Ngaahi Taumuʻa ki he Ako Folofolá

Taukei: Tokoniʻi ʻa e kau akó ke nau fili pe ko e founga ako folofola fē ke fakaʻaongaʻí ʻaki hano ʻoange kiate kinautolu ha ngaahi founga ako folofola kehekehe ke fakakaukauʻi.

Ko e hā ʻeku ʻuluaki mahinó pe meʻa te u malavá? (Sivi):

Kuó ke fakakaukau nai ki he lahi ʻo e ngaahi founga kehekehe ke ako ʻaki ʻa e folofolá? ʻOkú ke pehē ko e ngaahi founga ʻe fiha ʻoku maheni mo hoʻo kau akó?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

Naʻe pehē ʻe Palesiteni Nalesoni, “ʻOku ou fokotuʻu atu ke ke faʻu ʻa e founga hoʻo akó ke feʻunga mo koe” (Russell M. Nelson, “Living by Scriptural Guidance,” Ensign, Nov. 2000). ʻI he taimi ʻoku fili ai ʻe he kau akó ha founga ako folofola ʻokú ne feau ʻenau ngaahi fiemaʻu fakafoʻituituí, ʻoku meimei ke fakaʻaiʻai mo vēkeveke ange ai ke aʻusia ʻenau taumuʻa ako folofolá mo ongoʻi ʻa e mālohi ʻo hono ako ʻo e folofola ʻa e ʻOtuá ʻi heʻenau moʻuí. ʻOku ʻikai totonu ke feinga ʻa e kau faiakó ke tataki ʻa e kau akó ki ha founga ako folofola pau; ka ʻi heʻenau poupouʻi ʻa e kau akó ke fokotuʻu ha taumuʻa ako fakatāutahá, ʻoku totonu ke nau tokoni ke nau fakafuofuaʻi ʻa e founga ʻe lelei taha kiate kinautolú. Ko e founga ʻe taha ʻe lava ke fai ai ʻení ko hono ʻoange ki he kau akó ha ngaahi founga ako folofola kehekehe ke nau fili mei ai. ʻE lava foki ke ʻaonga lahi ke fakaafeʻi ʻa e kau ako kuo nau ʻosi maʻu ha ngaahi founga ako folofola leleí ke vahevahe kinautolu mo honau kaungāakó.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻI hono fakaafeʻi ʻe Brother Pilingi ʻene kau akó ke nau kamata fakalaulauloto ki heʻenau ngaahi taumuʻa ako folofolá, ʻokú ne ʻoange kiate kinautolu ʻa e fakamatala “Ngaahi Fakamatala fekauʻaki mo e Ngaahi Founga mo e Taukei Ako Folofolá” (ʻi laló). ʻOkú ne ʻoange ki heʻene kau akó ha miniti ʻe nima ke nau lau fakavave ʻa e fakamatalá pea lau ʻa e ngaahi konga ʻoku makehe kiate kinautolú ʻo kumi ʻa e ngaahi meʻa te nau ala fie ʻahiʻahiʻí. Hili ha miniti ʻe nima ʻokú ne fai ange ʻa e ngaahi fehuʻi ko ʻení:

• Hili hono toe vakaiʻi ʻa e lisi ko ʻení, ko e hā ha ngaahi founga ʻokú ke pehē ʻe ʻaonga ke ke fakaʻaongaʻi ʻi he taimí ni?

• ʻOku ʻi ai nai ha ngaahi founga ʻoku ʻikai ʻasi heni te ke fie ʻahiʻahiʻi pe hoko atu ki ai?

ʻI hono fokotuʻu mai ʻe he kau akó ʻa e ngaahi meʻa ʻoku ʻikai hiki ʻi he laʻipepa tufá, ʻoku hiki kinautolu ʻe Brother Pilingi ʻi he palakipoé. Hili ʻenau fealeaʻakí, ʻokú ne poupouʻi ʻene kau akó ke nau fakakaukauʻi pe ko e fē ʻa e founga ʻe lelei taha ki heʻenau taumuʻa ako folofolá pea poupouʻi kinautolu ʻi he taumuʻa kuo nau fokotuʻú.

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako)

Toe vakaiʻi ʻa e peesi maʻuʻanga tokoni ko e “Ngaahi Fakamatala fekauʻaki mo e Ngaahi Founga mo e Taukei Ako Folofolá” (ʻi laló) pea faʻu ha fehuʻi ʻe taha pe lahi ange te ke lava ʻo fai ki hoʻo kau akó ʻa ia te ne poupouʻi kinautolu ke nau feinga ke ʻiloʻi ha founga ako folofola ʻoku ʻaonga kiate kinautolú.

Fakalaulauloto pe aleaʻi:

ʻOkú ke pehē ʻoku tākiekina fēfē ʻe he ngaahi founga ako folofola ʻa e kau akó ʻa e founga ʻoku nau ako ai mei he folofolá?

Ko e hā ʻa e founga mo e taimi te u fakakau ai ʻení?

Fakapapauʻi ʻa e founga te ke ʻoange ai ki hoʻo kau akó ha ngaahi founga ako mo ha ngaahi taukei te nau lava ʻo fakaʻaongaʻi. Fakakaukauʻi ʻa e fehuʻi pe ngaahi fehuʻi te ke fakaʻaongaʻi ke tokoniʻi kinautolu ke nau ʻiloʻi ʻa e founga te ne feau lelei taha ʻenau ngaahi fiemaʻú. (Mahalo te ke fie fakakaukau ke fakaʻaongaʻi ʻeni ʻi hono fakatahaʻi mo e ngaahi taukei fokotuʻu taumuʻa fakafolofola kehe hangē ko hono ʻiloʻi ʻo e ngaahi tāpuaki ʻo e ako folofolá, poupouʻi kinautolu ke nau faʻa lotu ʻi hono fokotuʻu ha taumuʻa ako folofolá, pe hangē ko hono fakakaukauʻi ʻa e taimi mo e feituʻu ke ako aí.)

Kātaki ʻo fakatokangaʻi ange: ʻE mateuteu ha kau ako ʻe niʻihi ke fili lolotonga ʻo e kalasí pe ko e fē founga ako folofola te nau fie fakaʻaongaʻí. Mahalo ʻe fiemaʻu ke fakalaulauloto mo lotu ha niʻihi kehe kimuʻa pea nau toki fai ha fili. ʻE ʻaonga ke toutou vakaiʻi mo e kau akó pea tokoni ʻo fakatatau ki ai.

Ngaahi Fakamatala fekauʻaki mo e Ngaahi Founga mo e Taukei Ako Folofolá

Fekumi ki he Fakamoʻuí mo ʻEne ngaahi akonakí.	“Uá, ʻoku ou fakaafeʻi kimoutolu ke mou lau e Tohi ʻa Molomoná ke ʻosi mei he taimí ni ki he fakaʻosinga ʻo e taʻú. … ʻI hoʻo ako ʻi he faʻa lotú, ʻoku ou palōmesi atu ʻe fakaava mai e langí maʻau. ʻE tāpuekina koe ʻe he ʻEikí ʻaki ha ueʻi fakalaumālie mo ha fakahā lahi ange. ʻOku ou poupouʻi kimoutolu ʻi hoʻomou laukongá, ke mou fakaʻilongaʻi e veesi takitaha ʻoku fakamatala kau ki he Fakamoʻuí. Pea fakapapauʻi ʻokú ke talanoa kau kia Kalaisi, fiefia ʻia Kalaisi, mo malangaʻi ʻa Kalaisi ki ho fāmilí mo e kaungāmeʻá. ʻI he foungá ni te mou toe ofi ange ai ki he Fakamoʻuí. Pea ʻe kamata ke hoko ha ngaahi liliu, naʻa mo e ngaahi maná” (Russell M. Nelson, “Kau ʻa e Houʻeiki Fafiné ki Hono Tānaki ʻo ʻIsilelí,” Liahona, Nōvema 2018, 69–70). “ʻI he taimi ʻoku tau tali ai ʻa e fakaafe ongoongofua ʻa e ʻEikí ke “Ako ʻiate aú,” ʻoku tau maʻu ai Hono mālohi fakalangí.” (Thomas S. Monson, “Ako ʻIate Au,” Liahona, Māʻasi 2016, 6). “Ako ʻiate au, pea fanongo ki heʻeku ngaahi leá; ʻaʻeva ʻi he angamalū ʻo hoku Laumālié, pea te ke maʻu ʻa e melinó ʻiate au” (Tokāteline mo e Ngaahi Fuakava 19:23).
Feinga ke ʻiloʻi ʻa e ngaahi tāpuaki kuo talaʻofa mai ʻoku maʻu mei hono ako ʻo e folofolá.	Siʻoku kāinga ʻofeina, ʻoku ou palōmesi atu ʻi hoʻo ako e Tohi ʻa Molomoná he ʻaho kotoa peé, ʻe toe lelei ange ai hoʻo fai tuʻutuʻuní he—ʻaho kotoa pē. ʻOku ou palōmesi atu ʻi hoʻo fakalaulauloto ki he meʻa ʻokú ke akó, ʻe fakaava mai ʻa e ngaahi matapā ʻo e langí, pea te ke maʻu ha ngaahi tali ki hoʻo ngaahi fehuʻí mo ha fakahinohino ki hoʻo moʻuí. ʻOku ou palōmesi atu ʻi hoʻo fakaʻutumauku fakaʻaho he Tohi ʻa Molomoná, ʻe lava ke maluʻi koe mei he ngaahi kovi ʻo e kuongá, kau ai e haʻahaʻa fakalilifu ʻo e ponokalafí mo e ngaahi maʻunimā ʻokú ne fakakonahi ʻetau fakakaukaú” (Russell M. Nelson, “Ko e Tohi ʻa Molomoná: Ne Mei Fēfē Hoʻo Moʻuí Ka Ne Taʻeʻoua Ia?” Liahona, Nōvema 2017, 62–63). “ʻE lava ke hoko ʻa e fakalaulauloto ki ha potufolofolá ko ha kī ke ne fakaava mai ʻa e fakahaá pea mo e tataki mo e ueʻi ʻa e Laumālie Māʻoniʻoní. ʻE lava ke fakafiemālieʻi ʻe he folofolá ʻa e laumālie taʻemanongá, ʻo ʻomai ʻa e melinó, ʻamanaki leleí, mo toe fakafoki ʻa e loto-falalá ke malava ai ʻe ha taha ʻo ikunaʻi e ngaahi faingataʻa ʻo e moʻuí. ʻOkú na maʻu ʻa e ivi mālohi ke fakaleleiʻi e ngaahi faingataʻaʻia fakaelotó ʻi he taimi ʻoku tau tui ai ki he Fakamoʻuí. Te nau lava ʻo fakamoʻui leva e sinó” (Richard G. Scott, “Ko e Mālohi ʻo e Folofolá,” Liahona, Nōvema 2011, 6). “Naʻá ku pehē ange kiate kinautolu, ko e folofola ia ʻa e ʻOtuá, pea ʻilonga ʻa kinautolu ʻe tokanga ki he folofola ʻa e ʻOtuá, ʻo piki maʻu ki aí, ʻe ʻikai te nau teitei mate; pea ʻe ʻikai foki lava ke ikunaʻi ʻa kinautolu ʻe he ngaahi ʻahiʻahi mo e ngaahi ngahau vela ʻa e filí ke fakakuihi mo tohoakiʻi atu ʻa kinautolu ki he fakaʻauhá.” (1 Nīfai 15:24).
Tokoni ke fakakaukauʻi ʻe he kau akó pe ko e founga pe ngaahi founga ako folofola fē ke fakaʻaongaʻí.	“Hokó, ʻoku ou fokotuʻu atu ke ke faʻu ʻa e founga hoʻo akó ke feʻunga mo koe. Ko e founga ʻe taha ko hono lau ha tohi folofola mei he peesi ʻuluakí ki he peesi fakaʻosí. ʻOku ʻomi ʻe he founga ko ʻení ha fakakaukau lelei fakalūkufua. Ka ʻoku ʻi ai foki mo ha ngaahi founga kehe ʻoku ʻaonga. ʻE lava ke tokoni ʻa e tokanga ki ha tefito pe kaveinga pau, ʻa ia ʻoku fakalahi atu ʻi hono fakaʻaongaʻi ʻo e ngaahi futinouti fakafekauʻakí mo e ngaahi fakahinohino akó, ke liliu ʻa e maama ʻo e mahino fakatokāteliné” (Russell M. Nelson, “Living by Scriptural Guidance,” Ensign, Nov. 2000). “ʻOku totonu ke ke tokanga lahi ange ki he lahi ʻo e taimi ʻokú ke fakaʻaongaʻi ʻi he folofolá ʻi he lahi ʻo e meʻa naʻá ke lau ʻi he taimi ko iá. ʻOku ou ʻilo ʻokú ke faʻa lau ha ngaahi veesi ʻi he taimi ʻe niʻihi, pea kiʻi mālōlō ʻo fakalaulauloto ki ai, pea toe lau fakalelei ange ʻa e ngaahi vēsí, pea ʻi hoʻo fakakaukau ko ia ki hono ʻuhingá, mo lotua ke mahinó, pea mo fehuʻi ʻi ho ʻatamaí, mo tatali ki ha ueʻi fakalaumālié, pea mo hiki ʻa e ngaahi ongo mo e ngaahi ʻilo ʻoku hokó, koeʻuhí ke ke lava ʻo manatuʻi mo ako lahi ange ai. ʻI hoʻo ako ʻi he founga ko ʻení, mahalo he ʻikai ke lahi ʻa e ngaahi vahe ia pe ngaahi veesi te ke lau ʻi ha haafe houá, ka te ke fakaʻataʻatā ai ho lotó ke hū atu ʻa e folofola ʻa e ʻOtuá, pea ke Ne folofola atu kiate koe” (D. Todd Christofferson, “When Thou Art Converted,” Liahona, Mē 2004, 11). “Pea tokanga ke fai ʻa e ngaahi meʻá ni kotoa pē ʻi he fakapotopoto mo e maau; he ʻoku ʻikai fiemaʻu ke lele ʻa e tangatá ʻo vave ange ʻi he mālohi ʻokú ne maʻú. Pea ko e tahá, ʻoku ʻaonga ke ne faivelenga koeʻuhí ke ne lava ʻo maʻu ai ʻa e palé; ko ia, ʻoku totonu ke fai ʻa e meʻa kotoa pē ʻo maau” (Mōsaia 4:27).
Fakatatau ʻa e folofolá ki hoʻo moʻui fakafoʻituituí.	“ʻOku tau kamata ʻaki ha fakapapau ke ʻfakatatau ʻa e ngaahi folofola kotoa pē kiate kitautolu … ke ʻaonga ia kiate kimautolu pea mau poto aiʼ [1 Nīfai 19:23]. Kapau te tau ‘vilitaki atu, pea keinanga ʻi he folofola ʻa Kalaisí, pea kātaki ki he ngataʻangá, … [te tau] maʻu ʻa e moʻui taʻengatá’ [2 Nīfai 31:20]. … ʻI hoʻo fakalaulauloto mo lotu fekauʻaki mo e ngaahi tefitoʻi moʻoni fakatokāteliné, ʻe folofola atu ʻa e Laumālie Māʻoniʻoní ki ho ʻatamaí pea mo ho lotó [Tokāteline mo e Ngaahi Fuakava 8:2]. ʻE maʻu mei he ngaahi fakamatala ʻi he folofolá ha ngaahi fakakaukau foʻou pea ʻe fakatō ki ho lotó ʻa e ngaahi tefitoʻi moʻoni ʻoku fekauʻaki mo ho tūkungá. Te ke fakatupulaki ʻa e ngaahi aʻusia peheé ʻaki hoʻo moʻui fakatatau mo e maama kuo foaki atú ʻaki haʻo fekumi he folofolá ʻi he loto-haohaoa—mo e loto-moʻoni ke ‘haʻu kia Kalaisi’ [Sēkpe 1:7]. ʻI hoʻo fai iá, ʻe ʻʻāsili mālohi ʻa hoʻo falalá ʻi he ʻao ʻo e ʻOtuá,ʼ pea ʻe hoko ʻa e Laumālie Māʻoniʻoní ko ho takaua maʻu ai pē [Tokāteline mo e Ngaahi Fuakava 121:45–46]” (Russell M. Nelson, “Living by Scriptural Guidance,” Ensign, Nov. 2000). “Feinga ke maheni mo e ngaahi lēsoni ʻoku akoʻi mai ʻe he folofolá. ʻIlo ki he puipuituʻa mo e feituʻu naʻe fai ai ʻe he ʻEikí ʻa e ngaahi talanoa fakatātaá pea mo e akonaki ʻa e kau palōfitá. Ako kinautolu ʻo hangē pē ʻoku nau lea atu kiate koé, he ko hono moʻoní ia” (Thomas S. Monson, “A Time to Choose,” Ensign, May 1995).
Fokotuʻu ha taimi angamaheni ke ako ai ʻa e folofolá ʻi he ʻaho kotoa pē.	“Ko e taimi ki he ako folofolá ʻoku fiemaʻu ki ai ha taimi-tēpile ʻe fakaʻapaʻapaʻi. Ka ʻikai, ko e ngaahi tāpuaki mahuʻinga tahá ʻe maʻu ia ʻi he ʻaloʻofa ʻo e ngaahi meʻa ʻoku siʻi tahá” (Russell M. Nelson, “Living by Scriptural Guidance,” Ensign, Nov. 2000). “Ko hono toki akoʻi fakaʻangatahá, ʻoku ʻikai tatau hono ʻaongá mo hono lau mo fakaʻaongaʻi fakaʻaho ʻa e folofolá ʻi heʻetau moʻuí” (Thomas S. Monson, “Be Your Best Self,” Liahona, May 2009, 68). “Ko e founga pē ʻe taha te ke lava ʻo fakapapauʻi ai ʻoku ʻikai hanga ʻe ha fuʻu femoʻuekina ʻa e taimí ʻo fakatupu hano taʻe fakahoko ʻo e ako folofolá ko hono fokotuʻu ʻo ha taimi pau ke fai maʻu ai pē ʻa e ako folofolá. … ʻOku ou faingataʻaʻia ʻi he taimi ko ia ʻoku ʻikai ke u muimui ai ki heʻeku founga ako folofolá. Ko hoʻo anga pē ki hoʻo taimi ako folofola angamahení, ʻokú ke ongoʻi ʻaupito ʻa e taimi ʻoku ʻikai ke lava ʻo fakahoko ai iá. ʻOku hangē pē ia ko e meʻakaí—kuo pau ke ke maʻu ia. ʻOku ou ʻilo ʻoku ou fiemaʻu ʻa e folofolá ʻo hangē pē ko ʻeku fiemaʻu e meʻakaí. ʻOku ʻikai ke u liʻaki ha houa maʻu meʻatokoni angamaheni, pea ʻoku ʻikai ke u liʻaki ʻeku ako folofola maʻu peé” (Henry B. Eyring, “A Discussion on Scripture Study,” Liahona, July 2005, 24). “Ko e moʻoni ʻoku ou pehē, ʻoku totonu ke [ke] femoʻuekina ʻi he holi lahi ʻi ha ngāue lelei, pea fai ʻa e ngaahi meʻa lahi ko [hoʻo] fili tauʻatāina.” (Tokāteline mo e Ngaahi Fuakava 58:27). “Tuku ʻa e nofo noá; tuku ʻa e taʻemaʻá; tuku ʻa e fefakaangaʻaki ʻiate kimoutolú; tuku ʻa e mohe ʻo fuoloa ange ʻi he taimi ʻoku ʻaongá; mou ʻalu ʻo mohe ʻi he teʻeki ai ke fuoloa ʻa e poʻulí, koeʻuhí ke ʻoua naʻa mou helaʻia; ʻā hengihengi hake koeʻuhi ke longomoʻui ʻa homou sinó mo e ʻatamaí” (Tokāteline mo e Ngaahi Fuakava 88:124). Scriptures: Ten Minutes a Day (New Era, September 2017, pp. 26-29) Meʻakai Fakaʻahó: Sīpingá (Vitiō 2:51)
Lotu kimuʻa, lolotonga, pe hili ʻa e ako folofolá pea kole ki he Tamai Hēvaní ke Ne akoʻi koe ʻo fakafou ʻi he Laumālie Māʻoniʻoní. Lotua ke ke ʻiloʻi ʻa e ngaahi taumuʻa ʻoku totonu ke ke fokotuʻu ki he ako folofolá. Lotua ke tataki koe ki he ngaahi tali ʻokú ke fekumi ki aí.	“Koeʻuhí ʻoku toki mahino pē ʻa e moʻoni ʻoku ʻomi ʻi he fakahaá, ʻe fiemaʻu leva ke tau faʻa lotu ʻi heʻetau akó” (Russell M. Nelson, “Living by Scriptural Guidance,” Ensign, Nov. 2000). Ke maʻu ha fakahaá, ʻoku fiemaʻu ke tau teuteuʻi kitautolu. Kuó u ʻilo ʻi heʻeku ako folofola fakatāutahá ʻoku totonu ke u lotu maʻu pē kimuʻa peá u lau ʻa e folofolá. Peá u tatali leva. ʻOku ʻomi ʻe he ʻEikí ʻa e fakahaá ʻi he taimi ʻOʻoná, pea ʻi he founga ʻAʻaná, pea fakatatau ki Hono finangaló. ʻOku fiemaʻu ai ʻi he ngaahi taimi ʻe niʻihi ke tau tatali. ʻOku ʻi ai ha meʻa ʻe taha fekauʻaki mo e fakahā fakatāutahá ʻoku totonu ke tau manatuʻi: ʻoku ʻikai teitei kaikaila ʻa e ʻEikí; ʻOkú Ne fanafana (vakai, Hilamani 5:30). ʻOku pehē ʻe ha niʻihi ʻoku teʻeki ke nau maʻu ʻa e fakahā fakatāutahá koeʻuhí ʻoku teʻeki ke nau ongoʻi ha lea leʻolahi pe sio ki ha ʻāngelo. Ka ʻoku fanafana pē ʻa e ʻEikí. Ko ia ko e taimi te ke fekumi ai ki ha fakahaá, fakafanongo ki ha fanafana” (Dallin H. Oaks, “You Can Do This,” New Era, Apr. 2020, 13). “ʻOku ʻikai ke u ʻilo ha founga lelei ange ke manatu maʻu ai pē kiate Ia ʻi haʻaku ako fakaʻaho ʻa e folofolá” (David A. Bednar, “Understanding the Importance of Scripture Study,” [Brigham Young University–Idaho devotional, Jan. 6, 1998], byui.edu). “Ko e taimi ʻoku tau fie fakataufolofola ai ki he ʻOtuá, ʻoku tau lotu. Pea ko e taimi ʻoku tau fiemaʻu ai ke folofola mai kiate kitautolú, ʻoku tau fekumi ʻi he folofolá; he ʻoku fakafou ʻene folofolá ʻi Heʻene kau palōfitá. Te Ne toki akonekina leva kitautolu ‘i heʻetau fakaongoongo ki he ngaahi ueʻi ‘a e Laumālie Māʻoniʻoní” (Robert D. Hales, “Holy Scriptures: The Power of God unto Our Salvation,” Liahona, Nov. 2006, 26–27).
ʻEke ha ngaahi fehuʻi pea fekumi ʻi he folofolá ki ha ngaahi tali ki hoʻo ngaahi fehuʻi ʻi he ongoongoleleí.	Ko e hā ʻoku hoko ai ʻa e Sāpaté ko ha ʻaho ʻo e mālōloó? ʻOku fēfē ʻa e talanoa ko ʻení ʻi heʻeku moʻuí? ʻOku fakahoko fēfē ha liliu ʻi hono fakaʻapaʻapaʻi ʻeku ongomātuʻá? “ʻOku tokoniʻi hono maʻu ʻa e fakahinohino fakafolofolá ʻaki hono fakahaaʻi ha ngaahi fehuʻi mahuʻinga [1 Nīfai 10:19]. Mahalo te ke fehuʻi, ʻKo e hā ha tefitoʻi moʻoni ʻe lava ke ako mei he ngaahi akonaki ko ʻeni ʻa e ʻEikí?ʼ” (Russell M. Nelson, “Living by Scriptural Guidance,” EnsignNov. 2000). “He ko ia ʻoku kumi faivelengá, te ne ʻiloʻi; pea ʻe fakahā ʻa e ngaahi meʻa lilo ʻa e ʻOtuá kiate kinautolu, ʻi he mālohi ʻo e Laumālie Māʻoniʻoní, ʻo tatau pē ʻi he ngaahi kuongá ni mo e ngaahi kuonga ʻi muʻá, pea tatau pē ʻi he ngaahi kuonga ʻi muʻá mo e ngaahi kuonga ʻe hoko maí; ko ia, ʻe ʻikai liliu ʻe he ʻEikí ʻene ngaahi founga ngāué ʻo taʻengata” (1 Nīfai 10:19).
Faʻu ha lisi ʻo e ngaahi potufolofola ʻoku ʻi ai hano ʻuhinga makehe kiate koé.	Te ke lava ʻo kamata ʻaki ha ngaahi veesi fakataukei folofola pe ko ha niʻihi ʻo e ngaahi meʻa ʻokú ke saiʻia fakataautaha ai kuó ne ueʻi fakalaumālie koe ʻi he kuohilí. Mahalo te ke fie ngāue ki hono ako maʻuloto ha ngaahi veesi siʻi. ʻI hoʻo lau ʻa e ngaahi potufolofola makehe ko ʻení, feinga ke muimui ki he ngaahi potufolofola fakafekauʻaki ʻoku ʻoatu ʻi he konga ki lalo ʻo e pēsí pea sio pe ko e fē feituʻu te nau tataki koe ki ai ʻi hoʻo akó.
Kamataʻi haʻo tohinoa ako folofola.	ʻI he taimi ʻokú ke lau mo fakalaulauloto ai ki he folofolá, teuteu hoʻo tohinoá mo ha peni pe penivahevahe. Te ke lava ʻo hiki tatau ha faʻahinga veesi pē ʻo e potufolofola ʻokú ne ueʻi fakalaumālie koé, hiki ha fakamatala kau ki he meʻa ʻokú ke akó, pe lekooti ha faʻahinga ongo fakalaumālie pē. Te ke lava foki ʻo hiki ha ngaahi fakakaukau ke ako ʻi he kahaʻú.
Ako ʻa e puipuituʻá.	“Ako ʻa e puipuituʻa mo e feituʻu naʻe fai ai ʻe he ʻEikí ʻa e ngaahi talanoa fakatātaá mo e ngaahi naʻinaʻi ʻa e kau palōfitá” (Thomas S. Monson, “Be Your Best Self,” Liahona, May 2009, 68).
Kamata ʻi he ʻahó ni!	Neongo pe ko e hā hoʻo fili ke ako ʻa e folofolá, ʻe tokoni hoʻo akó ke fakamālohia hoʻo fakamoʻoní mo fakatupulaki hoʻo mahino ki he ongoongoleleí. ʻI hono fakalea ʻe tahá, ʻoku ʻikai ha founga totonu ʻe taha ki hono ako ʻo e folofolá, ko ia ʻoua naʻá ke manavasiʻi ke kiʻi vaʻinga pea ʻahiʻahiʻi ha ngaahi founga foʻou ki he founga hoʻo laukongá.
Ngaahi Maʻuʻanga Tokoni Lahi Angé	Russell M. Nelson, “Living by Scriptural Guidance,” Ensign, Nov. 2000 Henry B. Eyring, “A Discussion on Scripture Study,” Liahona, July 2005, 22–26 D. Todd Christofferson, “Ko e Tāpuaki ʻo e Folofolá,” Liahona, Mē 2010, 32–35 Ko e Ngaahi Tāpuaki ʻo e Folofolá (Vitiō 3:03) “Ten Scripture Study Tools,” Ensign, Sept. 2010, 31 Ngaahi Akonaki ʻa e Kau Palōfita ʻo e Ngaahi ʻAho Kimui Ní kau ki he Ngaahi Tāpuaki ʻo Hono Ako ʻo e Folofolá Richard G. Scott, “Ko e Mālohi ʻo e Folofolá,” Liahona, Nōvema 2011, 6–8