Ngaahi Fakakaukau ki Hono Fakatupulaki Hoʻomou Ako Fakafāmili ʻa e Folofolá

Ko e founga mālohi ke tokoniʻi homou fāmilí ke nau ako e ongoongoleleí ko hono ako fakafāmili maʻu pē ʻa e folofolá. ʻOku ʻikai mahuʻinga ʻa e tuʻo lahi mo e fuoloa hoʻomou lau folofola fakafāmilí ʻo tatau mo hoʻo feinga ke toutou fakahoko iá. ʻI he taimi te ke ʻai ai e ako folofolá ko ha konga mahuʻinga ia ʻo homou moʻui fakafāmilí, te ke tokoniʻi ai e mēmipa ho fāmilí ke mou ofi ange kia Sīsū Kalaisi pea langa ʻenau ngaahi fakamoʻoní ʻi he fakavaʻe ʻo ʻEne folofolá.

Fakakaukau ki he ngaahi fehuʻi ko ʻení:

• Te ke poupouʻi fēfē e kau mēmipa ʻo e fāmilí ke nau ako e folofolá ʻiate kinautolu peé?

• Ko e hā ha meʻa te ke lava ‘o fai ke fakalotolahiʻi ai e kau mēmipa ʻo e fāmilí ke nau vahevahe ʻa e meʻa ʻoku nau akó?

• Te ke fakamamafaʻi fēfē ʻa e ngaahi tefitoʻi moʻoni ʻokú ke ako ʻi he folofolá ʻi he ngaahi mōmeniti ʻo hoʻo akoʻi fakaʻahó?

Manatuʻi ko e ʻapí ʻa e feituʻu lelei taha ki hono ako mo akoʻi e ongoongoleleí. Te ke lava ʻo ako mo akoʻi e ongoongoleleí ʻi ʻapi ʻi ha ngaahi founga ʻoku ʻikai malava ia ʻi ha kalasi ʻa e Siasí. ʻAi ke ke mohu founga ʻi hoʻo fakakaukau ki ha ngaahi founga ke tokoniʻi ai ho fāmilí ke nau ako mei he folofolá. Fakaʻaongaʻi ha niʻihi ʻo e ngaahi fakakaukau ko ʻení ke fakatupulaki ʻaki hoʻomou ako fakafāmili e folofolá.

Fakaʻaongaʻi e Hivá.

Hivaʻi ha ngaahi hiva ʻoku nau fakamamafaʻi e ngaahi tefitoʻi moʻoni ʻoku akoʻi ʻi he folofolá.

Vahevahe ha Ngaahi Folofola ʻoku ʻUhingamālié

Tuku ha taimi maʻá e kau mēmipa ʻo e fāmilí ke nau vahevahe ha ngaahi potufolofola naʻa nau maʻu lolotonga ʻenau ako fakatāutahá ʻoku ʻuhingamālie kiate kinautolu.

Fakaʻaongaʻi Hoʻo Ngaahi Lea pē ʻAʻau

Fakaafeʻi e kau mēmipa ʻo e fāmilí ke nau fakamatalaʻi fakanounou ʻi he lea pē ʻanautolu ʻa e meʻa ne nau ako mei he folofola ne mou akó.

Fakaʻaongaʻi ʻa e Folofolá ki Hoʻo Moʻuí

Hili hano lau ha potufolofola, kole ki he kau mēmipa ʻo e fāmilí ke nau vahevahe ha ngaahi founga ʻoku ʻaonga ai ʻa e potufolofola ko iá ki heʻenau moʻuí.

ʻEke ha Fehuʻi

Fakaafeʻi e kau mēmipa ʻo e fāmilí ke nau ʻeke ha fehuʻi fekauʻaki mo e ongoongoleleí, pea tuku taimi leva ke fekumi ki ha ngaahi veesi ʻe ala tokoni ki hano tali e fehuʻi ko iá.

Fakaʻaliʻali ha Folofola

Fili ha veesi ʻokú ke pehē ʻoku mahuʻingamālié, pea fakaʻaliʻali ia ʻi ha feituʻu ʻe lava e kau mēmipa ʻo e fāmilí ʻo toutou mamata ki ai. Fakaafeʻi ʻa e toenga ʻo e mēmipa e fāmilí ke nau taufetongi ʻi hono fili ha potufolofola ke fakaʻaliʻalí.

ʻAi ha Lisi Potufolofola

Mou fili fakafāmili ha ngaahi veesi folofola te mou fie aleaʻi lolotonga e uike ka hoko maí.

Ako Maʻuloto ha Ngaahi Potufolofola

Fili ha potufolofola ʻoku ʻuhingamālie ki ho fāmilí, pea fakaafeʻi e kau mēmipa ʻo e fāmilí ke nau ako maʻuloto ia ʻaki hano toutou lau fakaʻaho pe ʻai ha foʻi vaʻinga ako maʻuloto.

Vahevahe ha Ngaahi Lēsoni Fakatātā

Fekumi ki ha ngaahi meʻa ʻoku felāveʻi mo e ngaahi vahe mo e veesi ʻoku mou lau fakafāmilí. Fakaafeʻi e kau mēmipa ʻo e fāmilí ke nau talanoa ki he founga ʻoku felāveʻi ai ʻa e meʻa takitaha mo e ngaahi akonaki ʻi he folofolá.

Fili ha Tefito

Tuku ke taufetongi e mēmipa ʻo e fāmilí ʻi hono fili ha tefito ʻe lava ke ako fakataha ʻe he fāmilí. Fakaʻaongaʻi ʻa e Fakahinohino ki he Ngaahi Folofolá (scriptures.ChurchofJesusChrist.org) ke kumi ha ngaahi potufolofola fekauʻaki mo e tefitó.

Tā ha Fakatātā

Lau fakafāmili ha ngaahi veesi ʻe niʻihi, pea tuku leva ha taimi ki he kau mēmipa ʻo e fāmilí ke nau tā ha meʻa ʻoku felāveʻi mo e meʻa ne mou laú. Tuku ha taimi ke mou aleaʻi ai hoʻomou ngaahi tā fakatātaá.

Fakafaivaʻi ha Talanoa

Hili hano lau ha foʻi talanoa, fakaafeʻi e kau mēmipa ʻo e fāmilí ke nau fakafaivaʻi ia. Hili iá, aleaʻi ʻa e founga ʻoku felāveʻi ai ʻa e talanoá mo e ngaahi meʻa ʻoku mou aʻusia fakafoʻituituí mo fakafāmilí.

Naʻe akoʻi ʻe ʻEletā Tēvita A. Petinā ʻo pehē: “Ko e lotu fakafāmilí, ako folofolá pea pehē ki he efiafi fakafāmili kotoa pē ʻi ʻapi, ʻokú ne tokoni ia ke tau ʻiloʻi ko hai kitautolu. He ʻikai ke hā ngali mahuʻinga pe te tau manatua fuoloa fēfē ha meʻa pē ʻe taha naʻe hoko. Ka ʻe hangē ko e fengāueʻaki ʻa e ngaahi fetōhoaki ʻa e mataʻipolosi lanu engeenga, koula, mo lanu melomeló ke nau ʻomai ha fakatātā laulōtahá, ʻe pehē tofu pē ʻa e ngaahi ola fungani fakalaumālie ʻe maʻu mei heʻetau fai maʻu pē ʻa e fanga kiʻi meʻa ʻoku ha ngali siʻisiʻí” (“Faivelenga mo Tokanga ʻo Lahi Ange ʻi ʻApi,” Liahona Nōvema 2009, 19–20).