Leksyon 44

Si Pablo ang Misyonaryo

Katuyoan

Aron sa pag-awhag sa matag bata sa pagpangandam karon nga mahimong usa ka misyonaryo ug mopakigbahin sa ebanghelyo sa uban.

Pagpangandam

1. Sa mainampoon nga paagi pagtuon sa Mga Buhat 22:17–30; 23:10–24, 31–33; ug 26:1–2, 22–29. Dayon pagtuon sa leksyon ug paghukom unsaon nimo sa patudlo ang mga bata sa mga asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii).

2. Dugang mga basahonon: Mga Buhat 19–26 (alang sa tibuok nga asoy).

3. Pilia ang mga pangutana sa panaghisgutan ug mga kalihokan sa pagpalambo nga makapaapil sa mga bata ug labing makatabang nila sa pagkab-ot sa katuyoan niini nga leksyon.

4. Mga materyal nga gikinahanglan:

   1. Usa ka Biblia o usa ka Bag-ong Tugon alang sa matag bata.

   2. Ang tsart nga gilarawan sa pang-atensyon nga kalihokan (o ikaw mahimong modibuho niini diha sa pisara).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Pangutan-a ang mga bata kon unsa ang ilang nahinumduman mahitungod kang Pablo gikan sa miaging mga leksyon. (Pahinumdumi sila nga ang iyang ngalan giusab gikan sa Saulo.) Pahinumdumi ang mga bata nga si Pablo gitawag sa Ginoo nga mahimong usa ka misyonaryo ug usa ka linain nga saksi ni Jesukristo (tan-awa sa Mga Buhat 13:2; 20:24). Siya migahin sa nahibilin niyang kinabuhi sa misyonaryo nga pag-alagad.

Kon ikaw adunay usa ka LDS nga edisyon sa Biblia, tuguti ang mga bata sa pagpakli ngadto sa mga mapa 18–22 ug subaya ang misyonaryo nga panaw ni Pablo pinaagi sa ilang mga tudlo. (Tabangi ang mga bata sa pagsulti sa mga ngalan sa mga dapit.) Ipasabut nga sa dihang si Pablo nakabig, pipila lamang ka mga Judeo sa Jerusalem ug sa mga naglibot nga mga dapit ang nakadungog mahitungod kang Jesukristo. Ang kang Pablo nga upat ka pangmisyonaryo nga mga panaw midala kaniya ngadto sa mga katawhan nga Judeo ug ingon man ngadto sa mga Hentil (kadtong dili Judeo ang nasyonalidad) sa daghang mga nasud. Kini nga mga Hentil wala masayud mahitungod sa Langitnong Amahan ug ni Jesukristo. Sila nagsimba og mga dios-dios ug mga larawan. Bisan asa miadto si Pablo siya nagsangyaw sa ebanghelyo ni Jesukristo.

Pagdibuho og usa ka diyagrama nga susama sa mosunod diha sa pisara o sa usa ka tsart:

Pang-atensyon nga Kalihokan

• Giunsa si Pablo sa pag-andam nga mahimong usa ka misyonaryo?

Isulat ang mga tubag sa mga bata sa mga ang-ang nga gikan ni Pablo ngadto sa Misyonaryo. Siguradoha ang pag-apil sa mga ideya sama sa naghinulsol, pagtuo kang Jesukristo, gibunyagan, nakadawat sa gasa sa Espiritu Santo, nasayud sa ebanghelyo, ug nagpuyo sa ebanghelyo.

Asoy sa Kasulatan

Tudloi ang mga bata sa asoy kon unsa ang nahitabo kang Pablo human sa iyang ikatulo nga misyonaryo nga panaw. (Alang sa gisugyot nga mga paagi sa pagtudlo asoy sa kasulatan, tan-awa sa “Pagtudlo gikan sa mga Kasulatan,” p. viii.) Ipasabut nga kini ang katapusang pagduaw ni Pablo sa Jerusalem, ug nga samtang siya didto ang mga Judeo nga wala mituo kang Jesus buot nga mopatay kaniya. Tungod kay siya usa ka nasudnon nga Romano, siya miadto sa mga pangulo sa mga Romano sa Jerusalem ug Caesareaalang sa panalipod. Sila nanalipod kaniya pinaagi sa paghimo kaniya nga binilanggo sa Romano ug sa ngadto-ngadto mipadala kaniya sa Roma alang sa husay. (Ang asoy sa mga panaw ni Pablo sa Roma itudlo sa leksyon 45.) Ipasabut nga pinaagi sa tanan niyang mga paghusay, si Pablo mikuha sa tanang mga kahigayunan sa pagpamatuod kang Jesukristo.

Mga Pangutana sa Panaghisgutan ug Paggamit

Tun-i ang mosunod nga mga pangutana ug ang mga pakisayran sa kasulatan samtang ikaw nag-andam sa imong leksyon. Paggamit sa mga pangutana nga sa imong pagtuo labing makatabang sa mga bata nga makasabut sa mga kasulatan ug sa makagamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang niia nga makasabut sa mga kasulatan.

Mga Pangutana sa Panaghisgutan ug Paggamit

• Ngano nga ang mga Judeo nasuko kang Pablo? (Mga Buhat 22:17–21.) Tabangi ang mga bata nga makasabut nga si Pablo nagpamatuod sa usa ka panan-awon gikan kang Jesukristo bahin sa katawhan nga wala motuo kang Jesus. Ngano nga si Pablo wala naunsa? (Mga Buhat 22:24, 29.)

• Ang labawng kapitan mitugot kang Pablo sa pagbalik pag-atubang sa mga Judeo aron sa paghatag katin-awan sa iyang kaugalingon, ug sa makausa pa ang mga Judeo misulay sa pagpatay kaniya tungod sa iyang pagpamatuod. (Mga Buhat 23:10.) Giunsa ni Pablo pagpakita og kaisug ug hugot nga pagtuo niining panahon sa pagpanggukod? Unsa kahay inyong bation kon kamo anaa sa sitwasyon ni Pablo?

• Giunsa sa Ginoo paghupay si Pablo? (Mga Buhat 23:11.) Unsa sa inyong hunahuna ang gibati ni Pablo sa dihang iyang nahibaloan nga siya dili patyon? Giunsa sa Ginoo paghupay ug pagpanalangin ang mga misyonaryo karon?

• Giunsa sa mga Judeo sa pagplano sa pagpapatay kang Pablo? (Mga Buhat 23:14–15.) Kinsa ang miluwas kang Pablo niini nga piano? (Mga Buhat 23:16.) Giunsa sa labawng kapitan pagtabang si Pablo nga makaikyas gikan sa mga Judeo? (Mga Buhat 23:22–24.) Ngano sa inyong hunahuna nga ang Ginoo nanalipod kang Pablo?

Ipasabut nga si Felix, ang gobernador nga Romano, mipabilin kang Pablo nga binilanggo sa Caesarea sa sulod sa duha ka tuig hangtud nga si Festus nahimong bag-o nga gobernador. Si Pablo mihangyo og usa ka husay sa Roma, apan sa wala pa mibiya padulong sa Roma siya misaysay kang Festus ug ni Haring Agripasa sugilanon sa iyang pagkakabig ug mipamatuod kang Jesukristo.

Mga Pangutana sa Panaghisgutan ug Paggamit

• Unsa ang gibati ni Pablo mahitungod sa pagpakigsulti kang Haring Agripa? Ngano? (Mga Buhat 26:1–3.) Unsa ang iyang gitudlo sa hari ug ni Festus? (Mga Buhat 26:22–23.)

• Unsa ang reaksyon ni Festus sa pagpamatuod ni Pablo? (Mga Buhat 26:24.) Unsa ang reaksyon ni Haring Agripa? (Mga Buhat 26:28.) Unsa nga mga hinungdan ang mahimong anaa si Haring Agripa aron sa dili hingpit nga modawat sa pagpamatuod ni Pablo ug mahimong usa ka Kristiyano? Unsa ang ubang mga butang nga nakapugong sa mga tawo sa pagdawat sa ebanghelyo karon?

• Unsa ang naghatag kang Pablo og kaisug sa pagsangyaw ngadto sa hari ug sa gobernador? Pahinumdumi ang mga bata nga si Pablo gitawag aron mahimong saksi alang kang Jesukristo ug mikuha sa tanang kahigayunan sa pagpamatuod kaniya. Kanus-a kita makapaambit sa atong pagpamatuod kang Jesus ngadto sa uban? Unsaon ninyo sa pag-andam karon nga mahimong usa ka misyonaryo?

Hisguti ang mosunod nga mga kinutlo gikan kang Presidente Ezra Taft Benson:

“Mga batang lalaki sa Primarya, naglaraw ug nagpaabut nga makaalagad og usa ka full-time nga misyon alang sa Ginoo. Mga batang babaye, pag-andam alang sa misyonaryo nga pag-alagad kon kamo pagatawagon” (sa Conference Report, Abr. 989, p. 104; o Ensign, Mayo 1989, p.82).

“Oo…pag-andam karon [kon kamo siyam, napulo, o napulog-usa]. Andama ang inyong mga kaugalingon sa pisikal, sa panghunahuna, sa sosyal, ug sa espirituwal. Pagmasulundon kananunay ngadto sa mga may awtoridad. Sugod og usa ka saving account alang sa inyong misyon kon kamo wala pa makahimo sa ingon. Bayad sa inyong ikapulo, pagtinguha nga makabaton og usa ka pagpamatuod sa ebanghelyo pinaagi sa pagtuon ug pag-ampo” (sa Conference Report, Abr. 1985, p. 49; or Ensign, Mayo 1985, p. 37).

Mga Pangutana sa Panaghisgutan ug Paggamit

• Unsa nga mga lakang ang inyong nahimo nga nag-andam kaninyo sa pagpakigbahin sa ebanghelyo? Unsa nga mga lakang ang inyo pang himoon sa umaabut?

Pagdibuho og laing diyagramo diha sa pisara o sa tsart susama sa usa nga gigamit sa pang-atensyon nga kalihokan, nga gisulat ang pulong nga gikan sa Ikaw diin si Pablo nahimutang. Isulat ang mga tubag sa mga bata diha sa mga ang-ang nga nagpaingon sa Ikaw ngadto sa Misyonaryo. Siguroa ang pag-apil sa mga ideya sama sa pagtuo kang Jesus, pagpabunyag, pagdawat sa gasa sa Espiritu Santo, pagdawat sa pagkapari (mga batang lalaki), pagkat- on sa ebanghelyo, pagtuon sa mga kasulatan, pag-ampo, pag-adto sa simbahan, ug pagpuyo sa ebanghelyo sa panimalay, sa tulunghaan, o bisan asa ikaw moadto.

Mga Pangutana sa Panaghisgutan ug Paggamit

• Unsa nga mga talento o mga abilidad ang mahimo nimong palamboon karon nga makatabang nimo nga mahimong labaw nga maayong misyonaryo alang sa Ginoo?

• Nganong labing mahinungdanon ang pagtuon sa mga kasulatan sa pagandam sa pagtudlo sa ebanghelyo?

Ipakigbahin ang mga ehemplo kon sa unsang paagi nga ang pagka-andam nakatabang nimo o sa usa ka tawo nga imong nailhan sa pagpakigbahin sa ebanghelyo. Awhaga ang mga bata sa pagpakigbahin og kasinatian sa dihang sila o ang ilang banay nakaangkon og kahigayunan sa pagtudlo sa uban mahitungod sa ebanghelyo. Kon adunay mga tawo sa inyong klase nga mga nakabig, ikaw mahimong mohangyo nila sa pagpakigbahin kon sa unsa nga paagi nga ang misyonaryo o ang uban mitabang nila nga makat-on sa ebanghelyo ug makaangkon og usa ka pagpamatuod.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan sa bisan unsa nga higayon sa panahon sa leksyon o ingon nga usa ka pagribyu, katingbanan, o hagit.

1. Hatagi ang mga bata og tagsa ka piraso sa papel ug lapis ug tuguti sila sa pagdibuho og pila ka mga hagdanan. Ipasulat ang ilang mga ngalan diha sa ubos ug Misyonaryo diha sa ibabaw. Ipasulat nila ang mga lakang nga ilang gihimo ug pagahimoon pa aron sa pag-andam nga mahimong mga misyonaryo.

2. Paghimo og kopya alang sa matag bata sa saad sa Ginoo ngadto sa mga misyonaryo nga makita sa Doktrina ug mga Pakigsaad 84:88. Hisgyuti kini nga saad uban sa mga bata ug awhaga sila sa pagpadayag niini sa ilang mga panimalay.

Panapos

Pagpamatuod

Ipamatuod nga ang Langitnong Amahan ug si Jesus buot nga ang mga bata mag-andam karon sa pagtudlo sa ebanghelyo. Ipadayag ang imong pagbati nga ang usa sa labing maayo nga paagi nga ila kining mahimo mao ang pagsunod sa ebanghelyo ni Jesukristo matag adlaw.

Gisugyot nga Basahonon sa Panimalay

Isugyot nga ang mga bata magtuon sa Mga Buhat 23:10–24, 31–33 sa panimalay ingon nga usa ka pagribyu niini nga leksyon.

Pagdapit og usa ka bata nga mohatag sa panapos nga pag-ampo.