Ang Pagkabata ni Jesukristo

Katuyoan

Aron sa pagtabang sa mga bata nga makat-on mahitungod sa pagkabata ni Jesus ug makasabut nga ang Dios mitagana og mga saksi sa pagpamatuod nga si Jesukristo iyang Anak.

Pagpangandam

Sa mainampoon nga paagi pagtuon sa Lucas 2:21–52, Mateo 2, ang Hubad ni Joseph Smith sa Mateo 3:24–26, ug Doktrina ug mga Pakigsaad 93:11–14. Dayon pagtuon sa leksyon ug paghukom unsaon nimo sa pagtudlo ang mga bata sa asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Pilia ang mga pangutana sa panaghisgutan ug mga kalihokan sa pagpalambo nga nga maoy makapaapil sa mga bata ug makatabang pag-ayo nila sa pagkab-ot sa katuyoan sa leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Usa ka makapaikag nga butang, sama sa usa ka handumanan sa banay, nga igo ang kagamyon nga dali matago sa lawak-klasehan.
3. Hulagway 7-6, Ang Batang Jesus didto sa Templo (Pakete sa mga Hulagway sa Ebanghelyo 205; 62500).

Gisugyot nga Kaiamboan sa Leksyon

Pagdapit og usa ka bata nga mohatag og pagsugod nga pag-ampo.

Pang-atensyon nga Kalihokan

Samtang ang mga bata mosulod sa klase, ipakita sa duha o tulo kanila ang butang nga imong gidala; unya itago kini sa dili pa moabut ang uban sa klase. Hangyoa ang usa sa mga bata nga nakakita sa butang sa paghulagway niini nga dili mosulti unsa kini. Pangutan-a ang klase kon sila nasayud ba unsa kini nga butang. Hangyoa ang laing mga bata kinsa nakakita sa butang sa paghulagway niini. Tabangi ang mga bata nga makasabut nga sila mahimong labaw nga sigurado mahitungod sa usa ka butang kon sila nakadungog niini gikan sa labaw sa usa ka tawo. Ipakita ang butang ngadto sa klase.

Ipasabut nga ang mga bata kinsa unang nakakita sa butang mibarug isip mga saksi tungod kay sila nasayud mahitungod sa butang ug mihulagway unsa kini. Ang saksi usa ka tawo kinsa adunay personal nga kahibalo sa usa ka butang ug nagpaambit niana nga kahibalo ngadto sa uban. Ang saksi usab mahimong usa ka butang nga naghatag og kamatuoran o kalig-unan; pananglit, ang Basahon ni Mormon nagsaksi nga si Jesus mao ang Kristo. Ipasabut nga sa dihang si Jesus usa pa ka bata, ang Langitnong Amahan mitagana og daghang mga saksi aron sa pagpamatuod nga si Jesus iyang Anak.

Asoy sa Kasulatan

Itudlo ang asoy sa pagkabata ni Jesus ingon nga makita diha sa mga kasulatan nga gisulat sa seksyon sa “Pagpangandam.” (Alang sa gisugyot nga mga paagi sa pagtudlo sa asoy sa kasulatan, tan-awa ang “Pagtudlo gikan sa mga Kasulatan,” p. viii)

Mga Pangutana sa Panaghisgutan ug Paggamit

Tun-i ang mosunod nga mga pangutana ug mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa paggamit sa mga baruganan sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan. Ikaw makagamit sa kalihokan sa pagpalambo isip usa ka ribyu sa miaging leksyon sa dili pa ikaw motudlo niini nga leksyon.

Mga Pangutana sa Panaghisgutan ug Paggamit

Ngano nga sila si Maria ug Jose midala sa bata nga Jesus ngadto sa templo? (Lucas 2:21–24.)
Giunsa ni Simeon pagkasayud nga si Jesus mao ang Anak sa Dios? (Lucas 2:25–30.)
Giunsa ni Ana pagsaksi nga si Jesus mao ang Anak sa Dios? Sa inyong pagtuo giunsa niya pagkahibalo kinsa siya? (Lucas 2:36–38.)
Sa unsa nga paagi nga ang maalamong mga lalaki nakahibalo nga si Jesus mao ang Anak sa Dios? Ngano nga sila mihatag kaniya og mga gasa? (Mateo 2:2, 11.)
Sa unsang paagi ikaw mahimong usa ka saksi ni Jesukristo?
Ngano nga ang Langitnong Amahan misulti kang Jose sa pagdala sa iyang banay ngadto sa Ehipto? (Mateo 2:13–14.) Unsa ang gibuhat ni Herod sa pagsulay sa pagpugong nga si Jesus mahimong hari? (Mateo 2:16.) Giunsa sa pagkahibalo ni Jose nga luwas na nga mobalik gikan sa Ehipto? (Mateo 2:19–20.) Diin mipuyo ang banay? (Mateo 2:21–23.)
Unsa sa inyong pagtuo ang gibuhat ni Jesus aron makaangkon og mga kasinatian ug kaalam? (HJS-Mateo 3:24–26; Lucas 2:40, 52; D&P 93:11–14.) Unsa nga mga butang nga mahinungdanon nga inyong mahibaloan samtang kamo nagdako? Unsa nga mga tumong ang inyong gihimo?
Ipakita ang huiagway nga Ang Batang Jesus didto sa Templo. Ngano nga ang mga lalaki sa templo nakadayeg kang Jesus? (Lucas 2:46–47. Timan-i nga sa Hubad ni Joseph Smith niini nga kasulatan nag-ingon “ug sila naminaw kaniya, ug nangutana kaniya og mga pangutana.”) Unsa ang gisulti niini ngari kanato kon unsa kadaghan ang nakat-unan ni Jesus sa iyang pagkabata? Unsa ang inyong mabuhat aron pagkat-on og labaw pa sa ebanghelyo? Sa unsa nga paagi mipasidungog ug mituman si Jesus sa iyang Amahan didto sa templo?
Unsa ang gibuhat ni Jesus sa pagpasidungog ug pagtuman nilang Jose ug Maria? (Lucas 2:51–52.) Ipasabut nga sila si Jose ug Maria mitudlo kang Jesus sa panahon sa iyang pagkabata sama sa atong mga ginikanan nga mitudlo kanato sa panahon sa atong mga pagkabata. Unsaon ninyo sa pagpasidungog ang inyong mga ginikanan?

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan sa bisan unsang higayon sa panahon sa leksyon o ingon nga usa ka ribyu, katingbanan, o hagit.

Pahinganli sa mga bata ang tanang mga tawo kutob sa mahimo gikan sa leksyon sa miaging mga semana kinsa misaksi nga si Jesukristo mao ang Anak sa Dios. Sa pagtabang sa mga bata nga makahinumdom niining mga saksi, ikaw mahimong mopatan-aw niia sa mosunod nga mga kasulatan: Lucas 1:30–32 (Gabriel), Lucas 1:41–43 (Elisabet), Juan 1:29–34 (Juan Bautista), ug Lucas 2:8–17 (ang mga anghel ug mga magbalantay sa karnero).
Hisguti ang mga tumong nga mahimo sa mga bata aron sa pagtabang nila nga makakat-on og dugang mahitungod sa ebanghelyo, sama sa pagbasa sa mga kasulatan matag adlaw, pag-ampo, pagsalmot sa gabii sa banay, ug uban pa. Ipasulat sa mga bata diha sa usa ka papel ang duha ka mga tumong nga makatabang nila nga makat-on og dugang mahitungod sa ebanghelyo karong tuiga. Awhaga sila sa pagbutang sa papel diin ilang makita kini kanunay.
Paghimo og kopya sa mapa sa katapusan niining leksyon alang sa matag bata sa imong klase. Ipapangita sa mga bata ug pabutangi og timaan ang mga dapit diin si Jesus mipuyo: Jerusalem, Bethlehem, Ehipto, ug Nazaret. (Mga mapa #2 ug #4 diha sa Giya ngadto sa mga Kasulatan mahimong makatabang kanimo niini nga kalihokan.)
Tabangi ang mga bata sa pagsag-ulo sa unang artikulo sa hugot nga pagtuo.
Isulat sa pisara ang mga pakisayran sa kasulatan sa mga higayon diin ang Langitnong Amahan misaksi nga si Jesus iyang Anak (Mateo 3:16–17; 17:5; 3 Nephi 11:6–8; Joseph Smith–Kasaysayan 1:17). Ipapangita sa mga bata ang mga pakisayran, ug hisguti unsa ang nahitabo sa matag higayon.
Tabangi ang mga bata sa pagsag-ulo sa Lucas 2:52.

Panapos

Pagpamatuod

Ipakigbahin uban sa mga bata ang imong mga pagbati mahitungod kang Jesukristo, ug sultihi sila ngano nga kini mahinungdanon alang kanimo nga siya mao ang Anak sa Dios. Tabangi sila nga makasabut nga sa panahon nga sila mosunod sa panig-ingnan ni Jesus sila labaw nga mahimong sama kaniya.

Kalihokan sa pagpalambo 2 mahimong magamit ingon nga usa ka tinuod nga kinabuhi nga paggamit sa leksyon.

Gisugyot nga Basahonon sa Panimalay

Isugyot nga ang mga bata magtuon sa Lucas 2:40–52 sa panimalay isip usa ka ribyu niini nga leksyon.

Pagdapit og usa ka bata sa paghatag sa panapos nga pag-ampo.