நீங்கள் எதைக் கற்பித்தாலும் அது பொருட்டின்றி இயேசு கிறிஸ்துவைப்பற்றி கற்பியுங்கள்

இயேசு கிறிஸ்துவின் மறுஸ்தாபிதம் செய்யப்பட்ட சுவிசேஷத்தில் கற்பிக்க பல காரியங்கள் உள்ளன—கொள்கைகள், கட்டளைகள், தீர்க்கதரிசனங்கள் மற்றும் வேதக் கதைகள். ஆனால் இவை அனைத்தும் ஒரே மரத்தின் கிளைகள், ஏனென்றால் அவை அனைத்தும் ஒரே நோக்கம் கொண்டவை: எல்லா ஜனங்களும் கிறிஸ்துவண்டை வந்து அவரில் பரிபூரணமாக இருக்க உதவ. (யாரோம் 1:11; மரோனி 10:32 பார்க்கவும்). ஆகவே, நீங்கள் எதைக் கற்பித்தாலும் அது பொருட்டின்றி, உண்மையில் நீங்கள் இயேசு கிறிஸ்துவைப்பற்றியும் எவ்வாறு அவரைப் போலாகுவது என்பதைப்பற்றியும் கற்பிக்கிறீர்கள் என நினைவுகூருங்கள். ஒவ்வொரு சுவிசேஷக் கொள்கை, கட்டளை மற்றும் தீர்க்கதரிசன போதனைகளிலும் இரட்சகர் மற்றும் அவருடைய மீட்கும் வல்லமையைப்பற்றிய சத்தியங்களை அறிய பரிசுத்த ஆவியானவர் உங்களுக்கு உதவுவார் (யாக்கோபு 7:10–11 பார்க்கவும்).

நீங்கள் தியாகத்தைப்பற்றி கற்பிக்கிறீர்களா? நாம் செய்யும் தியாகங்கள் இரட்சகரின் “பெரிதும் கடைசியுமான பலியை நோக்கி” எவ்வாறு நம் ஆத்துமாக்களுக்கு சுட்டிக்காட்டுகின்றன என்பதை கற்பவர்களுடன் ஆராய்வதைக் கருத்தில் கொள்ளுங்கள். (ஆல்மா 34:10). நீங்கள் ஒற்றுமையைப்பற்றி கற்பிக்கிறீர்களா? இயேசு கிறிஸ்து தம் பிதாவுடன் அடைந்த ஒற்றுமை மற்றும் நாம் அவர்களுடன் ஒன்றாக இருக்க வேண்டும் என்ற அவரது அழைப்பைப்பற்றி கலந்துரையாடுவதைக் கருத்தில் கொள்ளவும். (யோவான் 17 பார்க்கவும்). ஒவ்வொரு சுவிசேஷ தலைப்பையும் இயேசு கிறிஸ்துவைப்பற்றி கற்பிப்பதற்கும் கற்பதற்கும் ஒரு வாய்ப்பாக பார்க்கவும்.

ஒவ்வொரு கட்டளையும் இந்த வாய்ப்பை வழங்குகிறது. சுவிசேஷத்தின் நியாயப் பிரமாணங்களில் மட்டும் கவனம் செலுத்தாதீர்கள்—நியாயப் பிரமாணம் கொடுப்பவரைப்பற்றியும் அறிந்துகொள்ளுங்கள். நீங்கள் ஞான வார்த்தையைப்பற்றி கலந்துரையாடி, ஆரோக்கியமான வாழ்வில் செய்ய வேண்டியவை மற்றும் செய்யக்கூடாதவைகளுடன் நிறுத்தினால், இந்த நியாயப் பிரமாணத்தை நமக்கு வழங்குவதற்கு இயேசு கிறிஸ்து நம்மைப்பற்றி, நமது ஆவிக்குரிய மற்றும் உடல் நலனில், எவ்வளவு ஆழமாக அக்கறை கொண்டிருக்க வேண்டும் என்று சிந்திக்கும் வாய்ப்பை இழக்கிறீர்கள். இரட்சகர் அவருடைய நியாயப் பிரமாணங்களின்படி நாம் வாழ உதவுவதற்காக அவருடைய வல்லமையால் நம்மை ஆசீர்வதிக்க எவ்வளவு விருப்பமும் ஆர்வமும் உள்ளவராயிருக்கிறார் என்பதில் கவனம் செலுத்துங்கள். அவர் நமக்குக் கொடுக்கும் ஒவ்வொரு கட்டளையும் அவருடைய மனம், சித்தம் மற்றும் இருதயத்தைப்பற்றி ஏதாவது ஒன்றை வெளிப்படுத்துகிறது—இதை ஒன்றாகக் கண்டுபிடிப்பதில் மகிழ்ச்சியைக் காணுங்கள்!

இயேசு கிறிஸ்துவின் எடுத்துக்காட்டை வலியுறுத்துங்கள்

அனைத்து சுவிசேஷக் கொள்கைகளுக்கும் இயேசு கிறிஸ்துவே பரிபூரண முன்மாதிரி என்பதை அங்கீகரித்து, வலியுறுத்துவதன் மூலம் கற்பித்தல் மற்றும் கற்றுக்கொள்ளுதலின் மையத்தில் நாம் இயேசு கிறிஸ்துவை வைக்கலாம். சீஷர்களாக, நாம் கொள்கைகளை மட்டும் பின்பற்றுவதில்லை—நாம் இயேசு கிறிஸ்துவைப் பின்பற்றுகிறோம். இரட்சகரின் பரிபூரண முன்மாதிரியில் நாம் கவனம் செலுத்தும்போது, பரிசுத்த ஆவியானவர் அவரைப்பற்றி சாட்சியமளித்து, அவரைப் பின்பற்ற நமக்கு உணர்த்துவார்.

இறுதிபரியந்தம் நிலைத்திருத்தல் கொள்கையை நீங்கள் கற்பிக்கிறீர்கள் என்று ஒரு கணம் கற்பனை செய்து பாருங்கள். இரட்சகர் எப்படி இறுதிபரியந்தம் நிலைத்திருப்பதற்கு உதாரணமாக இருக்கிறார் என்பதைப்பற்றிய கலந்துரையாடல், அவர்மீது இனிமையான பயபக்தியை ஏற்படுத்த முடியும். அவருடைய உதாரணத்திலிருந்து நாம் கற்பிப்பவர்கள் எதைக் கற்றுக்கொள்ளக்கூடும்?

நம் அனைவருக்காகவும் ஒரு பரிபூரணமான எடுத்துக்காட்டை இரட்சகர் அமைத்தார். அவர்கள் அனைவரையும் அவர் குணப்படுத்தினார்—மைக்கல் மால்ம்

இயேசு கிறிஸ்துவின் பட்டங்கள், பாத்திரங்கள் மற்றும் பண்புகளைப்பற்றி கற்பியுங்கள்

வேதங்களில் இயேசு கிறிஸ்துவுக்கு அநேக பட்டங்களிருக்கின்றன. ஒவ்வொன்றும் தேவனின் திட்டத்தில் அவருடைய பாத்திரங்களில் ஒன்றைப் பிரதிபலிக்கின்றன மற்றும் அவருடைய தெய்வீக பண்புகளைப்பற்றி நமக்குக் கற்பிக்கின்றன. தேவனின் ஆட்டுக்குட்டி, மத்தியஸ்தர், நமது விசுவாசத்தை முடிப்பவர், மற்றும் உலகத்தின் ஒளி போன்ற பட்டங்கள் இயேசு கிறிஸ்துவைப்பற்றி நமக்கு என்ன கற்பிக்கின்றன என்பதை கற்பவர்களுடன் நீங்கள் ஆராய்வதைக் கருத்தில் கொள்ளலாம். மேலும், இரட்சகரைப்பற்றி அதிகம் அறிந்துகொள்ள கற்றுக்கொள்பவர்களுக்கு நீங்கள் உதவும்போது, அவர் என்ன சொன்னார், என்ன செய்தார் என்பதைத் தாண்டி, அவர் யார் என்பதையும், அவர் நம் வாழ்வில் என்ன பங்கு வகிக்க விரும்புகிறார் என்பதையும் கற்பியுங்கள். இரட்சகரின் குணம் மற்றும் பண்புகளைப்பற்றி நீங்கள் ஒன்றாகக் கற்றுக் கொள்ளும்போது, பரிசுத்த ஆவியானவர் அவரைப்பற்றிய உங்கள் புரிதலையும் அன்பையும் ஆழமாக்குவார்.

இயேசு கிறிஸ்துவைக் குறித்து சாட்சியமளிக்கும் அடையாளங்களைத் தேடுங்கள்

“எல்லா காரியங்களும் என்னைக் குறித்து சாட்சி கொடுக்க சிருஷ்டிக்கப்பட்டு, உண்டாக்கப்பட்டுள்ளன” (மோசே 6:63; 2 நேபி 11:4 ஐயும் பார்க்கவும்) என கர்த்தர் அறிவித்தார். அந்த சத்தியத்தை மனதில் கொண்டு, இரட்சகரைப்பற்றி சாட்சியமளிக்கும் வசனங்களில் ஏராளமான அடையாளங்களைக் காண நாம் கற்றுக்கொள்ளலாம். இந்த அடையாளங்களில் அப்பம், தண்ணீர் மற்றும் ஒளி போன்றவை அடங்கும். இந்த பொருள்கள் இரட்சகருடன் எவ்வாறு தொடர்புபடுகின்றன என்பதை நாம் ஒருமுறை புரிந்துகொண்டவுடன், அவை அவருடைய வல்லமை மற்றும் பண்புகளை நமக்குக் கற்பிக்க முடியும். தீர்க்கதரிசிகள் மற்றும் பிற விசுவாசமிக்க மனுஷர்கள் மற்றும் பெண்களின் வாழ்வில் இரட்சகரின் வாழ்க்கைக்கு இணையானவற்றை வேதங்களில் நீங்கள் காணலாம். அடையாளங்களைத் தேடுவது, நீங்கள் கவனிக்காத இடங்களில் இரட்சகரைப்பற்றிய சத்தியங்களை வெளிப்படுத்துகிறது.