Kapitulo 18
Maglikay sa Garbo
“Ang garbo sala sa tanan, ang labihan ka ngil-ad nga kinaiya. Ang panagang sa garbo mao ang pagkamapainubsanon.”
Gikan sa Kinabuhi ni Ezra Taft Benson
Sa pagpamulong sa iyang unang kinatibuk-ang komperensya isip Presidente sa Simbahan, si Presidente Ezra Taft Benson mitudlo sa kalainan tali sa garbo ug pagkamapainubsanon:
“Ang garbo dili moila sa Dios ug mobaliwala sa eksakto. Dili kini patas ug makiglalis kini kon si kinsa ang eksakto. …
“Ang garbo maila pinaagi sa pag-ingon ‘Unsay akong gusto sa kinabuhi?’ imbis nga ‘Unsay gusto sa Ginoo nga akong buhaton sa akong kinabuhi?’ Kini magbuot-buot sa kaugalingon sukwahi sa pagsunod sa kabubut-on sa Dios. Kini kahadlok sa tawo kaysa kahadlok sa Dios.
“Ang pagkamapainubsanon mosunod sa kabubut-on sa Dios—sa kahadlok sa Iyang paghukom ug sa panginahanglan niadtong naglibut kanato. Alang sa mga mapahitas-on, ang pasidungog sa kalibutan mao ang ilang tinguha; alang sa mapainubsanon, ang pasidungog sa kalangitan modasig sa ilang kasingkasing.”1
Kini nga mga pagtulun-an pamilyar na sa mga tawo nga nagserbisyo uban ni Presidente Benson diha sa Korum sa Napulog Duha ka mga Apostoles. Sila nasayud nga isip Presidente sa ilang korum, si Presidente Benson wala maghunahuna sa iyang personal nga panglantaw—apan sa pagkat-on ug pagsunod lang sa kabubut-on sa Dios. Si Presidente Boyd K. Packer, kinsa sa kaulahian miserbisyo mismo isip Presidente sa Korum sa Napulog Duha ka mga Apostoles, miingon kabahin sa pamaagi ni Presidente Benson sa diskusyon atol sa mga miting sa korum: “Mahimo kang dili mouyon ni Presidente Benson sa walay pagkabalaka nga iya kining personalon. Kami makahisgot og maayo sa mga butang nga dili mabalaka kon unsa man ang iyang panglantaw.”2 Si Elder Russell M. Nelson, kinsa miserbisyo sa Korum sa Napulog Duha ka mga Apostoles sulod sa duha ka tuig ubos sa pagpangulo ni Presidente Benson, miingon: “Sa bisan usang hisgutan, bisan kon kini dili iyang opinyon, usa ra ang sumbanan ni Presidente Benson sa pagtimbang-timbang sa sitwasyon—Unsa ang labing ikaayo sa gingharian? Bisan kon kini nagpasabut nga ang usa ka butang buhaton sa paagi nga dili uyon sa iyang gusto. Gusto lang niya kon unsa ang labing maayo para sa gingharian.”3
Isip lider sa gobyerno, si Presidente Benson sama ra ka mapahinunguron sa pagbuhat alang sa unsay labing ikaayo sa gingharian sa Dios. Sa dihang nagserbisyo siya isip secretary sa agrikultura sa Estados Unidos, siya nakadawat og daghang “pasidungog sa kalibutan,”4 uban sa grabe kaayong pagpanaway. Wala niya tuguti nga kining duha mahimo niyang tinguha. Hinoon, siya matinud-anon sa kanunayng pahinumdom sa iyang asawa, si Flora: “Ayaw kabalak-i ang opinyon sa kalibutan ang importante husto ka diha sa Ginoo.”5 Kontento sa hilom nga “pasidungog sa kalangitan,”6 kanunay siyang nagtinguha sa pagsunod sa kabubut-on sa Dios.
Ang Manluluwas kinsa, “maaghop ug mapaubsanon sa kasingkasing” (Mateo 11:29), mao ang atong talagsaong ehemplo sa pagkamapainubsanon.
Mga Pagtulun-an ni Ezra Taft Benson
1
Ang Ginoo nagpasidaan kanato nga maglikay sa garbo.
Ang Doktrina ug mga Pakigsaad nagsulti kanato nga ang Basahon ni Mormon usa ka “talaan sa napukan nga mga katawhan.” (D&P 20:9.) Nganong napukan sila? Kini ang usa sa dakong mga mensahe sa Basahon ni Mormon. Gihatag ni Mormon ang tubag diha sa panapos nga mga kapitulo sa basahon gamit niining mga pulonga: “Tan-awa, ang garbo niini nga nasud, o ang mga katawhan sa mga Nephite, nga nakapamatuod sa ilang kalaglagan.” (Moro. 8:27.) Ug dayon, dili nato palabyon ang makahuluganong mensahe sa Basahon ni Mormon gikan niadtong napukan nga mga katawhan, ang Ginoo nagpasidaan kanato diha sa Doktrina ug mga Pakigsaad, “Paglikay sa garbo, tingali kamo mahisama sa mga Nephite sa karaan.” (D&P 38:39.)
Nangamuyo ko sa inyong hugot nga pagtuo ug pag-ampo samtang naningkamot ko sa pagpasabut niining mensahe sa Basahon ni Mormon—ang sala sa garbo. Kini nga mensahe nakahasol og maayo sa akong kalag sa mubong panahon. Nasayud ko nga gusto sa Ginoo nga kining mensahe ipamulong karon.
Sa konseho sa wala pa dinhi sa yuta, ang garbo mao ang nakapapukan ni Lucifer, “anak sa kabuntagon.” (2 Ne. 24:12–15; tan-awa usab sa D&P 76:25–27; Moises 4:3.) Sa pagtapos sa kalibutan, kon limpyuhan na sa Dios ang yuta pinaagi sa kalayo, ang mga mapahitas-on pagasunugon sama sa dagami ug ang maaghup makapanag-iya sa yuta. (Tan-awa sa 3 Ne. 12:5; 25:1; D&P 29:9; JS—K 1:37; Mal. 4:1.)
Katulo diha sa Doktrina ug mga Pakigsaad ang Ginoo migamit sa hugpong sa mga pulong nga “paglikay sa garbo,” naglakip sa pasidaan sa ikaduhang elder sa Simbahan, kang Oliver Cowdery, ug kang Emma Smith, ang asawa sa Propeta. (D&P 23:1; tan-awa usab sa 25:14; 38:39.)7
2
Ang klarong ebidensya sa garbo mao ang pagdumot sa Dios ug sa atong isigkatawo.
Ang garbo mao ang sala nga nasaypan sa pagsabut, ug daghan ang nakasala nga daw wala masayud. (Tan-awa sa Mosiah 3:11; 3 Ne. 6:18.) Sa kasulatan wala gyuy matarung nga garbo—kini kanunayng gikonsiderar nga sala. Busa, bisan giunsa pa sa kalibutan paggamit ang termino, kinahanglan natong masabtan giunsa sa Dios paggamit ang termino aron atong masabtan ang kasulatan ug makakuha og kaayohan gikan niini. (Tan-awa sa 2 Ne. 4:15; Mosiah 1:3–7; Alma 5:61.)
Kadaghanan nato naghunahuna sa garbo isip paghunahuna lang sa kaugalingon, pagkamapahitas-on, pagkahambugero, pagkaarogante, o pagkamapalabi-labihon. Kining tanan sala, apan ang pinakahulugan, o ang kinauyukan niini, kulang ra gihapon.
Ang klarong ebidensya nga anaa ang garbo mao ang pagdumot— pagdumot sa Dios ug sa atong isigkatawo. Ang pagdumot nagpasabut sa “kalagot, pagkamasupakon, o matang sa pagsukol.” Kini ang gahum diin si Satanas buot nga modumala kanato.
Ang garbo adunay kinaiya sa pagpangumpetensya. Ang atong kabubut-on batok sa kabubut-on sa Dios. Kon atong itumong ang atong garbo ngadto sa Dios, kini anaa sa diwa nga “ang akong pagbuot ug dili Iyang kabubut-on ang matuman.” Sama sa giingon ni Pablo, sila “nagapangita sa ilang kaugalingon lamang ug dili sa mga kaayohan ni Jesukristo.” (Filip. 2:21.)
Kon ang atong kabubut-on nakigkompetinsya sa kabubut-on sa Dios dili nato makontrolar ang atong mga tinguha, kahinam, ug pasyon. (Tan-awa sa Alma 38:12; 3 Ne. 12:30.)
Ang mga mapahitas-on dili makadawat nga ang awtoridad sa Dios ang modumala sa ilang kinabuhi. (Tan-awa sa Hel. 12:6.) Ang ilang panglantaw sa kamatuoran sukwahi sa talagsaong kahibalo sa Dios, ang ilang mga abilidad batok sa gahum sa priesthood sa Dios, ang ilang mga nahimo gitan-aw nga batok sa Iyang talagsaong mga buhat.
Ang atong pagdumot sa Dios makita sa daghang paagi, sama sa rebelyon, pagkatig-a sa kasingkasing, pagkatikig og liog, dili maghinulsol, garbuso, daling masilo, ug nagpangita og timailhan. Ang mga mapahitas-on nanghinaut nga ang Dios mouyon kanila. Dili sila ganahang mousab sa ilang mga opinyon aron mauyon sa Dios.
Laing dakong bahin niining komon kaayo nga sala sa garbo mao ang pagdumot sa atong isigkatawo. Kita kada adlaw tintalon nga ipataas ang atong kaugalingon kaysa uban ug ipakaubos sila. (Tan-awa sa Hel. 6:17; D&P 58:41.)
Himoong kaaway sa mga mapahitas-on ang ubang tawo pinaagi sa pagkompara sa ilang mga kahibalo, opinyon, buhat, bahandi, talento, o uban pang kalibutanong mga butang nga makompara. Sa mga pulong ni C. S. Lewis: “Ang garbo dili malipay nga makaangkon og usa ka butang, apan mas makabintaha lang sa uban. … Ang pagkompara maoy nakapahimo ninyong mapahitas-on: ang kahimuot nga nakalabaw sa uban. Kon ang elemento sa pakigkompetinsya mawala, ang garbo mawala.” (Mere Christianity, New York: Macmillan, 1952, pp. 109–10.)
Sa konseho sa kinabuhi sa wala pa dinhi sa yuta, gihan-ay ni Lucifer ang iyang plano nga makigkompetinsya sa plano sa Amahan nga gipasiugdahan ni Jesukristo. (Tan-awa sa Moises 4:1–3.) Gusto niya nga siya tahuron nga labaw sa tanan. (Tan-awa sa 2 Ne. 24:13) Sa laing pagkasulti, ang iyang mapagarbuhong tinguha mao ang pagpalagpot sa Dios sa Iyang trono. (Tan-awa sa D&P 29:36; 76:28.)
Ang kasulatan adunay daghang ebidensya sa grabing mga sangputanan sa sala sa garbo ngadto sa mga indibidwal, grupo, siyudad, ug nasud. “Ang pagkagarbuso magauna sa pagkalaglag.” (Prov. 16:18.) Kini migun-ob sa nasud sa Nephite ug sa siyudad sa Sodoma. (Tan-awa sa Moro. 8:27; Ezeq. 16:49–50.)8
3
Ang mga mapahitas-on mas mahadlok sa hukom sa mga tawo kaysa hukom sa Dios.
Tungod sa garbo si Kristo gilansang. Ang mga Pariseo nasuko tungod kay si Jesus nangangkon nga Anak sa Dios, nga hulga sa ilang posisyon, ug busa ilang giplano ang Iyang kamatayon. (Tan-awa sa Juan 11:53.)
Si Saul nahimong kontra ni David tungod sa garbo. Siya nasina nga ang pundok sa mga babaye nga Israelite nanganta og “Si Saul nakapatay sa iyang mga linibo, ug si David sa iyang tinagpulo ka libo.” (1 Sam. 18:6–8.)
Ang mga mapahitas-on mas mahadlok sa hukom sa mga tawo kaysa hukom sa Dios. (Tan-awa sa D&P 3:6–7; 30:1–2; 60:2.) Ang “Unsay hunahunaon sa mga tawo kanako?” mas bug-at kay sa “Unsay hunahuna sa Dios kabahin nako?”
Pagawason na unta ni Haring Noah si propetang Abinadi, apan tungod sa iyang garbo nga gisulsolan sa iyang dautang mga pari gisunog si Abinadi. (Tan-awa sa Mosiah 17:11–12.) Si Herodes nasubo sa hangyo sa iyang asawa nga putlan sa ulo si Juan Bautista. Apan ang iyang mapasigarbuhong tinguha sa pagpakita nga maayo “sa iyang mga dinapit” mao ang nakaingon nga iyang gipapatay si Juan. (Mat. 14:9; tan-awa usab sa Marcos 6:26.)
Ang garbo ni Haring Noah mao ang hinungdan sa kamatayon ni Abinadi ug sa iya mismong kamatayon.
Ang kahadlok nga mahukman sa tawo makita mismo sa pagbuhat unsay gikaangayan sa mga tawo. Ang mga mapahitas-on ganahan kaayo “sa pagdayeg sa katawhan kaysa pagdayeg sa Dios.” (Juan 12:42–43.) Ang atong motibo sa pagbuhat og mga butang mao sab ang dapit diin anaa ang sala. Si Jesus miingon nga Siya “kanunay mobuhat” sa mga butang nga makapahimuot sa Dios. (Juan 8:29.) Dili ba angay kitang mobuhat og maayo aron ang atong motibo ikahimuot sa Dios kaysa magpataas sa atong kaugalingon aron molabaw sa uban?
Ang mga tawo nga mapahitas-on dili kaayo mabalaka kon ang ilang sweldo paigo ba sa ilang panginahanglan kondili kon ang ilang sweldo mas dako ba kaysa uban. Ang ilang pagbati mao nga mas maayo sila kaysa uban. Kini mao gyud ang garbo.
Kon ang garbo adunay dakong impluwensya kanato, mawala ang atong pagkagawasnon sa kalibutan ug atong matugyan ang atong kagawasan sa paghukom sa tawo. Ang kalibutan mas lanog kaysa mga panghunghong sa Espiritu Santo. Ang pagpangrason sa mga tawo molupig sa mga pinadayag sa Dios, ug ang mga mapahitas-on dili manggunit sa puthaw nga gunitanan. (Tan-awa sa 1 Ne. 8:19–28; 11:25; 15:23–24.)9
4
Ang garbo makita sa daghang paagi.
Ang garbo usa ka sala nga daling makita diha sa uban apan kita dili dali nga moangkon. Kadaghanan nato nagkonsiderar sa garbo nga sala niadtong anaa sa ibabaw, sama sa adunahan ug makinaadmanun, nga mipakaubos natong tanan. (Tan-awa sa 2 Ne. 9:42.) Hinoon, dunay mas grabing sakit nga nia kanato—ug kana mao ang garbo nga bisan ang tawo kabus pero mapahitas-on. Kini makita sa daghang paagi, sama sa pagpangita og sayop, pagpanglibak, pagreklamo, pagpakabuhi sobra sa atong kapanguhaan, kasina, kaibog, pugngan ang pagpasalamat ug pagdayeg nga makabayaw sa uban, ug dili mapasayloon ug kamasinahon.
Ang pagkamasinupakon maingon ta nga usa ka garbusong pagpakigbatok sa tawo nga adunay labawng awtoridad kanato. Tingali ngadto sa ginikanan, lider sa priesthood, magtutudlo, o sa katapusan ngadto sa Dios. Ang mapahitas-on nga tawo dili gayud ganahan nga adunay tawo nga mas molabaw kaniya. Siya naghunahuna nga kini nakapaubos sa iyang posisyon.
Ang pagkadalo usa sa mas komon nga pagpakita sa garbo. “Unsay epekto niining tanan diri kanako” mao ang sentro sa tanang panghitabo—pagkamapahitas-on sa kaugalingon, pagbati og kalooy sa kaugalingon, kalibutanong pagtagbaw sa kaugalingon, paglingaw sa kaugalingon, ug paghunahuna ra sa kaugalingon.
Ang garbo moresulta sa tinago nga mga kalihokan nga giestablisar aron makaangkon og gahum, mopahimulos, ug sa himaya sa kalibutan. (Tan-awa sa Hel. 7:5; Ether 8:9, 16, 22–23; Moises 5:31.) Kini nga bunga sa sala sa garbo, gitawag og tinago nga mga kalihokan, nakapagun-ob sa sibilisasyon sa Jaredite ug Nephite ug sa kaniadto pa ug sa umaabut mao usab ang hinungdan sa pagkagun-ob sa daghang nasud. (Tan-awa sa Ether 8:18–25.)
Laing pagpakita sa garbo mao ang panagbingkil. Mga panaglalis, away, dili matarung nga kamandoan, panaglahi nga kinaiya sa kaliwatan [generation gaps], diborsyo, pag-abuso sa kapikas, kagubot, ug kasamok maapil niining kategoriya sa garbo.
Ang panagbingkil diha sa atong pamilya makapalayo sa Espiritu sa Ginoo. Kini makapalayo usab sa daghan natong mga sakop sa pamilya. Ang panagbingkil maggikan sa makasakit nga pulong ngadto sa tibuok kalibutan nga panagsungi. Ang kasulatan nag-ingon kanato nga “tungod sa pagkamapahitas-on modangat lamang ang panagbingkil.” (Prov. 13:10; tan-awa usab sa Prov. 28:25.)
Ang kasulatan nagpamatuod nga ang mapahitas-on daling masilo ug magdumot. (Tan-awa sa 1 Ne. 16:1–3.) Dili sila mopasaylo aron maoy hinungdan nga ang laing tawo dili makapangayo og pasaylo kanila ug makapangatarungan sa nasakitan nilang pagbati.
Ang mapahitas-on dili sayon nga madawat og tambag o pagkorihir. (Tan-awa sa Prov. 15:10; Amos 5:10.) Ang pag-una og depensa sa kaugalingon ilang gamiton aron sa pagpangatarungan sa ilang mga kahuyang ug kapakyasan. (Tan-awa sa Mat. 3:9; Juan 6:30–59.)
Ang mga mapahitas-on mag-agad sa isulti sa kalibutan kon sila aduna bay bili o wala. Ang ilang pagsalig sa kaugalingon madeterminar sumala sa ilang kalampusan sa kalibutanong mga butang. Sila mobati nga mapuslanon isip indibidwal kon daghan sila og nakab-ut, talento, kaanyag, o kaalam kaysa ubang mga tawo. Bati ang garbo. Moingon kini nga, “Kon molampus ka, pakyas ko.”
Kon nahigugma kita sa Dios, buhaton nato Iyang kabubut-on, ug mas mahadlok sa Iyang paghukom kaysa mga tawo, kita adunay pagsalig sa kaugalingon.10
5
Ang garbo makapugong o makahunong sa kalamboan.
Ang garbo makadaut nga sala sumala sa tinuoray nga kahulugan sa pulong. Kini makapugong o makahunong sa kalamboan. (Tan-awa sa Alma 12:10–11.) Ang mga mapahitas-on dili sayon tudloan. (Tan-awa sa 1 Ne. 15:3, 7–11.) Dili nila usabon ang ilang hunahuna aron dawaton ang mga kamatuoran, para nila ang pagbuhat niini nagpasabut nga sila nasayop.
Ang garbo may ngil-ad og epekto sa tanan natong relasyon—atong relasyon ngadto sa Dios ug sa Iyang mga sulugoon, tali sa bana ug asawa, ginikanan ug anak, sa agalon ug empleyado, sa magtutudlo ug estudyante, ug sa tanang katawhan. Ang kagrabihon sa atong garbo madeterminar kon giunsa nato pagtratar ang atong Dios ug ang atong mga kaigsoonan. Gusto ni Kristo nga kita tabangan aron kita makaadto kon asa Siya. Kita ba adunay sama nga tinguha para sa uban?
Ang garbo makapalubad sa atong pagbati isip anak sa Dios ug panag-igsoonay. Kini makabungkag ug makabahin-bahin kanato sumala sa “ranggo”, sumala sa atong “katigayunan” ug sa atong “mga kahigayunan sa pagkat-on.” (3 Ne. 6:12.) Ang panaghiusa imposible para sa mga mapahitas-on, ug gawas kon kita magkahiusa kita dili iya sa Ginoo. (Tan-awa sa Mosiah 18:21; D&P 38:27; 105:2–4; Moises 7:18.)
Hunahunaa kon unsa nga kadaut ang nahimo niini sa nangagi ug unsa nga kadaut ang nahimo niini karon sa atong kinabuhi, atong pamilya, ug sa Simbahan.
Hunahunaa ang paghinulsol nga mahitabo sa nausab nga kinabuhi, napreserbar nga kaminyoon, ug nalig-on nga mga panimalay, kana kon ang garbo dili mopugong kanato sa pagkumpisal sa atong mga sala ug paglig-on niini. (Tan-awa sa D&P 58:43.)
Hunahunaa ang daghang dili kaayo aktibo nga mga miyembro sa Simbahan tungod kay sila nasilo ug ang ilang garbo nagpugong kanila sa pagpasaylo o hingpit nga makaambit diha sa lamesa sa Ginoo.
Hunahunaa ang napulo ka liboang mga batan-ong lalaki ug magtiayon nga nag-misyon na unta kon dili pa tungod sa ilang garbo nga nagpugong kanila sa pagsunod sa Dios. (Tan-awa sa Alma 10:6; Hel. 3:34–35.)
Hunahunaa kon sa unsang paagi molambo ang buhat sa templo kon ang panahon nga gigahin niining sagradong pagserbisyo mas importante kaysa daghang mapagarbuhong mga tinguha nga nakigkompetensya sa atong panahon.11
Ang pagkamapainubsanon makadala og panaghiusa ug kalig-on sa kaminyoon ug pamilya.
6
Ang panagang sa garbo mao ang pagkamapainubsanon.
Ang garbo makaapekto natong tanan sa lain-laing panahon ug kagrabihon. Karon inyong makita nganong ang building sa damgo ni Lehi nga nagpresentar sa garbo sa kalibutan dako ug lapad ug daghan kaayong mga tawo ang misulod niini. (Tan-awa sa 1 Ne. 8:26, 33; 11:35–36.)
Ang garbo sala sa tanan, ang labihan kangil-ad nga kinaiya. Oo, ang garbo sala sa tanan, ang labihan kangil-ad nga kinaiya.
Ang panagang sa garbo mao ang pagkamapainubsanon—pagkamaaghup, pagkamanunuton. (Tan-awa sa Alma 7:23.) Kini ang mapainubsanon nga kasingkasing ug mahinulsulon nga espiritu. (Tan-awa sa 3 Ne. 9:20; 12:19; D&P 20:37; 59:8; Sal. 34:18; Isa. 57:15; 66:2.) Sama sa maayong pagkasulat ni Rudyard Kipling:
Ang kasaba ug singgit wala na;
Kapitan ug hari patay na.
Imong sakripisyo naa sa gihapon,
Kasingkasing putli’g mapainubsanon.
Dios sa Panon, kami pagaubani,
Basin mahikalimot kami. …
Ang Dios makabaton og mapaubsanong mga tawo. Kita mahimong mopili nga magmapainubsanon o mapugos nga magmapainubsanon. Si Alma miingon, “Bulahan sila kinsa magpaubos nga wala pugsa sa pagpaubos.” (Alma 32:16.)
“Atong pilion ang pagpaubos.
Kita makapili nga magmapainubsanon pinaagi sa pagbuntog sa pagdumot sa atong mga kaigsoonan, itratar sila sama sa pagtratar sa atong kaugalingon, ug ibayaw sila sa sama kataas o mas taas pa kay kanato. (Tan-awa sa D&P 38:24; 81:5; 84:106.)
Kita makapili nga magmapainubsanoon pinaagi sa pagdawat sa tambag ug pagpanton. (Tan-awa sa Jacob 4:10; Hel. 15:3; D&P 63:55; 101:4–5; 108:1; 124:61, 84; 136:31; Prov. 9:8.)
Kita makapili nga magpainubsanon pinaagi sa pagpasaylo niadtong nakasilo kanato. (Tan-awa sa 3 Ne. 13:11, 14; D&P 64:10.)
Kita makapili nga magpainubsanon pinaagi sa pagserbisyo nga dili maghunahuna og balos. (Tan-awa sa Mosiah 2:16–17.)
Kita makapili nga magmapainubsanon pinaagi sa pag-misyon ug pagsangyaw sa pulong nga makapahimo sa uban nga mapainubsanon. (Tan-awa sa Alma 4:19; 31:5; 48:20.)
Kita makapili nga magmapainubsanon pinaagi sa pag-adto sa templo nga mas kanunay.
Kita makapili nga magmapainubsanon pinaagi sa pagkumpisal ug pagbiya sa atong mga sala ug magbag-o diha sa Dios. (Tan-awa sa D&P 58:43; Mosiah 27:25–26; Alma 5:7–14, 49.)
Kita makapili nga magmapinubsanon pinaagi sa paghigugma sa Dios, pagtugyan sa atong kabubut-on ngadto Kaniya, ug pagbutang og una Kaniya sa atong kinabuhi. (Tan-awa sa 3 Ne. 11:11; 13:33; Moro. 10:32.)
“Pilion nato ang pagpaubos. Mahimo nato kini. Nasayud kong mahimo nato kini.”
Akong mga kaigsoonan, kinahanglang mangandam kita sa pagtubos sa Zion. Maingon ta nga ang garbo mao ang nakapugong kanato sa pag-establisar sa Zion sa kapanahunan ni Propetang Joseph Smith. Ang sama nga sala sa garbo maoy hingpit nga nakagun-ob sa mga Nephite. (Tan-awa sa 4 Nephi 1:24–25.)
“Ang garbo mao ang dakong babag sa Zion. Akong balikon: ang garbo mao ang dakong babag sa Zion.
Kinahanglang limpyuhan nato ang atong kaugalingon pinaagi sa pagbuntog sa garbo. (Tan-awa sa Alma 6:2–4; Mateo 23:25–26.)
Kinahanglang mosunod kita “sa mga pagdani sa Balaang Espiritu,” ug isalikway ang “kinaiyanhon nga tawo,” mahimo nga “usa ka santos pinaagi sa pag-ula ni Kristo ang Ginoo,” ug mahimo nga ingon sa “usa ka bata, manunuton, maaghup, mapainubsanon.” (Mosiah 3:19; tan-awa usab sa Alma 13:28.)
Nga ato kining buhaton ug magpadayon sa pagtuman sa atong balaang destinasyon mao ang akong kinasingkasing nga pag-ampo.12
Mga Sugyot alang sa Pagtuon ug Pagtudlo
Mga Pangutana
-
Si Presidente Benson mipasabut og maayo nga ang garbo maoy hinungdan sa pagkagun-ob sa mga Nephite (tan-awa sa seksyon 1.) Sa inyong hunahuna nganong ang garbo adunay ingon ani ka makalaglag nga gahum?
-
Sa unsang paagi nga ang “kabubut-on [sa mga tawo] mobatok sa kabubut-on sa Dios”? (Tan-awa sa seksyon 2.) Unsa ang atong madawat nga mga panalangin kon kita mosunod sa kabubut-on sa Dios?
-
Sa inyong hunahuna nganong kita usahay mangutana “Unsay hunahunaon sa ubang mga tawo kanako?” kaysa “Unsay hunahuna sa Dios kabahin nako?” (Tan-awa sa seksyon 3.) Sa unsang paagi mausab atong kinabuhi kon atong dakong tinguha mao ang pagpahimuot sa Dios?
-
Ribyuha ang mga pamaagi diin makita ang garbo nga nalista sa seksyon 4. Sa unsang paagi nga atong malikayan kining mga pamaagi diin makita ang garbo sa atong kinabuhi?
-
Si Presidente Benson miingon, “Ang garbo ngil-ad og pekto sa tanan natong relasyon”— ngadto sa Dios ug sa sa uban (seksyon 5). Nganong tinuod kini? Sa unsang paagi ang atong mga relasyon molambo kon kita mapainubsanon?
-
Sa seksyon 6, si Presidente Benson naglista og mga pamaagi diin kita makapili nga magmapainubsanon. Sa inyong hunahuna nganong mas maayo nga mopiling magmapainubsanon kaysa mapugos nga magmapainubsanon?
May Kalabutan nga mga Kasulatan
Mateo 23:12; Lucas 18:9–14; Santiago 4:6; Alma 5:27–28; D&P 112:10; 121:34–40
Tabang sa Pagtuon
Sa pagpahisama sa mga pulong sa propeta sa inyong kaugalingon, hunahunaa kon sa unsang paagi kining mga pagtulun-an inyong magamit (tan-awa sa Pagtudlo, Walay Labaw Ka Mahinungdanon nga Tawag [1999], 171). Ikonsiderar ang pagpamalandong kon sa unsang paagi kadtong mga pagtulun-an makatabang kaninyo niadtong mga kabalaka, mga pangutana, ug mga hagit sa inyong kinabuhi.