Veivakatavulici ena Yalotabu

Ena gauna a vakaroti rau kina o Joseph Smith kei Sidney Rigdoni na iVakabula me rau vunautaka na Nona kosipeli, a yalataka o Koya vei rau, “Ena lako yani na Yalo Tabu me vakadinadinataka na veika kece ko na tukuna” (Vunau kei na Veiyalayalati100:8; raica talega na Vunau kei na Veiyalayalati 42:15–17; 50:17–22). Na yalayala vata ga oqo sa baleti ira kece era vakavulica na kosipeli, oka kina o iko. Nio vakavulica na kosipeli i Jisu Karisito, e rawa ni tiko vata kei iko na Yalo Tabu me tuberi iko ka vakadinadinataka na dina kina nodra vakasama kei na yalodra o ira o vakavulica (raica na Vunau kei na Veiyalayalati 8:2). O sega ni tu duadua ni o veivakavulici, ni “sa sega nio koya ga sa vosa, ia na Yalo Tabu” (Marika 13:11).

E dauniveivakavulici dina na Yalo Tabu. E sega ni dua na qasenivuli vakayago, se cava sara na nona maqosa se kilaka, e rawa ni sosomitaka na Nona itavi ena kena vakadinadinataki na dina, vakadinadinataki Karisito, ka veisautaka na yalo. Ia sa rawa vei ira kece na qasenivuli mera iyaya ni cakacaka ni nodra vukei na luve ni Kalou mera vuli mai vua na Yalotabu.

Veivakavulici ena Yalotabu

• Vakarautaki iko vakayalo.

• Dau tuvakarau e veigauna mo sotava na veivakauqeti vakayalo me baleta na nodra gagadre na vuli.

• Vakarautaka na ituvaki kei na madigi vei ira na vuli mera vakavulici mai vua na Yalo Tabu.

• Vukei ira na vuli mera vakasaqara, kila, ka cakacakataka na nodra ivakatakila yadua.

• Wasea vakawasoma na ivakadinadina, ka sureti ira na vuli mera wasea na nodra nanuma, veika era sotava, kei na nodra ivakadinadina.

Sa Vakarautaki Koya Vakayalo na iVakabula me Veivakavulici

Me vakavakarau ki na Nona ilesilesi, a gole o Jisu ki na lekutu ena 40 na siga “me tiko vata kei na Kalou” (iVakadewa nei Josefa Simici, Maciu 4:1 [ena Maciu 4:1, ivakamacala e ra b]). Ia a tekivu makawa sara na Nona vakavakarau vakayalo. Ni temaki Koya o Setani, a rawa vua me taura na “vosa ni bula” ka a vakamareqeta tu o Koya na “auwa” saraga ena nona gadrevi ira (Vunau kei na Veiyalayalati 84:85). Vakasamataka na nomu sasaga mo vakarautaki iko vakayalo mo veivakavulici. Na cava o vulica mai na Maciu 4:1–11 me baleta na sala o rawa ni muria kina na ivakaraitaki ni iVakabula ena nomu vakavakarau vakayalo?

Na Yalotabu sai koya na qasenivuli dina ka ivurevure dina ni saumaki. Na veivakavulici kaukauwa ni kosipeli e sega ni gadrevi walega kina na vakarautaki ni lesoni ia na nomu vakarautaki iko vakayalo ni bera nio tekivu mo veivakavulici. Kevaka o sa vakavakarau tiko vakayalo, ena vinaka cake mo rogoca ka muria na veidusimaki ni Yalotabu ni o veivakavulici. Na sala mo sureta kina na Yalo Tabu ki na nomu veivakavulici sai koya mo sureti Koya ki na nomu bula. Oqo e oka kina na sasaga vagumatua mo muria na ivakaraitaki ni iVakabula ka bulataka na Nona kosipeli ena yalomu taucoko. Baleta ni sega ni dua vei keda e cakava vakavinaka sara oqo, e kena ibalebale talega na veivutuni ena veisiga yadua.

Taro me vakasamataki vakatitobu: Na cava na kena ibalebale vei iko mo vakarautaki iko vakayalo mo veivakavulici? Na cava o vakauqeti mo cakava mo vakavinakataka kina na sala o vakarautaki iko kina vakayalo? O nanuma vakacava ni vakavakarau vakayalo e rawa ni vakayaco veisau ena nomu veivakavulici?

Mai na iVolanikalou: Esera 7:10; Luke 6:12; Alama 17:2–3, 9; Vunau kei na Veiyalayalati 11:21; 42:13–14

Sa Dau Tu Vakarau na iVakabula me Sotava na Nodra Gagadre na Tani

O Jairo, na iliuliu ni valenilotu, a lutu e yavai Jisu, ka kerea me vukea na luvena yalewa sa vakarau mate. Eratou sa sasagataka tiko o Jisu kei ira na Nona tisaipeli na nodratou ilakolako ena veisala osooso ki na vale nei Jairo qai cegu vakasauri o Jisu. “O cei a tarai au?” A taroga o Koya. E vaka e dua na taro sega ni matata—ena nodra tabili na tamata, ocei ena sega ni tarai Koya? Ia, na iVakabula e raica rawa ni o ira na lewe vuqa, e dua a torovi Koya mai ena dua na gagadre vakatabakidua kei na vakabauta me ciqoma na veivakabulai e solia o Koya. Ena tiko na gauna me sikovi luvei Jairo yalewa. Ia taumada a kaya vua na yalewa a tara na Nona isulu, “Luvequ Yalewa, mo vakacegu: sa vakabulai iko na nomu vakabauta; lako ena vakacegu” (raica na Luke 8:41–48).

Nio qasenivuli, o na rairai kunei iko ena so na gauna ena dua na vakusakusa mo ubia e dua na ka o sa vakarautaka tu mo vakavulica. Ena rairai bibi beka, mo vakadeitaka ni nomu vakusakusa mo kakua ni vakusakusataka e dua na gagadre bibi vua e dua o vakavulica tiko. Me ikuri ni veidusimaki vakayalo o vakasaqara ena nomu vakavakarau mo veivakavulici, vakasaqara talega na veidusimaki ni Yalotabu ni ko veivakavulici tiko. Tovolea mo kila na gagadre, na taro, kei na nodra malele na vuli. Ena rawa ni vukei iko na Yalo Tabu mo kila na sala e ciqoma se kila vinaka tiko kina e dua na ka o sa vakavulica tiko e dua na gonevuli. Ena rawa ni uqeti iko o Koya, ena so na gauna, mo veisautaka na nomu ituvatuva. Me ivakaraitaki, ona vakauqeti beka mo vakayagataka vakalevu cake na gauna mai na kena o nakita tiko ena dua na ulutaga se mo biuta eso na veivosaki me baleta e muri e dua na ka e bibi cake vei ira na vuli ena gauna oqo.

Taro me vakasamataki vakatitobu: Na gauna cava o sa bau vakila kina ni dua na itubutubu se qasenivuli tale eso a kila vinaka na nomu gagadre vaka dauvuli? Era kila beka o ira o vakavulica nio taleitaka vakalevu cake na nodra vuli mai na nodra vakacavara e dua na lesoni? E rawa vakacava nio tukuna vakavinaka cake na nomu kauwai?

Mai na iVolanikalou: 1 Pita 3:15; Alama 32:1–9; 40:1; 41:1; 42:1

Sa Vakarautaka na iVakabula na Madigi mera Vakavulici kina na Tamata mai vua na Yalo Tabu

A dredre vei ira e vuqa ena gauna i Jisu mera kila se o cei dina o Koya, ia a levu tu na nodra nanuma. “Eso era kaya ni sai kemuni ko Joni na Dauveipapitaisotaki,” eratou tukuna na Nona tisaipeli, “eso, ko Ilaisa; kei na so tale, ko Jeremaia, se dua vei ira na parofita.” Ia qai taroga o Jisu e dua na taro ka sureti iratou na Nona tisaipeli me ratou vakatikitikitaka na nodra nanuma na tani ka raica e lomadratou: “Dou sa kaya se ko cei koi au?” E vinakata mera kunea na kena isau ka sega mai na “lewe kei na dra” ia vakadodonu sara ga mai vei “Tamaqu sa tiko mai lomalagi.” Sai koya na mataqali ivakadinadina vakaoqo—na ivakatakila yadua mai vua na Yalo Tabu—ka rawa kina vei Pita me tukuna, “Oi kemuni na Karisito, na Luve ni Kalou bula” (raica na Maciu 16:13–17).

Me ra bula tiko vakayalo ena iotioti ni gauna, era na gadreva na tamata o vakavulica e dua na ivakadinadina vakayalo ni dina. E sega ni rawa nio solia vei ira, ia e rawa nio sureta, vakayaloqaqataka, vakauqeti ira, ka vakavulici ira me ra vakasaqara. Sa rawa mo vakamatatataka—ena nomu vosa kei na ivalavala—na kena bibi na Yalo Tabu kina vulici ni kosipeli. Vakasamataka mada, me ivakaraitaki, na ituvaki ni vuli o tauyavutaka ka vakayaloqaqataka. E dua na ka rawarawa me vaka na ituvatuva ni idabedabe ena dua na rumu se na sala o kidavaki kina ka veimaliwai kei ira na vuli e vakarautaka e dua na irogorogo vakayalo vei ira na vuli tiko. Sa rawa talega mo sureti ira na vuli mera vakarautaki ira vakayalo mera vuli, me vaka ga na nomu vakavakarau vakayalo mo veivakavulici. Kerei ira mera vakaitavi ena vuku ni yalo era kauta mai. Ka rawa ni o vakarautaka vei ira na madigi mera vakila kina na Yalo ni vakadinadinataki Jisu Karisito kei na Nona kosipeli. Na ivakadinadina oya ena yaco me dua na “vatu” vei ira, “ia ena sega ni rawati ira na matamata ki eli” (Maciu 16:18).

Taro me vakasamataki vakatitobu: Na cava o sa raica e cau kina dua na draki vakayalo ni kena vulici na kosipeli? Na cava e veivagolei tani mai kina? Na cava e vukei ira na tamata o vakavulica mera vuli mai vua na Yalotabu? Vakasamataka mada na ituvaki ni vanua o dau veivakavulicI wasoma kina. Na cava o vakila nio tiko e kea? Ena rawa vakacava mo sureta vakavinaka cake na Yalotabu me tiko e kea?

Mai na iVolanikalou: Luke 24:31–32; Joni 14:26; 16:13–15; Moronai 10:4–5; Vunau kei na Veiyalayalati 42:16–17; 50:13–24

Ni da veivakavulici, e rawa nida sureti ira na vuli mera vakasaqara na nodra dui ivakadinadina vakayalo me baleta na dina.

Na iVakabula e Vukei Ira Eso Mera Vakasaqara, Kila, ka Cakacakataka na iVakatakila Yadua

E vinakata na Turaga me veitaratara kei keda—ka vinakata o Koya meda kila ni veitaratara tiko kei keda o Koya. Ena 1829, a vulica tiko kina o Oliver Cowdery e dua na qasenivuli yabaki 22 na ivunau doudou ka talei, ni dua e rawa ni ciqoma na ivakatakila kina tamata yadua. Ia e tautauvata na nona taro kei na ka era taroga e vuqa vei keda: “E saga dina tiko beka na Turaga me vosa vei au? Ena rawa vakacava meu kila na ka e tukuna tiko o Koya?” Me saumi na veitaro oqo, a sureti Oliver o Jisu Karisito me vakasamataka lesu na gauna vuni ni vakasaqaqara vakayalo. “Au a sega li ni vakaceguya na nomu vakasama?” A taroga o koya (raica na Vunau kei na Veiyalayalati 6:21–24). E muri, a qai vakavulici Oliver ena sala tale eso e rawa ni vosa kina vua na Yalotabu (raica na Vunau kei na Veiyalayalati 8:2–3; 9:7–9; raica talega na Vunau kei na Veiyalayalati 11:12–14).

Nida bula tiko ena dua na vuravura e dau sega soti ni bibi sara ki na veika vakayalo, eda gadreva kece meda vukei me kila na domo ni Yalotabu. Eda a rairai vakila beka na Yalotabu ka sega ni kila rawa. Ka da rawa ni vulica vakalevu cake na sala meda vakasaqara kina na Yalotabu, kila na Nona veivakayarayarataki, ka cakacaka ena veivakauqeti e solia vei keda o Koya. Ni o veivakavulici, vukei ira na vuli mera kunea na sala e rawa ni veitaratara kina na Yalotabu—kei na sala sa veitaratara kina kei ira o Koya. E dua vei ira na isolisoli cecere o rawa ni solia ni o qasenivuli oya mo vukei ira o vakavulica mera toso ena bula taucoko ena sasaga ni ivakatakila yadua.

Taro me vakasamataki vakatitobu: Na cava na vuna e bibi kina meda vulica meda ciqoma na ivakatakila ki na tamata yadua? Sa bau dua e vukei iko mo kila na sala mo vakasaqara ka kila kina na ivakatakila? O na vakayaloqaqataki ira vakacava o vakavulica mera vakasaqara, kila, ka cakacakataka na ivakatakila mai vua na Yalo Tabu?

Mai na iVolanikalou: Kalatia 5:22–23; Alama 5:45–47; Vunau kei na Veiyalayalati 42:61; 121:33; Joseph Smith—Ai Tukutuku 1:8–20

Na iVakabula e Wasea na iVakadinadina Vei Ira e Vakavulica

Ena dua na gauna talei ni veivakavulici kei na veiqaravi, a saga o Jisu me vakaceguya nona itokani o Marica, ka sa mate na tacina. A wasea vua e dua na ivakadinadina rawarawa ni dua na dina tawamudu: “Ena tucake tale na wekamu” (Joni 11:23). Na nona ivakadinadina a vakauqeti Marica me wasea na nona ivakadinadina: “Au kila ni na tucake tale ko koya ena tucaketale ena siga mai muri” (Joni 11:24). Raica na sala e tokaruataki kina na ivakarau oqo ena Joni 11:25–27. Na cava e vakauqeti iko me baleta na ivakaraitaki ni iVakabula? Na cava e tiki bibi kina ni veivakavulici na wasei ni ivakadinadina ni dina ni kosipeli?

Na nomu ivakadinadina e rawa ni veivakayarayarataki kaukauwa vei ira o vakavulica. E sega ni gadrevi me titobu se balavu na nomu ivakadinadina. Ka sega ni gadrevi me tekivu ena “Au via wasea noqu ivakadinadina.” Wasea ga na veika o kila ena kaukauwa ni Yalo Tabu. Ena kaukauwa sara na nomu ivakadinadina ke cavuti vakadodonu ka veilauti. Wasea vakawasoma na nomu ivakadinadina me baleta na iVakabula, Nona kosipeli, kei na Nona kaukauwa ena nomu bula, ka vakayaloqaqataki ira o vakavulica me ra vakayacora vakakina. Mo nanuma tiko ni so na gauna na ivakadinadina kaukauwa duadua ena sega ni vakavurea na ivakavuvuli ia mai vua e dua e vuli tiko.

Taro me vakasamataki vakatitobu: Vakaraica na ivakaraitaki eso ena ivolanikalou e vakaraitaka na veivakayarayarataki kaukauwa ni dua e cavuta tiko na nona ivakadinadina. Na cava o vulica rawa mai na ivakaraitaki oqo? Ena gauna cava o sa vakalougatataki kina ena nona ivakadinadina tale eso na tamata? Sa veivakauqeti vakacava na nomu wasea na nomu ivakadinadina vei ira o vakavulica? E sa vakauqeti iko vakacava?

Mai na iVolanikalou: Cakacaka 2:32–38; Mosaia 5:1–3; Alama 5:45–48; 18:24–42; 22:12–18; Vunau kei na Veiyalayalati 46:13–14; 62:3

Eso na Sala mo Bulataka Kina na Veika o Vulica Tiko

• Kerei ira na vuli mera wasea na veika e vakavulica vei ira na Yalo Tabu ni ra vulica na vosa ni Kalou.

• Vakavakarau taumada mo ciqoma na veivakauqeti vakayalo nio veivakavulici tiko.

• Vola na veivakauqeti vakayalo e yaco mai nio vakavakarau tiko.

• Vakarautaka na madigi eso vei ira na lewe ni kalasi mera vakasamataka vakatitobu na veika e vakavulici ira tiko kina na Yalotabu.

• Vakayagataka na sere kei na ivakatagi tabu kei na iyaloyalo mo sureta kina na veivakauqeti ni Yalotabu.

• Vakarogoca na veivakauqeti nio tuvanaka ka veivakavulici, ka tuvakarau mo moica na nomu ituvatuva.

• Vakarautaka na madigi vei ira kece na vuli me ra wasea nodra ivakadinadina ena veika era sa vulica.

• Vukei ira na tani mera kila na gauna e tiko kina na Yalotabu.

• Bulataka na dina o vakavulica tiko me rawa nio vakadinadinataki ira.

• Vakamuria na veivakauqeti mo veivakavulici ena gauna sega ni namaki, ka sega ni vakaivolataki.