Ipakigbahin ang Basahon ni Mormon

Ipakigbahin ang Basahon ni Mormon nga App

Ang Basahon ni Mormon nagtanyag og paglaom, nagpalig-on sa pagtuo diha ni Jesukristo, ug nagtugot sa Espiritu sa paghatag sa katawhan og kalinaw ug giya sa tanang aspeto sa ilang kinabuhi. Si Presidente Russell M. Nelson mitudlo nga kon kita nagpakigbahin sa Basahon ni Mormon, kita nagpakigbahin “sa gahom sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag.” Siya misaad nga “kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. … Kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi.”

“[Ang Basahon ni Mormon] nagtudlo sa doktrina ni Kristo. … Naghatag [kini] sa labing hingpit ug labing batid nga pagsabot sa Pag-ula ni Jesukristo nga makita bisan asa. … Ang hingpit nga gahom sa ebanghelyo ni Jesukristo anaa sa Basahon ni Mormon” (“Ang Basahon ni Mormon: Unsa kaha ang Imong Kinabuhi Kon wala Kini?,” Liahona, Nob. 2017, 62–63).

Adunay daghang paagi nga inyong mapakigbahin ang Basahon ni Mormon sa uban. Mahimo kamong mosulti sa mga tawo mahitungod sa pagtulon-an nga inyong nakat-onan gikan niini. Mahimo kamong mopakigbahin og bersikulo ngadto sa mga higala nga may kalabotan sa ilang kinabuhi. Mahimo kamong mopasabot kon sa unsang paagi ang basahon nagtabang kaninyo nga madiskobrehan ang paglaom ug pagkaayo nga gitanyag ni Jesukristo ug i-tag ang @thebookofmormon kon kamo mopakigbahin sa online.

Magdapit og tawo nga motan-aw sa bidyo sa Basahon ni Mormon o mobasa og gilarawan nga istorya sa Basahon ni Mormon. Magpadala sa usa ka tawo og Basahon ni Mormon nga app sa ilang lumad nga pinulongan ug ipakita kon sa unsang paagi kini nagtubag sa mga pangutana sa kalag. Moapil sa mga social media nga page sa Simbahan kabahin sa Basahon ni Mormon, o moapil sa mga komunidad nga nakatutok sa pagkat-on ug sa pagpakigbahin sa mga hunahuna gikan sa Basahon ni Mormon.

Samtang kamo mag-ampo alang sa giya kon unsaon sa pagpakigbahin ang mga pagtulon-an ug gahom sa Basahon ni Mormon ngadto sa uban, ang Espiritu Santo mogiya kaninyo.