Fakatupulaki ʻa e Ngaahi Taukei ʻa e Faiakó
Teuteuʻi fakalaumālie koe.

“Teuteuʻi fakalaumālie koe,” Fakatupulaki ʻa e Ngaahi Taukei ʻa e Faiakó: Faiako ʻaki ʻa e Laumālié (2023)

“Teuteuʻi fakalaumālie koe,” Fakatupulaki ʻa e Ngaahi Taukei ʻa e Faiakó: Faiako ʻaki ʻa e Laumālié

Ngaahi Tefitoʻi Moʻoni ʻo e Faiako Hangē ko Kalaisí: Faiako ʻaki ʻa e Laumālié

Teuteuʻi fakalaumālie koe.

Pōtoʻi Ngāué

Fakaʻaongaʻi ʻa e fakamatala “Fakalakalaka ko ha Faiako Hangē ko Kalaisí—Ko ha Vakaiʻi Fakataautaha” ke fakaafeʻi ʻa e Laumālie Māʻoniʻoní ke tokoni atu ke fakaleleiʻi hoʻo ngaahi teuteu ke faiakó.

ʻĪmisi
kiʻi fakatātā ʻo e Faiako ʻi he Founga ʻa e Fakamoʻuí

Fakamatalaʻi

Hili hoʻo teuteu ʻa e lēsoni takitaha, ʻalu ki he “Fakalakalaka ko ha Faiako Hangē ko Kalaisí—Ko ha Vakaiʻi Fakataautaha” ʻi he konga 3 ʻo e Ko e Faiako ʻi he Founga ʻa e Fakamoʻuí. Fakakaukau pe ʻoku fakamatalaʻi fēfē ʻe he ngaahi fakamatala takitaha ʻi he konga vakaiʻi [fakatāutahá] ʻa e aʻusia fakaako kuó ke teuteú. Pea fakatatau ki he fakahinohino ʻa e Laumālié, fili ʻi he faʻa lotu ha faʻahinga meʻa pē ʻoku fiemaʻu ke fakaleleiʻi ʻi he palani ʻo e lēsoní pea fai ha ngaahi liliu.

Naʻe vahevahe ʻe ʻEletā Tieta F. ʻUkitofa ʻa e talaʻofa ko ʻení fekauʻaki mo hono fakaʻaongaʻi ʻo e vakaiʻi [fakatāutahá]: “ʻʻE iku ai ki he vakavakaiʻi kitá, fakahaaʻi ʻo e ngaahi meʻa ʻoku ʻikai mahinó, pea poupouʻi ʻa e ueʻi fakalaumālie fekauʻaki mo e ngaahi founga te tau lava ai ʻo fakalakalaká. … ʻE lava ke hoko ʻa e vakaiʻi fakaekita ko ʻení ko ha tāpuaki maʻongoʻonga—ʻi he ʻahó ni pea mo e taimi kotoa pē ʻoku tau teuteu ai ke faiako ʻi he founga ʻa e Fakamoʻuí” (“Ko ha Lisi Vakaiʻi ʻa e Faiakó” [Ko e Faiako ʻi he Founga ʻa e Fakamoʻuí mo ʻEletā Tieta F. ʻUkitofa, 12 Sune, 2022], ChurchofJesusChrist.org).

Fakatātaaʻi

Hili hono fakakakato ʻe Sisitā ʻOloseni ʻene palani lēsoní, ʻokú ne ʻalu ki he fakamatala “Fakalakalaka ko ha Faiako Hangē ko Kalaisí—Ko ha Vakaiʻi Fakataautaha.” ʻOkú ne vakaiʻi ʻi he faʻa lotu ʻa e konga takitaha ʻo e siví pea fili ha tali feʻunga ki he fakamatala takitaha. ʻOkú ne vakai ki ha konga ʻi heʻene lēsoní ʻe lava ke ne fakaʻaongaʻi lelei ange ai ʻa e ngaahi lea ʻa e kau palōfitá ke akoʻi ʻaki ha moʻoni te nau ako.

ʻOku feinga ʻa Brother Sosi ke fakaafeʻi ʻa e ako fakamātoató ʻi heʻene ngaahi lēsoní. Hili ʻene teuteu ʻa e lēsoní, ʻokú ne ʻalu ki he “Fakalakalaka ko ha Faiako Hangē ko Kalaisí—Ko ha Vakaiʻi Fakataautaha” ke vakaiʻi ʻa e tūkunga ʻokú ne ʻi ai ʻi he konga ko ʻení. ʻOkú ne vakavakaiʻi ʻene lēsoní ʻo fakatatau ki ai:

Fakaafeʻi ʻa e Ako Fakamātoató

  • (4) ʻOku ou tokoni ke fatongia ʻaki ʻe he kau akó ʻa ʻenau akó.

  • (1) ʻOku ou poupouʻi ʻa e kau akó ke nau ʻiloʻi ʻa e Fakamoʻuí ʻaki hono ako fakaʻaho ʻo e ongoongoleleí.

  • (4) ʻOku ou fakaafeʻi ʻa e kau akó ke nau teuteu ke ako.

  • (4) ʻOku ou poupou ki he kau akó ke vahevahe ʻa e ngaahi moʻoni ʻoku nau akó.

  • (4) ʻOku ou fakaafeʻi ʻa e kau akó ke nau moʻui ʻaki ʻa e meʻa ʻoku nau akó.

ʻOkú ne fakakaukau te ne lava ʻo fai ha fehuʻi te ne poupouʻi ʻa e kau akó ke nau ʻiloʻi ʻa Sīsū Kalaisi ʻi heʻenau ako fakaʻaho ʻenau folofolá pea fai ha liliu ʻi heʻene lēsoní.

Lomiʻi heni ke vakai ki ha vitiō ʻo e sīpinga ko ʻení.

Akoako

  1. Ko e hā ha ngaahi liliu te ke fai ʻi hoʻo palani lēsoní kapau naʻe hangē hoʻo vakaiʻi fakatāutahá ko ʻení:

    Akoʻi ʻa e Tokāteliné

    • (4) ʻOku ou ako ʻiate au pē ʻa e tokāteline ʻo Sīsū Kalaisí.

    • (3) ʻOku ou faiako mei he ngaahi folofolá mo e ngaahi lea ʻa e kau palōfita ʻi he ngaahi ʻaho kimui ní.

    • (3) ʻOku ou tokoni ke fekumi, ʻiloʻi, mo mahino ki he kau akó ʻa e ngaahi moʻoni ʻi he folofolá.

    • (4) ʻOku nofotaha ʻeku tokangá ʻi he ngaahi moʻoni ʻoku iku ki he uluí mo langaki ʻa e tui kia Sīsū Kalaisí.

    • (1) ʻOku ou tokoni ke maʻu ʻe he kau akó ha fakafehokotaki fakataautaha ʻi he tokāteline ʻo Sīsū Kalaisí.

  2. Vakavakaiʻi hoʻo palani lēsoni hokó ʻaki hono fakaʻaongaʻi ʻa e “Fakalakalaka ko ha Faiako Hangē ko Kalaisí—Ko ha Vakaiʻi Fakataautaha.” Fakakaukauʻi ʻi he faʻa lotu ʻa e tuʻunga ʻoku ʻi ai hono fakamatalaʻi lelei ʻe he ngaahi fakamatala takitaha ʻi he vakaiʻi [fakatāutahá] ʻa e aʻusia fakaako kuó ke teuteú. Fili leva ha faʻahinga meʻa ʻoku fiemaʻu ke fakaleleiʻi ʻi he palani ʻo e lēsoní pea fai ha ngaahi liliu, ʻo fakatatau mo e fakahinohino ʻa e Laumālié.

Aleaʻi pe Fakalaulauloto

  • ʻE iku fēfē hono fakahoko ʻo e vakaiʻi fakaekitá, ke ne fakahaaʻi ʻa e ngaahi meʻa ʻoku ʻikai mahinó, pea poupouʻi ʻa e ueʻi fakalaumālie fekauʻaki mo e ngaahi founga te ke lava ai ʻo fakalakalaká?

  • Ko e hā ʻa e ʻaonga hono fakaʻaongaʻi ʻo e fakamatala vakaiʻi [fakatāutahá] ʻi he palani lēsoni takitaha ʻokú ke teuteú?

Fakakau

Fie Ako Lahi Ange?

Pōtoʻi Ngāué

Fai ha ngaahi fehuʻi ke fakafuofuaʻi hoʻo aʻusiá mo hoʻo fakamoʻoni kia Sīsū Kalaisí pea mo e tokāteline mo e ngaahi tefitoʻi moʻoni ʻi he lēsoní.

ʻĪmisi
tangata ʻokú ne fakaʻaongaʻi ha komipiuta toʻotoʻo

Fakamatalaʻi

Ke teuteu fakalaumālié, te ke lava ʻo fakakaukau ki hoʻo ngaahi aʻusia mo e fakamoʻoni kia Sīsū Kalaisí pea mo e tokāteline pe tefitoʻi moʻoni ʻoku akoʻi ʻi he lēsoní. ʻI hoʻo kiʻi tuʻu hifo ʻo fakakaukau ki hoʻo ngaahi aʻusiá mo e fakamoʻoní, te ke maʻu ha loto-falala lahi ange ke tuʻu ko ha fakamoʻoni kia Sīsū Kalaisi pea “ʻE fekauʻi atu ʻa e Laumālie Māʻoniʻoní ke fakamoʻoniʻi ʻa e ngaahi meʻa kotoa pē te mou lea ʻakí” (Tokāteline mo e Ngaahi Fuakava 100:8). Lolotonga hoʻo teuteú, te ke lava ʻo kiʻi taʻofi fakataimi pea fai ha ngaahi fehuʻi ʻe tokoni atu ke ke fakakaukau. Ko ha ngaahi sīpinga ʻeni ʻo ha ngaahi fehuʻi te ke lava ʻo fehuʻi pē kiate koe:

  • ʻOku fēfē ʻeku ongo ki he tefitoʻi moʻoni ko ʻení?

  • Ko e hā ha aʻusia kuó u maʻu ʻi he tefitoʻi moʻoni ko ʻení?

  • Kuo tokoniʻi fēfē au ʻe he Fakamoʻuí ke u ako mo moʻui ʻaki ʻa e tefitoʻi moʻoni ko ʻení?

  • Kapau te u fakamoʻoni ki he tefitoʻi moʻoni ko ʻení, ko e hā te u lea ʻakí pea ko e hā hono ʻuhingá?

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

ʻOku teuteu ʻe Brother ʻAlameita ha lēsoni peá ne ʻiloʻi ʻa e tefitoʻi moʻoni ko ʻení ʻa ia te ne lava ʻo fakaʻaongaʻi ke tokoni ki he kau akó ke nau ʻiloʻi mo mahino kiate kinautolu: “ʻI heʻetau maʻu ʻa e sākalamēnití mo manatu maʻu ai pē ki he Fakamoʻuí, te tau maʻu ai Hono Laumālié.”

ʻOku kiʻi longo ʻa Brother ʻAlameita ke fakalaulauloto ki heʻene ngaahi aʻusiá ʻaki haʻane fehuʻi loto pē kiate ia, “Ko e hā ha meʻa kuó u aʻusia ʻi heʻeku feinga ke manatuʻi ʻa e Fakamoʻuí ʻi he taimi ʻoku ou maʻu ai ʻa e sākalamēnití?”

ʻI he fakalaulauloto ʻa Brother ʻAlameita ki he fehuʻi ko ʻení, naʻá ne fakatokangaʻi kuo tokoniʻi ia ʻe heʻene manatuʻi mo fakakaukau ki he Fakamoʻuí lolotonga ʻa e sākalamēnití ke ne ongoʻi ʻa e ngaahi ola mālohi ʻo e fakamolemolé mo e fakamoʻuí ʻo fakafou ʻi he Fakalelei ʻa e Fakamoʻuí.

Lomiʻi heni ke vakai ki ha vitiō ʻo e sīpinga ko ʻení.

Akoako

Fakaʻaongaʻi ha kiʻi taimi ke ke fakalaulauloto ai ki hoʻo aʻusiá mo hoʻo fakamoʻoni kia Sīsū Kalaisí ki he tokāteline mo e tefitoʻi moʻoni takitaha ʻi he lisi ko ʻení:

  • Kapau te tau tauhi ʻa e ngaahi fekau ʻa e ʻOtuá, ʻe tāpuekina kitautolu ʻe he ʻOtuá fakatuʻasino mo fakalaumālie fakatouʻosi.

  • Ko ha tefitoʻi moʻoni mei he lēsoni hoko te ke akoʻí.

Aleaʻi pe Fakalaulauloto

  • Ko e hā naʻá ke ako pe ongoʻi lolotonga hoʻo akoakó?

  • ʻE founga fēfē haʻo toe lelei ange ʻi hono akoʻi ʻo e ngaahi tefitoʻi moʻoni mo e tokāteline ʻi hoʻo lēsoní ʻi hoʻo fakaʻaongaʻi ʻa e taukei ko ʻení?

Fakakau

  • ʻI he taimi kotoa pē ʻokú ke teuteu ai ha lēsoni, kiʻi taʻofi ʻo fakakaukau ki hoʻo aʻusia mo e fakamoʻoni kia Sīsū Kalaisí pea mo e tokāteline mo e ngaahi tefitoʻi moʻoni ʻi he lēsoní.

Fie Ako Lahi Ange?

Paaki