Faasoa Atu le Tusi a Mamona
Faasoa Atu le Polokalama [App] o le Tusi a Mamona
O le Tusi a Mamona e ofoina atu le faamoemoe, faamalosia le faatuatua ia Iesu Keriso, ma faataga le Agaga e tuu atu i tagata le filemu ma le taitaiga i tulaga uma o o latou olaga. Na aoao mai Peresitene Russell M.Nelson e faapea, a tatou faasoaatu le Tusi a Mamona ua tatou faasoa atu “le mana e faamalolo ai, faamafanafana, toefuatai, fesoasoani, faamalosia, faatoafimalie, ma faafiafia o tatou agaga.” Sa ia folafola atu “a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu i—aso uma. … A outou mafaufau loloto i mea tou te suesueina, o le a matala mai pupuni o le lagi, ma o le a outou maua tali i a outou lava fesili ma le taitaiga mo o outou lava olaga.”
“Ua Aoao Mai e [le Tusi a Mamona] le Aoaoga Faavae a Keriso. … [Ua] tuuina mai ai le malamalamaaga aupito atoatoa ma sili ona mausali o le Togiola a Iesu Keriso e maua i soo se mea. … O le mana atoa o le talalelei a Iesu Keriso o loo i ai i le Tusi a Mamona” (“O Le Tusi a Mamona: Faamata e Faape’i Lou Olaga e aunoa ma Lea?,” Liahona, Nov. 2017, 62–63).
E tele auala e mafai ona e faasoa atu i isi le Tusi a Mamona. E mafai ona e tau atu i tagata e uiga i se aoaoga na e aoaoina mai ai. E mafai ona e faasoa atu se fuaiupu i ni uo e faatatau i o latou olaga. E mafai ona e faamatala atu le ala ua fesoasoani ai le tusi ia te oe ia iloa le faamoemoe ma le faamalologa e ofo mai e Iesu Keriso ma faapipii i le @thebookofmormon pe a e faasoa i luga o le initoneti.
Valaaulia se tasi e maimoa i se vitio o le Tusi a Mamona pe faitau se tusi ata o tala o le Tusi a Mamona e i ai ata. Auina atu i se tasi le polokalama [app] o le Tusi a Mamona i lo latou gagana moni ma faaali i ai le ala na te taliina ai fesili o le loto. Ia auai i itulau o ala o faasalalauga faaagafesootai a le Ekalesia o le Tusi a Mamona, pe auai i faalapotopotoga e taulai atu i le faasoaina atu o vaaiga malamalama mai le Tusi a Mamona.
Ao e tatalo mo se taitaiga i le ala e faasoa atu ai aoaoga ma le mana o le Tusi a Mamona i isi, o le a taiala oe e le Agaga Paia.