Taulai atu ia Iesu Keriso

Aoao atu e uiga i faalagiga, matafaioi, ma uiga paia o Iesu Keriso.

Vaavaai mo faatusa lea e molimau ia Iesu Keriso.

Tomai: Fatu ni fesili sailiili e fesoasoani ai i tagata aoga e faailoa mai matafaioi, faalagiga, faatusa, uiga paia, ma uiga o Iesu Keriso.

Faamatalatala

A o tatou saili e fesoasoani i tagata aoga e saili Iesu Keriso i tusitusiga paia, e mafai ona oo ina latou iloa ma alolofa ia te Ia. O se tasi o auala e fatu ai se fesili suesue e fesoasoani ai i tagata aoga e faailoa mai se matafaioi, faalagiga, faatusa, uiga faaleatua, po o uiga o Iesu Keriso o le faaaofia ai lea o mea nei i lau fesili: (1) fuaitau o le mau, (2) mea e te manao ia iloa e tagata aoga (matafaioi, faalagiga, faatusa, uiga faaleatua, po o uiga o Iesu Keriso), ma le (3) auala o le a iloa ai e tagata aoga nei mea mo i latou lava. O nei fesili e tatau ona avatu ae e te lei faitauina le fuaitau o le mau ina ia saunia tagata aoga e saili mea e mafai ona latou aoaoina e uiga ia Iesu Keriso.

Faataitaiga

Toe iloilo fesili nei, ma matau pe faapefea ona latou faaaofia ai fuaitau o mau, mea o le a sailia e tagata aoga, ma pe faapefea ona iloa e tagata aoga mo i latou lava:

• A o e faitau i le tala i le Samaria agalelei i le Luka 10:25–37, o a uiga faaleatua o Iesu Keriso o mafai ona e vaai i ai?

• A o e suesueina le Mataupu Faavae ma Feagaiga 29:1–8, sue ni faalagiga ma ni matafaioi eseese se tolu a Iesu Keriso e lagona le talafeagai i mea e te manaomia i le taimi nei i lou olaga.

• A o e faitauina le Galuega 3:1–7, o le a se mea ua e matauina e uiga ia Peteru e faamanatu atu ai ia te oe Iesu Keriso?

Kiliki ii matamata ai se vitio o lenei faataitaiga.

Faataitai

Faitau fuaiupu nei, ma mo seti o fuaiupu taitasi, tusi ai se fesili suesue e fesoasoani ai i tagata aoga ia iloa matafaioi, faalagiga, faatusa, uiga faaleatua, ma uiga o Iesu Keriso.

• Kenese 45:3–5

• Mataupu Faavae ma Feagaiga 45:7–9

• 1 Nifae 3:1–7

Talanoaina pe Mafaufau Loloto

• O le a se mea na e aoaoina mai e uiga i le avea ma se faiaoga e faapei o Keriso mai lenei aafiaga?

• E mafai faapefea e lenei mea ona fesoasoani i a tatou tagata aoga ma talanoaga i le potuaoga e taulai atili atu ai ia Iesu Keriso?

Faaaoga

I le faaaogaina o mea sa e aoaoina mai i faataitaiga, mafaufau i tulaga ma manaoga o au tagata aoga a o e suesue e saunia au lesona i lenei vaiaso. Faatasi ai ma se fuaitau se tasi o mau i lau lesona, tusi se fesili e sailiili ai o le a fesoasoani i tagata aoga e iloa ai matafaioi, faalagiga, faatusa, uiga faaleatua, ma uiga o Iesu Keriso e fesoasoani ai ia i latou e taulai atu ia te Ia. Tusi i lalo fesili e oo mai ia te oe ma, afai e lava sou taimi, faataitai le fai atu o na fesili i se tasi ae e te lei fesili atu i se tasi i le vasega. O le a fesoasoani lenei mea ia te oe e faaleleia ai lau fesili ae e te lei faaaogaina i au tagata aoga.

E Te Fia Aoao Atili?

• Chad H. Webb, “Ma ua Matou Tautalatala e Uiga ia Keriso, Ua Matou Olioli ia Kerisot” (Faasalalauga faaletausaga o aoaoga mo Seminare ma Inisitituti o Mataupu Faalelotu, 12 Iuni, 2018), broadcasts.ChurchofJesusChrist.org