Ngaahi Fakakaukau ki Hono Fakatupulaki Hoʻo Ako Fakataautaha ʻa e Folofolá

Ko ha ngaahi founga faingofua ʻeni ke fakatupulaki ai hoʻo ako e folofola ʻa e ʻOtuá ʻi he ngaahi tohi folofolá.

Lotua ha Tataki Fakalaumālie

ʻOku ʻi he folofolá e folofola ʻa e ʻOtuá Lolotonga hoʻo ako kinautolú, kole ki hoʻo Tamai Hēvaní ʻEne fakahinohinó pea maʻu Hono Laumālié ke tokoni atu ke mahino ia kiate koe.

Fekumi ki ha Ngaahi Moʻoni kau kia Sīsū Kalaisi

ʻOku akoʻi mai ʻe he folofolá ʻoku fakamoʻoni ʻa e meʻa kotoa pē kia Kalaisi (vakai, 2 Nīfai 11:4; Mōsese 6:63), ko ia fekumi kiate Ia ʻi he ngaahi meʻa naʻe hokó, ngaahi talanoá, mo e ngaahi akonaki ʻi he folofolá. Fakakaukau ke tohi pe fakaʻilongaʻi ʻa e ngaahi veesi ʻoku akoʻi fekauʻaki mo e Fakamoʻuí mo e founga ke muimui ai kiate Iá.

Fekumi ki he Ngaahi Lea mo e Kupuʻi Lea Ueʻi Fakalaumālié

Mahalo te ke saiʻia ʻi ha ngaahi foʻi lea mo e kupuʻi lea pau ʻi he folofolá, ʻo hangē naʻe hiki fakapatonu mai pē ia kiate koé. ʻE lava ke nau ongo mahuʻinga fakafoʻituitui, fakalaumālie mo fakalotolahi kiate koe. Fakakaukau ke fakaʻilongaʻi ia ʻi hoʻo tohi folofolá pe hiki ia ʻi ha tohinoa ako.

Fekumi ki he ngaahi Moʻoni ʻo e Ongoongoleleí

ʻI he taimi ʻe niʻihi ʻoku fakamatalaʻi mahino mai ʻa e ngaahi moʻoni ʻo e ongoongoleleí (ʻa ia ʻoku faʻa ui ko e tokāteliné pe ngaahi tefitoʻi moʻoní), pea taimi ʻe niʻihi ʻoku ʻomi ia ʻi ha sīpinga pe talanoa. Fehuʻi loto pē kiate koe, “Ko e hā ha ngaahi moʻoni taʻengata ʻoku akoʻi ʻi he ngaahi veesi ko ʻení?”

Fakafanongo ki he Laumālié

Tokanga ki hoʻo ngaahi fakakaukaú mo e ongo ʻokú ke maʻú, neongo kapau ʻoku ʻikai felāveʻi ia mo e meʻa ʻokú ke laú. Mahalo ko e ngaahi ongo ko iá ko e ngaahi meʻa moʻoni ia ʻoku finangalo hoʻo Tamai Hēvaní ke ke ako mo ongoʻí.

Fakatatau ʻa e Folofolá ki Hoʻo Moʻuí

Fakakaukau ki he founga ʻoku ʻaonga ai ki hoʻo moʻuí ʻa e ngaahi talanoa mo e akonaki ʻokú ke laú. Hangē ko ʻení, te ke lava ʻo fehuʻi loto pē, “Ko e hā ha ngaahi meʻa kuó u aʻusia ʻoku faitatau mo e meʻa ʻoku ou laú?” pe “Te u muimui fēfē ki he sīpinga ʻa e tokotaha ko ʻeni ʻi he folofolá?”

ʻEke ha Ngaahi Fehuʻi

ʻE lava ke tokoni hono fai ha ngaahi fehuʻi fekauʻaki mo e ongoongoleleí ke ke fakapapauʻi e meʻa ke akó. ʻE lava ke ke fakakaukau ki ha ngaahi fehuʻi ʻi hoʻo ako e folofolá. ʻE lava ke fekauʻaki e ngaahi fehuʻi ko ʻení mo e meʻa ʻokú ke laú pe ki hoʻo moʻuí fakalūkufua. Fakalaulauloto ki he ngaahi fehuʻi ko ʻení pea fekumi ki he ngaahi talí ʻi hoʻo hokohoko atu ke ako e folofolá. Hili hoʻo akó, fehuʻi ange pe ko e hā mo ha toe meʻa ʻe fie maʻu ʻe he ʻOtuá ke ke ako, pea fakasio ha ngaahi tali lolotonga e ngaahi houa mo e ngaahi ʻaho ka hoko maí.

Fakaʻaongaʻi e Ngaahi Tokoni ki he Ako Folofolá

Ke maʻu ha ʻilo lahi ange ki he ngaahi veesi ʻokú ke laú, fakaʻaongaʻi ʻa e Fakahinohino ki he Ngaahi Folofolá (scriptures.ChurchofJesusChrist.org), mo e ngaahi tokoni kehe ki he akó.

Fakakaukau ki he Puipuituʻa ʻo e Folofolá

Te ke lava ʻo maʻu ha ngaahi fakakaukau mahuʻinga fekauʻaki mo e folofolá ʻo ka ke fakakaukau ki hono puipuituʻá—ʻa e ngaahi tūkunga pe taimi mo e feituʻu ʻo e folofolá. Hangē ko ʻení, ʻe tokoni hono ʻilo e puipuituʻá mo e tui ʻa ha kakai naʻe lea ki ai ha palōfitá ke mahino kiate koe ʻa e taumuʻa ʻo ʻene ngaahi leá.

Hiki Hoʻo Ngaahi Fakakaukaú mo e Ongó

ʻOku lahi e ngaahi founga ke hiki ai e ngaahi ongo ʻokú ke maʻú ʻi hoʻo akó. Hangē ko ʻení, te ke lava ʻo fakaʻilongaʻi ha foʻi lea pe kupuʻi lea mahuʻinga pea hiki hoʻo ngaahi fakakaukaú ko ha fakamatala ʻi hoʻo folofolá. Te ke lava foki ʻo tauhi ha tohinoa ki he ngaahi fakakaukau mo e ongo ʻokú ke maʻú. Pe te ke hiki ʻa e fehuʻi naʻá ke fai kimuʻa pea kamata hoʻo akó, hoko atu ai mo e ngaahi tali naʻe tataki koe ki aí.

Ako e Ngaahi Lea ʻa e Kau Palōfita mo e Kau ʻAposetolo ʻi he Ngaahi ʻAho Kimui Ní

Lau ʻa e meʻa kuo akoʻi ʻe he kau palōfita mo e kau ʻaposetolo ʻo e ngaahi ʻaho kimui ní kau ki he ngaahi tefitoʻi moʻoni ʻokú ke maʻu ʻi he folofolá. ʻOku maʻu ʻenau ngaahi pōpoakí ʻi he“Konifelenisi Lahí,” “Ngaahi Makasiní,” mo e ngaahi naunau kehe ʻi he Gospel Library.

Lau e Ngaahi Talanoá

Lau ʻa e ngaahi talanoa ʻi he folofolá, ʻo feinga ke mahino kiate koe honau puipuituʻá (taimí, feituʻú, tokotaha leá, mo e haʻofangá). ʻOku hoko ʻa e ngaahi talanoa mei he folofolá ko ha maʻuʻanga tokoni lelei ki he meʻá ni, tautautefito ki he fānaú mo e kāingalotu ʻoku ʻikai ke nau maheni mo e folofolá.

Vahevahe e Ngaahi Fakakaukaú

ʻOku hoko hono aleaʻi e ngaahi ʻilo mei hoʻo ako fakatāutahá ko ha founga lelei ki hono akoʻi ʻa e niʻihi kehé mo tokoni ke fakamālohia hoʻo mahino ki he meʻa naʻá ke laú.

Liliu ʻo Moʻui ʻAki ʻa e Meʻa ʻOkú ke Akó

ʻE lava ke tākiekina mo tataki kitautolu ʻe he ako ʻo e Folofolá ke liliu ʻetau tōʻonga moʻuí. Fakafanongo ki he meʻa ʻoku ueʻi koe ʻe he Laumālié ke ke fai lolotonga hoʻo laukongá, pea tukupā leva ke ke ngāueʻi ʻa e ngaahi ueʻi ko iá.