« តើអ្វីទៅជាការប្រឹក្សាអំពីការប្រព្រឹត្តតាមចំណង់ផ្លូវភេទ ? » ការប្រតិព័ទ្ធភេទដូចគ្នា ៖ ថ្នាក់ដឹកនាំសាសនាចក្រ ( ឆ្នាំ ២០២០ )

« តើអ្វីទៅជាការប្រឹក្សាអំពីការប្រព្រឹត្តតាមចំណង់ផ្លូវភេទ ? » ការប្រតិព័ទ្ធភេទដូចគ្នា ៖ ថ្នាក់ដឹកនាំសាសនាចក្រ

តើអ្វីទៅជាការប្រឹក្សាអំពីការប្រព្រឹត្តតាមចំណង់ផ្លូវភេទ ?

ការរស់នៅជីវិតដ៏បរិសុទ្ធ

« តើអ្នករាល់គ្នាមិនដឹងទេឬអី ថាខ្លួនអ្នករាល់គ្នាជាព្រះវិហារនៃព្រះ ហើយថាព្រះវិញ្ញាណនៃព្រះ ទ្រង់សណ្ឋិតក្នុងអ្នករាល់គ្នា ? » ( កូរិនថូស ទី១ ៣:១៦ ) ។

រូបកាយរបស់យើងគឺជាអំណោយដ៏ពិសេសមួយមកពីព្រះ ។ រូបកាយផ្ដល់ដល់វិញ្ញាណរបស់យើងនូវរបៀបមួយ ដើម្បីដកពិសោធន៍ពិភពខាងសាច់ឈាម ។ រូបកាយគឺជាផ្នែកគន្លឹះចំពោះសក្ដានុពលរបស់យើង ដើម្បីឆ្ពោះទៅរកភាពតម្កើងឡើង ។ ការរៀនគ្រប់គ្រងលើរូបកាយរបស់យើង គឺជាផ្នែកដ៏សំខាន់មួយដើម្បីប្រែក្លាយដូចជាព្រះវរមាតាបិតាសួគ៌របស់យើង ។ ដើម្បីគ្រប់គ្រងលើខ្លួនឯងបាន វាត្រូវការពេលវេលា ការអនុវត្ត និងចិត្តអំណត់ ប៉ុន្ដែវាមានលទ្ធផលដ៏អស់កល្ប ។

ព្រះបានបង្គាប់យើងឲ្យ « ទប់អស់ទាំងតណ្ហារបស់ [ យើង ] ដើម្បីឲ្យ [ យើង ] អាចបានពោរពេញទៅដោយសេចក្ដីស្រឡាញ់ » ( អាលម៉ា ៣៨:១២ ) ។

ការរស់នៅតាមច្បាប់ព្រហ្មចារីភាពគឺជាប្រភពមួយនៃពរជ័យដ៏មហិមា ។ ដូចដែលប្រធាន ម៉ារ៉ុន ជី រ៉ុមនី បានប្រកាស ៖ « ខ្ញុំមិនអាចគិតដល់ពរជ័យណាដែលប្រាថ្នាចង់បានដោយចិត្តក្លៀវក្លាជាង ពរជ័យដែលបានសន្យាដល់ពួកអ្នកមានចិត្តបរិសុទ្ធ និងគុណធម៌នោះទេ ។ ព្រះយេស៊ូវបានមានបន្ទូលអំពីរង្វាន់ដ៏ជាក់លាក់សម្រាប់គុណធម៌ខុសៗគ្នា ប៉ុន្ដែបានបម្រុងទុករង្វាន់ដ៏ធំបំផុតសម្រាប់អ្នកដែលមានចិត្តបរិសុទ្ធ ដែលចំពោះរូបខ្ញុំវាហាក់ថា ទ្រង់បានមានបន្ទូលថា ‹ ដ្បិតអ្នកទាំងនោះនឹងបានឃើញព្រះ › ( ម៉ា. ៥:៨ ) ។ ហើយពួកគេមិនត្រឹមតែនឹងបានឃើញព្រះអម្ចាស់ប៉ុណ្ណោះទេ ប៉ុន្ដែពួកគេថែមទាំងនឹងមានអារម្មណ៍ល្អនៅក្នុងវត្តមានរបស់ទ្រង់ទៀតផង ។

« ហើយនេះគឺជា … សេចក្ដីសន្យារបស់ព្រះអង្គសង្គ្រោះ ៖ ‹ សូមឲ្យគុណធម៌តុបតែងគំនិតអ្នក ដោយឥតឈប់ឈរឡើយ ខណៈនោះ អ្នកនឹងមានចិត្តក្លាហានឡើងនៅចំពោះវត្តមាននៃព្រះ › ( គ.&ស. ១២១:៤៥ ) » ( « Trust in the Lord » Ensign ខែ ឧសភា ឆ្នាំ ១៩៧៩ ទំព័រ ៤២ ) ។

ជីវិតខាងផ្លូវភេទគឺជាផ្នែកដ៏សំខាន់មួយនៃភាពជាមនុស្ស ហើយវាក៏ជាប្រភពនៃតណ្ហាដែលត្រូវទប់ឲ្យជាប់ផងដែរ ។ ថ្វីបើមានអារម្មណ៍ដ៏ខ្លាំងទាំងនេះក្ដី ក៏មានពួកបរិសុទ្ធថ្ងៃចុងក្រោយទាំងឡាយ ដែលគោរពតាមច្បាប់សីលធម៌របស់ព្រះអម្ចាស់យ៉ាងស្មោះត្រង់អស់ជាច្រើនឆ្នាំមកហើយដែរ ។

បុគ្គលទាំងនេះបានធ្វើការប្ដេជ្ញាចិត្ត ដើម្បីរស់នៅក្នុងជីវិតដ៏បរិសុទ្ធមួយ ហើយចៀសវាងពីអ្វីៗដែលនឹងកាត់បន្ថយការទប់ចិត្ត ។ លើសពីនេះ ពួកគេបានផ្ដល់ការបម្រើដ៏ពិសេសដល់មនុស្សដទៃ ជាពិសេសនៅក្នុងមជ្ឈដ្ឋានសាសនាចក្រយើង ។ ពេលធ្វើដូច្នោះ ពួកគេបានរកឃើញអំណរ ការសប្បាយចិត្ត និងសេចក្ដីសុខសាន្ដ ។

ឪពុកម្តាយគួរតែបង្រៀនកូនៗរបស់ពួកគេ

កុមារ និងយុវវ័យត្រូវការជំនួយពីឪពុកម្ដាយ និងមជ្ឈិមវ័យដែលអាចទុកចិត្តបានដើម្បីរៀន និងស្វែងយល់ពីជីវិតខាងផ្លូវភេទនៅក្នុងបរិបទដ៏ទេវភាព ៖ « ឪពុកម្ដាយមានការទទួលខុសត្រូវចម្បង ដើម្បីអប់រំណែនាំពីរឿងផ្លូវភេទដល់កូនៗរបស់ពួកគេ ។ ការបង្រៀនអំពីប្រធានបទនេះដោយស្មោះត្រង់ និងច្បាស់លាស់នៅក្នុងគេហដ្ឋាន នឹងជួយដល់មនុស្សវ័យក្មេងឲ្យចៀសវាងពីអំពើបាបខាងសីលធម៌ដ៏ធ្ងន់ធ្ងរ ។

« នៅកន្លែងណាដែលសាលារៀនមានផ្តល់ការអប់រំស្តីពីផ្លូវភេទ នោះឪពុកម្តាយគួរតែស្វែងរកមើលឲ្យប្រាកដថា ការបង្រៀនដែលត្រូវបានផ្តល់ឲ្យទៅកាន់កូនៗរបស់ពួកគេនោះ វាចុះសម្រុងទៅនឹងសីលធម៌ និងគុណសម្បត្តិខាងក្រមសីលធម៌ឬទេ » ( « ការអប់រំស្ដីពីផ្លូវភេទ » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣៨.៦.១៤ ) ។

ការសាកល្បងនៅក្រៅចំណងអាពាហ៍ពិពាហ៍

ការសាកល្បងជាមួយនឹងការបង្ហាញអារម្មណ៍ផ្លូវភេទនៅក្រៅចំណងអាពាហ៍ពិពាហ៍ គឺជាអំពើបាបដ៏ធ្ងន់ធ្ងរមួយ ។

« ច្បាប់ព្រហ្មចារីភាពរបស់ព្រះអម្ចាស់គឺ ៖

ត្រណមចៀសចេញពីទំនាក់ទំនងខាងផ្លូវភេទ នៅក្រៅចំណងអាពាហ៍ពិពាហ៍រវាងបុរសម្នាក់ និងស្ដ្រីម្នាក់ស្របតាមក្រឹត្យវិន័យរបស់ព្រះ ។
ភក្ដីភាពនៅក្នុងចំណងអាពាហ៍ពិពាហ៍ ។

ភាពស្និទ្ធស្នាលខាងរូបកាយរវាងស្វាមី និងភរិយាមានគោលបំណងធ្វើឲ្យមានភាពស្រស់ស្អាត និងពិសិដ្ឋ ។ វាត្រូវបានតែងតាំងឡើងដោយព្រះ ដើម្បីបង្កើតកូនចៅ និងបង្ហាញសេចក្ដីស្រឡាញ់រវាងស្វាមី និងភរិយា ។

មានតែបុរសម្នាក់ និងស្ត្រីម្នាក់ ដែលបានរៀបការស្របច្បាប់ និងពេញច្បាប់ក្នុងនាមជាស្វាមី និងភរិយាប៉ុណ្ណោះ ដែលគប្បីមានទំនាក់ទំនងខាងផ្លូវភេទ ។ នៅចំពោះព្រះនេត្ររបស់ព្រះ ភាពស្អាតស្អំខាងសីលធម៌មានសារៈសំខាន់ណាស់ ។ ការបំពានលើច្បាប់ព្រហ្មចារីភាពគឺជារឿងធ្ងន់ធ្ងរណាស់ ( សូមមើល និក្ខមនំ ២០:១៤; ម៉ាថាយ ៥:២៨; អាលម៉ា ៣៩:៥ ) ។ ទាំងនោះរួមបញ្ចូលទាំងការប្រើប្រាស់ដោយខុសឆ្គងនូវអំណាចដ៏ពិសិដ្ឋ ដែលព្រះបានប្រទានមកយើងដើម្បីបង្កើតជីវិត » ( « ព្រហ្មចារីភាព និងភក្ដីភាព » ក្បួនខ្នាតទូទៅ ៣៨.៦.៥ ) ។

« ព្រះបញ្ញត្តិរបស់ព្រះហាមឃាត់ដល់អាកប្បកិរិយាមិនគោរពតាមច្បាប់ព្រហ្មចារីភាពទាំងអស់ មិនថាចំពោះភេទដូចគ្នា ឬភេទផ្ទុយគ្នានោះទេ ។ ថ្នាក់ដឹកនាំសាសនាចក្រធ្វើការប្រឹក្សាដល់សមាជិក ដែលបានរំលងច្បាប់ព្រហ្មចារីភាព ។ ថ្នាក់ដឹកនាំជួយពួកគេឲ្យមានការយល់ដឹងច្បាស់លាស់អំពីសេចក្តីជំនឿទៅលើព្រះយេស៊ូវគ្រីស្ទ ដង្វាយធួនរបស់ទ្រង់ ដំណើរការនៃការប្រែចិត្ត និងគោលបំណងនៃជីវិតនៅលើផែនដី ។ អាកប្បកិរិយាដែលមិនត្រូវតាមច្បាប់ព្រហ្មចារីភាព អាចជាបុព្វហេតុនៃការមានក្រុមប្រឹក្សាសមាជិកភាពសាសនាចក្រ ( សូមមើល [ ក្បួនខ្នាតទូទៅ ] ៣៨.៦.៥ ) ។ អាកប្បកិរិយាបែបនេះអាចត្រូវបានអភ័យទោសតាមរយៈការប្រែចិត្តដោយស្មោះត្រង់ » ( « ការប្រតិព័ទ្ធលើភេទដូចគ្នា និងអាកប្បកិរិយានៃការប្រតិព័ទ្ធភេទដូចគ្នា » ក្បួនខ្នាតទូទៅ ៣៨.៦.១២ ) ។