Paghinulsol ug Pag-uswag subay sa Dalan ngadto sa Manluluwas

Kasagaran sa proseso sa paghinulsol mahitabo tali sa usa ka indibidwal, sa Dios, ug niadtong kinsa naapektohan sa mga sala sa usa ka tawo. Hinuon, usahay ang bishop o ang presidente sa stake kinahanglan nga motabang sa mga miyembro sa Simbahan sa ilang mga paningkamot sa paghinulsol. Kon magtabang sa mga miyembro sa proseso sa paghinulsol, ang mga bishop ug ang mga presidente sa stake mahigugmaon ug maamumahon. Sila mosunod sa ehemplo sa Manluluwas, kinsa mibayaw sa mga indibidwal ug mitabang nila nga makapalayo sa sala ug mopaduol ngadto sa Dios. (Tan-awa sa Mateo 9:10–13; Juan 8:3–11; tan-awa usab sa Kinatibuk-ang Tamdanan nga Basahon, 32.1.)

Kining samang mga baroganan magamit kon motabang og mga indibidwal nga karon o sa milabayng panahon nabilanggo. Ang mga lider kinahanglang mosunod sa mga pag-aghat sa Espiritu ug mogamit sa gihatag nga direksiyon nga anaa sa mga kasulatan ug sa Kinatibuk-ang Tamdanan nga Basahon, kapitulo 32. Samtang buhaton nila kini, magiyahan sila sa pagtabang sa mga anak sa Dios nga makabalik sa dalan sa pakigsaad.

Pagtabang sa usa ka Hamtong nga Binilanggo

Ang mga lider giawhag sa pagtabang sa hamtong nga binilanggo sa paghinulsol, pagpasaylo sa ilang kaugalingon ug sa uban, ug pag-angkon og pagpamatuod mahitungod ni Jesukristo isip ilang Manluluwas. Ang mga lider kinahanglang motudlo nga ang Ginoo mahimong mohatag og kapasayloan ni bisan kinsa, bisan unsa pa ang ilang sitwasyon.

Mahimo nilang ipasabot og maayo nga, “siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom [niini]” (Doktrina ug mga Pakigsaad 58:42).

Ang mga lider kinahanglan usab nga motudlo nga ang dalan pabalik ngadto sa hingpit nga pagkamiyembro diha sa Simbahan dili makompleto hangtod human nga makagawas ang tawo gikan sa pagkabilanggo ug mahimong kabahin na usab sa ward. Ang kahimtang sa pagkamiyembro sa Simbahan mahimong makalibog sa mga chaplain ug sa mga opisyal sa bilanggoan ug kinahanglang dili makaapekto sa nangahitabong pag-atiman sa pagpangalagad.

Ang mga indibidwal nga wala pa gayod mabunyagi isip miyembro sa Simbahan apan nakadiskobre sa mga kamatuoran sa ebanghelyo samtang nabilanggo mahimong mangandam alang sa bunyag human sila makagawas.

Mga Konseho sa Pagkamiyembro

Ang konseho sa pagkamiyembro sa Simbahan usa ka importante nga lakang sa pagtabang sa usa ka tawo kinsa nakahimo og seryoso nga kriminal nga binuhatan nga maghinulsol ug mobalik ngadto sa dalan sa pakigsaad (tan-awa sa Kinatibuk-ang Tamdanan nga Basahon, 32.6, 32.9–32.14). Kini nga pagtabang mahimong maglakip sa paghatag og pormal nga restriksiyon sa pipila ka pribilihiyo sa pagkamiyembro diha sa Simbahan o pagbakwi sa pagkamiyembro sa usa ka tawo sulod sa usa ka panahon (tan-awa sa Kinatibuk-ang Tamdanan nga Basahon, 32.11.3, 32.11.4). Ang usa sa mga katuyoan sa mga restriksiyon sa pagkamiyembro sa Simbahan o pagbakwi sa pagkamiyembro mao ang pagtabang sa usa ka tawo nga makapahimulos sa matubsanong gahom ni Jesukristo pinaagi sa paghinulsol.

Ang konseho sa pagkamiyembro gikinahanglan kon ang usa ka miyembro nabilanggo tungod sa pagpatay, paglugos, sekswal nga pag-atake, pag-abuso sa bata o batan-on, pag-abuso sa usa ka kapikas o laing hamtong, binuhatan nga motuyo sa pagpasakit (bayolente, sekswal, o pinansyal), pakighilawas sa duol nga kabanay [incest], pornograpiya nga naggamit og bata, dinaghan nga kaminyoon, seryoso nga sala samtang naghupot og dakong katungdanan sa Simbahan, ug kadaghanan sa nakonbikto og bug-at nga krimen (tan-awa sa Kinatibuk-ang Tamdanan nga Basahon, 32.6.1).

Ang konseho sa pagkamiyembro mahimong kinahanglanon kon ang usa ka miyembro nabilanggo tungod sa bayolente nga mga buhat, mas ubos nga matang sa pag-abuso, sekswal nga imoralidad, malimbongon nga mga buhat, mga kalapasan sa pagsalig, ug ubang mga buhat (tan-awa sa Kinatibuk-ang Tamdanan nga Basahon, 32.6.2).

Ang bishop o ang presidente sa stake sa yunit diin nagpuyo ang tawo sa dihang nahimo ang krimen mohimo sa bisan unsa nga gikinahanglan nga aksiyon alang sa pormal nga mga restriksiyon o pagbakwi sa pagkamiyembro. Kon ang mga pribilihiyo sa pagkamiyembro gibutangan og restriksiyon, ang lider (o klerk kon gitugotan) mopadala sa rekord sa pagkamiyembro ngadto sa yunit nga responsable alang sa dapit diin ang tawo nabilanggo. Kon ang pagkamiyembro gibakwi, ang bishop o ang presidente sa stake mokontak sa lider niana nga yunit (tan-awa sa Kinatibuk-ang Tamdanan nga Basahon, 32.14.8, 32.15).

Komon nga walay konseho nga napahigayon sa wala pa mabilanggo ang usa ka miyembro. Usahay, ang mga lider nga adunay responsibilidad alang sa miyembro nga anaa sa bilanggoan kinahanglan nga modumala sa konseho sa pagkamiyembro.

Pagsuporta sa mga Indibidwal nga Nakonbikto sa Sekswal nga mga Sala

Ang mga lider kinahanglang makigtagbo niadtong nakonbikto sa usa ka sekswal nga sala aron mahibalo kon adunay legal nga mga kondisyon nga nagpugong sa ilang abilidad sa pagtambong sa Simbahan o sa ubang mga kalihokan. Ang mga lider kinahanglan usab nga mokontak sa help line sa Simbahan alang sa giya niini nga mga sitwasyon. Ang help line anaa alang sa mga bishop ug sa mga presidente sa stake.

• Estados Unidos ug Canada

• United Kingdom

• Ireland

• France

• Australia

• New Zealand

• Sa mga nasod nga walay help line, ang presidente sa stake kinahanglan nga mangayo og giya sa area legal counsel sa buhatan sa area.

Ang mga lider kinahanglang magpakitambag sa legal counsel sa Simbahan kon unsaon sa paghimo og angay nga mga panagsabot sa pagtabang sa indibidwal nga mouswag subay sa dalan balik ngadto sa Manluluwas samtang nagseguro sa kahilwasan sa tanang miyembro sa ward.

Ang konseho sa pagkamiyembro sa Simbahan mahimong usa ka importante nga lakang sa pagtabang sa usa ka tawo kinsa nakahimo og seryoso nga kriminal nga binuhatan nga maghinulsol ug mobalik ngadto sa dalan sa pakigsaad.

Ang ubang mga nasod motipig ug nasyonal nga database [koleksiyon sa mga impormasyon] sa mga nakonbikto sa sekswal nga krimen batok sa usa ka menor de edad. Ang mga nakasala sa panghilawas nga anaa sa parole o probation mahimong gipahamtangan og mga restriksiyon sa gobiyerno sa pag-apil sa sosyal nga mga kalihokan sama sa mga miting sa simbahan. Ang Simbahan motahod niini nga mga restriksiyon. Ang legal nga mga restriksiyon human mapagawas ang usa ka indibidwal mahimong magkalainlain, ug ang mga restriksiyon mahimong matangtang sa paglabay sa panahon. Depende sa mga sirkumstansiya, ang Simbahan mahimong mopatuman og dugang nga mga paagi sa pagpanalipod agi og dugang sa pormal nga legal nga mga restriksiyon sa indibidwal.

Mga Garment sa Templo

Ang Simbahan wala magdili sa usa ka hamtong nga binilanggo sa pagsul-ob sa mga garment sa templo. Apan, ang presidente sa stake kinahanglang mainampoong motimbang-timbang sa sitwasyon ug mohimo sa kataposang desisyon. Bisan unsa pa ang desisyon sa presidente sa stake, ang hamtong nga binilanggo kinahanglang makigtambayayong sa administrasyon sa prisohan ug sa chaplain aron sa pagtino kon siya makasul-ob ba og mga garment sa templo sa tukmang paagi.

Pagtabang sa mga Indibidwal nga Makaandam nga Makagawas

Ang mga lider makahatag og suporta sa mga bulan sa dili pa makagawas gikan sa pasilidad nga makapanalangin sa kinabuhi sa indibidwal human makagawas. Mahimo nilang ikonsiderar ang mosunod nga mga ideya:

• Motabang sa indibidwal sa paghimo og plano sa unsay buhaton sa unang 90 ka adlaw human makagawas. Kini nga plano mahimong maglakip sa pagpangita og dapit nga kapuy-an, pagpangita og trabaho, ug pagkonektar og usab sa pamilya ug lokal nga mga lider sa Simbahan alang sa padayon nga suporta.

• Mokontak sa bag-ong mga lider sa kaugalingon nga ward, ug motabang nga maandam sila sa paghatag og padayon nga suporta. Moawhag nila sa pagsangon og tigpangalagad nga magtiayon ug sa paghimo og kanunay nga mga interbyo sa gibuhian nga indibidwal.

• Subay sa mga lagda sa pasilidad, mohatag sa indibidwal og importanteng impormasyon sa pagkontak sa mga ahensya sa pagsuporta, mga kapanguhaan sa publiko, o uban pang mapuslanong mga kontak.

• Motabang sa paghan-ay sa transportasyon pinaagi sa pagsakay sa awto o libre nga tiket sa bus. (Tan-awa sa mga lagda sa “Kahilwasan.”)

• Maghisgot mahitungod sa mga kahadlok ug mga kabalaka nga mahimong anaa sa indibidwal mahitungod sa pagkagawas. Motabang sa pagsulbad sa mga kabalaka, mohatag og tambag, ug mohatag og mga panalangin sa pagkapari.

• Kon anaa, kontaka daan ang Church Transitional Services Office sa 1-801-240-7340.

Pagtabang sa mga Indibidwal human Makagawas

Ang unang pipila ka adlaw, mga semana, ug bisan mga bulan human makagawas gikan sa pagkabilanggo mahimong lisod kaayo. Kasagaran, ang indibidwal walay luwas nga kapuy-an o maayong mga kahigayonan sa panarbaho. Ang pagpahiangay sa kinabuhi sa gawas sa pagkabilanggo makapaluya sa emosyon, ug ang daan nga mga buhat sa pagkaadik ug uban pang kinaiya mahimong makadani. Ang suporta sa pamilya, mga higala, ug mga miyembro sa Simbahan niining panahona mahinungdanon.

Kini nga mga pangutana tingali makatabang nga rebyohon kon maghatag og suporta:

• Asa magpuyo ang maong tawo? Luwas ba siya ug anaa sa dalan padulong sa pagpanarbaho ug sa koneksiyon sa pamilya ug sa lokal nga mga miyembro sa Simbahan?

• Unsa ang sunod nga mga lakang sa mga paningkamot sa tawo nga mapabarog pag-usab ang usa ka luwas ug mabungahon nga kinabuhi?

• Aduna bay gikinahanglan nga medikal nga mga appointment o uban pang panginahanglan sa kahimsog?

• Unsa ang mahimo sa pamilya, mga higala, ug sa Simbahan aron matabangan ang tawo nga mobati nga gihigugma ug mouswag?

• Unsa nga mga ahensiya sa komunidad ug mga kapanguhaan ang magamit sa pagtabang?

• Gikinahanglan ba ang pagtambal ug pagtambag? Sa unsa nga paagi nag-uswag ang tawo? Unsaon sa tawo pagbayad niini? Kinahanglan ba nga adunay buhaton nga mga kausaban sa pagtambal o pagtambag?

• Kinahanglan ba nimong tabangan ang tawo nga makasabot sa bisan unsang mga kausaban o anotasyon sa iyang rekord sa pagkamiyembro?

Dugang pa, samtang ang mga lider magpahigayon og konseho sa pagkamiyembro alang sa usa ka hamtong nga nabilanggo kaniadto, giawhag sila sa pagkonsiderar sa rason sa pagkabilanggo sa indibidwal, sa gidugayon sa pagkabilanggo, ug sa espirituhanong mga kinaiya nga napalambo sa indibidwal. Sa kasagaran, ang hamtong nga binilanggo nakagahin na og mga tuig sa paghinulsol, pagtambong sa mga serbisyo sa Simbahan, pagtuon, ug pagserbisyo sa uban kutob sa iyang mahimo. Sa ingon nga mga sitwasyon mahimong angay nga ang mga konseho sa pagkamiyembro, magsunod sa mga lagda sa Kinatibuk-ang Tamdanan nga Basahon, kapitulo 32, aron mapadali ang proseso sa pagrebyo ug sa pagtabang sa indibidwal nga makabalik dayon sa dalan sa pakigsaad ug sa hingpit nga pagkamiyembro.

Ang mga programa sa Simbahan sama sa Family Services, mga grupo aron maulian sa pagkaadik, o mga klase sa pagbarog pinaagi sa kinaugalingong paningkamot mahimong parehas nga makatabang. Ang mga lider ug mga miyembro mahimong mokontak sa Church Transitional Services Office alang sa dugang nga tabang sa 1-801-240-7340.