Mga Manwal sa Primary ug Panahon sa Pagpakigbahin
Leksyon 37: Si Pedro ang Apostol

Leksyon 37

Si Pedro ang Apostol

Katuyoan

Aron sa pagtabang sa mga bata makasabut nga sila, sama kang Pedro, mahimong makapalambo og labaw ka lig-on nga pagpamatuod kang Jesukristo.

Pagpangandam

  1. Sa mainampoon nga paagi pagtuon sa Mateo 4:18–19; 14:22–33; 16:13–17; 17:1–9; Lucas 22:31–34, 54–62; Mga Buhat 3:1–9; 4:6–20; 5:12–42; ug Alma 32:21. Dayon pagtuon sa leksyon ug paghukom unsaon nimo sa pagtudlo ang mga bata sa mga asoy sa kasulatan. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)

  2. Pilia ang mga pangutana sa panaghisgutan ug paggamit ug mga kalihokan pagpalambo nga makapaapil sa mga bata ug labing makatabang kanila sa pagkab-ot sa katuyoan niini nga leksyon.

  3. Mga materyal nga gikinahanglan: Usa ka Biblia o usa ka Bag-ong Tugon alang sa matag bata.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Hangyoa ang mga bata sa pagpaminaw samtang ikaw magsaysay nila sa mosunod nga mga sugilanon.

Sugilanon 1: Sa dihang si Jesus mipasabut nga siya hapit na patyon, may usa ka lalaki nga miingon, “Ako andam sa pag-uban nimo, ngadto sa bilanggoan, ingon man ngadto sa kamatayon” (Lucas 22:33). Kining mao nga tawo misunod diha sa panon sa dihang si Jesus gidakop ug gidala ngadto sa usa ka husay. Usa ka babaye miduol ug miingon nga kining lalakiha nakauban ni Jesus, apan ang lalaki milimod niini, nag-ingon, “Ako wala makaila kaniya.” Wala magdugay human niana dihay lain nga tawo ang miingon, “Ikaw usab kauban nila.” Usab ang lalaki milimod nga nakaila kang Jesus. Sa ikatulong higayon usa ka tawo mitudlo kaniya ingon nga usa sa mga sumusunod ni Jesus, apan ang lalaki miingon sa makausa pa, “Ako wala masayud unsa ang imong gipamulong.” (Tan-awa Lucas 22:54–62.)

Sugilanon 2: Usa ka adlaw niana usa ka lalaki ug iyang higala mihunong tupad sa usa ka lalaki kinsa natawo nga bakol. Ang lalaki misulti ngadto sa lalaking bakol, “Sa ngalan ni Jesukristo nga Nasareno barug ug lakaw.” Siya mikuha sa kamot sa lalaking bakol ug mialsa kaniya. Ang lalaking bakol diha dayon naayo ug miadto sa templo “naglakaw, ug naglukso, ug nagdayeg sa Dios.” Sa dihang ang dakodako nga mga pari nakadungog mahitungod niini, sila nangutana pinaagi sa unsa nga gahum ang lalaking bakol naayo. Ang lalaki kinsa miayo sa lalaking bakol miingon nga kadto pinaagi sa gahum ni Jesukristo, bisan kon siya nasayud nga siya mahimong mabilanggo o mapatay tungod sa pagsulti niini. Ang mga pari mimando sa lalaki nga dili motudlo pag-usab sa ngalan ni Jesukristo. Apan siya mitubag nga kini labaw nga mahinungdanon ang pagtuman sa Dios kaysa pagtuman sa mga paripari nga Judeo ug nga siya magpadayon sa pagtudlo sa ngalan ni Kristo. (Tan-awa sa Mga Buhat 3:1–9; 4:6–20.)

Ipasabut nga ang lalaki sa duha ka mga sugilanon mao si Pedro. Sa dihang si Pedro milimud nga nakaila kang Jesus sa wala pa ang Paglansang sa Krus, siya nagtuon pa ug nagtubo pa. Si Jesus gidakop, ug si Pedro nahadlok. Sa panahon nga si Pedro miayo sa lalaking bakol, siya nakadawat na sa Espiritu Santo ug aduna nay labaw ka lig-on nga pagpamatuod ni Jesukristo. Kini nakahatag kaniya sa kusog sa pagbuhat unsa ang matarung dili magsapayan kon unsa ang mahitabo kaniya.

Pang-atensyon nga Kalihokan

  • Unsa ang pagpamatuod? (Kinaugalingon nga kaalam kang Jesukristo ug sa kamatuoran sa iyang simbahan.) Ipasabut nga kini nga leksyon makatabang sa pagpalig-on sa mga pagpamatuod sa mga bata kang Jesukristo.

Mga Asoy sa Kasulatan ug Mga Pangutana sa Panaghisgutan ug Paggamit

Itudlo sa mga bata ang mosunod nga mga asoy mahitungod kang Pedro ug hisguti sa matag usa. Tun-i ang mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Asoy sa Kasulatan ug Mga Pangutana sa Panaghisgutan ug Paggamit

  1. Si Pedro misunod kang Jesus (Mateo 4:18–19).

    • Ngano sa inyong hunahuna nga si Pedro misunod kang Jesukristo human nga si Jesus misulti kaniya kon kinsa siya? Unsa ang kinahanglan isakripisyo ni Pedro aron lamang sa pagsunod kang Jesus? Unsa ang kinahanglan natong isakripisyo aron sa pagsunod kang Jesus? Sa unsa nga paagi ikaw napanalangin tungod sa pagsunod sa Manluluwas?

  2. Si Jesus ug si Pedro naglakaw diha sa ibabaw sa tubig (Mateo 14:22–33).

    • Ngano sa inyong hunahuna nga si Jesus nakahimo sa paglakaw diha sa dagat? (Mateo 14:25.) Ngano nga si Pedro nakahimo sa paglakaw sa pagsugat ni Jesus? (Mateo 14:28–29.)

    • Unsa ang nahitabo kang Pedro human siya mihimo og pipila ka mga lakang? (Mateo 14:30–31.) Ngano sa inyong hunahuna nga ang hugot nga pagtuo ni Pedro nag-usab-usab? Giunsa pagtabang ni Jesus si Pedro sa dihang ang iyang hugot nga pagtuo nag-usab-usab? (Mateo 14:31.) Ngano nga ang atong hugot nga pagtuo usahay mahuyang? Sa unsang paagi si Jesukristo mopalig-on sa atong hugot nga pagtuo? (Pinaagi sa Espiritu Santo, atong mga ginikanan, mga pangulo sa Simbahan, maayo nga mga higala, ang mga kasulatan, ug uban pa.)

    Tabangi ang mga bata nga makasabut sa matag higayon nga kita magbuhat og usa ka butang nga gisugo sa Langitnong Amahan ug ni Jesukristo kanato nga buhaton, kita naggamit sa atong hugot nga pagtuo. Ug sa matag higayon nga kita naggamit sa atong hugot nga pagtuo, ang atong hugot nga pagtuo mahimong molabaw og dyutay ang kalig-on. Kita, sama kang Pedro, kinahanglan nga mogamit sa atong hugot nga pagtuo aron sa pagsunod sa mga pagtulun-an ni Jesus, ug dayon ang atong hugot nga pagtuo motabang sa pagpalig-on sa atong mga pagpamatuod.

  3. Si Pedro mipamatuod nga si Jesukristo ang Anak sa Dios (Mateo 16:13–17).

    • Matud pa ni Pedro si kinsa si Jesukristo? (Mateo 16:16.) Sa unsa nga paagi nga si Pedro nasayud niini? (Mateo 16:17. Pinaagi sa Espiritu.) Unsaon nato, sama ni Pedro, sa pagpadayag sa atong mga pagpamatuod kang Jesukristo?

  4. Si Pedro uban ni Jesukristo diha sa Bukid sa Transpigurasyon. (Mateo 17:1–9; tan-awa sa “Katingbanan sa Mga Pangutana sa Panaghisgutan ug Paggamit” sa leksyon 15, p. “00” [51]).

    • Unsa ang nahitabo kang Jesukristo diha sa Bukid sa Transpigurasyon? (Mateo 17:2.) Kinsa ang mipakita kanila ni Jesus ug Pedro, Santiago, ug Juan? (Mateo 17:3.) Kang kinsa nga tingog ang nadungog sa mga tinunan? (Mateo 17:5.) Ngano sa inyong hunahuna nga kining kasinatian mahimong makapalig-on sa pagpamatuod ni Pedro kang Jesukristo?

  5. Si Pedro ug Juan miayo sa usa ka lalaking bakol ug gitanggong ngadto sa bilanggoan (Mga Buhat 3:1–9; 4:6–20; 5:12–42).

    Iparibyu sa usa ka bata ang sugilanon nilang Pedro ug Juan nga miayo sa lalaki nga bakol. Isaysay ang nahibilin nga sugilanon gikan sa Mga Buhat 5:12–42.

    • Giunsa nila ni Pedro ug Juan pag-ikyas gikan sa bilanggoan? (Mga Buhat 5:19.) Unsa ang gisulti sa mga anghel kanila nga pagabuhaton? (Mga Buhat 5:20.) Unsa ang imong bation mahitungod sa pagbalik ngadto sa pagsangyaw human mabilanggo sa pagbuhat sa ingon? Unsa sa inyong hunahuna sa unsa nga paagi nga sila si Pedro ug Juan nakadawat sa kaligon sa pagbuhat unsa ang matarung?

    Tabangi ang mga bata nga makasabut nga kita mahimong dili mabilanggo tungod sa pagtudlo mahitungod kang Jesukristo, apan kita pagasulayan sa laing mga paagi. Sa unsang paagi kaha kamo mahimong sulayan tungod sa inyong pagpamatuod kang Jesukristo? (Tan-awa sa kalihokan sa pagpalambo 4.)

    • Sa unsa nga paagi nga ang pagpamatuod ni Pedro kang Jesukristo milambo? Ngano nga kita nagkinahanglan og lig-on nga pagpamatuod kang Jesukristo? Unsaon nato sa pagbaton niini nga pagpamatuod? Unsaon nato sa pagtabang sa atong mga pagpamatuod nga molambo? (Basaha ang mga kasulatan, pagtuon og dugang pa mahitungod kaniya, sunod sa mga sugo, pag-ampo, paminaw ngadto sa Espiritu Santo, tambong sa simbahan, ug uban pa.)

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa panahon sa leksyon o ingon nga usa pagribyu, katingbanan, o hagit.

  1. Tabangi ang mga bata nga makasabut nga ang usa ka pagpamatuod maglakip nga masayud sa mosunod:

    • Ang Langitnong Amahan buhi ug siya ang Amahan sa atong mga espiritu.

    • Si Jesukristo ang anak sa Langitnong Amahan ug ang atong Manluluwas.

    • Si Joseph Smith ang propeta pinaagi niya gipahiuli sa Ginoo ang ebanghelyo sa ulahing mga adlaw.

    • Ang Basahon ni Mormon mao ang pulong sa Dios ug naglangkob sa kinatibuk-an sa ebanghelyo.

    • Ang Simbahan ni Jesukristo sa mga Santos sa Ulahing mga Adlaw mao ang bugtong tinuod nga simbahan.

    • Kita gipangulohan og mga propeta ug mga apostoles karon.

    Hisguti ang mga paagi nga kita makaangkon og pagpamatuod niini nga mga kamatuoran.

  2. Ipasabut ug tabangi ang mga bata sa pagsag-ulo sa ika-siyam nga artikulo sa hugot nga pagtuo.

  3. Ipahunahuna sa mga bata ang mga kasinatian ni Pedro uban sa Manluluwas nga nakapadugang sa iyang pagpamatuod kang Jesukristo. (Pagpakaon sa 5,000, pag-ayo sa mga masakiton, pagpabangon sa anak nga babaye ni Jairo gikan sa mga patay, ug uban pa.) Sa unsa nga paagi nga kita masayud sa atong kaugalingon nga si Jesukristo mao ang Anak sa Dios? (Pinaagi sa pagtuon sa mga kasulatan, pag-ampo, pagsunod sa mga sugo, ug uban pa.)

  4. Pahinganli sa mga bata ang pila ka mga paagi diin ang ubang mga tawo maningkamot nga sila mahimong makalimod sa Simbahan o pagbuhat og usa ka butang nga sayop. Dayon hisguti kon unsaon nila nga mahimong ligon igo nga mosalikway niana nga mga tintasyon. Gamita ang mosunod nga mga ehemplo, kon gikinahanglan:

    • Adunay usa ka tawo nga naningkamot nga sila dili makatambong sa mga tigum sa Simbahan.

    • Adunay usa ka tawo nga naningkamot nga sila makasupak sa Pulong sa Kaalam.

    • Adunay usa ka tawo nga naningkamot nga sila makapamakak.

    • Adunay usa ka tawo nga naningkamot nga sila makagasto sa ilang salapi alang sa ikapulo.

    Hatagi og gibug-aton nga kita kinahanglan nga makaangkon og usa ka kaugalingon nga pagpamatuod kang Jesukristo nga mahimong lig-on sama kang Pedro.

  5. Isaysay ang mosunod nga sugilanon mahitungod sa kon unsa ang nahitabo kang Presidente Joseph F. Smith, ikaunom nga Presidente sa Simbahan, sa dihang siya usa ka batan-ong lalaki nga mipauli na gikan sa iyang misyon:

    “Usa ka adlaw human si Joseph F. Smith ug ang iyang kauban nakalakaw og duol-duol ug naghimo og kampo, usa ka panon sa hubog nga mga lalaki ang mihunong sa kampo sakay sa ilang mga kabayo, namalikas ug nagpasipala ug nagbahad nga mopatay sa bisan kinsang mga Mormon nga moagi sa duol sa ilang giagian. Ang uban sa mga kauban ni Joseph Smith nanglakaw paingon sa sapa ug dili makita sa dihang ilang nadungog ang mga lalaki nga nagsingabot. Sila naghulat nga makalabang na kining panon sa mga lalaki. Si Joseph F. Smith layolayo lamang og gamay gikan sa kampo, nangahoy aron ikasugnod sa dihang ang mga lalaki miabut. Sa dihang iya silang nakita, siya miingon nga ang iyang unang hunahuna mao ang pagpangita og dapit aron makatago. Dayon ang hunahuna miabot ngadto kaniya, ‘Ngano man nga ako modagan gikan niini nga mga tawo?’ Uban niana nga hunahuna siya maisugon nga milakaw padulong ngadto sa daob sa kampo nga ang iyang mga bukton napuno sa mga kahoy. Ang usa sa mga lalaki mipunting sa iyang pusi! sa batan-ong elder ug misukna sa kusog, maisug nga tingog, ‘Ikaw usa ba ka “Mormon”?’

    “Si Joseph F. Smith wala magduhaduha bisan sa makadiyot. Siya mitan-aw sa lalaki sa mata ug mitubag, ‘Oo, sir; gitina na sama sa panaptong delana; tinud-anay nga asul, matinud-anon kaayo.

    “Siya mitubag nga walay bisan unsa nga timaan sa kahadlok ug nakapakugang gayud pag-ayo sa lalaki. Ang lalaki migunit kang Joseph F. Smith sa kamot ug miingon: ‘Oo, ikaw ang labing makapahimuot nga lalaki nga akong gikahimamat! milamano, batan-ong lalaki, ako nahimuot nga makakita og lalaki nga mobarug alang sa iyang mga tinuohan’” (Joseph Fielding Smith, The Life of Joseph F. Smith, pp. 188–89).

  6. Tabangi ang mga bata sa pagsag-ulo sa Mga Buhat 5:29.

  7. Awita o basaha ang mga pulong sa “Ako Nasayud Akong Amahan Buhi” (Baruganan sa Ebanghelyo, 31110).

Panapos

Pagpamatuod

lhatag ang imong pagpamatuod bahin ni Jesukristo, ug pagpamatuod nga samtang kita makakat-on og dugang mahitungod kang Jesus ug maminaw ngadto sa pagsaksi sa Espiritu Santo, ang atong mga pagpamatuod kang Jesus mopadayon sa paglambo hangtud sa tibuok natong mga kinabuhi. Ipasabut nga kita siguro aduna pay mga pagduda ug mga pangutana, apan samtang kita magpadayon sa pagtuon sa mga kasulatan, pag-ampo, ug pagtuman sa mga sugo, ang atong mga pagpamatuod mahimong labaw ka lig-on.

Gisugyot nga Basahonon sa Panimalay

Isugyot nga ang mga bata magtuon sa Mateo 16:13–17 ug Mga Buhat 5:29–32 sa panimalay ingon nga usa ka pagribyu niini nga leksyon

Dapita ang usa ka bata nga mohatag sa panapos nga pag-ampo.