Alika Kujifunza kwa Bidii

Hakika ilikuwa ya kuvutia sana kumwangalia Mwokozi akitembea juu ya maji. Lakini hiyo haikuwa ya kutosha kwa Petro. Yeye alitaka kufanya kile Mwokozi alichokuwa anafanya, kuwa pale alipo, na kupitia jambo lile yeye mwenyewe. “Niamuru nije kwako juu ya maji,” alisema. Mwokozi alijibu kwa mwaliko rahisi tu: “Njoo.” Kwa hilo, Petro aliruka kutoka kwenye usalama wa chombo na kutuonyesha kwamba ufuasi siyo tukio la kukaa tu (ona Mathayo 14:24–33). Unahitaji imani katika Yesu Kristo na jitihada zenye bidii. Lakini pia huleta thawabu nyingi za kutembea pamoja na Mwokozi.

“Njoo.” “Njoo uone.” “Njoo, Unifuate.” “Enenda zako, nawe ukafanye vivyo hivyo” (Mathayo 14:29; Yohana 1:39; Luka 18:22; 10:37). Tangu mwanzo wa huduma Yake, Mwokozi aliwaalika wafuasi Wake kujionea wao wenyewe kweli, nguvu, na upendo ambao Yeye aliutoa. Alifanya hili kwa sababu hakika hii ndiyo kujifunza inachomaanisha. Siyo tu kusikiliza au kusoma; ni kubadilika pia, kutubu, na kupiga hatua. Kwa maneno ya Mwokozi, kujifunza huja kwa “kwa kujisomea na pia kwa imani” (Mafundisho na Maagano 88:118; msisitizo umeongezwa). Na imani inajumuisha kujitendea sisi wenyewe, siyo tu kutendewa (ona 2 Nefi 2:26).

Tunapofuata mfano wa Mwokozi, tunawaalika wale tunaowafundisha kuomba, kutafuta, na kubisha—na ndipo wanapata (ona Mathayo 7:7–8). Na tunaukubali mwaliko huo sisi wenyewe. Kwa pamoja, kupitia imani yetu katika Kristo na jitihadi yenye bidii, tutakuja kujua wenyewe kile inachomaanisha kutembea pamoja na Yeye.

Kualika Kujifunza kwa Bidii

• Wasaidie wanafunzi wawajibike kwa kujifunza kwao wenyewe.

• Wahimize wanafunzi kuja kumjua Mwokozi kwa kujifunza injili kila siku.

• Waalike wanafunzi wajiandae kujifunza.

• Wahimize wanafunzi kushiriki kweli wanazojifunza.

• Waalike wanafunzi kuishi kile wanachojifunza.

Mwokozi Aliwasaidia Wengine Wawajibike kwa ajili ya Kujifunza Kwao

Kujenga mashua ambayo ingewavusha salama baharini ingekuwa kazi ngumu kwa yeyote. Kaka wa Yaredi “alielekezwa daima na mkono wa Bwana” (Etheri 2:6), akipokea maelekezo kuhusu umbo la vyombo hivyo na jinsi ambavyo vingepatiwa hewa. Lakini unagundua nini kuhusu Bwana alivyojibu wakati kaka wa Yaredi alipouliza kuhusu utoaji wa mwanga katika mashua hizo? (ona Etheri 2:22–25). Ni jinsi gani kaka wa Yaredi alibarikiwa kwa mwaliko wa kuitumia imani yake katika njia hii? (ona Etheri 3:1–16).

Inaweza kuonekana kuwa rahisi kuwaambia tu wanafunzi mambo yote unayodhani wanapaswa kujua. Hata hivyo, Mzee David A. Bednar alishauri: “Kusudio letu halipaswi kuwa ‘Je, niwaambie nini?’ Badala yake, swali la kujiuliza wenyewe ni ‘Ni kipi ninaweza kuwaalika wafanye? Ni maswali gani yenye mwongozo wa kiungu ninayoweza kuuliza ambayo, kama wako tayari kujibu, yataanza kumwalika Roho Mtakatifu katika maisha yao?’” (evening with a General Authority, Feb. 7, 2020, broadcasts.ChurchofJesusChrist.org).

Zingatia jinsi unavyoweza kuwaalika wanafunzi wachukue jukumu la kujifunza kwao wenyewe. Kwa mfano, ungeweza kuwaalika waulize maswali yao wenyewe, watafute majibu, watafakari, na washiriki au waandike mawazo na hisia zao. Wanapofanya hivyo, wataimarisha imani yao, watagundua ukweli katika maneno ya Mungu, na watapata uzoefu wao wenyewe katika kweli hizi. Tunapowajibika kwa ajili ya kujifunza kwetu sisi wenyewe, tunaweza kusema, kama Joseph Smith alivyosema, “Nimejua mimi mwenyewe” (Joseph Smith—Historia ya 1:20).

Maswali ya Kutafakari: Kwa nini ni muhimu kwa wanafunzi kujishughulisha badala ya kukaa tuli katika kujifunza kwao? Ni kwa jinsi gani unaweza kuwasaidia wawajibike kwa ajili ya kujifunza kwao? Je, ni kwa namna gani walimu walikusaidia wewe ufanye hili? Ni mifano gani kutoka katika maandiko unayoifikiria ya wakati ambapo watu walialikwa kujifunza kwa ajili yao wenyewe? Mifano hii inaathiri vipi jinsi wewe unavyofundisha?

Kutoka katika Maandiko: 1 Nefi 11; Mafundisho na Maagano 9:7–8; 58:26–28; 88:118–125; Joseph Smith—Historia ya 1:11–20

Mwokozi Aliwahimiza Wengine Waje Kumjua Yeye kwa Kujifunza Neno Lake

Wakati ulipofika wa Mwokozi kuunda rasmi Kanisa Lake katika siku za mwisho, aliwaambia watumishi Wake, “Tegemeeni mambo ambayo yameandikwa” (Mafundisho na Maagano 18:3). Ndiyo, Kitabu cha Mormoni, ambacho walikuwa wamekaribia kumaliza kukitafsiri, kilikuwa na maelekezo yenye msaada kwa ajili ya kazi, ikijumuisha jinsi ya kubatiza, jinsi ya kusimamia sakramenti, na maelezo mengine muhimu. Lakini Mwokozi pia alitaka watumishi Wake wayaone mafunuo Yake kama fursa ya kumsikia Yeye na kuja kumjua Yeye kwa kina zaidi. Katika ufunuo huo huo, Yeye aliwaambia, “Ni sauti yangu ndiyo inenayo [maneno hayo] kwenu; … kwa hiyo, mnaweza kushuhudia kwamba mmesikia sauti yangu na mnayajua maneno yangu” (Mafundisho na Maagano 18:35–36).

Fikiria kuhusu watu unaowafundisha. Wanaonaje kuhusu kujifunza maandiko? Kwa sababu hiyo, wewe unaonaje? Je, ni zaidi ya kazi ya siku moja? Unapojifunza maandiko, je, unahisi Mwokozi akizungumza nawe moja kwa moja? Rais Russell M. Nelson alifundisha: “Ni wapi tunaweza kwenda kumsikiliza Yeye? Tunaweza kwenda kwenye maandiko. … Kuzama kila siku kwenye neno la Mungu ni muhimu kwa uhai wa kiroho, hasa katika siku hizi za ongezeko la mabadiliko ya ghafla. Tunaposherehekea katika maneno ya Kristo kila siku, maneno ya Kristo yatatuambia jinsi ya kukabiliana na ugumu ambao hatukutegemea kuukabili” (“Msikilize Yeye,” Liahona, Mei 2020, 89). Unapofundisha, wahimize wanafunzi kujisomea maandiko kwa lengo la kumpata Mwokozi—siyo tu kupata mistari au kweli kuhusu Yeye bali kumpata Yeye. Kuisikia sauti ya Bwana kila siku katika maandiko ni msingi kwenye bidii ya maisha yote, kujifunza injili kwa kujisimamia mwenyewe.

Maswali ya Kutafakari: Fikiria tabia zako mwenyewe za kujifunza maandiko. Ni kwa jinsi gani kujifunza neno la Mungu kumeimarisha uhusiano wako na Yeye? Unaweza kufanya nini ili kuboresha kujifunza kwako? Ni kwa jinsi gani utawashawishi wengine kujifunza neno la Mungu kwa bidii na kila siku? Ni baraka gani watapokea wanapofanya hivyo?

Kutoka kwenye Maandiko: Yoshua 1:8; 2 Timotheo 3:15–17; 2 Nefi 32:3; Yakobo 2:8; 4:6; Mafundisho na Maagano 33:16

Mwokozi Aliwaalika Wengine Wajiandae Kujifunza

Hata mbegu bora zaidi haziwezi kukua kwenye ardhi ngumu, yenye mawe au miiba. Vivyo hivyo, hata mafundisho ya thamani kubwa na yenye kuhamasisha imani hayawezi kubadili moyo ambao haujaandaliwa kuyapokea. Hiyo ni sehemu ya ujumbe wa mfano wa Mwokozi kuhusu mpanzi, mbegu, na udongo wa hali tofauti tofauti. Ni katika “udongo mzuri”—moyo ambao umelainishwa na kuondolewa mawe ya kiroho na miiba—ndimo neno la Mungu hutoa matunda yenye kuleta uhai (ona Mathayo 13:1–9, 18–23).

Maaandalizi ya kiroho ni muhimu—kwako wewe na kwa watu unaowafundisha. Hivyo tunaiandaaje mioyo yetu ili iwe “ardhi nzuri” kwa ajili ya neno la Mungu? Fikiria kanuni hizi zifuatazo za maandalizi, ambazo unaweza kuzitumia katika maisha yako na kuzihimiza katika maisha ya wale unaowafundisha. Omba ili kujua kile Bwana anachotaka wewe ujifunze. Ishi katika namna ambayo inaalika uwepo Wake katika maisha yako. Tubu kila siku. Kuza hamu yako ya kujifunza kwa kuuliza maswali ya dhati. Jifunze neno la Mungu kwa imani kwamba Yeye atakuongoza kwenye majibu ya maswali yako. Fungua moyo wako kwa lolote atakalo kufundisha.

Wanafunzi wanapojiandaa kujifunza katika njia hii, watakuwa na macho ya kiroho ya kuona na masikio ya kusikia kile ambacho Bwana angetaka wao wajue (ona Mathayo 13:16).

Maswali ya Kutafakari: Unafanya nini ili kujiandaa mwenyewe kujifunza? Ni kwa jinsi gani maandalizi yako huleta matokeo ya namna unavyoona, kusikia, na kuelewa neno la Mungu? Unawezaje kuwashawishi wengine kujiandaa kujifunza? Kuna tofauti gani inayoweza kuletwa na hilo katika jinsi wanavyopokea kweli za injili?

Kutoka kwenye Maandiko: Enoshi 1:1–8; Alma 16:16–17; 32:6, 27–43; 3 Nefi 17:3

Wanafunzi wanafaidika kutokana na fursa za kushiriki na wengine kile wanachojifunza.

Mwokozi Aliwahimiza Wengine Kushiriki Kweli Walizokuwa Wakijifunza

“Mimi si mwepesi wa kusema,” Henoko alilalamika wakati Bwana alipomwita kuhubiri injili. Lakini lugha ya kushawishi haijawahi kuwa sifa kwa mtumishi wa Bwana. Badala yake, Bwana alimwahidi Henoko kwamba kama angekuwa na imani ya kutosha kufungua kinywa chake, maneno yangetoka. “Nitakupa maneno,” Yeye alisema (Musa 6:31–32). Henoko aliitumia imani yake, naye Bwana alinena kupitia kwake, kwa maneno yenye nguvu ambayo yalisababisha watu kutetemeka (ona Musa 6:47). Kwa hakika, yalisababisha nchi kutetemeka yenyewe. Milima ilikimbia, mito iligeuzwa uelekeo wake, na mataifa waliwaogopa watu wa Mungu, “neno la Henoko lilikuwa na nguvu sana, na lugha ambayo Mungu alimpa ilikuwa yenye nguvu kubwa” (Musa 7:13).

Bwana anataka sisi sote—siyo tu manabii Wake—tuwe na nguvu ya kunena neno Lake. Yeye anataka hivyo kwetu sisi sote, ikijumuisha watu unaowafundisha (ona Mafundisho na Maagano 1:20–21). Maneno yetu yawezekana yasihamishe milima au kuchepusha uelekeo wa mito, lakini yanaweza kusaidia kuibadili mioyo. Hiyo ndiyo kwa nini ni muhimu kuwapatia wanafunzi fursa za kushiriki wao kwa wao kile wanachojifunza kuhusu Mwokozi na injili Yake. Kufanya hili kutawasaidia wao wafanye kweli wanazofundishwa ziwe zinawahusu na kuweza kuzielezea. Kunaweza pia kuwasaidia wapate kujiamini katika uwezo wao wa kushiriki kweli katika mazingira mengine.

Maswali ya Kutafakari: Fikiria kuhusu wakati ulipozungumza kuhusu ukweli wa injili na mtu mwingine. Ulijifunza nini kutokana na uzoefu huo? Ni lini ulikuwa mwenye shukrani kwamba mtu alikuwa jasiri kushiriki mawazo na imani zao? Ni kwa jinsi gani watu unaowafundisha watanufaika kutokana na fursa ya kuzungumza kuhusu mambo wanayojifunza? Je, ni fursa gani unaweza kutengeneza kwa ajili yao?

Kutoka kwenye Maandiko: Alma 17:2–3; Moroni 6:4–6; Mafundisho na Maagano 84:85; 88:122; 100:5–8

Mwokozi Aliwaalika Wengine Waishi Yale Aliyoyafundisha

“Nuru yenu na iangaze mbele ya watu.” “Wapendeni adui zenu.” “Ombeni, nanyi mtapewa.” “Ingieni kwa kupitia mlango mwembamba.” Mathayo 5:16, 44; 7:7,13.) Baadhi ya mialiko ya wazi, ya kukumbukwa katika huduma yote ya duniani ya Mwokozi ilizungumzwa alipokuwa akiwafundisha wanafunzi Wake kwenye upande wa mlima unaotazamana na Bahari ya Galilaya. Dhumuni la Mwokozi lilikuwa kubadilisha maisha, kama ilivyowekwa wazi na mwaliko Wake wa kuhitimisha: “Basi kila asikiaye haya maneno yangu, na kuyafanya, atafananishwa na mtu mwenye akili, aliyejenga nyumba yake juu ya mwamba” (Mathayo 7:24; msisitizo umeongezwa).

Mvua hunyesha na mafuriko kuja na pepo zinavuna katika maisha ya kila mtu. Kujifunza kuhusu injili haitoshi ikiwa wanafunzi wanapaswa kuyakabili majaribu watakayokabiliana nayo. Hii ndiyo kwa nini tunapaswa kutokusita kuwaalika wanafunzi kufikiria jinsi wanavyoweza kuishi kile wanachojifunza. Kutokana na kuheshimu haki ya kujiamulia ya watu wengine, mialiko yetu mingi itakuwa ya jumla: “Je, unahisi kusukumwa kufanya nini?” Mara chache sana mialiko yetu yaweza kuhitaji kuwa mahususi: “Je, utachagua moja ya sifa za Mwokozi ambayo ungependa kuifanyia kazi?” Unapotoa fursa kwa wanafunzi kusikia, kutambua, na kushiriki misukumo kutoka kwa Roho Mtakatifu, Yeye atawafundisha hatua gani binafsi wanahitaji kuchukua. Wasaidie wanafunzi wafikirie baraka ambazo zitafuata pale wanapotenda juu ya kile wanachojifunza, na wahimize waendelee kufanya hivyo hata wakati inapokuwa vigumu. Kuishi ukweli ni njia ya haraka zaidi kuelekea kwenye imani kubwa, ushuhuda mkubwa, na uongofu mkubwa. Kama Mwokozi alivyosema, kuishi mafundisho ya Baba ndio njia ya sisi sote kujua kwa hakika mafundisho ni ya kweli (ona Yohana 7:17).

Maswali ya Kutafakari: Ni lini ulishawishika kutenda kwa sababu ya mwaliko uliopewa na mtu? Je, maisha yako yalibadilikaje kama matokeo yake? Tambua mialiko ambayo imetolewa katika maandiko na viongozi wa Kanisa. Unajifunza nini ambacho kinaweza kukusaidia kuwaalika wengine kutenda? Je, ni kwa njia gani unaweza kufuatilia mialiko yako?

Kutoka kwenye Maandiko: Luka 10:36–37; Yohana 7:17; Yakobo 1:22; Mosia 4:9–10; Mafundisho na Maagano 43:8–10; 82:10

Baadhi ya Njia za Kutumia Kile Unachojifunza

• Waombe wengine waje wakiwa wamejiandaa kushiriki kitu ambacho Roho Mtakatifu amewafundisha, kama vile utambuzi kutoka kwenye kifungu cha maneno katika maandiko.

• Wape wanafunzi fursa ya kufundisha sehemu ya somo.

• Wahimize wanafunzi kurejelea video, andiko, au ujumbe kabla ya kukutana.

• Epuka mazoea ya wewe kujibu kila swali. Washirikishe wengine katika kutafuta majibu.

• Kabla ya kushiriki utambuzi wako kuhusu andiko, waombe wanafunzi washiriki utambuzi wao wenyewe.

• Uliza maswali yanayowahitaji wanafunzi kutafuta majibu katika neno la Mungu.

• Waalike wanafunzi kuuliza maswali yao wenyewe kuhusu kile wanachojifunza.

• Toa muda kwa wanafunzi wote kutafakari swali kabla ya kuwataka washiriki majibu.

• Fikiria kuwagawa wanafunzi katika makundi madogo madogo, kadiri inavyofaa.

• Elezea matarajio ya wazi wazi ili kuwasaidia wanafunzi wakue.

• Toa mialiko ambayo inawashawishi wanafunzi wajiboreshe lakini siyo ya kuwalemea. Fuatilia na waalike wanafunzi washiriki uzoefu wao.

• Wasaidie wanafunzi wajifunze kutoka kwenye maandiko kwa:

  • Kuwekea alama vifungu vyenye maana, kama wanahitaji.

  • Kualika ufunuo kupitia kutafakari na kwa sala.

  • Kuandika misukumo ya kiroho.

  • Kutunza shajara ya kujifunzia.

  • Kuweka malengo ya kutendea kazi kile wanachojifunza.