Pene 13
Te mau haamaitairaa faito ore o te fare o te Fatu
« I roto i te mau hiero e noaa ai ia tatou te mau haamaitairaa rahi a‘e a te Atua no te ora mure ore. Ua riro mau te mau hiero ei uputa no te ra‘i ».
No roto mai i te oraraa o Ezra Taft Benson
« Te mauruuru nei au i te Fatu i te mea e, te vai noa nei to’u mau haamana‘oraa no te hiero—e tae roa’tu i to’u tamariiriiraa », « Te haamana‘o maitai roa nei au, i to’u tamariiriiraa, a haere mai ai au na roto mai i te faaapu, e fatata mai ai i te fare faaapu tahito i Whitney, Idaho. Ua faaroo vau i to’u metua vahine i te himeneraa ‘Ai-je fais du bien dans ce monde aujourd’hui [Ua rave anei au i te maitai i teie mahana] ?’ (Hymns, no. 58).
« E nehenehe noa â ta’u e ite ia’na i roto i to’u mata varua i te tipaparaa i ni‘a i te iri auri ahu e te mau ve‘a i ni‘a i te tahua, a auri noa ai i te mau taamu roroa o te ahu uouo, e te topata hou i ni‘a i to’na rae. I to’u aniraa’tu ia’na e, eaha ta’na e rave ra, na ô mai nei oia e, ‘E ahu hiero teie, e ta’u tamaiti. E haere au e to oe papa i te hiero.… ’
« I muri iho, ua vaiiho atura oia i te auri ahu tahito i ni‘a i te vairaa, huti mai nei i te hoê parahiraa i piha‘i iho i to’u, e ua paraparau maira ia’u i te parau no te ohipa hiero—te faufaa ia ti‘a ia haere i te hiero e ia amui atu i roto i te mau oro‘a mo‘a e ravehia i reira. Ua faaʻite atoa mai oia i to’na ti‘aturi rahi e, ia tae i te hoê mahana e ti‘a atoa i ta’na mau tamarii, mau mootua e mau hina ia fana‘o atoa i teie mau haamaitairaa faito ore.
« Ua riro teie mau haamana‘oraa nehenehe no ni‘a i te varua o te ohipa hiero ei haamaitairaa i roto i to matou fare faaapu … Ua ho‘i faahou mai teie mau haamana‘oraa i te taime a faaipoipo ai au i ta maua mau tamarii e te mau mootua tata‘itahi, te mau mootua e te mau hina a to’u metua vahine, i raro a‘e i te faaûruraa a te Varua i roto i te fare o te Fatu.
« Ua riro teie mau haamana‘oraa ei mau haamana‘oraa faufaa rahi no’u ».1
Te mau haapiiraa a Ezra Taft Benson,
1
E tapa‘o te mau hiero no te mau mea atoa ta tatou e poihere nei.
O te hiero te vahi fatata roa’tu i te ra‘i i ni‘a i te fenua tahuti nei.2
E riro [te] hiero ei maramarama no te mau taata atoa i roto i te reira vahi—e tapa‘o no te mau mea atoa ta tatou e poihere nei.3
Ua riro te hiero ei faahaamana‘oraa tamau e, ua hinaaro te Atua ia vai mure ore te utuafare.4
[Ua riro te hiero] ei tapa‘o ite-tamau-hia e, aita te Atua i vaiiho i te taata ia haere noa na roto i te pouri. E vahi no te heheuraa. Noa’tu e, te ora nei tatou i roto i te hoê ao hi‘a—hoê ao ino—ua faataahia e ua haamo‘ahia te tahi mau vahi mo‘a ia ti‘a hoʻi i te mau tane e te mau vahine ti‘amâ ia haapii i te faanahonahoraa o te ra‘i e ia haapa‘o i te hinaaro o te Atua.5
[Ua riro te hiero ei] faaʻiteraa e, e nehenehe te puai o te Atua e tape‘a i te mau puai o te diabolo i rotopu ia tatou. E rave rahi metua, i roto e i rapae au i te Ekalesia, te mana‘ona‘o nei i te parau no te parururaa i mua i te maniiraa o te ino te nehenehe e horomii i te mau parau tumu keresetiano. Ua tuʻati maitai to’u mana‘o i te hoê faahitiraa parau a te peresideni Harold B. Lee i te anotau no te Tama‘i Rahi II o te Ao nei. Te na ô ra oia e : « Te paraparau nei tatou i te parau no te parururaa i teie mahana, areʻa, aita tatou e manuïa ra ia maramarama e… ua faati‘a tatou i te hiero i reira hoʻi e itehia ai ia tatou taua mau tapa‘o nei e faatupu mai i te puai e faaora mai i teie nunaa i te haamouraa ».6
I roto i te hoê aru‘i faaoaoaraa i roto i te hotera Hilton no Beverly Hills i Los Angeles, [California,] ua faaue mai te peresideni o te mau Hau Amui no Marite [i roto i to’u ti‘araa faaterehau no te ohipa faaapu] ia farii i te peresideni no te hoê o to tatou mau repupirita apî, te peresideni no e va’u ahuru ma va’u mirioni taata e parahirahi nei i ni‘a i na 3 000 motu, tauatini maire i te roa, hoê nunaa tei ti‘a mai, te tahi noa tau matahiti te maoro. A parahi ai matou i roto i taua tamaaraa ra i tera pô, tei paepaehia te pae rahi na te taiete hamaniraa hoho‘a teata, e e rave rahi mau feia haʻuti teata tuiroo tei tae atoa mai, ua ti‘a ia’u ia hi‘o i rapae na roto i te hoê hi‘o haamaramarama nehenehe roa. I raro i te purumu rahi, i te vahi pateitei, ua ti‘a ia’u ia ite i te maramarama mărû o te mori ati a‘e i ta tatou hiero hanahana no Los Angeles, e ua oaoa vau ia faaʻite atu i te reira i ta’u mau manihini e to’u mau hoa i ni‘a i ta matou amuraa maa e i te tahi atu mau amuraa maa. Ua feruri au, a parahi ai matou i reira, « E rave rahi o te mau mea e tupu nei i teie pô, e hu‘a miti noa ïa te reira no te oraraa. Te mau mea râ e vai maoro noa, te mau mea e vai mau nei, te mau mea faufaa, o te mau mea ïa e faaʻitehia ra i roto i te hiero o te Atua ».7
Hiero no Los Angeles California
A faariro na i [te hiero] ei faahaamana‘oraa tamau e, e mea mure ore te oraraa, e te mau fafauraa ta tatou i rave i te tahuti nei, e nehenehe ïa e riro mai e mea mure ore.8
2
Titauhia ia tatou ia farii i te mau oro‘a hiero e te mau fafauraa, ia ti‘a hoʻi ia tatou ia tomo i roto i te îraa o te autahu‘araa e ia faaineine no te ho‘i faahou â i mua i te aro o te Atua.
I to te Metua i te Ao ra tuuraa mai ia Adamu e o Eva i ni‘a i teie fenua, ua rave oia i te reira ma te opua e haapii ia raua e nahea ia ho‘i faahou i mua i To’na aro. Ua fafau mai to tatou Metua i te hoê Faaora no te faaora ia raua i to raua hi‘araa. Ua horo‘a’tu Oia ia raua i te faanahonahoraa o te faaoraraa e ua parau ia raua ia haapii i ta raua mau tamarii i te faaroo ia Iesu Mesia e i te tatarahapa. I muri a‘era, ua faaue te Atua ia Adamu e to’na huaai ia bapetizohia, ia farii i te Varua Maitai, e ia tomo i roto i te faanahoraa a te Tamaiti a te Atua.
Te tomoraa i roto i te faanahoraa a te Tamaiti a te Atua, ua aifaito ïa i te tomoraa i roto i te îraa o te Autahu‘araa a Melehizedeka i teie mahana, te fariihia nei i roto ana‘e i te fare o te Fatu.
Ua haapa‘o Adamu e o Eva i teie mau titauraa, no reira na ô maira te Atua ia raua, « E tei roto oe i te haapa‘oraa o to’na ra huru, aore to’na e mau mahana haamataraa, e aore hoʻi e mau matahiti hopea ra, mai a muri e a muri noa’tu ». (Mose 6:67).
E toru matahiti na mua a‘e i to Adamu poheraa, ua tupu te hoê ohipa rahi. Ua arata‘i oia i ta’na tamaiti o Seta, Ta’na mootua tamaiti o Enosa, e i te tahi atu mau tahu‘a rahi no roto i to’na huaai, e te tahi atu o to’na huaai parau-ti‘a, i roto i te hoê peho tei parauhia o Adamu-onidi-Ahamana. I reira i horo‘a’tu ai Adamu i ta’na haamaitairaa hopea i ni‘a i teie mau huaai parau-ti‘a.
I muri iho ua fâ mai te Fatu ia ratou [a hi‘o PH&PF 107:53–56]…
E mea nahea to Adamu arata‘iraa mai i to’na huaai i mua i te aro o te Fatu ?
Te pahonoraa : Ua tomo Adamu e to’na huaai i roto i te faanahoraa o te autahu‘araa a te Atua. I teie mahana e parau tatou e, ua haere ratou i roto i te fare o te Fatu e ua farii i to ratou mau haamaitairaa.
Te faanahoraa o te autahu‘araa i faahitihia i roto i te mau papa‘iraa mo‘a e parau-atoa-hia i te tahi taime te faanahoraa patereareha no te mea, mea na ni‘a mai i te metua tane haere mai i ni‘a i te tamaiti. Tera râ, ua tatara-atoa-hia teie faanahoraa i roto i te heheuraa no teie anotau mai te hoê faanahoraa faatereraa utuafare i reira hoʻi te hoê tane e te vahine e tomo ai i roto i te hoê fafauraa e te Atua—mai ta Adamu e o Eva i na reira—ia taatihia e a muri noa’tu, no te farii i te huaai, e no te haapa‘o i te hinaaro e i te ohipa a te Atua i roto i to ratou oraraa tahuti nei.
Mai te mea e haapa‘o na taata faaipoipo i ta raua mau fafauraa, e farii raua i te haamaitairaa o te tuhaa teitei a‘e o te basileia tiretiera. I teie mahana, hoê noa rave‘a no te tomo i roto i teie mau fafauraa maori râ, na roto i te haereraa i roto i te fare o te Fatu.
Ua haapa‘o Adamu i teie faanahoraa e ua arata‘i i to’na huaai i mua i te aro o te Atua…
Hoê noa rave‘a no te tomo i roto i teie faanahoraa o te autahu‘araa maori râ, na roto i te haapa‘oraa tatou i te mau faaueraa atoa a te Atua e te titauraa i te mau haamaitairaa o te mau metua mai ia Aberahama i na reira ra [a hi‘o Aberahama 1:1–3] na roto i te haereraa i te fare o to tatou Metua. Aita e vahi ê atu e fariihia te reira !
… A haere i te hiero—te fare o to tatou Metua—no te farii i te mau haamaitairaa o to outou mau metua ia ti‘a hoʻi ia outou ia farii i te mau haamaitairaa teitei a‘e o te autahu‘araa. « No te mea ia ore hoʻi teie, e ore roa e ti‘a i te hoê taata ia ite i te mata o te Atua, oia o te Metua, e ora’i ». (PH&PF 84:22).
E fare nahonaho te fare o to tatou Metua. E haere tatou i To’na fare no te tomo i roto i te reira faanahoraa o te autahu‘araa, e na te reira hoʻi e horo‘a mai ia tatou i te mau mea atoa na te Metua ra, mai te mea e, e mea haapa‘o maitai tatou.9
3
Na roto i te mau oro‘a hiero e te mau fafauraa, e nehenehe ta tatou e farii i te parururaa e i te mau haamaitairaa rahi a‘e a te Atua no te ora mure ore.
E mea mure ore te mau haamaitairaa o te fare o te Fatu. E faufaa rahi roa to te reira mau haamaitairaa no tatou no te mea, i roto i te mau hiero e noaa ai ia tatou te mau haamaitairaa rahi a‘e a te Atua no te ora mure ore. Ua riro mau te mau hiero ei mau uputa no te ra‘i.10
Te hinaaro o te Fatu maori râ, ia farii te mau tane e te mau vahine paari atoa i roto i te Ekalesia i te mau oro‘a o te hiero. To’na auraa maori râ, e titauhia ia ratou ia rave i to ratou oro‘a hiero e ia taatihia te mau taata faaipoipo e a muri noa’tu. Na teie mau oro‘a e horo‘a mai i te parururaa e te haamaitairaa no to ratou faaipoiporaa. E haamaitai-atoa-hia ta ratou mau tamarii no te fanauraahia mai i roto i te fafauraa. No to ratou fanauraahia i roto i te fafauraa, e farii ïa te reira mau tamarii i te haamaitairaa o te ti‘araa matahiapo, e na te reira e haapapû i to ratou ti‘araa fetii mure ore, noa’tu te ohipa e tupu i ni‘a i te mau metua, mai te mea e vai ti‘amâ noa te mau tamarii no taua mau haamaitairaa ra.11
I to outou hi‘oraa, e ere anei e mea faahiahia i te mea e, i teie mahana ua purara haere te Feia Mo‘a na te ao atoa nei, e, i roto i teie purararaa, te hamanihia nei te mau hiero no ratou ? Na roto i te mau oro‘a ta ratou e farii i roto i te mau vahi mo‘a, e ahuhia ratou i te mauhaa o te parau-ti‘a e e ahuhia i te mana o te Atua ma te puai rahi.12
Te vai ra te hoê puai i taatihia i ni‘a i te mau oro‘a o te ra‘i—oia te puai o te haamoriraa i te Atua—o te nehenehe e o te riro i te pato‘i i te puai o te enemi mai te mea e, e mea ti‘amâ tatou no te farii i taua mau haamaitairaa ra. E paruruhia to [tatou] oire, e paruruhia to tatou mau utuafare, e tiaʻihia ta tatou mau tamarii mai te mea e, e haapa‘o tatou i te evanelia, e haere tatou i te hiero, e e ora tatou i piha‘i iho i te Fatu … E haamaitai te Atua ia tatou, te Feia Mo‘a, ia ora ei mea ti‘amâ i te mau fafauraa e te mau oro‘a e ravehia i roto i teie vahi mo‘a.13
Ua horo‘a mai te hoê Metua i te Ao ra paari i te oro‘a hiero no te tauturu ia tatou ia riro mai te Mesia te huru.14
Eita e ti‘a ia tatou ia parahi i piha‘i iho i te mau tino tiretiera maori râ, e mea viivii ore e e mea mo‘a tatou. I roto ana‘e i teie mau vahi mo‘a e ravehia ai te mau ture e te mau oro‘a o te arata‘i mai i te tane e te vahine i rapae i te ao nei e ia haamo‘ahia. Ua horo‘ahia mai te reira na roto i te heheuraa e e haroʻaroʻahia te reira na roto i te heheuraa. O te reira te tumu i parau ai te hoê o te mau taea‘e no ni’a i te hiero e, te « haapiiraa tuatoru a te Fatu ».15
Aore roa hoê melo o te Ekalesia e nehenehe e maitai roa e aita teie mau oro‘a no te hiero. E ohipa na tatou ia tauturu i te feia aita i noaa ia ratou teie mau haamaitairaa, ia farii ratou i te reira.16
4
E haamaitairaa na tatou te iritiraa i te mau uputa o te faaoraraa i to tatou mau tupuna.
Ua hamanihia e ua haamo‘ahia te mau hiero ia ti‘a hoʻi i te mau metua, na roto i te autahu‘araa, ia taatihia i ta ratou mau tamarii e ia taatihia te mau tamarii i to ratou mau metua. E ravehia teie mau oro‘a taatiraa no te feia ora e te feia pohe. Mai te mea e, aita tatou e taatihia i to tatou mau tupuna e i to tatou huaai, ua faufaa ore ïa te opuaraa o teie fenua no tatou, oia hoʻi,te faateiteiraa o te taata.17
Eita e nava‘i no te hoê tane e te vahine ia taatihia i roto i te hiero no te haapapû i to raua faateiteiraa—mai te mea e mea haapa‘o maitai raua—titau-atoa-hia ia raua ia taamuhia e a muri noa’tu i ni‘a i to raua mau tupuna e ia hi‘o e, ua ravehia anei te ohipa no te reira mau tupuna. I parau mai hoʻi te aposetolo Paulo e, « e ore e noaa te maitai rahi roa ia ratou ra ia ore tatou nei—e ore atoa tatou e maitai roa ia ore to tatou feia i pohe ra » (PH&PF 128:15). No reira, e ti‘a i to tatou mau melo ia haroʻaroʻa e, e hopoi‘a na ratou tata‘itahi ia hi‘o e, ua taamuhia anei ratou i ni‘a i to ratou mau tupuna—e aore râ, mai tei faaʻitehia i roto i te mau papa‘iraa mo‘a, to tatou « mau metua ». Teie te auraa o te tuhaa 2, irava 2, i roto i te Te Parau Haapiiraa e te Mau Parau Fafau a parau ai Moroni e, na Elia « e tanu i roto i te mau aau o te mau tamarii te mau fafauraa i fafauhia i te mau metua, e e riro te mau aau o te mau tamarii i te fariu i to ratou ra mau metua ».18
Ia feruri ana‘e au i te tuatapaparaa tupuna, e ite au i te taata—te taata ta’u e here nei, o te tiaʻi nei i to tatou utuafare, to ratou huaai, ia tauturu ia ratou ia farii i te faateiteiraa i roto i te basileia tiretiera.19
E haamaitairaa na tatou te iritiraa i te mau uputa o te faaoraraa i te mau varua tei tape‘ahia i roto i te pouri i roto i te ao varua, ia ti‘a ia ratou ia farii i te maramarama o te evanelia e ia haavâhia ratou mai ia tatou atoa nei. Oia mau, « te mau ohipa ta’u e rave nei »—te horo‘araa i te mau oro‘a faaora o te evanelia ia vetahi ê—« e rave atoa outou » [a hi‘o Ioane 14:12]. E hia rahiraa tauatini o to tatou mau metua e tiaʻi noa nei â i teie mau oro‘a taatiraa ?
Ua ti‘a roa ia ui e, « Ua rave anei au i te mau mea atoa e ti‘a ia’u ia rave i teie pae’tu o te paruru ? E riro anei au ei faaora no ratou—to’u iho mau tupuna ? »
Ia ore ratou, eita e ti‘a ia tatou ia maitai roa ! Te faateiteiraa, e ohipa utuafare ïa.20
E mea rairai roa te paruru. Te ora nei tatou i roto i te tau mure ore. Ua riro te mau mea atoa mai te hoê mahana i te Atua. Te feruri nei au e, no te Fatu, aita ïa e paruru. Hoê noa iho ïa faanahonahoraa rahi. Ua papû ia’u e, e oaoa to te ra‘i ia farerei ana‘e tatou [i roto i te hiero]. Te oaoa nei to tatou mau tupuna, e te ti‘aturi nei au e te pure nei au e, e rave tatou i teie mau rave‘a i horo‘ahia mai ia tatou i teie nei no te haere tamau noa i te hiero.21
Outou o tei rave i to outou tuatapaparaa, tei ite i te faufaa o te ohipa e ua farii i te oaoa rahi e roaa na roto i te taamu-amui-raa i te mau utuafare, e te iteraa i to outou faturaa ai‘a hanahana, e ti‘a ïa ia outou ia faaʻite i te reira oaoa ia vetahi ê. A tauturu ia ratou ia ite i te oaoa e te faaotiraa ta outou e ite nei i roto i te ohipa. Titauhia ia tatou ia haapii rahi atu i to tatou mau melo i teie ohipa. Ua ite outou paatoa e, e ohipa rahi te ti‘a ia ravehia, e e rave rahi, e rave rahi melo o te nehenehe e rave i te ohipa e o te oaoa i te raveraa i te ohipa ahiri te tahi pae o tatou—outou pauroa—e faaama i te tahi anapa iti uira i roto ia ratou na roto i to ratou oaoa, to ratou hi‘oraa, e te faaroo.22
5
E ti‘a i te mau tamarii e i te feia apî ia haapii no ni‘a i te mau haamaitairaa e tiaʻi nei ia ratou i roto i te hiero.
E vahi mo‘a te hiero, e e mea mo‘a te mau oro‘a i roto i te hiero. No to’na huru mo‘a, e otiʻatiʻa rii tatou i te tahi taime ia parau i te hoê mea no ni‘a i te hiero i ta tatou mau tamarii e te mau mootua.
No te reira tumu, e rave rahi taata o tei ore e faatupu i te hinaaro mau ia haere i te hiero, e aore râ, ia haere ana‘e ratou i reira, e haere ratou ma te ite iti no te faaineine ia ratou no te mau titauraa e te mau fafauraa ta ratou e rave.
Te ti‘aturi nei au e, mai te mea e, te vai ra te haroʻaroʻa e aore râ, te ite au, e riro te reira ei tautururaa rahi no te faaineine i to tatou mau feia apî no te hiero. Te ti‘aturi nei au e, na teie haroʻaroʻa e faatupu i roto ia ratou i te hinaaro ia imi i to ratou mau haamaitairaa autahu‘araa mai ia Aberahama i imi i to’na [a hi‘o Aberahama 1:1–4].23
Ia ui mai ta outou mau tamarii e, no te aha tatou e faaipoipo ai i roto i te hiero, e ti‘a ia outou ia haapii ia ratou e, te mau hiero ana‘e te vahi i ni‘a i te fenua nei i reira te tahi mau oro‘a e ravehia ai. E ti‘a atoa ia outou ia faaʻite i ta outou mau tamarii i to outou mau mana‘o i te taime a tuturi amui ai outou i mua i te fata mo‘a, e a rave ai outou i ni‘a ia outou iho i te mau fafauraa o tei faati‘a ia ratou ia taatihia i ni‘a ia outou e a muri noa’tu.24
« E haamaitai te Atua ia tatou ia haapii i ta tatou mau tamarii e ta tatou mau mootua i te mau haamaitairaa rahi e tiaʻi maira ia ratou na roto i te haereraa i te hiero ».
E mea tano roa ia faatoro te mau metua vahine e te mau metua tane i ni‘a i te hiero e ia parau i ta ratou mau tamarii e, « tera te vahi i faaipoipohia ai maua no te tau a muri atu ». Ia na reira hoʻi outou, i reira te feruriraa o te faaipoiporaa hiero e niniihia ai i roto i te varua e te aau o ta outou mau tamarii i to ratou apîraa ra.25
E ti‘a ia tatou ia faaʻite i to tatou mau utuafare i to tatou here i to tatou mau tupuna e to tatou mauruuru i te mea e, ua ti‘a ia tatou ia tauturu ia ratou ia farii i te mau oro‘a faaoraraa, mai ta to’u na metua i na reira i ni‘a ia’u. Mai te mea e, e na reira tatou, e tupu i te rahi te mauruuru e te here i roto i to tatou mau utuafare.26
Te ti‘aturi nei au e, te vai ra te hinaaro e te aravihi i roto i te feia apî no te rave i te ohipa imiraa tuatapaparaa tupuna, hau atu râ, ua riro ratou ei mau rave‘a maitai no te horo‘a i te ora i te taatoaraa o teie faanahoraa.27
E haamaitai te Atua ia tatou ia haapii i ta tatou mau tamarii e ta tatou mau mootua i te mau haamaitairaa rahi e tiaʻi maira ia ratou na roto i te haereraa i te hiero.28
6
Ia rahi te haereraa i te hiero, e rahi atoa te heheuraa o te taata iho.
Ua faariro vau ei peu na’u, ia rave ana‘e au i te hoê faaipoiporaa, e parau vau i na taata faaipoipo apî ia ho‘i oi‘oi mai raua i te hiero e ia haere faahou i roto i te hiero ei tane e ei vahine faaipoipo. Eita e ti‘a ia raua ia maramarama hope roa i te auraa o te oro‘a mo‘a e aore râ, te mau taatiraa i roto hoê noa tere i roto i te hiero, tera râ, mai te mea e, e haere tamau noa raua i te hiero, ei reira te nehenehe, te auraa e te faufaa o te mau mea atoa e vai papû ai i roto ia raua. I muri a‘e ua farii au i te rata no roto mai i te tahi o teie mau taata faaipoipo apî ma te faaʻite mai i to ratou mauruuru no te mea ua haapapûhia i taua parau ra. A haere tamau noa ai ratou i te hiero, ua tupu i te rahi to ratou here te tahi e te tahi, e ua haapuaihia to ratou faaipoiporaa.29
I roto i to tatou mau tere i te hiero, e roaa ia tatou te iteraa i te auraa o te tere mure ore o te taata. E ite tatou i te mau tapa‘o nehenehe e te faahiahia o te mau ohipa faufaa roa a‘e—no mutaa iho ra, no teie mahana, e no a muri a‘e—te faahoho‘araa o te misioni a te taata i mua i te Atua. E faahaamana‘ohia ia tatou ta tatou mau hopoi‘a na roto i te raveraa i te mau fafauraa hanahana no ni‘a i te haapa‘o, te haamo‘araa, te tusia e te tavini-itoito-raa i to tatou Metua i te Ao ra.30
Te fafau atu nei au ia outou e, mai te mea e, e haere rahi outou i te hiero o to outou Atua, e farii outou i te mau heheuraa rahi atu no te haamaitai i to outou oraraa na roto i to outou haamaitairaa i te feia tei pohe.31
I roto i te hau o teie mau hiero nehenehe, i te tahi taime e itehia ia tatou te mau tatararaa no te tahi mau fifi rarahi o te oraraa. I raro a‘e i te faaûruraa a te Varua, i te tahi taime, e tae mai te iteraa mâ ia tatou, i reira. Ua riro te mau hiero ei vahi no te heheuraa o te taata iho. I te mau taime ia teimaha roa te fifi e aore râ, te ati i ni‘a ia’u, e haere au i te fare o te Fatu ma te pure i roto i to’u aau no te ani i te mau pahonoraa. Ua tae te reira mau pahonoraa ma te maramarama e te papû maitai.32
Te ho‘i pinepine ra anei tatou i te hiero no te farii i te mau haamaitairaa o te taata iho o te tae mai na roto i te haamori-tamau-raa ? Te pahonohia nei te mau pure, te tupu nei te mau heheuraa, te tupu nei te haapiiraa a te Varua i roto i te mau hiero mo‘a o te Fatu.33
E faariro tatou i te hiero ei fare mo‘a i te atea ê i to tatou fare mure ore.34
Te mau mana‘o tauturu no te tuatapaparaa e te haapiiraa
Uiraa
-
Ua parau te peresideni Benson e, te hoê hiero, e tapa‘o ïa « no te mau mea atoa ta tatou e poihere nei », e ua faaʻite mai oia i te tahi mau parau mau ta te hiero e faahoho‘a nei (a hi‘o i te tuhaa 1). Eaha te mau hiero no outou ?
-
I roto i te tuhaa 2, nahea te mau haapiiraa a te peresideni Benson no ni‘a i te mau haamaitairaa o te autahu‘araa e au ai i te mau melo atoa o te utuafare ? Ia hi‘o faahou outou i teie tuhaa, a feruri maite i to outou haamaitairaa e ta outou hopoi‘a ia tauturu i te mau melo o te utuafare ia faaineine no te ho‘i faahou i mua i te aro o te Atua.
-
Ia tai‘o outou i te tuhaa 3, a feruri maite i te mau haapiiraa a te peresideni Benson no ni‘a i te mau haamaitairaa ta tatou e farii na roto i te mau oro‘a hiero. Mai te aha te huru to outou haamaitairaahia na roto i te mau oro‘a hiero ? Mai te mea e, aita â outou i farii atura i te mau oro‘a hiero, a feruri maite eaha te ti‘a ia outou ia rave no te faaineine ia outou no te farii i te reira.
-
Ua parau te peresideni Benson e, « Ia feruri ana‘e au i te tuatapaparaa tupuna, e ite au i te taata—te taata ta’u e here nei » (tuhaa 4). Nahea teie parau i te arata‘i ia outou i roto i te raveraa i te aamu utuafare ? Eaha ta tatou e nehenehe e rave no te tauturu rahi atu â o to tatou mau tupuna ia farii i te mau haamaitairaa o te evanelia ?
-
Eaha te tahi mau mea e nehenehe ta tatou e rave no te tauturu i te mau tamarii e i te feia apî ia faaineine no te mau oro‘a hiero e no te mau fafauraa ? Nahea e ti‘a ai i te feia apî ia horo‘a « i te ora i te taatoaraa o te faanahoraa » no te aamu utuafare ? (A hi‘o i te tuhaa 5).
-
Ua faaitoito mai te peresideni Benson ia tatou ia faariro « i te hiero ei fare mo‘a i te atea ê i to tatou fare mure ore » (tuhaa 6). Eaha te auraa o teie parau no outou ? A feruri i te mau haamaitairaa ta outou i farii a ho‘i faahou ai outou i te hiero.
Te mau papa‘iraa mo‘a
Isaïa 2:1–3 ; PH&PF 97:15–16 ; 109:8–23 ; 124:39–41 ; 138:32–34
Tauturu haapiiraa
« Pinepine, e i roto i te hoê haapiiraa e rave rahi mauihaa o te ti‘a ia outou ia haapii i roto i te taime i faataahia. No te reira huru, e ti‘a ia outou ia ma‘iti i te mauihaa e tano no te feia ta outou e haapii ra » (Te haapiiraa : Aita e piiraa teitei a‘e [1999], 101).