Alofa Ia I Latou E Te A’oa’oina

Fatu se siosiomaga lea e faaaloalogia ai tagata uma ma iloa ai e faatauaina o latou sao.

Tomai: Faailoa atu e te faatauaina tagata aooga ae latou te lei tuuina mai ni manatu faaalia pe sii mai o latou lima i se manatu.

Faamatalatala

E mafai ona tatou faaalia le alofa mo a tatou tagata aoao e ala i le talanoa atu ia i latou tatou te faatauaina o latou sao. O nisi taimi pe a fai mai ni manatu o tamaiti aoga, atonu e foliga mai tatou te le fiafia pe ono faalavelaveina i le mafaufau e uiga i mea o le a sosoo ona tatou fai atu ai. E faigofie ona tilotilo ese pe amata ona tilotilo i a tatou tusitusiga paia a o tatou mafaufau i le auala e tali atu ai. E taua le manatua e mananao tagata aoga ia lagona o loo logona, faailoaina, ma vaaia. E mafai ona tatou fesoasoani i tagata aoga ia lagona faapea e ala i le taulai atoa atu ia i latou a o latou faasoa mai ni manatu faaalia. O se tasi o auala e ausia ai lenei mea o le liliu atu lea o lou tino e faafesagai ma i latou,vaai atu ia i latou, ma taulai atu ia i latou i le taimi atoa o faaali mai ai o latou manatu. O le isi auala o le faailoa atu lea i upu e te faatauaina lo latou sao ae latou te lei tuuina mai ni manatu faaalia. A sii mai e se tagata aoga o latou lima, e mafai ona e fai atu se tala e pei o le, “Ioritana, matou te fiafia lava e faalogo atu ia te oe. Faamolemole tau mai ia i matou mea o loo e mafaufau i ai,” po o le, “Taiaopo, ua matou fiafia lava e aoao mai ia te oe. O le a se mea e te manao e faasoa mai?” O nei faatinoga faigofie e mafai ona faailoa atu ai i tagata aoao e taua a latou saofaga ma e taua i le aafiaga e aoao ai.

Faataitaiga

Vaai i le gagana o le tino a lenei faiaoga a o ia faalogologo atu i manatu o se tagata aoga. O loo faasaga atu o ia ma tilotilo i le tagata aoga. E le o taulai atu o ia i se isi tagata aoga, tusitusiga paia, po o se isi lava mea. E i ai se isi mea e mafai ona e aoaoina mai lenei ata ma e uiga i le fesootai atu i tagata aoga e faatauaina i latou?

Kiliki ii e matamata ai se vitio o lenei faataitaiga

Faataitai

I lenei vaiaso, faataitai le tomai lenei e ala i le taulai atu i au talanoaga ma isi tagata ma ta’u atu ai e te faatauaina a latou sao. Faasaga atu i le tagata ma tilotilo i mata a o e talanoa atu ia te ia. Aveese soo se mea faalavefau, ma taulai atoa atu i le tagata.

Talanoaina pe Mafaufau Loloto

• O le a se mea ua e aoaoina e uiga i le taua o ituaiga o fesootaiga e le tautatala ma faaleo i le faailoa atu i isi e te faatauaina i latou?

• O a nisi o auala e mafai ona e faailoa atu ai i tagata aoga e te faatauaina o latou manatu faaalia?

• Faaalu sina taimi ma mafaufau i taimi na faataitai ai e le Faaola lenei tomai.

Faaaoga

I le taimi o lau lesona e sosoo ai, faaaoga le tomai lenei e ala i le faasaga atu i au tagata aoga, tuu i lalo au tusitusiga paia, ma vaai lelei i mata o tagata aoga a o latou faasoa mai manatu faaalia.

E Te Fia Aoao Atili?

• Autu o le Talalelei, “Fesootaiga,” topics.ChurchofJesusChrist.org

• Mark Ogletree, “Talanoa, Faalogo, & Alofa,” Ensign, Feb. 2014, 14–17