Pasiuna

Isip lider sa Simbahan, mosunod ka sa ehemplo ni Jesukristo samtang mangalagad ka niadtong naapektohan sa krimen ug sa pagkabilanggo. Ang Langitnong Amahan nakaila ug nahigugma sa Iyang mga anak, ug ang imong pagserbisyo sa katungdanan sa Simbahan sa pagpangalagad sa prisohan makatabang sa daghan sa pagkat-on, pagtubo, ug pagpalambo og mga sundanan sa pagpakabuhi nga mogiya nila samtang nag-uswag sila subay sa dalan paingon sa ilang Manluluwas. Ang mga panghitabo nga mosangpot sa pagkabilanggo sa indibidwal sa kasagaran sakit kaayo ug nagkinahanglan og pagkaayo, pagkaalim, ug pagpasaylo. Samtang mangalagad ka, nagtabang ka sa Ginoo sa pagluwas sa Iyang mga anak, sa pagpalambo sa ilang mga kaugmaon, ug sa paghiusa nila ngadto sa ilang mga pamilya.

Ang mga lider gidapit sa pagkonsiderar sa mosunod nga mga pangutana:

• Klaro ba nato nga nailhan kadtong mga indibidwal ug mga pamilya nga naapektohan sa krimen ug sa pagkabilanggo, ug nahibalo ba kita unsay ilang gikinahanglan?

• Gitawag ug giandam ba nato ang mga miyembro sa atong stake nga motabang?

• Nakasabot ba kita sa katuyoan ug sa gitinguha nga resulta sa atong mga paningkamot?

• Pamilyar ba kita sa mga lagda sa lokal nga bilanggoan ingon man usab sa makatabang nga mga kapanguhaan sa komunidad?

• Giandam ba nato ang atong kaugalingon pinaagi sa pagtuon ug pag-ampo sa pagpadayon niini nga paningkamot sa pagpangalagad?

Sa Pagsugod

Daghang komplikado ug lisod nga mga kamatuoran ang kinahanglan gayod nga masabtan sa paghimo niini nga buhat. Kini nga mga lagda dili motubag sa matag sitwasyon, apan hinaot nga makahatag kini nimo sa gikinahanglan nga mga baroganan sa paghimo niini nga buhat. Ang atong abilidad sa pagpanalangin sa uban nga naapektohan sa krimen ug sa pagkabilanggo molambo kon atong tan-awon ang mga butang ingon nga kini mao gayod ug moserbisyo sa paagi nga mopakita niana nga pagsabot.