Ipapangita sa mga bata ang mosunod o susama nga mga kasulatan aron sa pagtabang nila sa pagribyu sa mga butang nga gibuhat ni Jesus sa panahon sa iyang mortal nga pagpangalagad:
- Mateo 5:2 (nagtudlo sa ebanghelyo)
- Mateo 14:14 (nag-ayo sa mga masakiton)
- Marcos 3:14 (nagtukod sa iyang simbahan)
- 2 Nephi 2:6–7 (nagtubos alang sa atong mga sala ug namatay alang kanato)
- Mateo 28:6–7 (nabanhaw)

Panapos

Pagpamatuod

Ipamatuod ang imong pagpasalamat kang Jesus ug alang sa mga daghang mga butang nga iyang gibuhat alang kanato ug sa gipadayon sa pagbuhat alang kanato. Sultihi ang mga bata kon unsa ikaw kamapasalamaton alang sa kahigayunan nga magtuon og dugang mahitungod sa panahon ni Jesus sa yuta.

Gisugyot nga Basahonon sa Panimalay

Isugyot nga ang mga bata magtuon sa Juan 15:9–13 sa panimalay ingon nga usa ka pagribyu niini nga leksyon.

Pagdapit og usa ka bata nga mohatag sa panapos nga pag-ampo.