Leksyon 43

Si Pablo Nagpamatuod kang Jesukristo

Katuyoan

Aron sa pagtabang sa matag bata nga gustong magmaisugon sa pagpamatuod kang Jesukristo.

Pagpangandam

1. Sa mainampoon nga paagi pagtuon sa Mga Buhat 13:2–4; 14; ug 16:16–34. Dayon pagtuon sa leksyon ug paghukom unsaon nimo pagtudlo sa mga bata sa mga asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii).

2. Pilia ang mga pangutana sa panaghisgutan ug paggamit ug mga kalihokan sa pagpalambo nga makapaapil sa mga bata ug labing makatabang nila sa pagkab-ot sa katuyoan niini nga leksyon.

3. Pag-andam og usa ka kopya sa tanghaga nga nahimutang diha sa katapusan sa leksyon. Isulat ang pulong MAISUG sa dagko nga mga letra sa likod sa dili pa kini piraso-pirasohon sa paggunting.

4. Mga materyal nga gikinahanglan:

   1. Usa ka Biblia o usa ka Bag-ong Tugon alang sa matag bata.

   2. Usa ka piraso sa papel ug usa ka lapis alang sa matag bata.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Ipang-apud-apod ang mga piraso sa tanghaga ngadto sa mga bata. Hisguti ang kahulugan sa matag pulong sa mga piraso sa tanghaga ug ipasumpay nila ang mga piraso. Ipabali sa mga bata ang mga piraso ug ipasumpay og balik ang tanghaga aron sa pagpangita og lain nga pulong. Isulat ang pulong MAISUG diha sa pisara.

Pang-atensyon nga Kalihokan

• Unsa ang gipasabut sa pulong maisug? Ipasabut nga ang mga pulong diha sa mga piraso sa tanghaga nagtabang sa paghulagway unsa ang gipasabut sa magmaisugon.

• Unsa nga mga pulong sa tanghaga ang inyong mahinumduman? Isulat ang mga pulong o ipadayag ang mga piraso sa tanhaga ubos sa pulong MAISUG.

Mga Asoy sa Kasulatan

Ribyuha sa makadiyot ang pagkakabig ni Saulo ngadto sa ebanghelyo, ug sultihi ang mga bata nga ang ngalan ni Saulo giusab ngadto sa Pablo. Si Pablo mihunong sa paggukod sa mga sumusunod ni Jesus ug nahimong usa ka maisug nga Apostol ug misyonaryo alang kang Jesukristo.

Tudloi ang mga bata sa asoy sa mga misyonaryo nga kasinatian nila ni Pablo ug ni Barnabas nga makita sa Mga Buhat 13:2–4; 14 ug ang asoy sa kasina-tian nilang Pablo ug Silas sa bilanggoan nga makita sa Mga Buhat 16:16–34. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Hangyoa ang mga bata sa pagpaminaw sa mga paagi nilang Pablo, Barnabas, ug Silas nga maisugon nga nagpamatuod kang Jesukristo ug sa iyang ebanghelyo.

Mga Pangutana sa Panaghisgutan ug Paggamit

Tun-i ang mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa makagamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan.

Mga Pangutana sa Panaghisgutan ug Paggamit

• Unsa ang gisugo sa Ginoo nilang Pablo ug Barnabas nga buhaton? (Mga Buhat 13:2–4.)

• Human sila si Pablo ug Barnabas miayo sa bakol nga lalaki sa Lystra, kinsa sila sa pagtuo sa mga tawo? (Mga Buhat 14:11–12.) (Ipasabut nga silang Jupiter ug Mercurius mini nga mga dios nga gisimba sa mga tawo. Sila wala masayud sa Langitnong Amahan ug Jesukristo.) Unsa ang gisulay pagtudlo nilang Pablo ug Barnabas ngadto sa mga tawo mahitungod kang Jesukristo? (Mga Buhat 14:14–17.)

• Giunsa pagtagad si Pablo sa mga Judeo sa Antioch ug Iconium? (Mga Buhat 14:19.) Ngano sa inyong hunahuna nga siya mipadayon sa pagsangyaw sa ebanghelyo human gidagmalan?

• Ngano nga adunay piho nga mga lalaki sa Macedonia ang nasuko sa dihang silang Pablo ug Silas miayo sa usa ka babaye pinaagi sa pagpapahawa sa dautan nga espiritu gikan kaniya? (Mga Buhat 16:19.) Unsa ang gibuhat niining mga lalaki ngadto kanilang Pablo ug Silas? (Mga Buhat 16:20–23.)

• Unsa ang gibuhat nilang Pablo ug Silas samtang sila didto sa bilanggoan? (Mga Buhat 16:25.) Ngano sa inyong hunahuna nga sila nag-ampo ug nagawit og mga pagdayeg ngadto sa Dios? Unsa sa inyong hunahuna ang nahimo nga sangputanan sa ilang mga buhat ngadto sa ubang mga binilanggo?

• Ngano sa inyong hunahuna nga silang Pablo ug Silas nagpabilin diha sa bilanggoan sa dihang ang linog miabli sa mga pultahan sa bilanggoan? (Mga Buhat 16:27–31.) Sa unsang paagi nga ang ilang mga buhat nakapanalangin sa magbalantay sa bilanggoan ug sa iyang banay? (Mga Buhat 16:32–34.) Unsa nga matang sa mga kahigayunan ang ania nato sa pagpamatuod ug pagtudlo sa uban mahitungod kang Jesukristo?

• Ipabasa sa mga bata ang Mga Buhat 14:3 ug 16:18, 25, 31. Sa unsang paagi nga kining mga kasulatan nagpakita nga si Pablo maisugon sa iyang pagpamatuod kang Jesukristo bisan asa siya moadto? Unsaon nato sa pagpahibalo sa ubang mga tawo nga kita adunay lig-on nga mga pagpamatuod kang Jesukristo?

• Unsa ang pipila ka mga hagit nga mahimong atong maantus samtang kita maningkamot nga mahimong maisugon sa pagpamatuod ni Jesus?

Hagita ang mga bata sa paghunahuna og piho nga mga butang nga mahimong ilang buhaton karon nga semana aron sa pagpakita sa uban nga sila adunay lig-on nga pagpamatuod kang Jesukristo. Pasulata sila bisan og usa ka ideya ug ipabutang ang papel diin makita nila kini kanunay. Ikaw mahimong mopasulat nila usab sa mga pulong gikan sa tanghaga diha sa ilang papel.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsang higayon sulod sa leksyon o ingon nga usa ka pagribyu, katingbanan, o hagit.

1. Andama ang mosunod nga gilis sa mga pulong o isulat kini diha sa pisara:

   • Maisugong mihatag og pagpamatuod kang Jesukristo

   • Mitudlo mahitungod sa “ang buhi nga Dios”

   • “Miampo ug miawit og pagdayeg ngadto sa Dios”

   • Mipabilin sa bilanggoan ug miluwas sa tigbalantay

   • Mitudlo sa tigbalantay “sa pagtuo sa Ginoo nga si Jesukristo”

   Isulat ang mosunod nga mga pakisayran sa kasulatan sa managkalahi nga mga piraso sa papel: Mga Buhat 14:3, Mga Buhat 14:15, Mga Buhat 16:25, Mga Buhat 16:28, Mga Buhat 16:31.

   Ipakita ang gilis sa mga pulong ug pag-apud-apod sa mga pakisayran sa kasulatan sa tagsatagsa sa mga bata. Ipabasa sa mga bata ang kasulatan, usa sa matag higayon, ug pahukmi kon hain nga gilis sa pulong ang matag usa mahiapil. Ipasabut nga si Pablo usa ka maisug nga saksi ni Jesukristo bisan asa siya ug bisan unsa ang iyang gibuhat.

2. Basaha ang mga pulong diha sa mga piraso sa tanghaga sa makausa ug pahisguti sa mga bata kon unsaon nila sa pagpamatuod sa maisugon nga paagi kang Jesukristo niining mga dapita. Ikaw mahimong maghimo og mga sitwasyon, sama sa mosunod, nga nakasulat sa mga piraso sa papel. Dayon tuguti ang matag bata sa pagpili og usa ug ipasulti kon unsang paagi ang pili-on niya nga pag-atubang niana nga hagit:

   • Usa ka higala ang misulog-sulog nimo tungod kay ikaw dili mag-swimming sa Igpapahulay nga Adlaw.

   • Ikaw gidapit sa usa ka salida sa sine nga wala magsubay sa sumbanan sa Simbahan.

   • Pila sa imong mga higala ang nagsugod sa pagsulti og mga bastos nga mga komedya ug mga istorya.

   • Diha sa usa ka tindahan ang usa ka higala mikuha og usa ka singsing ug mibutang niini sa iyang bulsa ug miawhag nimo sa pagbuhat sa ingon.

   • Ang usa sa imong mga kauban sa tulunghaan naghimo og bakak nga mga pamahayag mahitungod sa mga doktrina sa Simbahan.

   • Ikaw gitintal sa pagtan-aw sa papel sa lain atol sa usa ka pasulit.

3. Ipadula sa mga bata ang sugilanon nilang Pablo ug Silas sa bilanggoan. Dayon tuguti sila sa pagpaaron-ingnon nga nag-interbyu kanilang Pablo, Silas, ug sa mga lalaki sa bilanggoan, sa magbibilanggo, ug iyang banay. Pangutan-a silang Pablo ug Silas ngano nga sila gibutang sa bilanggoan ug kon unsa ang nahitabo kanila diddto. Pangutan-a ang ubang mga lalaki sa bilanggoan kon unsa ang ilang gibati sa dihang silang Pablo ug Silas miampo ug miawit ug ang linog miabli sa pultahan sa bilanggoan. Pangutan-a ang magbalantay sa bilanggoan kon unsa ang iyang gibati sa dihang iyang nakit-an ang pultahan sa bilanggoan nga naabli ug ngano nga siya ug ang iyang banay gibunyagan.

Panapos

Pagpamatuod

lhatag ang imong kaugalingong pagpamatuod kang Jesukristo. Kon angay, ipaambit ang higayon sa dihang ang Langitnong Amahan mipanalangin nimo sa dihang ikaw nagmaisugon nga nagpamatuod kang Jesukristo.

Gisugyot nga Basahonon sa Panimalay

Isugyot nga ang mga bata magtuon sa Mga Buhat 16:16–34 sa panimalay ingon nga usa ribyu niini nga leksyon.

Pagdapit og usa ka bata nga mohatag sa panapos nga pag-ampo.