ព្រះគម្ពីរមរមន និងព្រះគម្ពីរប៊ីប

សេចក្ដីផ្ដើម

ក្នុងនាមជាដៃគូនឹងព្រះគម្ពីរប៊ីប ព្រះគម្ពីរមរមនគឺជាសាក្សីមួយទៀតអំពីទេវភាពរបស់ព្រះយេស៊ូវគ្រីស្ទ និងតួនាទីរបស់ទ្រង់ជាព្រះអង្គសង្គ្រោះនៃពិភពលោក ។ ព្រះគម្ពីរមរមនស្ដារឡើងវិញនូវសេចក្ដីពិតដ៏ច្បាស់ និងពិសេសៗដែលបានបាត់បង់ពីព្រះគម្ពីរប៊ីប ។ នៅពេលយើងសិក្សាព្រះគម្ពីរមរមន ការយល់ដឹងរបស់យើងអំពីគោលលទ្ធិទាំងឡាយនៅក្នុងព្រះគម្ពីរប៊ីបត្រូវបានបំភ្លឺច្បាស់ ។

ការអានពីសាវតា

រ័សុល អិម ណិលសុន « Scriptural Witnesses » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៤៣–៤៦ ។
ថាត អរ ខាលីស្ទើរ « The Book of Mormon—a Book from God » Ensign ឬ Liahona ខែ វិច្ឆិកា ឆ្នាំ ២០១១ ទំព័រ ៧៤-៧៦ ។

យោបល់សម្រាប់ការបង្រៀន

អេសេគាល ៣៧:១៥–១៩, នីហ្វៃទី២ ៣:១១–១២, ២៩:៣–១០

ព្រះគម្ពីរប៊ីប និងព្រះគម្ពីរមរមន គឺជាសាក្សីរួមបញ្ចូលគ្នាអំពីព្រះយេស៊ូវគ្រីស្ទ

សូមសួរដល់សិស្សថា តើអ្វីដែលពួកគេអាចនឹងនិយាយទៅកាន់នរណាម្នាក់ដែលបង្ហាញការសង្ស័យអំពីព្រះគម្ពីរមរមន ដោយសារព្រះបានប្រទានព្រះគម្ពីរប៊ីបដល់យើងរួចហើយនោះ ។

សូមអញ្ជើញសិស្សឲ្យអាន នីហ្វៃទី២ ២៩:៣-១០ ដោយស្ងៀមស្ងាត់ ហើយគូសចំណាំឃ្លាទាំងឡាយដែលចង្អុលបង្ហាញពីមូលហេតុរបស់ព្រះអម្ចាស់ក្នុងការប្រទានព្រះគម្ពីរច្រើនជាងមួយ ។

តើព្រះអម្ចាស់បានមានបន្ទូលអ្វីខ្លះ អំពីអ្នកទាំងឡាយណាដែលមានប្រតិកម្មដោយសង្ស័យចំពោះព្រះគម្ពីរដែលជាការបន្ថែមដល់ព្រះគម្ពីរប៊ីបនោះ ?
យោងតាម ខ ៨ តើព្រះអម្ចាស់បានមានបន្ទូលថា អ្វីជាគោលបំណងរបស់ទ្រង់ក្នុងការបើកសម្ដែងព្រះគម្ពីរជាការបន្ថែមដល់ព្រះគម្ពីរប៊ីបនោះ ? ( សិស្សអាចផ្ដល់ចម្លើយផ្សេងៗគ្នា ប៉ុន្តែពួកគេគួររកឃើញសេចក្ដីពិតដូចតទៅនេះ ៖ ព្រះគម្ពីរប៊ីប និងព្រះគម្ពីរមរមន រួមគ្នាថ្លែងទីបន្ទាល់អំពីព្រះយេស៊ូវគ្រីស្ទ ) ។
តើអ្នកបានរៀនអ្វីខ្លះ ពីវគ្គបទគម្ពីរនេះ ដែលជួយអ្នកឲ្យយល់ពីសារៈសំខាន់នៃការមានសាក្សី ដែលជាព្រះគម្ពីរបន្ថែម ?

ដើម្បីជួយឲ្យការយល់ដឹងរបស់សិស្សកាន់តែមានភាពស៊ីជម្រៅ អំពីរបៀបដែលព្រះគម្ពីរប៊ីប និងព្រះគម្ពីរមរមនធ្វើការជាមួយគ្នាក្នុងការថ្លែងទីបន្ទាល់អំពីព្រះយេស៊ូវគ្រីស្ទ សូមបង្ហាញសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ក្នុងកូរ៉ុមនៃពួកសាវកដប់ពីរនាក់ ហើយសូមឲ្យសិស្សម្នាក់អានវាឮៗ ៖

« សាក្សីជាព្រះគម្ពីរទាំងនេះបញ្ជាក់ភាពពិតដល់គ្នាទៅវិញទៅមក ។ គំនិតនេះត្រូវបានពន្យល់ជាយូរយារមកហើយ នៅពេលដែលព្យាការីម្នាក់បានសរសេរថា ព្រះគម្ពីរមរមនគឺ ‹ ត្រូវបានសរសេរឡើងក្នុងគោលបំណងដើម្បីឲ្យអ្នករាល់គ្នាជឿដល់ [ ព្រះគម្ពីរប៊ីប ] ហើយបើសិនជាអ្នករាល់គ្នាជឿដល់ [ ព្រះគម្ពីរប៊ីប ] នោះអ្នកនឹងជឿដល់ [ ព្រះគម្ពីរមរមន ] ផងដែរ › [ មរមន ៧:៩ ] ។ គម្ពីរនីមួយៗយោងទៅគ្នាទៅវិញទៅមក ។ គម្ពីរនីមួយៗឈរជាភស្តុតាងថា ព្រះមានព្រះជន្មរស់ ហើយនិយាយទៅកាន់កូនចៅរបស់ទ្រង់តាមរយៈវិវរណៈដល់ព្យាការីរបស់ទ្រង់ ។

« សេចក្ដីស្រឡាញ់ចំពោះព្រះគម្ពីរមរមនពង្រីកសេចក្ដីស្រឡាញ់របស់មនុស្សម្នាក់ចំពោះព្រះគម្ពីរប៊ីប ហើយដូចគ្នាផងដែរ សេចក្ដីស្រឡាញ់ចំពោះព្រះគម្ពីរប៊ីបពង្រីកសេចក្ដីស្រឡាញ់របស់មនុស្សម្នាក់ចំពោះព្រះគម្ពីរមរមន ។ ព្រះគម្ពីរនៃការស្ដារឡើងវិញ ពុំប្រជែងនឹងព្រះគម្ពីរប៊ីបនោះទេ ព្រះគម្ពីរទាំងនោះបង្គ្រប់ដល់ព្រះគម្ពីរប៊ីបវិញ » ( « Scriptural Witnesses » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៤៣ ) ។

តើអ្វីដែលលេចធ្លោចំពោះអ្នកនៅក្នុងការពិពណ៌នារបស់ប្រធាន ណិលសុន អំពីទំនាក់ទំនងរវាងព្រះគម្ពីរទាំងពីរនេះ ហើយមូលហេតុអ្វី ?

សូមរំឭកសិស្សថា ព្យាការីក្នុងព្រះគម្ពីរសញ្ញាចាស់ អេសេគាល បានព្យាករថា បន្ទះឈើនៃពួកយូដា និងបន្ទះឈើនៃពួកយ៉ូសែប នឹងរួមបញ្ចូលគ្នា ។ សូមពន្យល់ថា « បន្ទះ » អាចសំដៅដល់បន្ទះឈើ ឬរមូរក្រដាសដែលមូរជុំវិញអង្កត់ឈើ ( សូមមើល ប៊យដ៍ ឃេ ផាកកឺ « Scriptures » Ensign ខែ វិច្ឆិកា ឆ្នាំ ១៩៨២ ទំព័រ ៥១ ) ។ សូមអញ្ជើញឲ្យសិស្សម្នាក់អាន អេសេគាល ៣៧:១៥–១៩ ឮៗ ។

តើបន្ទះឈើទាំងនេះតំណាងឲ្យអ្វីខ្លះ ? ( បើចាំបាច់ សូមពន្យល់ថា « បន្ទះឈើនៃពួកយូដា » សំដៅលើព្រះគម្ពីរប៊ីប ហើយ « បន្ទះឈើនៃយ៉ូសែប » គឺសំដៅលើព្រះគម្ពីរមរមន ) ។
តើអ្នកគិតថា វាមានន័យយ៉ាងណាដែលថា បន្ទះឈើ ឬព្រះគម្ពីរទាំងពីរនេះ « ជាបន្ទះតែមួយ ដើម្បីឲ្យបានជាប់ជាមួយគ្នានៅដៃឯង » ? ( ខ ១៧, ១៩ ) ។

ដើម្បីជួយឆ្លើយនឹងសំណួរនេះ សូមចែកចាយសេចក្ដីថ្លែងការណ៍ខាងក្រោមនេះដោយប្រធាន ប៊យដ៍ ឃេ ផាកកឺ ( ឆ្នាំ ១៩២៤-២០១៥ ) ក្នុងកូរ៉ុមនៃពួកសាវកដប់ពីរនាក់ ៖ សូមពន្យល់ថា មិនយូរប៉ុន្មានពីមុនប្រធាន ផាកកឺ បានថ្លែងសេចក្ដីថ្លែងការណ៍នេះ នោះសាសនាចក្របានបោះពុម្ពកំណែថ្មីនៃព្រះគម្ពីរមរមន និងព្រះគម្ពីរប៊ីប ។ ព្រះគម្ពីរនីមួយៗមានលេខយោង និងជំនួយព្រះគម្ពីរផ្សេងៗទៀត ដែលយោងដល់គម្ពីរផ្សេងទៀត ដែលធ្វើឲ្យមានការរួបរួមព្រះគម្ពីរទាំងពីរនោះនៅក្នុងរបៀបថ្មីមួយ ។ សូមអញ្ជើញសិស្សឲ្យស្ដាប់មើលពរជ័យទាំងឡាយ ដែលមានដល់ពួកអ្នកដែលសិក្សាព្រះគម្ពីរប៊ីប និងព្រះគម្ពីរមរមនរួមគ្នា ។

« បន្ទះឈើ ឬបញ្ជីរបស់ពួកយូដា និងបន្ទះឈើ ឬបញ្ជីរបស់អេប្រាអិម … ឥឡូវនេះត្រូវបានត្បាញបញ្ចូលគ្នាជារបៀបមួយដែលនៅពេលអ្នកអានព្រះគម្ពីរមួយយ៉ាងផ្ចិតផ្ចង់ នោះអ្នកនឹងត្រូវបានទាក់ទាញឲ្យដក់ចិត្តទៅលើព្រះគម្ពីរមួយទៀត ពេលអ្នករៀនពីព្រះគម្ពីរមួយ អ្នកត្រូវបានបំភ្លឺដោយព្រះគម្ពីរមួយទៀត ។ ព្រះគម្ពីរទាំងនេះពិតជាតែមួយនៅក្នុងដៃរបស់យើងមែន ។ ឥឡូវនេះ ការព្យាកររបស់អេសេគាលត្រូវបានបំពេញហើយ ។

« រយៈពេលជាច្រើនឆ្នាំបានកន្លងផុតទៅ ព្រះគម្ពីរទាំងនេះនឹងបង្កើតផលជាជំនាន់នៃពួកគ្រីស្ទានស្មោះត្រង់ជាបន្ដបន្ទាប់ ដែលស្គាល់ព្រះអម្ចាស់ព្រះយេស៊ូវគ្រីស្ទ ហើយដែលចង់គោរពតាមព្រះទ័យទ្រង់ ។ …

« … វិវរណៈនឹងបើកសម្ដែងដល់ [ ជំនាន់ថ្មីៗ ] ដែលមិនដូចជាដល់ជំនាន់ណាផ្សេងឡើយនៅក្នុងប្រវត្តិសាស្ត្រនៃពិភពលោក ។ ឥឡូវនេះ ពួកគេមានបន្ទះឈើនៃយ៉ូសែប និងយូដា នៅក្នុងដៃរបស់ពួកគេ ។ ពួកគេនឹងអភិវឌ្ឍចំណេះវិជ្ជានៃដំណឹងល្អ លើសហួសជីដូនជីតារបស់ពួកគេអាចសម្រេចបានទៅទៀត ។ ពួកគេនឹងមានទីបន្ទាល់ថា ព្រះយេស៊ូវគឺជាព្រះគ្រីស្ទ ហើយអាចប្រកាសអំពីទ្រង់ និងការពារទ្រង់ » ( « Scriptures » Ensign ខែ វិច្ឆិកា ឆ្នាំ ១៩៨២ ទំព័រ ៥៣ ) ។

តើមានពរជ័យអ្វីខ្លះ នៅពេលយើងសិក្សាព្រះគម្ពីរមរមន និងព្រះគម្ពីរប៊ីបរួមគ្នានោះ ? ( សិស្សគួរតែរកឃើញគោលការណ៍ដូចតទៅនេះ ៖ ពេលយើងសិក្សាព្រះគម្ពីរប៊ីប និងព្រះគម្ពីរមរមនរួមគ្នា យើងទទួលបានសាក្សីកាន់តែធំធេងថា ព្រះយេស៊ូវគឺជាព្រះគ្រីស្ទ ) ។
តើការសិក្សាព្រះគម្ពីរមរមន និងព្រះគម្ពីរប៊ីបរួមគ្នា បានពង្រឹងការចេះដឹង និងសក្ខីភាពរបស់អ្នកអំពីព្រះយេស៊ូវគ្រីស្ទយ៉ាងណាដែរ ?

សូមឲ្យសិស្សម្នាក់អាន នីហ្វៃទី២ ៣:១១-១២ ។ ( វាអាចមានអត្ថប្រយោជន៍ក្នុងការបញ្ជាក់ឲ្យច្បាស់ថា ខគម្ពីរទាំងនេះគឺជាផ្នែកនៃការព្យាករដោយយ៉ូសែបនៃស្រុកអេស៊ីព្ទ ។ នៅក្នុងខគម្ពីរទាំងនេះ យ៉ូសែប បានលើកឡើងពីសៀវភៅពីរក្បាល—សៀវភៅសរសេរដោយកូនចៅរបស់យ៉ូសែប គឺជាព្រះគម្ពីរមរមន និងសៀវភៅដែលសរសេរដោយកូនចៅសាសន៍យូដា គឺជាព្រះគម្ពីរប៊ីប ) ។

តើឥទ្ធិពលអ្វីខ្លះ ដែលព្រះគម្ពីរមរមន និងព្រះគម្ពីរប៊ីបនឹងមានទៅលើពិភពលោក កាលដែលព្រះគម្ពីរទាំងពីរនេះ « រួមទៅជាមួយគ្នា » ? ( សិស្សគួរតែរកឃើញគំនិតទាំងឡាយដូចតទៅនេះ ៖ ព្រះគម្ពីរទាំងនេះនឹងផ្ចាញ់ផ្ចាលដល់គោលលទ្ធិក្លែងក្លាយ បង្រាបការទាស់ទែងគ្នា ហើយបង្កើតឲ្យមានសេចក្ដីសុខសាន្ត ) ។

សូមឲ្យសិស្សពិចារណាពីរបៀបដែលពួកគេប្រើប្រាស់ព្រះគម្ពីរមរមន និងព្រះគម្ពីរប៊ីបរួមគ្នា ដើម្បីពង្រឹងទីបន្ទាល់ និងសេចក្ដីជំនឿរបស់ពួកគេទៅលើព្រះវរបិតាសួគ៌ និងព្រះយេស៊ូវគ្រីស្ទ ។ សូមអញ្ជើញសិស្សឲ្យចែកចាយគំនិត និងចំណាប់អារម្មណ៍របស់ពួកគេ ។ សូមអញ្ជើញពួកគេឲ្យប្រព្រឹត្តតាមការបំផុសដែលពួកគេទទួល ។

នីហ្វៃទី១ ១៣:២៣–២៩, ៣៥–៣៦, ៣៨–៤១

សេចក្ដីពិតដ៏ច្បាស់ និងពិសេសៗត្រូវបានស្ដារឡើងវិញ

សូមរំឭកសិស្សថា ព្រះអម្ចាស់បានចេញព្រះបញ្ជាដល់ព្យាការី យ៉ូសែប ស៊្មីធ ឲ្យធ្វើកំណែថ្មីដ៏បំផុសគំនិតនៃព្រះគម្ពីរប៊ីបរបស់ស្តេច ជេមស៍ ។ កំណែថ្មីនេះ ឥឡូវត្រូវបានស្គាល់ថាជា ការបកប្រែរបស់ យ៉ូសែប ស៊្មីធ ។ សូមបង្ហាញ ហើយអានសេចក្ដីថ្លែងការណ៍ខាងក្រោមដោយព្យាការី យ៉ូសែប ស្ម៊ីធ ( ឆ្នាំ ១៨០៥–៤៤ ) ៖

« ខ្ញុំជឿលើព្រះគម្ពីរប៊ីប បើសិនជាវាត្រូវបានសរសេរដោយដងប៉ាកានៃអ្នកនិពន្ធដើម ។ អ្នកបកប្រែដែលគ្មានវិជ្ជាជីវៈ អ្នកចម្លងខ្ជីខ្ជា ឬពួកសង្ឃដែលក្លែងបន្លំ និងពុករលួយបានបង្កើតឲ្យមានកំហុសជាច្រើន » ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ២០៧ ) ។

តើហេតុអ្វីចាំបាច់ត្រូវធ្វើកំណែថ្មីដ៏បំផុសគំនិតនៃព្រះគម្ពីរប៊ីប ?

សូមរំឭកសិស្សថា នីហ្វៃបានទទួលការនិមិត្តអំពីការចេញមកនៃព្រះគម្ពីរប៊ីប ។ សូមអញ្ជើញឲ្យសិស្សម្នាក់អាន នីហ្វៃទី១ ១៣:២៣-២៥ ឮៗ ។ សូមឲ្យសិស្សក្នុងថ្នាក់ស្វែងរកការពិពណ៌នារបស់នីហ្វៃអំពីព្រះគម្ពីរប៊ីប ពេលវាត្រូវបានសរសេរដំបូង ។

តើទេវតាបានបង្រៀនអ្វីដល់នីហ្វៃ អំពីព្រះគម្ពីរប៊ីប នៅពេលវាត្រូវបានសរសេរជាលើកដំបូង ? ( វា « មានសេចក្ដីសញ្ញាទាំងឡាយនៃព្រះអម្ចាស់ » វា « មានប្រយោជន៍ដ៏ធំ » ហើយវា « មាននូវភាពពោរពេញនៃដំណឹងល្អរបស់ព្រះអម្ចាស់ » ) ។

សូមអញ្ជើញសិស្សឲ្យអាន នីហ្វៃទី១ ១៣:២៦-២៨ ដោយរកមើលអ្វីដែលនីហ្វៃបានដឹងថានឹងកើតឡើងដល់ព្រះគម្ពីរប៊ីប ហើយសម្រាប់ហេតុផលអ្វីខ្លះ ។

តើសាសនាចក្រដ៏ធំ ហើយគួរខ្ពើមឆ្អើមនោះបានធ្វើអ្វីចំពោះព្រះគម្ពីរប៊ីប ? ( សូមសង្កត់ធ្ងន់ថា សាសានាចក្រដ៏ធំ ហើយគួរខ្ពើមឆ្អើមមិនមែនគ្រាន់តែជាសាសនាចក្រ ឬអង្គការជាក់លាក់ណាមួយនោះទេ តែជាវាក្យសព្ទទូទៅមួយដែលសំដៅទៅលើអស់អ្នកណាដែលប្រឆាំងទាស់នឹងព្រះគ្រីស្ទ [ សូមមើល នីហ្វៃទី១ ១៣:៤-៩, ១៤:១០ ] ) ។
យោងតាម ខ ២៧ តើហេតុអ្វីផ្នែកដ៏ច្បាស់ និងពិសេសៗទាំងឡាយត្រូវបានដកចេញ ?

សូមអញ្ជើញសិស្សម្នាក់ឲ្យអាន នីហ្វៃទី១ ១៣:២៩ ឲ្យឮៗ ខណៈសិស្សក្នុងថ្នាក់រកមើលពីលទ្ធផលដែលមកពីផ្នែកដ៏ច្បាស់ និងពិសេសៗត្រូវបានដកចេញពីព្រះគម្ពីរប៊ីប ។

តើមានអ្វីកើតឡើង ដែលជាលទ្ធផលនៃការដកចេញនូវការបង្រៀនដ៏ច្បាស់ និងពិសេសៗរបស់ព្រះអម្ចាស់ ពីព្រះគម្ពីរប៊ីបនោះ ?
តើភស្ដុតាងអ្វីដែលអ្នកឃើញនៅក្នុងពិភពលោកសព្វថ្ងៃនេះដែល « មនុស្សជាច្រើនលើសលប់ត្រូវជំពប់ដួល » ដែលជាលទ្ធផលនៃការខ្វះនូវសេចក្ដីពិតដ៏ច្បាស់ និងពិសេសៗទាំងឡាយនេះ ?

សូមអញ្ជើញសិស្សបីបួននាក់ប្ដូរវេនគ្នាអានឮៗចេញពី នីហ្វៃទី១ ១៣:៣៥-៣៦, ៣៨-៤១ ខណៈដែលសិស្សក្នុងថ្នាក់រកមើលដំណោះស្រាយរបស់ព្រះអម្ចាស់ចំពោះបញ្ហានេះ ។

តើព្រះអម្ចាស់នឹងធ្វើអ្វី ដើម្បីយកឈ្នះលើបញ្ហាដែលបណ្ដាលមកពីការដកចេញនូវសេចក្ដីពិតដ៏ច្បាស់ និងពិសេសៗចេញពីព្រះគម្ពីរប៊ីប ?
ក្រៅពីព្រះគម្ពីរមរមន តើ « ព្រះគម្ពីរផ្សេងទៀត » ណាខ្លះ ដែលព្រះអម្ចាស់បាននាំចេញមក ជាផ្នែកនៃការស្ដារឡើងវិញ ? ( សូមលើកទឹកចិត្តដល់សិស្ស ដើម្បីធ្វើកំណត់ចំណាំនៅក្នុងព្រះគម្ពីររបស់ពួកគេថា « ព្រះគម្ពីរផ្សេងៗទៀត » អាចរួមមាន ព្រះគម្ពីរគោលលទ្ធិ និង សេចក្ដីសញ្ញា មុក្ដាដ៏មានតម្លៃមហិមា និង ការបកប្រែរបស់យ៉ូសែប ស្ម៊ីធ ពីព្រះគម្ពីរប៊ីប ) ។
យោងតាម ខ ៤០ តើព្រះគម្ពីរមរមន និង « ព្រះគម្ពីរផ្សេងៗទៀត » ដោះស្រាយបញ្ហាដែលបណ្ដាលមកពីការដកចេញនូវផ្នែកដ៏ច្បាស់ និងពិសេសៗចេញពីព្រះគម្ពីរប៊ីបយ៉ាងដូចម្ដេចដែរ ? ( សិស្សគួរយល់ដឹងពីសេចក្ដីពិតដូចតទៅនេះ ៖ ព្រះគម្ពីរមរមន និងព្រះគម្ពីរថ្ងៃចុងក្រោយទាំងឡាយ ជួយស្ថាបនាសេចក្ដីពិតនៃព្រះគម្ពីរប៊ីប និងស្ដារឡើងវិញនូវសេចក្ដីពិតដ៏ច្បាស់ និងពិសេសៗ ដែលត្រូវបានដកចេញពីគម្ពីរនោះ ) ។

ដើម្បីបង្ហាញពីរបៀបដែលព្រះគម្ពីរមរមនបញ្ជាក់ពីការយល់ដឹងរបស់យើងអំពីគោលលទ្ធិ និងគោលការណ៍ទាំងឡាយដែលមានក្នុងព្រះគម្ពីរប៊ីប សូមចែកចាយសេចក្តីថ្លែងការណ៍ខាងក្រោមដោយអែលឌើរ ថាត អរ ខាលីស្ទើរ ដែលបានបម្រើក្នុងគណៈប្រធាននៃពួកចិតសិបនាក់ ៖

« ព្រះគម្ពីរប៊ីបគឺជាសាក្សីមួយអំពីព្រះយេស៊ូវគ្រីស្ទ ហើយព្រះគម្ពីរមរមនគឺជាសាក្សីមួយទៀត ។ តើហេតុអ្វីសាក្សីទីពីរនេះមានសារៈសំខាន់ខ្លាំងម្ល៉េះ ? ការបង្ហាញខាងក្រោមនេះអាចនឹងជួយបាន ៖ តើអ្នកអាចគូសបន្ទាត់ត្រង់បានប៉ុន្មាន នៅតាមចំណុចតែមួយនៅលើក្រដាសមួយសន្លឹក ? ចម្លើយគឺ គូសបានច្រើនរាប់មិនអស់ឡើយ ។ សូមគិតមួយភ្លែតថា ចំណុចតែមួយនេះគឺតំណាងឲ្យព្រះគម្ពីរប៊ីប ហើយថា បន្ទាត់ត្រង់រាប់រយទាំងនោះដែលត្រូវបានគូសតាមចំណុចនេះ តំណាងឲ្យការបកស្រាយខុសៗគ្នានៃព្រះគម្ពីរប៊ីប ហើយថា ការបកស្រាយនីមួយៗតំណាងឲ្យព្រះវិហារខុសៗគ្នា ។

« ប៉ុន្តែ តើមានអ្វីកើតឡើង ប្រសិនបើនៅលើក្រដាសមួយសន្លឹកនេះ មាននូវចំណុចទីពីរទៀតដែលតំណាងឲ្យព្រះគម្ពីរមរមននោះ ? តើអ្នកអាចគូសបន្ទាត់ត្រង់បានប៉ុន្មាននៅចន្លោះចំណុចយោងទាំងពីរនេះគឺ ៖ ព្រះគម្ពីរប៊ីប និងព្រះគម្ពីរមរមន ? គូសបានតែមួយប៉ុណ្ណោះ ។ មានតែការបកស្រាយនៃគោលលទ្ធិរបស់ព្រះគ្រីស្ទតែមួយប៉ុណ្ណោះ ដែលធ្វើឲ្យទីបន្ទាល់នៃសាក្សីទាំងពីរនេះនៅតែបន្តមាន ។

« ព្រះគម្ពីរមរមនបានដើរតួនាទីម្តងហើយម្តងទៀតជាសាក្សីគាំទ្រ បញ្ជាក់ និងបង្រួបបង្រួមនៃគោលលទ្ធិទាំងឡាយដែលត្រូវបានបង្រៀននៅក្នុងព្រះគម្ពីរប៊ីប » ( « The Book of Mormon—a Book from God » Ensign ឬ Liahona ខែ វិច្ឆិកា ឆ្នាំ ២០១១ ទំព័រ ៧៥ ) ។

ហេតុអ្វីបានជាវាសំខាន់ដើម្បីមានទាំងព្រះគម្ពីរមរមន និងព្រះគម្ពីរប៊ីប ធ្វើជាសាក្សីអំពីគោលលទ្ធិទាំងឡាយនៃដំណឹងល្អរបស់ព្រះយេស៊ូវគ្រីស្ទ ?

សូមអញ្ជើញសិស្សឲ្យថ្លែងទីបន្ទាល់ និងចែកចាយគំរូនានាអំពីរបៀបដែលព្រះគម្ពីរមរមនបានជួយពួកគេឲ្យយល់កាន់តែច្បាស់អំពីព្រះគម្ពីរប៊ីប ឬដើម្បីខិតកាន់តែជិតទៅព្រះអង្គសង្គ្រោះ ។

ការអានរបស់សិស្ស

អេសេគាល ៣៧:១៥–១៩, នីហ្វៃទី១ ១៣:២០–៤១, នីហ្វៃទី២ ៣:១១–១៤, ២៩:១–១៤ ។
រ័សុល អិម ណិលសុន « Scriptural Witnesses » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៤៣–៤៦ ។