Mga Responsibilidad sa Stake

Ang presidente sa stake ang modumala sa mga paningkamot sa pagpangalagad sa prisohan sa mga utlanan sa stake ug motino sa matang sa suporta nga ihatag sa matag pasilidad sa bilanggoan. Kini nga mga paningkamot naglakip sa pagsuporta sa mga hamtong ug sa kabatan-onan nga binilanggo. Ang stake mahimong mag-organisar og grupo sa pagpangalagad sa prisohan aron mosuporta niini nga buhat. Kasagaran, ang grupo maglangkob sa presidente sa stake o usa sa iyang mga magtatambag, usa ka high councilor, usa ka sakop sa kapangulohan sa Relief Society, ug ubang mga magtiayon o mga indibidwal nga gitawag sa stake. Sa pipila ka sitwasyon, ang organisasyon sa usa ka branch sa Simbahan mas makahatag sa gikinahanglan nga suporta (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 37.6). Ang tanang paningkamot sa pagpangalagad kinahanglan nga nagsunod sa mga lagda sa administrasyon sa lokal nga bilanggoan.

Ang mga lider sa stake ug sa ward magtambayayong usab sa pag-atiman niadtong bag-o lang nga nakagawas gikan sa pagkabilanggo. Sila moatiman sa mga sakop sa pamilya nga adunay minahal nga nabilanggo.

Kon ang stake nagkinahanglan og tabang sa paghatag og serbisyo ngadto sa prisohan o sa bilanggoan nga anaa sa sulod sa mga utlanan, ang Kapangulohan sa Area mahimong mosangon og usa ka stake o dugang pa nga mga stake nga anaa sa duol aron motabang.