E fa’a’ite ānei au i tō’u huru ’aore rā e paraparau ānei au ia vetahi ’ē ?

Te mau mea e feruri

Nō te tahi mau ta’ata, ’ia vai ’ōmo’e noa terā mau mana’o fa’ahina’arora’a ta’ata nō tōna iho ’āpeni e nehenehe te reira e fa’atupu i te ha’amā ’aore rā te hō’ē māna’ona’ora’a au ’ore. E nehenehe te fa’a’itera’a i te reira mau mana’o i te hō’ē hoa pāpū e fa’aora ’e e rāpa’au iāna. Nō te tahi, e hina’aro rātou e tīa’i ri’i ā ’aore rā e fa’aiti ri’i mai te ta’ata tā rātou e paraparau i tō rātou mau mana’o, nō reira ’eiaha teie fa’aotira’a ’ia fa’atumuhia i ni’a i te fa’ahepora’a ’ia « fa’a’ite » i te nūna’a ’aore rā ’ia parau-roa-hia e homo’āpeni ’oia. Mai te peu ’ua fa’aoti ’outou e fa’a’ite i tō ’outou mana’o fa’ahina’arora’a ta’ata nō tō ’outou iho ’āpeni, ’a feruri nā roto i te pure ’o vai tā ’outou e parau atu ’e e nāhea i te parau atu i teie huru ’ohipa o tō ’outou orara’a tāhuti nei.

Mai te peu ’ua fa’aoti ’outou e fa’a’ite i te tupura’a te mana’o fa’ahina’arora’a ta’ata nō tō ’outou iho ’āpeni, ’aore rā ’ia parau-roa-hia ’outou e homo’āpeni, e ti’a ’ia pāturuhia ’e ’ia hāmani-maita’i-hia ’e ’ia fa’aturahia ’outou, i te fare ’e i te fare purera’a. Tītauhia ia tātou pā’āto’a ’ia fa’a’oroma’i i te tahi ’e te tahi ’a ’imi noa ai i te rāve’a.

’Ei mau melo nō te ’Ēkālesia, tei ia tātou pā’āto’a te hōpoi’a ’ia ha’amau i te hō’ē vāhi e pāturuhia ’e e herehia tō tātou mau taea’e ’e mau tuahine ato’a. Nā te reira natira’a e fa’aitoito i te fa’a’ōhie i te orara’a i te ’evanelia ’e te ’imira’a i te Vārua ’a fāri’i noa ai i te huru rau o te orara’a tāhuti nei.