Mga Palisiya sa Pagpadala og Sulat

Pagpadala og Sulat pinaagi sa Koreyo

Ang pagpangalagad niadtong mga nabilanggo mahimong maglakip sa pagkontak nila pinaagi sa pag-email o pagpadala og sulat pinaagi sa koreyo. Ang tukma sa panahon nga pagtubag sa mga sulat sa nabilanggo nga indibidwal mahinungdanon sa ilang pagkat-on ug kaayohan. Ang komunikasyon pinaagi sa koreyo makahatag nimo og oportunidad sa pagdapit sa binilanggo sa pagduol ngadto ni Jesukristo ug sa paghatag og personal nga pagpangalagad. Magtugot usab kini kanimo sa pagtubag sa ilang mga pangutana, sa pagdasig nila, ug sa pagpakigbahin sa mga materyal sa Simbahan aron matabangan sila nga mas mapaduol ngadto sa Manluluwas.

Ang presidente sa stake mahimong motawag og mga indibidwal, lakip na sa mga magtiayon, aron mopadala og sulat ngadto sa usa ka binilanggo. Ang tanang komunikasyon kinahanglang magpakita og Kristohanong gugma, maglikay sa pagpanaway o pagpanghimaraot sa kriminal nga binuhatan sa indibidwal.

Ang mosunod nga mga lagda magamit kon mopadala og sulat ngadto sa nabilanggo nga mga indibidwal:

• Ang tigtubag sa sulat kinahanglan labing minos 18 anyos.

• Ang kahon sa post office kinahanglang gamiton aron sa pagpanalipod sa kapribado sa tigtubag sa sulat.

• Ang mga sulat dili mosobra sa lima ka pahina.

• Ang mga sulat kinahanglang pirmahan gamit lamang ang ngalan sa tigtubag sa sulat ug kinahanglang likayan ang pagpakigbahin sa bisan unsa nga nailhan nga personal nga mga detalye.

• Ang adunay kolor nga mga sobre, adunay kolor nga papel o stationery, mga kard sa pagpangumusta, hugpong sa mga kard, ug ubang daghang hut-ong sa mga papel wala gitugot.

• Ang pagpadala og personal nga mga litrato o kwarta wala gitugot.

• Ang pagkontak sa mga higala o pamilya sa nabilanggo nga indibidwal wala gitugot.

• Ang pagpangutana mahitungod sa mga hinungdan o mga detalye sa pagkabilanggo sa indibidwal wala gitugot.

• Ang mga sulat gikan sa nabilanggo nga indibidwal kinahanglang ikonsiderar nga kompidensiyal. Mahimo kining tipigan diha sa luwas nga dapit hangtod sa unom ka bulan, human niana kinahanglang gision kini. OK ra nga i-scan ug i-email ang mga sulat sulod sa usa ka gisangonan nga stake. Pero, ang bisan unsang elektronik nga mga kopya kinahanglang i-delete human sa unom ka bulan.

• Ang tanang sulat kinahanglang masulat uban sa pagsabot nga ang mga komunikasyon imonitor ug basahon sa kawani sa pasilidad.

• Ang mga sulat kinahanglang dili maghatag og legal nga tambag o komentaryo bahin sa legal nga mga proseso.

• Kon ang sulat sa nabilanggo nga indibidwal maglakip og pagkompisal sa dugang nga kriminal nga binuhatan, pagpanghulga nga mopasakit sa usa ka tawo, o magpahayag og legal nga pagpanimalos batok sa Simbahan, niana ang mga lider kinahanglan nga mokontak dihadiha dayon sa Office of General Counsel sa 1-801-240-6301.

Pag-order og mga Basahon sa Simbahan

Ang mga lider sa stake giawhag sa paghatag sa matag nabilanggo nga indibidwal og kopya sa mga kasulatan, subskripsiyon sa Liahona nga magasin, ug uban pang mga basahon nga makasuporta sa pagkaayo, sa mental o emosyonal nga kaayohan, pagkaayo gikan sa pagkaadik, ug pagbarog pinaagi sa kinaugalingong paningkamot. Kadaghanan sa mga pasilidad mohatag og limitasyon sa gidaghanon sa personal nga mga aytem nga mahimong mabatonan sa usa ka indibidwal.

Seguroha nga mosunod niini nga mga lagda:

• Ayaw pagpadala og gigamitan og baga nga hapin o gigamitan og spring nga mga basahon.

• Ang tanang balaod sa pasilidad kinahanglang sundon. Palihog tan-awa ang website sa pasilidad alang sa mga detalye. Sa daghang sitwasyon, ang gi-order nga mga materyal kinahanglang direkta nga ipadala gikan sa tigmantala o tig-apud-apod ngadto sa padalhan nga address sa pasilidad.

• Ang tibuok nga ngalan sa nabilanggo nga indibidwal, numero sa binilanggo, ug ang yunit o selda nga nahimutangan kinahanglan nga ibutang sa gi-order, ingon man ang padalhan nga address sa pasilidad sa bilanggoan.

• Ang mga pundo sa Simbahan mahimong gamiton sa pagpamalit sa tukmang mga basahon gikan sa kasaligan nga mga namaligya og mga basahon.

Proseso sa Pagtugot sa Pagbisita sa Bilanggoan

Ang mga lider kinahanglan nga mosunod sa piho nga mga balaod sa mga pagbisita sama sa makita diha sa website sa pasilidad sa bilanggoan. Ang kanunay nga mga pagbisita, sinemana nga mga tulumanon sa pagsimba, o ubang mga klase kinahanglang ipakigsabot uban sa tabang sa chaplain sa bilanggoan. Ang pagbaton og maayong relasyon sa chaplain makatabang og dako nganha nimo ug niadtong imong giserbisyohan. Ang ubang bilanggoan nagkinahanglan nga ang mga lider sa Simbahan mohatag og sinulat nga pagtugot nga sila giaprobahan nga representante sa Simbahan. Ang mga lider mahimong mo-email sa opisina sa Pagpangalagad sa Prisohan sa punoang buhatan sa Simbahan sa paghangyo og sulat alang niini nga katuyoan sa [e-mail].