Leksyon 46

Si Jesukristo Moanhi Pag-usab

Katuyoan

Aron ipaila sa mga bata ang mga timailhan sa ikaduhang pag-anhi sa Manluluwas, ug sa pag-awhag kanila nga mag-andam sa ilang mga kaugalingon sa pagsugat kaniya.

Pagpangandam

1. Sa mainampoon nga paagi pagtuon sa Joseph Smith—Mateo 1:1–4, 21–55; diha sa Perlas nga Labing Bililhon; Mga Buhat 1:9–11; ug Doktrina ug mga Pakigsaad 29:11; 38:30; 101:24–25; 133:46–48. Dayon pagtuon sa leksyon ug paghukom unsaon nimo sa pagtudlo ang mga bata sa mga asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)

2. Dugang mga basahonon: Joseph Smith—Mateo 1:5–20 ug Doktrina ug mga Pakigsaad 45:16–75, 88:87–101.

3. Pilia ang mga pangutana sa panaghisgutan ug paggamit ug mga kalihokan pagpalambo nga makapaapii sa mga bata ug labing makatabang kanila sa pagkab-ot sa katuyoan niini nga leksyon.

4. Mga materyal nga gikinahanglan:

   1. Usa ka Perlas nga Labing Bililhon alang sa matag bata.

   2. Pipila ka mga kopya sa Biblia ug Doktrina ug mga Pakigsaad.

   3. Upat ka mga dahon sa igos (tan-awa ang sundanan sa ubos) nga ginunting gikan sa papel nga dekolor, o pagdibuho sa pisara, uban sa usa sa mosunod nga mga pulong o hugpong sa mga pulong nga nasulat diha sa matag dahon: mini nga Kristo, ang Israel nga gipundok, mga kalaglagan, langitnong mga katingalahan.

   4. Usa ka dibuho sa mga sanga sa usa ka kahoy nga igos nga gidibuho diha sa papel o sa pisara.

   5. Tape o lain nga igpapilit.

   6. Mga hulagway 7-3, Ang Pagkatawo ni Jesus (Mga Hulagway sa Ebanghelyo 200; 62116); 7-25, Ang Ikaduha nga Pag-anhi (62562); 7-43, Ang Pagkayab ni Jesus (Mga Hulagway sa Ebanghelyo 236; 62497); ug usa ka hulagway sa propeta karon.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Pagpakita og mga huiagway sa Ang Pagkatawo ni Jesus ug Ang Ikaduhang Pag-anhi.

Pang-atensyon nga Kalihokan

• Unsa nga mahinungdanong mga panghitabo sa kasaysayan sa yuta ang girepresentaran niining duha ka mga huiagway?

• Unsa nga mga timailhan ang nagpahibalo sa pagkatawo ni Jesus sa Betlehem? (Ang mga anghel miawit, usa ka bitoon ang nakita, adunay usa ka gabii nga walay kangitngit sa America, ug uban pa.)

• Unsa ang inyong bation kon kamo didto pa sa Betlehem sa dihang si Jesus natawo?

• Unsa sa inyong pagtuo ang kahimtang kon si Jesus moanhi sa yuta pagusab?

Ipasabut nga kon ang Manluluwas moanhi pag-usab, kini mao “ang mahinungdanon ug makalilisang nga adlaw sa Ginoo” (D&P 2:1). Daghang mga milagro ang mahitabo sa panahon nga si Kristo mobalik, ug ang tanang katawhan sa yuta masayud nga siya mao ang Manluluwas. Ngadto sa mga matarung kini mahimong usa ka panahon sa mahingpiton nga kalipay tungod kay sila magpuyo sa yuta, si Jesukristo maoy maghari, adunay kalinaw, ug si Satanas dili na makahimo sa pagtintal kanila sa pagbuhat og sayop. Kadtong kinsa mga dautan mahadlok ug maguol sa pag-anhi ni Jesus. Tungod kay sila wala makahinulsol, sila pagalagiagon (tan-awa sa D&P 29:9).

Asoy sa Kasulatan

Tudloi ang mga bata sa asoy sa kasulatan mahitungod sa ikaduhang pag-anhi sa Manluluwas nga makita sa Joseph Smith—Mateo 1:1–4, 21–55. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.)

Pahinumdumi ang mga bata nga ang usa sa mahinungdanong mga buhat ni Joseph Smith mao ang paghimo og usa ka bag-o nga hubad sa Biblia. Ang iyang hubad sa Mateo 24 naglangkob og mahinungdanon nga mga kamatuoran nga wala nasulat sa asoy sa Bag-ong Tugon mahitungod sa ikaduhang pag-anhi sa Manluluwas. Kini nga kapitulo mahinungdanon kaayo alang sa mga Santos sa Ulahing mga Adlaw nga kini gilakip sa Perlas nga Labing Bililhon ingon nga Joseph Smith—Mateo.

Mga Pangutana sa Panaghisgutan ug Paggamit

Tun-i ang mosunod nga mga pangutana ug sa mga pakisayran sa kasulatan samtang ikaw mag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug makagamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

• Sa dihang si Jesus misulti sa iyang mga tinun-an nga siya moanhi pag-usab, giunsa niya paghulagway kon unsa ang kahimtang sa iyang pagbalik? (Joseph Smith—Mateo 1:1.) Sa unsang paagi kini lahi sa paagi sa iyang pag-anhi sa yuta sa unang higayon?

• Human ang mga tinun-an makasabut nga ang pagbalik ni Jesus mahitabo sa human sa iyang pagkamatay ug pagkabanhaw, unsa ang buot nila nga mahibaloan? (Joseph Smith—Mateo 1:4.) Ngano nga ang mga tinun-an buot nga masayud mahitungod sa Ikaduhang Pag-anhi? Ngano nga mahinungdanon alang nato nga masayud mahitungod sa Ikaduhang Pag-anhi? Ipasabut nga si Jesus gusto sa mga sakop sa iyang simbahan, o sa mga pinili, nga makaila sa mga timailhan nga mag-una sa iyang pag-anhi aron nga sila dili malingla ug mahimong andam sa pagsugat kaniya.

• Ngano nga si Jesus mihatag nato og mga timailhan sa iyang ikaduhang pag-anhi? (Joseph Smith—Mateo 1:37, 39.) Ngano nga iyang gipahisama ang iyang ikaduhang pag-anhi ngadto sa usa ka kahoy nga igos? (Joseph Smith—Mateo 1:38.) (Ipakita ang hinlo nga mga sanga sa kahoy nga igos o pagdibuho sa latid diha sa pisara. Ipadayag ang mga dahon sa igos sa tukma nga mga panahon sulod sa nahibilin sa panaghisgot.)

• Unsa ang usa ka mini nga Kristo o mini nga propeta? (Joseph Smith—Mateo 1:21–22. Mga tawo ug mga relihiyon nga miangkon nga aduna sa kamatuoran ug misulay sa pagpahilayo sa mga tawo gikan sa tinuod nga simbahan ni Kristo.)

• Unsa ang mahimong buhaton sa mini nga mga Kristo ug mini nga mga propeta? (Joseph Smith—Mateo 1:22.) Sa unsa nga paagi nga ang mga pinili (matarung) makalikay sa paglingla? (Joseph Smith—Mateo 1:37, unang hugna.)

Hatagi og gibug-aton nga kita kinahanglan nga kanunay nga maminaw ngadto sa buhi nga propeta ug mosunod kon unsa ang iyang isulti nato nga buhaton aron sa paglikay nga malingla. Si Presidente Wilford Woodruff, ikaupat nga Presidente sa Simbahan, miingon, “Ang Ginoo dili gayud gusto nako o ni bisan kinsang lalaki kinsa nagbarug ingon nga Presidente sa iyang Simbahan sa pagpahisalaag kaninyo” (tan-awa sa Opisyal nga Pahayag—1 sa Doktrina ug mga Pakigsaad).

Mga Pangutana sa Panaghisgutan ug Paggamit

• Unsaon nato sa pagkaila sa tinuod nga Kristo kon siya moanhi? Unsaon niya sa pagpakita? (Joseph Smith—Mateo 1:25–26, 36; Mga Buhat 1:9–11; D&P 133:46–48.)

• Unsa ang panagtipon sa Israel? (D&P 45:69.) Sa unsang paagi nga ang mga misyonaryo mitabang sa pagpundok sa mga matarung ngadto sa Simbahan? (Joseph Smith—Mateo 1:31.) Ipasabut nga ang mga pinili nga mga tawo sa Dios, kinsa gitawag nga Israel, nagpuyo sa tanang dapit sa kalibutan. Sa dili pa moanhi si Jesus pag-usab, ang mga misyonaryo moadto ngadto sa tanang dapit sa kalibutan aron sa pagtudlo sa ebanghelyo. Kadtong kinsa modawat sa kamatuoran ug nagpabunyag magtipon ngadto sa mga istaka sa Zion. Sa unsang mga nasud nga ang mga sakop sa atong purok (o sanga) nag-alagad og mga misyon?

• Unsa ang gipasabut sa pulong nga kalaglagan? (Kadaot, kalamidad, pagkaguba, pagkagun-ob, pagkaalaot.) Unsa nga mga kalaglagan ang gisulti ni Jesus nga mahitabo sa dili pa ang iyang pag-anhi? (Joseph Smith-Mateo 1:28–30.)Unsa nga mga kalaglagan ang inyong nakit-an o nadunggan sukad?

• Unsa ang pipila sa langitnong mga katingalahan nga makita sa hapit na ang Ikaduhang Pag-anhi? (Joseph Smith—Mateo 1:33.)

• Sa unsang paagi nga ang yuta malimpyo sa panahon nga si Jesus moanhi pag-usab? (D&P 101:24–25.) Unsa kadugayon nga si Jesus magmando isip hari sa ibabaw sa kalibufan? (D&P 29:11.)

Hisguti ang mosunod nga kinutlo gikan kang Presidente Brigham Young, ikaduha nga Presidente sa Simbahan:

“Siya [Jesus] mopapas sa sala gikan sa yuta ug sa makalilisang nga sangputanan niini, ang mga luha matrapuhan gikan sa matag mata ug wala nay bisan unsa nga masakitan o madaot sa tanang balaan nga bukid sa Dios” (sa Journal of Discourses, 11:124).

Mga Pangutana sa Panaghisgutan ug Paggamit

• Kanus- a ang Ikaduhang Pag-anhi mahitabo? (Joseph Smith—Mateo 1:40, 46.) Ngano nga kita kinahanglan nga mag-andam alang sa pag-anhi ni Jesus? Unsaon nato sa pag-andam?(Joseph Smith—Mateo 1:47–50.) Unsa ang mahitabo niadtong kinsa wala nag-andam sa panahon nga si Jesus moanhi? (Joseph Smith—Mateo 1:51–55.)

Paghimog katingbanan pinaagi sa paghatag og gibug-aton nga si Jesus mihatag nato sa mga timailhan sa iyang pag-anhi aron nga kita makatimaan sa pag-abut niini ug mahimong andam. Ipasabut nga ang Ginoo nag-ingon nga kon kita andam kita dili angay nga mahadlok. (D&P 38:30.)

Basaha ang mosunod nga kinutlo gikan ni Presidente Ezra Taft Benson, ikanapulo ug tulo nga Presidente sa Simbahan:

“Kita nakaamgo ba nga kita nagpuyo sa mga adlaw sa katumanan niining mga timailhan ug mga katingalahan? Kita uban niadtong kinsa makakita og daghan niining mga panagna nga matuman…. Kita wala masayud sa adlaw ni sa takna sa Iyang pag-anhi, apan niini kita unta bation og pagsalig: Kita nagbarog duol ngadto sa halangdong adlaw sa Ginoo!” (The Teachings of Ezra Taft Benson, p. 20).

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan sa bisan unsa nga higayon sa panahon sa leksyon o ingon nga usa ka pagribyu, katingbanan, o hagit.

1. Paghimo og usa ka kopya sa mosunod nga mga pamulong alang sa matag bata. l-apud-apod ang mga pamulong ug paghatag og mga lapis ngadto sa mga sakop sa klase. Ipares-pares nila ang sinugdanan sa pakigpulong uban sa katapusan sa pakigpulong pinaagi sa pagbadlis gikan sa hugpong sa pulong sa unang kolum ngadto sa husto nga panapos sa ikaduha nga kolum. Ikaw mahimong motugot sa mga bata sa pagpangita sa mga pakisayran alang sa mga pakigpulong nga wala nila mahibaloi.

   Ang Ikaduhang Pag-anhi
   	Ang Langitnong Amahan lamang ang nasayud	mas hayag nga tan-awon kaysa adlaw (D&P 133:49).
   	Si Jesus magsul-ob	kanaog gikan sa langit (Mga Buhat 1:11).
   	Mga mini nga Kristo	usa ka mahimayaon nga adlaw alang sa mga matarung (D&P 2:1).
   	Si Jesus mo-	sa pulang mga saput (D&P 133:48).
   	Ang Ikaduhang Pag-anhi mahimong	diha sa tibuok nga kalibutan (JS—M 1:31).
   	Ang mga dautan paga-	molingla sa daghan (JS—M 1:22).
   	Sa panahon nga si Jesus moanhi, siya	tabunan sa kangitngit (D&P 45:42).
   	Mga misyonaryo mosangyaw sa ebanghelyo	sa tukmang takna nga si Jesus moanhi (JS—M 1:40).
   	Ang mga kalaglagan	pagalaglagon (D&P 29:9).
   	Ang adlaw paga-	mga gubat, mga kagutom, mga sakit, ug mga linog (JS—M 1:28–29).

2. Aron sa pagtabang sa mga bata nga mahibalo kon unsa ka maayo ang ilang pagpangandam alang sa Ikaduhang Pag-anhi, pagpangutana kanila sa mga mosunod o susama nga mga pangutana. Hunong human sa matag pangutana aron sa paghatag kanila og panahon sa paghunahuna mahitungod kon unsa sila ka maayo pag-andam niana nga dapita. Ayaw hangyoa ang mga bata sa pagtubag og kusog.

   Kon ang Manluluwas mianha sa akong balay, ako buot ba nga:

   • Mousab sa pila sa mga pulong nga akong gigamit?

   • Motipig sa pila sa mga magasin, basahon, o mga video?

   • Mobalhin sa mga istasyon diha sa telebisyon o mopalong sa telebisyon?

   • Mopalong sa huni nga akong gipaminaw?

   • Moilis sa akong mga saput nga labaw nga maligdong?

   • Modala kaniya bisan asa ako moadto?

   • Mopakuyog niya kanako kon ako kauban sa akong mga higala?

   • Mobasa sa mga balaan nga kasulatan sa makadaghan kaysa akong gibuhat karon?

   • Magtagad sa akong banay nga lahi sa akong kalagmitan nga gibuhat?

3. Ribyuha ug isag-ulo ang ikanapulo nga artikulo sa hugot nga pagtuo uban sa mga bata. Ipasabut nga ang mga panghitabo nga gihisgutan niini nga artikulo sa hugot nga pagtuo mao ang makapadasig nga mga butang nga atong malauman sa panahon nga si Jesus moanhi pag-usab.

4. Pagdaia og mga pamantalaan o mga peryodiko ug tuguti ang mga bata sa pagpangita og mga sinulat nga nagpakita sa mga kalaglagan nga nahitabo sa kalibutan.

5. Ribyuha ang sambingay sa napulo ka mga birhen gikan sa leksyon 25, ug hisguti ang mga butang nga gitudlo niining sambingay mahitungod kon unsa ang kinahanglan natong buhaton aron sa pag-andam alang sa Ikaduhang Pag-anhi.

6. Aron sa pagtabang sa mga bata nga makasabut sa usa ka paagi nga sila makaandam alang sa Ikaduhang Pag-anhi, hisguti ang mosunod nga kinutlo gikan kang Presidente Ezra Taft Benson:

   “Sa Basahon ni Mormon kita makakaplag og usa ka sumbanan alang sa pag-andam sa Ikaduhang Pag-anhi. Usa ka dakong bahin sa basahon nagtumbok diha sa pipila ka mga dekada sa hapit na ang pag-adto ni Kristo sa America. Pinaagi sa mainampingon nga pagtuon niana nga yugto sa panahon nga kita makatino ngano nga ang uban nalaglag sa makalilisang nga mga paghukom nga nag-una sa Iyang pag-adto ug kon unsa ang nagdala sa uban nga magbarug diha sa templo sa yuta sa Bountiful ug mihikap pinaagi sa ilang mga kamot ngadto sa mga samad sa Iyang mga kamot ug mga tiil” (The Teachings of Ezra Taft Benson, pp. 58-59).

   Ipasabut nga ang latid sa pagtuon alang sa sunod nga tuig mao ang Basahon ni Mormon. Kini mahimong usa ka talagsaon nga kahigayunan aron sa pagkat-on unsa ang atong angay nga buhaton aron mahimong espirituhanon nga andam alang sa ikaduhang pag-anhi sa Manluluwas.

Panapos

Pagpamatuod

Ipamatuod nga kadtong kinsa motuman sa mga sugo ug magpuyo nga matarung mahimong makalaum sa ikaduhang pag-anhi ni Jesukristo uban sa hingpit nga kalipay ug kamaya. Awhaga sa mga bata nga magmabinantayon sa kanunay alang sa mga timailhan sa ikaduhang pag-anhi ni Jesus ug mahimong espirituhanon nga andam alang niini nga mahimayaong panghitabo.

Gisugyot nga Basahonon sa Panimalay

Isugyot nga ang mga bata magtuon sa Joseph Smith—Mateo 1:46–55 sa panimalay ingon nga usa pagribyu niini nga leksyon.

Pagdapit og usa ka bata nga mohatag sa panapos nga pag-ampo.