Si Esteban, ang Martir

Katuyoan

Aron sa pagtabang sa matag bata nga makasabut mahitungod sa Diosnong Kapangulohan.

Pagpangandam

Sa mainampoon nga paagi pagtuon sa Mga Buhat 6, 7:54–60, ug Doktrina ug mga Pakigsaad 130:22–23. Dayon pagtuon sa leksyon ug paghukom unsaon nimo sa pagtudlo ang mga bata sa mga asoy sa kasulatan. (Tanawa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Dugang basahonon: Mga Buhat 7:1–53 ug Joseph Smith—Kasaysayan 1:17.
SPilia ang mga pangutana sa panaghisgutan ug paggamit ug mga kalihokan sa pagpalambo nga makapaapil sa mga bata ug labing makatabang kanila sa pagkab-ot sa katuyoan niini nga leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Usa ka kopya sa Doktrina ug mga Pakigsaad.
3. Hulagway 7–40, Ang Unang Panan-awon (Mga Hulagway sa Ebanghelyo 403; 62470).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Isulat ang pulong martir diha sa pisara. Hangyoa ang usa ka bata sa pagduol sa atubangan sa klase.

Pang-atensyon nga Kalihokan

(Ngalan sa bata), ikaw ba andam nga mahimong usa ka martir?
Aduna bay usa kaninyo nga nasayud kon unsa ang usa ka martir?

Ipasabut nga ang martir usa ka tawo kinsa hugot nga nagtuo sa usa ka butang nga siya mohatag sa iyang kinabuhi ingon nga usa ka saksi.

Kini nga leksyon mahitungod sa usa ka tawo kinsa adunay hugot nga pagpamatuod sa Langitnong Amahan, Jesukristo, ug sa Espiritu Santo ug gipatay tungod niana nga pagpamatuod.

Asoy sa Kasulatan

Itudlo sa mga bata ang asoy sa kinabuhi ni Esteban ingon nga makita diha sa Mga Buhat 6 ug 7. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.)

Mga Pangutana sa Panaghisgutan ug Paggamit

Tun-i ang mosunod nga mga pangutana ug mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa kiase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

Ngano nga ang mga Apostoles mitawag og pito ka mga lalaki aron sa pagtabang kanila? (Mga Buhat 6:1–4.) Giunsa kining pito ka mga lalaki pagtawag? (Mga Buhat 6:3, 5–6.) Nganong ang mga Apostoles “mipandong sa ilang mga kamot” niadto nga mga lalaki? (Ang mga Apostoles mihatag kanila sa awtoridad sa pagkapari, diin ilang nadawat gikan kang Jesukristo, aron sa paghimo og piho nga mga tahas; ang tanan kinsa nakadawat sa pagkapari giorden pinaagi sa pagpatong sa mga kamot.)
Unsa nga mga hiyas ang anaa kang Esteban nga nakatabang kaniya sa pagabag sa mga Apostoles ug pag-alagad sa katawhan? (Mga Buhat 6:5, 8.) Giunsa niya pagpanalangin ang mga kinabuhi sa katawhan?
Ngano nga ang mga pangulo sa Judeo midala kang Esteban sa atubangan sa usa ka konseho? (Mga Buhat 6:9–12.) Unsa ang gihimo sa mga pangulo sa sinagoga nga bakak nga pamasangil nga gibuhat ni Esteban? (Mga Buhat 6:13–14. Ipasabut nga ang mapasipalaon nagpasabut sa pagsulti sa mabiaybiayon ug dili balaan nga pagtahud mahitungod sa Dios o sagrado nga mga butang.) Ngano nga sila naghunahuna nga si Esteban nagsulti og pasipala?
Unsa ang nahitabo sa nawong ni Esteban samtang siya nagsulti ngadto sa mga sakop sa konseho? (Mga Buhat 6:15.)

lasoy sa daklit pag-usab ang mga butang nga gisulti ni Esteban sa konseho (tan-awa sa Mga Buhat 7:1–53). Tabangi ang mga bata nga makasabut si Esteban nagpatin-aw ug nagpamatuod sa mga panalangin sa Dios ngadto sa katawhan sa Israel. Siya nag-ingon usab nga ang katawhan misupak sa Dios, nagdaugdaog ug mipatay sa mga propeta, ug misalikway ug mipatay sa Mesiyas.

Mga Pangutana sa Panaghisgutan ug Paggamit

Kinsa ang nakita ni Esteban sa dihang siya mihangad ngadto sa langit? (Mga Buhat 7:55.) Kinsa ang kuyog ni Esteban samtang siya nagpamatuod sa Langitnong Amahan ug ni Jesus? (Ang Espiritu Santo.)
Nakakita ba ang mga tawo nga naglibot ni Esteban sa panan-awon nga iyang nakita? Unsa ang ilang gibuhat? (Mga Buhat 7:57–59.) Unsa ang gisulti ni Esteban samtang sila nagbato kaniya? (Mga Buhat 7:59–60.) Ngano sa inyong hunahuna nga si Esteban nakahimo sa pagpasaylo sa mga tawo kinsa mipatay kaniya?

Ipakita ang huiagway Ang Unang Panan-awon.

Mga Pangutana sa Panaghisgutan ug Paggamit

Kinsa ang laing nakakita sa susama nga panan-awon sa Langitnong Amahan ug ni Jesukristo? (Joseph Smith—Kasaysayan 1:17.)
Unsa ang atong makat-unan mahitungod sa Langitnong Amahan, Jesukristo, ug ang Espiritu Santo gikan sa mga panan-awon nilang Esteban ug ni Joseph Smith? (Ikaw mahimong mogamit sa pagpalambo nga mga kalihokan 4 ug 5 aron sa pagtabang sa mga bata sa pagkat-on mahitungod sa mga sakop sa Diosnong Kapangulohan.)
Unsaon nato nga masayud nga ang Langitnong Amahan ug si Jesukristo anaa? Unsa ang kinahanglan natong buhaton aron mahimong takus sa pagpakig-uban sa Espiritu Santo? Tabangi ang mga bata nga makasabut nga kon kita motuman sa mga sugo, kita makadawat og usa ka pagpamatuod sa Langitnong Amahan ug ni Jesukristo pinaagi sa Espiritu Santo.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa panahon sa leksyon o ingon nga usa ka pagribyu, katingbanan, o hagit.

Basaha ang Juan 17:20–21 ug hisguti kon sa unsang paagi nga ang Langitnong Amahan, si Jesukristo, ug ang Espiritu Santo “usa” sa katuyoan. Ikaw mahimong modangop ngadto sa sanglitanan sa usa ka amahan, inahan, ug mga anak nga nagtinabangay sa pagbuhat alang sa usa ka katuyoan.

Ikaw mahimo usab nga mopasabut sa papel sa matag sakop sa Diosnong Kapangulohan diha sa atong mga pag-ampo: Kita mag-ampo ngadto sa Langitnong Amahan sa ngalan ni Jesukristo, ug ang mga tubag moabut pinaagi sa Espiritu Santo.
Ipasabut nga ang maisugon, matinud-anong mga tawo gawas kang Esteban nahimo usab nga mga martir tungod sa ilang pagpamatuod ug hugot nga pagtuo sa Langitnong Amahan ug ni Jesukristo. Gamita ang mga ehemplo sama sa mosunod gikan sa mga kasulatan:

Si Joseph Smith gidaugdaog sa dihang siya misulti sa uban mahitungod sa iyang panan-awon, ug si Joseph ug ang iyang igsoon nga si Hyrum sa aulahian gipatay.

Daghan sa mga nahaunang mga tinun-an ug mga Apostoles sa Simbahan ang gidaugdaog ug ang uban gipamatay. Si Santiago nahimong martir (Mga Buhat 12:2), ingon man si Pablo, ug kini naandan nga gituohan nga silang Pedro, Marcos, ug Mateo gipangmartir usab (tan-awa sa “Marcos,” “Mateo,” “Pablo,” ug “Pedro” diha sa Giya ngadto sa mga Kasulatan.

Tuguti ang mga bata sa pagsulti nimo kon unsa ang ilang nakat-onan gikan sa mga sanglitanan niining mga matinud-anong mga tawo.
Ribyuha ang ikalima nga artikulo sa hugot nga pagtuo. Hisguti kon giunsa sa mga pangulo sa Simbahan karon sa pagtawag og mga tawo ngadto sa mga katungdanan sa Simbahan, sama nga si Esteban gitawag sa pagtabang sa mga nahiuna nga mga Apostoles. Ipasabut nga kon ang usa ka tawo makadawat og usa ka tawag, siya gigahin pinaagi sa pagpandong sa mga kamot ug gihatagan og awtoridad sa paghimo og linaing mga kaakohan. Tabangi ang mga bata sa pagsabut nga kon ang mga batan-on nga mga lalaki o babaye mag-alagad sa mga kapangulohan sa mga korum sa pagkapari o klase sa mga Young Women, sila pagatawagon og igahin sa samang mga paagi.
Basaha ug hisguti ang Doktrina ug mga Pakigsaad 130:22–23. Tabangi ang mga bata nga makasabut nga ang Langitnong Amahan ug si Jesukristo adunay mahimayaon nga mga lawas sa unod ug bukog. Ang atong pisikal nga mga lawas imahen sa Langitnong Amahan ug ni Jesus. Ang Espiritu Santo usa ka persona sa Espiritu, nga walay lawas sa unod ug mga bukog.
Ipakita ang mosunod nga mga ginunting nga mga pulong o isulat ang mga pulong diha sa pisara:
- Ang Dios nga Kapangulohan
- Langitnong Amahan:
- Jesukristo:
- Ang Espiritu Santo:
Isulat ang mosunod nga mga pakigpulong nga naghulagway sa mga sakop sa Dios nga Kapangulohan diha sa lahi nga mga piraso sa papel. Hinumdumi nga ikaw nagkinahanglan og duha ka mga papel nga may “Adunay mahimayaon nga lawas sa unod ug mga bukog.”
- Langitnong Amahan:
  - Ang Amahan sa atong mga espiritu
  - Ang Amahan sa mortal nga lawas ni Jesus
  - Adunay mahimayaong lawas sa unod ug mga bukog
  - Kita nag-ampo kaniya
- Jesukristo:
  - Ang atong Manluluwas ug Manunubos
  - Adunay mahimayaong lawas sa unod ug mga bukog
  - Naglalang sa kalibutan
  - Adunay mortal nga inahan
- Ang Espiritu Santo:
  - Usa ka persona sa Espiritu
  - Nagsaksi sa Langitnong Amahan ug ni Jesus
  - Nagpadayag sa kamatuoran sa tanang mga butang (Moroni 10:5)
  - Mahimong atong makanunayong kauban.
Ribyuha ang papel sa matag sakop sa Dios nga Kapangulohan pinaagi sa pagtugot sa mga bata nga mopili og usa sa mga piraso sa papel nga imong giandam. Tuguti ang matag bata nga mobasa og kusog sa pamahayag, aron mailhan kon kinsa nga sakop sa Dios nga Kapangulohan nga gipasabut, ug mobutang sa pamahayag sa ubos sa tukma nga titulo.
Awita o basaha ang mga pulong sa “Ang Unang Pag-ampo ni Joseph” (Mga Baruganan sa Ebanghelyo, 31110).

Panapos

Pagpamatuod

Ipamatuod ang imong kasayuran sa Dios nga Kapangulohan, ug sultihi ang mga bata kon unsa kamahinungdanon kanimo nga makabaton niini nga kasayuran. Ipakigbahin sa mga bata ang imong gugma alang sa Langitnong Amahan, kang Jesukristo, ug sa Espiritu Santo.

Gisugyot nga Basahonon sa Panimalay

Isugyot nga ang mga bata magtuon sa Mga Buhat 7:54–60 ug Doktrina ug mga Pakigsaad 130:22–23 sa panimalay ingon nga pagribyu niini nga leksyon.

Pagdapit og usa ka bata nga mohatag sa panapos nga pag-ampo.