Ang Adlaw sa Pagkunsad

Katuyoan

Aron sa pagtabang sa matag bata nga makasabut mahitungod sa gasa sa Espiritu Santo ug sa pagsabut kon unsaon sa pag-ila sa mga pag-aghat sa Espiritu Santo.

Pagpangandam

Sa mainampoon nga paagi pagtuon sa Mga Buhat 2:1–24, 32–33, 36–47 ug Juan 14:25–27. Dayon pagtuon sa leksyon ug paghukom unsaon nimo pagtudlo ang mga bata sa mga asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Dugang mga basahonon: Mga Baruganan sa Ebanghelyo, mga kapitulo 7 ug 21.
Pilia ang mga pangutana sa panaghisgutan ug paggamit ug mga kalihokan sa pagpalambo nga makapaapil sa mga bata ug maoy labing makatabang kanila sa pagkab-ot sa katuyoan niini nga leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Tisas ug usa ka pisara.
3. Hulagway 7-39, Adlaw sa Pagkunsad.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Itudlo sa mga bata nga sa dihang si Jesus kauban sa iyang mga Apostoles siya mitudlo kanila og daghang mga butang. Siya nasayud nga siya dili sa kanunay uban kanila, busa siya misaad sa pagpadala og usa ka linain nga gasa aron sa pagtabang kanila.

Basaha ang mosunod nga mga timailhan. Tuguti ang mga bata sa pagbarug kon sa ilang hunahuna sila nasayud kon unsa kini nga gasa ug sa paghunghong sa tubag diha sa imong dunggan. Kon sila husto sa pag-ila sa Espiritu Santo, tuguti sila nga magpabilin nga magbarug.

Pang-atensyon nga Kalihokan

Ako nagtudlo sa kamatuoran.
Ako usa ka giya.
Ako naghatag og kahupayan.
Ako nagpamatuod kang Jesukristo.
Ako kalagmitan nagsulti sa inyong hunahuna ug kasingkasing.
Ako sakop sa Diosnong Kapangulohan.
Ako usa ka espiritu nga persona apan walay pisikal nga lawas.

Isulat ang pulong Espiritu Santo diha sa pisara. Basaha ang Juan 14:25–27 uban sa mga bata. Ribyuha ang lista sa mga timailhan aron sa pagtabang sa mga bata nga makasabut kon unsa ang gibuhat sa Espiritu Santo alang kanato. isulat ang pulong Pagkunsad diha sa pisara. Ipasabut nga ang Pagkunsad naggikan sa usa ka Griyego nga pulong nga nagpasabut nga ika kalim-an. Ang Pagkunsad usa ka kasaulogan sa mga Judeo nga gihimo sa matag tuig kalim-an ka mga adlaw human sa Paglabay. Si Jesus mihatag sa sakramento ngadto sa iyang mga Apostoles diha sa Katapusang Panihapon, diin nahitabo sa panahon sa Paglabay. Diha sa ika kalim-an ka mga adlaw human sa Katapusang Panihapon nga ang iyang mga tinun-an nakadawat sa gasa sa Espiritu Santo. Isulat ang pulong Gasa sa Espiritu Santo diha sa pisara.

Asoy sa Kasulatan

Tudloi ang mga bata sa asoy sa adlaw sa Pagkunsad (Mga Buhat 2:1–24, 32–33, 36–47). (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Ipakita ang huiagway sa Adlaw sa Pagkunsad sa tukma nga panahon.

Mga Pangutana sa Panaghisgutan ug Paggamit

Pagtuon sa mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug makagamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

Sa adlaw sa Pagkunsad, sa unsa nga paagi nga ang Espiritu Santo miadto sa mga Apostoles ni Jesus? (Mga Buhat 2:1–4.)
Unsa ang nakahatag og abilidad sa mga tinun-an sa pagsulti sa tanang mga matang sa pinulongan ug mahimong masabtan sa mga tawo nga nagsulti sa nagkalainlain nga mga pinulongan? (Mga Buhat 2:4.) Sa unsa nga paagi nga kining espirituhanong gasa sa Espiritu Santo nakatabang sa paningkamot sa misyonaryo sa Simbahan karon? (Pinaagi sa pagtabang daghang mga misyonaryo ang nakat-on og langyaw nga mga pinulongan. Ang gasa sa pinulongan makatabang usab sa mga kontak nga makasabut sa mensahe sa ebanghelyo bisan kon ang usa ka misyonaryo dili kaayo makamaong mosulti sa pinulongan.)
Unsa ang nakaingon sa mga kasingkasing sa mga katawhan nga nasakitan human nga si Pedro mipamatuod sa pagkalansang sa krus ug pagkabanhaw ni Kristo? (Mga Buhat 2:33, 36–37. Ang Espiritu Santo.) Unsa ang buot ipasabut sa nasakitan nga kasingkasing? (Sa pagbaton og usa ka hilabihang pagbati sa pagbasol o kasubo.) Sa unsang paagi nga ang Espiritu Santo makatabang nato sa pagbati og pagbasol alang sa mga butang nga atong nabuhat?
Sa unsang paagi nga ang Espiritu Santo makatabang nato sa pagkasayud kon unsa ang buhaton? Tabangi ang mga bata nga makasabut nga ang mga tawo makabati sa Espiritu Santo nga mitabang kanila sa ilang mga kinabuhi sa nagkalainlain nga mga paagi, sama sa pagbati og kalinaw o usa ka panghunahuna nga ang usa ka butang husto, pagbaton og klaro nga pagsabut sa mga kasulatan ug sa ubang mga hilisgutan, pagkakita og tubag sa usa ka problema sa mga kasulatan, pagpaminaw og usa ka pakigpulong o usa ka leksyon diha sa simbahan nga nakatabang nimo, ug uban pa. Kon sa imong hunahuna kini tukma, ikaw mahimong mopaambit og usa ka kasinatian sa dihang ikaw nakabati sa Espiritu Santo sa imong kinabuhi.
Unsa ang gisulti ni Pedro sa mga katawhan nga gikinahanglan nilang buhaton aron sa pagdawat sa gasa sa Espiritu Santo? (Mga Buhat 2:38.) Unsa ang gikinahanglan natong buhaton aron sa pagdawat sa gasa sa Espiritu Santo?
Pila kaninyo ang nahatagan sa gasa sa Espiritu Santo? Tabangi ang mga bata nga makasabut nga posible nga adunay kahigayunan nga makaangkon sa pag-aghat sa Espiritu Santo sa dili pa ang bunyag; bisan pa niana, kita makadawat sa gasa sa Espiritu Santo kon kita nakumpirma nga mga sakop sa Ang Simbahan ni Jesukristo sa mga Santos sa Ulahing mga Adlaw human sa atong mga bunyag. Kon kita matarung, ang gasa sa Espiritu Santo naghatag og katungod nga kita makaangkon sa Espiritu Santo uban kanato ingon nga makanunayon nga kauban (tan-awa sa D&P 121:45–46).
Human mabunyagi ang 3,000 ka mga kalag, unsa ang pipila ka mga butang nga ilang gibuhat aron ang Espiritu Santo magpadayon sa paggiya kanila? (Mga Buhat 2:42–47.) (Ikaw mahimong motugot sa mga bata sa pagpangita sa mga tubag sa kasulatan ug sa paglista niini diha sa pisara.)
Unsa ang atong kinahanglan nga buhaton aron makaangkon sa Espiritu Santo uban kanato? (Magbasol, magpabunyag, modawat sa gasa sa Espiritu Santo, magpuyo nga matarung, mag-ampo alang sa giya sa Espiritu Santo, mohunong ug maminaw, ug magsunod sa mga pag-aghat nga moabut.)

Pagpaambit sa mosunod nga kinutlo uban sa mga bata:

“Pag-ampo ngadto sa Langitnong Amahan aron sa pagpanalangin kanimo uban sa lyang Espiritu sa tanang higayon.… Ang Espiritu Santo usa ka…gasa gikan sa Langitnong Amahan.… Siya mohunghong diha kanimo sa usa ka ligdong, hinay nga tingog sa pagbuhat og matarung. Kon ikaw magbuhat og matarung, ikaw bation og maayo, ug kana mao ang Espiritu Santo nga nagsulti kanimo. Ang Espiritu Santo usa ka halangdon nga kauban. Siya kanunay nga anaa aron sa pagtabang nimo” (Ezra Taft Benson, sa Taho sa Komperensya, Abr. 1989, p. 103; o Ensign, Mayo 1989, p. 82).

Dapita ang mga bata sa pagpakigabhin og usa ka kasinatian sa dihang sila o usa ka sakop sa ilang banay nakabati sa pag-aghat sa Espiritu Santo. Awhaga ang mga bata sa pagpaminaw sa pag-aghat sa Espiritu Santo ug pagpaningkamot sa pagsunod niadtong mga pag-aghat. (Tan-awa sa kalihokan sa pagpalambo 6.)

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa panahon sa leksyon o ingon nga usa ka pagribyu, katingbanan, o hagit.

Ipakigbahin ang mosunod nga sugilanon mahitungod kang Presidente Harold B. Lee, ang ikanapulo ug usa nga Presidente sa Simbahan:

“Ako tingali nag-edad og walo ka tuig, o mas bata pa, sa dihang ako gidala sa akong amahan sa usa ka umahan sa layo layo nga dapit. Samtang siya nagtrabaho ako naghimo og mga butang nga buhaton sa usa ka batan-ong lalaki. Ang adlaw init ug abugon ug ako nagdula hangtud nga ako gikapoy. Sa pikas nga bahin sa koral adunay usa ka gubaon nga kamalig nga maora og nakadapit og pagtagad nako. Sa akong hunahuna ako naghunahuna niining gubaon nga kamalig nga usa ka kastilyo nga ako gustong susihon, busa ako miduol sa koral ug nagsugod sa pagkatkat aron maabut ngadto niana nga kamalig. Adunay usa ka tingog nga akong nadungog nga nagingon nga kini usa ka makahuluganong butang. ‘Harold, ayaw pag-adto ngadto.’ Ako mitan-aw sa palibot aron sa pagpangita kon kinsa ang nagsangpit sa akong ngalan. Ang akong amahan tua sa layo kaayo sa pikas nga bahin sa umahan. Siya dili makakita kon unsa ang akong buhaton. Wala makita ang nagsangpit. Dayon ako nakaamgo nga adunay usa ka tawo nga dili nako makita nga nagpahimangno nako sa dili pag-adto ngadto. Kon unsa man ang anaa ngadto, dili gayud nako mahibaloan, apan ako nakat-on og sayo nga adunay mga tawo nga dili nato makita nga mahimong makigsulti nato” (sa Conference Report, Mexico Area Conference 1972, pp. 48–49).
Isulat ang matag usa sa mosunod nga mga pakisayran diha sa usa ka lahi nga piraso sa papel. (Alang sa dugang pakisayran mahitungod sa Espiritu Santo, tan-awa diha sa Giya ngadto sa mga Kasulatan.) Ikaw mahimong motugot sa mga bata sa paghulbot sa mga papel gikan sa usa ka sudlanan. Tuguti ang bata sa pagpangita sa pakisayran nga nalista diha sa papel ug pagsulti kon unsa ang giingon niana nga bersikulo mahitungod sa Espiritu Santo.

Juan 14:26 (Ang Espiritu Santo gitawag nga Maghuhupay; siya magtudlo sa tanang mga butang ug magtabang nato sa paghinumdom sa mga butang.)

Juan 15:26 (Ang Espiritu Santo mao ang Espiritu sa kamatuoran; siya nagpamatuod kang Kristo.)

Juan 16:13 (Ang Espiritu Santo naggiya nato ngadto sa tanang kamatuoran ug magpakita nato sa mga butang sa umaabot.)

Mga Buhat 4:31 (Ang Espiritu Santo nagtabang nato sa pagsulti sa pulong sa Dios nga may kaisug.)

Mga Buhat 5:32 (Ang Dios naghatag sa Espiritu Santo niadtong kinsa motuman kaniya.)

Mga Taga Galacia 5:22 (Gugma, hingpit nga kalipay, kalinaw, pagpailob, pagkamabination, pagkamaayo, ug hugot nga pagtuo moabot pinaagi sa Espiritu.)
Basaha ang mosunod nga kinutlo. Ikaw mahimong buot nga mohimo og usa ka kopya alang sa matag bata.

“Human sa bunyag, ang usa ka tawo kumpirmahan nga usa ka sakop sa Ang Simbahan ni Jesukristo sa mga Santos sa Ulahing mga Adlaw ug nianang mubo nga ordinansa makadawat sa gasa sa Espiritu Santo. Human niana, sa tibuok kinabuhi, ang mga lalaki, mga babaye, bisan ang mga gagmay nga mga bata adunay katungod alang sa madasigong direksyon aron sa paggiya kanila sa ilang mga kinabuhi—kinaugalingon nga pagpadayag!” (Boyd K. Packer, “Personal Revelation—Available to All,” Friend, June 1990, inside front cover).
Paghimo og usa ka handout sa mosunod nga pakigpulong alang sa matag bata:

Kon ako magpuyo nga matarung, ang gasa sa Espiritu Santo mahimong makatabang nako pinaagi sa pagtudlo nako, paggiya nako, paghupay nako, pagpanalipod nako, pagpahimangno nako gikan sa katalagman, pagpamatuod nako sa kamatuoran.
Hangyoa ang mga bata sa pag-ila sa labing daghan nga mga ngalan sa Espiritu Santo nga ilang mahunahunaan. Hisguti ang mosunod nga mga ngalan kon ang mga bata wala makahunahuna niini: ang Espiritu Santo, ang Espiritu sa Dios, ang Espiritu sa Ginoo, Maghuhupay, ug ang Espiritu. (Tan-awa sa “Espiritu Santo” diha sa Giya sa mga Kasulatan.)

Ikaw mahimong mosulat sa mga hunahuna sa “Ang Ligdong, Hinay nga Tingog” diha sa pisara. Hatagi og gibug-aton nga ingon nga gibunyagan nga sakop sa Ang Simbahan ni Jesukristo sa mga Santos sa Ulahing mga Adlaw, kitang tanan mahimong makabaton niini nga tabang sa atong mga kinabuhi. Tabangi ang mga bata nga makasabut nga samtang sila magpuyo nga matarung ug maminaw sa mga pag-aghat sa Espiritu Santo, sila mahimong makadawat og giya, mga pasidaan, ug kahupayan.

Panapos

Pagpamatuod

Ipamatuod nga si Jesus naghigugma sa matag usa kanato, ug busa siya mohimo nga posible alang nato sa pagdawat sa gasa sa Espiritu Santo aron mahimong katabang, magtutudlo, usa ka maghuhupay, ug usa ka giya.

Gisugyot nga Basahonon sa Panimalay

Isugyot nga ang mga bata magtuon sa Mga Buhat 2:1–8, 36–41 sa panimalay ingon nga usa ka pagribyu niini nga leksyon

Pagdapit og usa ka bata nga mohatag sa panapos nga pag-ampo.