Sa’ chixjunil li taak’ut, chatk’utuq chirix li Jesukristo

Wan naab’al li k’a’aq re ru li naru chi k’ute’k chirix lix k’ojob’anb’il evangelio li Jesukristo—eb’ li raqal chi na’leb’, eb’ li taqlahom, eb’ li profeetil aatin, ut eb’ li seraq’ sa’ li loq’laj hu. Chixjunileb’ ruq’eb’ jun ajwi’ li che’, xb’aan naq chixjunileb’ juneb’ ajwi’ li rajom: xtenq’ankil chixjunileb’ li kristiaan chi chalk rik’in li Kristo ut chi tz’aqlok re ru rik’in a’an (chi’ilmanq Jarom 1:11; Moroni 10:32). Jo’ kan naq maak’a’ naxye k’a’ru yookat chixk’utb’al, chijultiko’q aawe naq yookat chi k’utuk chirix li Jesukristo ut chan ru wulak jo’ a’an. Li Santil Musiq’ej naru tatxtenq’a chixk’eeb’al reetaleb’ li yaal chirix li Kolonel ut lix wankil jo’ aj tojol-ix sa’ li junjunq chi na’leb’, taqlahom, ut profeetil k’utuk (chi’ilmanq Jakob 7:10–11).

Ma yookat chi k’utuk chirix li mayej? Naru nekeril sa’ komonil chan ru naq li mayejak nekeb’aanu naxk’am lee ch’ool sa’ li “xnimal ru ut roso’jik xmayej” li Kolonel (Alma 34:10). Ma yookat chi k’utuk chirix li junajil? Naru teetz’il rix li junajil kiwan wi’ li Jesukristo rik’in lix Yuwa’, ut lix b’oqom naq junajaqo rik’ineb’ a’an (chi’ilmanq Jwan 17). K’e reetal naq li junjunq na’leb’ chirix li evangelio a’an jun hoonal re k’utuk ut re tzolok chirix li Jesukristo.

Li junjunq chi taqlahom naxk’e ajwi’ li hoonal a’in. Maatzol ka’ajwi’ xchaq’rab’ li evangelio—chattzoloq b’an ajwi’ chirix laj K’ehol chaq’rab’. Wi yookex chi tzolok chirix li Aatin re Chaab’il Na’leb’ ut ka’ajwi’ nekeril k’a’ru naru malaj ink’a’ naru nekeb’aanu re naq kawaq lee junxaqalil, neketz’eq li hoonal re xtz’ilb’al rix naq k’a’jo’ naq nak’oxlak li Jesukristo chiqix—sa’ musiq’ej ut jo’ ajwi’ sa’ tib’elej—re xk’eeb’al qe li chaq’rab’ a’in. K’ehomaq reetal naq li Kolonel naraj qosob’tesinkil rik’in lix wankilal re qatenq’ankil chixyu’aminkil lix chaq’rab’. Chixjunileb’ lix taqlahom li naxk’e qe nokoxtenq’a chixnawb’al lix k’a’uxl, li rajom, ut lix ch’ool—chetawaq xsahil eech’ool naq nekek’e reetal a’in sa’ komonil!

Xjultikankil reetalil lix b’aanuhom Jesukristo

Naqak’e li Jesukristo sa’ xjolomil li k’utuk ut li tzolok naq naqak’e reetal naq a’an li eetalil tz’aqal re ru sa’ chixjunil li na’leb’ re li evangelio. Jo’ xtzolom a’an, ink’a’ ka’ajwi’ naqataaqe li na’leb’—naqataaqe aj b’an wi’ li Jesukristo. Naq naqak’e li qilob’aal sa’ lix b’aanuhom li Kolonel, li Santil Musiq’ej tixch’olob’ xyaalal a’an ut tooreek’asi chixtaaqenkil.

K’oxla jun k’amokaq naq yookat chi k’utuk chirix li kuyuk toj sa’ roso’jik. Xtz’ilb’al rix chan ru naq li Kolonel a’an jun eetalil re kuyuk toj sa’ roso’jik naru naxk’e jun sahil eek’ahom re tuqtuukilal. K’a’ru naru neke’xtzol ut neke’reek’a li kristiaan nakak’ut wi’ lix b’aanuhom?

Li Kolonel kixk’e jun eetalil tz’aqal re ru choq’ qe chiqajunjunqal. Kixk’irtesiheb’ chixjunil, xb’aan laj Michael Malm

K’utuk chirixeb’ lix k’ab’a’, eb’ lix k’anjel, ut eb’ lix chaab’ilal li Jesukristo

Naab’al li nak’ab’a’iik wi’ li Jesukristo sa’ li loq’ laj hu. Li junjunq xk’ab’a’ nareetali jun reheb’ lix k’anjel sa’ lix k’uub’anb’il na’leb’ li Dios ut naxk’ut chiqu lix choxahil chaab’ilal. Naru teetz’il rix k’a’ru neke’xk’ut chiqu li k’ab’a’ej Xkarneer li Dios, aj Aatinanel chiqix, aj Choyonel re li qapaab’aal, ut lix Saqen li ruchich’och’, chirix li Jesukristo. Jo’kan ajwi’, naq yookat chixtenq’ankileb’ li komon chi tzolok chirix li Kolonel, maak’ut ka’ajwi’ li k’a’ru kixye ut kixb’aanu, chak’utaq b’an ani tz’aqal a’an ut k’a’ru lix k’anjel naraj xb’aanunkil sa’ li qayu’am. Naq nekextzolok chirix lix wanjik ut lix chaab’ilal li Kolonel, li Santil Musiq’ej jwal tixnimob’resi wi’chik lee nawom chirix a’an ut lee rahom choq’ re.

Xsik’b’aleb’ li eetalil li neke’xch’olob’ xyaalal li Jesukristo

“Chixjunil li k’a’aq re ru,” chan li Qaawa’, “yo’ob’tesinb’il ut yiib’anb’il re xch’olob’ankil inyaalal” (Moises 6:63; chi’ilmanq ajwi’ 2 Nefi 11:4). Rik’in li yaal a’in, naru naqatzol rilb’al naab’aleb’ li eetalil sa’ li loq’laj hu li neke’xch’olob’ xyaalal li Kolonel. Eb’ li eetalil a’in neke’xk’am chaq li k’a’aq re ru jo’ li kaxlan wa, li ha’, ut li saqen. Naq naqak’e reetal chan ru naq li k’a’aq re ru a’in neke’xk’am rib’ sa’ aatin rik’in li Kolonel, naru nokoh’extzol chirix lix wankilal ut lix chaab’ilal. Naru ajwi’ nakataw xjuntaq’eetil lix yu’am li Kolonel rik’ineb’ xyu’am li profeet ut rik’ineb’ jalan chik tiikil winq ut ixq sa’ li loq’laj hu. Sa’ xsik’b’aleb’ li eetalil taataw li yaal chirix li Kolonel sa’eb’ li na’ajej b’ar wi’ ink’a’ raj taak’e reetal.