Si Jesukristo Naglimpyo sa Templo

Katuyoan

Aron pagtabang sa matag bata nga mobati og labaw nga gugma ug pagtahud alang sa Langitnong Amahan ug kang Jesukristo ug alang sa sagradong mga dapit.

Pagpangandam

Sa mainampoon nga paagi pagtuon sa Juan 2:13–16, Mateo 21:12–14, Lucas 19:45–48, ug Exodo 20:7. Dayon pagtuon sa leksyon ug paghukom kon unsaon nimo pagtudlo ang mga bata sa asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii).
Dugang nga basahonon: Marcos 11:15–17.
Pilia ang mga pangutana sa panaghisgutan ug mga kalihokan sa pagpalambo nga maoy makapaapil sa mga bata ug labing makatabang nila sa pagkab-ot sa katuyoan sa leksyon.
Mga materyal nga gikinahanglan:
1. Usa ka Biblia o usa ka Bag-ong Tugon sa matag bata.
2. Ang mosunod nga mga ginunting nga mga mga pulong:
  
  Kita mahimong magpakita sa atong gugma alang sa Langitnong Amahan ug ni Jesus pinaagi:
  
  Sa atong balaan nga pagtahud sa Primarya ug tigum sa sakramento.
  
  Sa pulong nga atong gigamit samtang kita nag-ampo.
  
  Sa paagi sa atong pagsinina.
  
  Sa paagi sa atong paglihok.
  
  Sa paagi sa atong pagsulti.
3. Hulagway 7-9, Si Jesukristo Naglimpyo sa Templo (pakete sa mga Hulagway sa Ebanghelyo 224; 62163).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Pagbadlis og pinahigda nga linya diha sa pisara. Isulat ang PAGTAHUD ibabaw sa linya ug WALAY PAGTAHUD sa ilalom. Hangyoa ang mga bata nga magpakaaron-ingnon nga usa ka higala moanha sa ilang panimalay. Sultii sila nga ikaw magbadlis og usa ka “linya sa pagtahud” sa pisara. Hisguti ang mga butang nga buhaton sa higala (tan-awa sa ubos), ug tuguti ang klase sa paghukom kon ang higala nagpakita og pagtahud o walay pagtahud diha kanimo ug sa imong panimalay. Pagbadlis og usa ka dili putol nga linya, nga motadlas sa pinahigda nga linya diha sa pisara, pasaka para sa mga kahimtang nga nagpakita og pagtahud ug paubos sa mga kahimtang nga nagpakita og walay pagtahud. Gamita ang mga kahimtang sama sa mga mosunod:

Ang higala:

Pang-atensyon nga Kalihokan

Naghulat nga walay timik sa gawas hangtud nga dapiton sa pagsulod.
Misulod nga lapokon ang mga tiil.
Nagpasalamat kanimo sa pagdapit nga moanha.
Nagsinggit ug nagsiyagit nga kusog sa imong panimalay.
Naghatag og katahuran sa imong mga ginikanan.
Nangayo og makaon.
Maampingon nga nagtagad sa imong mga kabtangan.
Wala manumbaling sa imong mga ginikanan sa dihang sila makigsulti kaniya.
Nagdapit kanimo sa pagduaw sa iyang balay.

Ang imong “linya sa pagtahud” mahimong sama niini:

Ipatubag sa mga bata ang mosunod nga mga pangutana sa ilang mga kaugalingon:

Pang-atensyon nga Kalihokan

Sa panahon nga ikaw moduaw sa panimalay sa usa ka higala, unsa ang porma sa imong “linya sa pagtahud”?
Sa panahon nga ikaw moanhi sa Primarya unsa ang porma sa imong “linya sa pagtahud”?
Unsa ang porma sa imong “linya sa pagtahud” samtang ikaw anaa sa imong kaugalingon nga panimalay?

Asoy sa Kasulatan

Itudlo ang asoy sa paghinlo ni Jesus sa templo sa Jerusalem. Ang asoy sa unang paghinlo anaa sa Juan 2:13–16. Ang ikaduha nga asoy, dul-an sa tulo ka tuig ang milabay ug mga pipila na lamang ka mga adlaw sa dili pa ang iyang pagkalansang sa krus, anaa sa Mateo 21:12–14 ug Lucas 19:45–48. (Alang sa gisugyot nga paagi sa pagtudlo sa mga asoy sa kasulatan, tan-awa sa “Pagtudlo gikan sa mga Kasulatan,” p. viii.) Samtang ikaw nagtudlo niining mga asoy, ipangutana sa mga bata ang ilang mga kaugalingon kon unsa ang gibati ni Jesus mahitungod sa Langitnong Amahan ug sa templo. Tabangi ang mga bata nga makasabut nga kining mao nga templo usa ka sagrado nga dapit, sama sa atong mga templo ug mga balay-tigumanan sa simbahan karon, ug si Jesus buot nga kita motahud niining balaan nga mga dapit.

Mga Pangutana sa Panaghisgutan ug Paggamit

Tun-i ang mosunod nga mga pangutana ug ang mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa paggamit sa mga baruganan ngadto sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan.

Mga Pangutana sa Panaghisgutan ug Paggamit

Unsa ang nakit-an ni Jesus nga gibuhat sa ubang mga tawo didto sa templo? (Juan 2:14.)
Ngano nga giabug ni Jesus ang mga tigbaligya ug mga tig-ilis og salapi gikan sa templo? Unsa man ang gisulti ni Jesus ngadto kanila? (Juan 2:16; Mateo 21:13; Lucas 19:45–46.)
Unsa ang gibuhat ni Jesus didto sa templo human siya miabog kanila? (Mateo 21:14; Lucas 19:47.)
Ngano sa inyong pagtuo nga mahinungdanon nga magpakita og balaan nga pagtahud sa sagradong mga dapit sama sa mga panimalay, mga templo, ug mga gambalay sa simbahan? Kang kinsa kita nagpakita og pagtahud?

Hisguti ang kamahinungdanon sa pagpakita og balaang pagtahud diha sa mga dapit nga human na gipahinungod ngadto sa Ginoo. Tabangi ang mga bata nga makasabut nga ang balaan nga pagtahud usa ka lalom nga pasidungog ug gugma.

Mga Pangutana sa Panaghisgutan ug Paggamit

Kinsa ang gipakitaan ni Jesus og gugma ug pagtahud sa dihang siya miabug sa mga tigpailis og mga salapi? (Juan 2:16.) Ngano nga iya kining gibuhat?
Unsaon kanato pagpakita og gugma ug pagtahud alang sa Langitnong Amahan ug kang Jesus diha sa simbahan? sa panimalay? sa tulunghaan? sa dula?

Ipakita ang mga ginunting nga mga pulong tagsatagsa. Hisguti uban sa mga bata ang mga paagi nga makapakita og gugma ug pagtahud sa Langitnong Amahan ug ni Jesus, lapil and mosunod nga mga ideya:

Mga Pangutana sa Panaghisgutan ug Paggamit

Kon kita magpakita og balaan nga pagtahud sa panahon sa sakramento, kita nagpakita og gugma ug pagtahud kang Jesus ug sa mga pakigsaad nga atong gihimo uban sa Langitnong Amahan.
Kon kita maminaw sa mga pakigpulong sa tigum sa sakramento ug magpakita og balaan nga pagtahud sa Primarya, kita makat-on og labaw pa mahitungod sa Langitnong Amahan ug ni Jesus ug sa unsay ilang buot ipabuhat kanato.
Kon kita mag-ampo sa tukma nga pamaagi, kita nagpakita og pagtahud sa Langitnong Amahan.
Kon kita magsinina sa ligdong nga paagi, kita nagpakita nga kita adunay pagtahud sa atong mga lawas isip sagradong mga nilalang sa Langitnong Amahan.
Kon kita nagbuhat sa gusto sa Langitnong Amahan ug ni Jesus nga atong buhaton, kita nagpakita nga kita nagtuo nila ug nga kini mahinungdanon alang kanato sa pagbuhat unsa ang ilang gihangyo nga atong buhaton.
Kon kita naggamit sa ngalan sa Ginoo sa balaan nga pagtahud ug wala magpataka sa paggamit niini, kita nagpakita sa uban nga kita nagtahud ug naghigugma kaniya.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan sa bisan unsang higayon sa panahon sa leksyon o ingon nga usa ka ribyu, katingbanan, o hagit.

Ipabasa sa mga bata ug ipasag-ulo ang Exodo 20:7. Isaysay ug hisguti ang mosunod nga hitabo nga gisaysay ni Presidente Spencer W. Kimball, ug tabangi ang mga bata nga mohimo og pasalig sa pagtuman niining mahinungdanon nga sugo.

“Diha sa ospital usa ka adlaw niana ako gisakay pagawas gikan sa lawak operahanan sa usa ka magbabantay kinsa napandol, ug didto migawas sa iyang masuk-anon nga mga ngabil ang dautang tunglo [pamalikas] uban sa kombinasyon sa mga ngalan sa Manluluwas. Bisan kon kalipungon, ako mikulo ug nangaliyupo: ‘Palihug! Palihug! Kana akong Ginoo kansang ngalan imong gipanamastamasan.’ Dihay sobrang kamingaw, unya usa ka malumo nga tingog mihunghong: ‘Pasayioa ko.’ Siya nakalimot og makadiyot nga ang Ginoo mapugsanon nga nagmando sa iyang tanang mga katawhan, ‘Dili mo pagagamiton ang ngalan sa Ginoo nga imong Dios sa pasipala; kay ang Ginoo dili mag-isip nga walay sala niadtong nagagamit sa iyang ngalan sa pasipala’ (Exodo 20:7)” (“President Kimball Speaks Out on Profanity,” Ensign, Peb. 1981, p. 3).
Pagkuha og pipila ka mga huiagway sa mga templo ug mga gambalay sa simbahan. Isulat ang mga ngalan sa mga templo ug mga gambalay diha sa lain nga mga piraso nga papel, ug hangyoa ang mga bata sa pagparisparis sa mga ngalan ngadto sa mga huiagway. Ipaparisparis nila ang mga ngalan ug mga huiagway sa ikaduhang higayon samtang ikaw nagpasabut sa unsang paagi kining mga gambalay nakatabang sa Ginoo sa pagpausbaw sa iyang buhat dinhi sa yuta.
Ihulagway ang mga pagbati nga imong naangkon sa dihang ikaw mitambong sa templo, o pagdapit og usa ka tawo sa inyong ward o branch sa pagpakigbahin sa iyang mga pagbati mahitungod sa templo. Tabangi ang mga bata sa pag-amgo unsa ka sagrado ang templo ug nga kadtong mga nagtambong mobati nga duol ngadto sa Ginoo didto. Hisguti unsa ang mahimo sa mga bata sa ilang mga kinabuhi aron mahimong takus nga mosulod sa templo.
Hatagi ang matag bata og usa ka piraso nga papel ug usa ka lapis. Ipasulat nila ang piho nga mga paagi nga sila makapakita og gugma, pasidungog, ug pagtahud alang sa Langitnong Amahan ug kang Jesukristo sa mosunod nga semana. Hangyoa sila sa pagbutang sa lista diin sila makakita niini sa kanunay.
Pagdibuho og lain nga “linya sa pagtahud” diha sa pisara samtang ang mga bata naghatag og mga sanglitanan sa mga lihok nga nagpakita og pagtahud o walay pagtahud diha sa gambalay sa simbahan.

Hagit

Gamita ang “linya sa pagtahud” pag-usab ug sultihi ang mga bata nga sila kinahanglan nga adunay “linya sa pagtahud” alang sa ilang relasyon uban sa Langitnong Amahan ug kang Jesukristo. Awhaga ang mga bata sa pagpataas sa ilang linya pinaagi sa pagpakita og gugma ug pagtahud alang sa Langitnong Amahan ug ni Jesus sa tanan nga ilang gibuhat.

Panapos

Pagpamatuod

Ipadayag ang imong mga pagbati sa balaan nga pagtahud alang sa Langitnong Amahan ug ni Jesukristo ug ang imong tinguha nga magpakita og gugma, pasidungog, ug pagtahud alang kanila pinaagi sa pamaagi sa imong pagpakabuhi.

Gisugyot nga Basahonon sa Panimalay

Isugyot nga ang mga bata magtuon sa Mateo 21:12–14 sa panimalay isip balik pagtuon niini nga leksyon.

Pagdapit og usa ka bata nga mohatag sa panapos nga pag-ampo.