Pene 24
Te hoê oraraa tei faatumuhia i ni‘a i te Mesia
« Te faito tano roa a‘e no to tatou rahi mau, e au ïa te reira i to tatou huru Mesia ».
No roto mai i te oraraa o Ezra Taft Benson
Pinepine te peresideni Ezra Taft Benson i te faahiti i te aʻo a te Faaora i na pĭpĭ ati Nephi hoê ahuru e ma piti : « Eaha to outou huru e au ai ? Amene, e parau atu vau ia outou, mai to‘u nei ïa » (3 Nephi 27:27).1 Teie parau tumu—te titauraa ia riro roa mai te Mesia te huru—e tumu parau tamau ïa te reira i roto i te taviniraa a te peresideni Benson, i te tau ihoa râ a tavini ai oia ei peresideni no te Pŭpŭ no te Tino Ahuru Ma Piti Aposetolo e ei Peresideni o te Ekalesia i muri iho.
No te mea ua pûpû oia i to’na ora no te tavini i te Fatu, ua parau te peresideni Benson ma te mana e te mana‘o papû a parau ai oia i to’na iteraa papû i muri nei :
« Te faa‘ite papû nei au ia outou e, aita e opuaraa rahi a‘e, e opuaraa anaanatae a‘e e e opuaraa hanahana a‘e no te varua i te tamataraa ia haapii mai no niʻa i te Mesia e ia haere na niʻa i To’na haerea. Ua taahi to tatou hi‘oraa, o Iesu Mesia, i teie fenua ei « Hi‘oraa Maitai Hope’. O Oia to tatou paruru i mua i te Metua. Na’na i rave i te tusia taraehara rahi ia roaa mai ia tatou te îraa o te popou e ia faateiteihia tatou ia au i To’na aroha e to tatou tatarahaparaa e to tatou parau-ti‘a. Ua rave Oia i te mau mea atoa na roto i te maitai-roa-raa e te faaue nei Oia ia riro tatou mai Ia’na e mai To’na Metua ra i te maitai-roa-raa. (Hi‘o 3 Nephi 12:48).
« ‘Eaha ta Iesu e rave ? e aore râ ‘Eaha Ta’na e ani mai ia’u ia rave ?’ o te mau uiraa faufaa roa ïa te reira i roto i te oraraa o te hoê taata. Ua riro te haereraa na niʻa i To’na haerea ei manuïaraa rahi roa a‘e i roto i teie oraraa. Te tane e aore râ te vahine manuïa maitai roa a‘e, o tera ïa tei ora i te oraraa fatata roa a‘e i to te Fatu ».2
A aʻo ai te peresideni Benson i te Feia Mo‘a ia pee i te hi‘oraa maitai roa o te Faaora, ua faahaamanaʻo oia ia ratou e, e nehenehe ia ratou ia na reira na roto ana‘e i te tautururaa a te Faaora. Ua parau oia e :
« Ua ite au e, te ora nei te Fatu. Ua ite au e, ua here Oia ia tatou. Ua ite au e, aita e taata e manuïa maori râ Ia’na, e ia apiti te hoê taata Ia’na, eita oia e manuïa ore.
« Ua ite au e, e rahi atu â ta te Atua e nehenehe e faatupu i roto i to tatou oraraa i ta tatou iho e nehenehe.
« Ia roaa mai to tatou itoito pae morare mai teie taime atu no te tutava rahi a‘e, i te mahana tata‘itahi, no te feruriraa i te Mesia, no te haapiiraa mai Ia’na ra, no te haereraa i te vahi i haerehia e a’na, e no te raveraa i To’na hinaaro ia tatou ».3
« Ua parau atura Iesu… O vau te e‘a, te parau mau, e te ora: aore roa e taata e tae i te Metua ra, maori râ ei ia‘u » (Ioane 14:6).
Te mau haapiiraa a Ezra Taft Benson
1
Na te hi‘oraa e te mau haapiiraa a Iesu Mesia e horo‘a mai nei i te hi‘oraa rahi no te mau taata atoa.
A piti tauasini matahiti i teie nei, ua taahi te hoê taata maitai roa i ni‘a i te fenua nei : o Iesu te Mesia. E tamaiti Oia na te hoê metua i te raʻi e na te hoê metua vahine tahuti. O Oia te Atua o teie nei ao, i raro a‘e i te Metua. Ua haapii Oia i te parau mau i te taata, ia ora ratou i te tîtîraa. Na To’na hi‘oraa e Ta’na mau haapiiraa i horo‘a mai i te hi‘oraa rahi, te eʻa papû hoê roa, no te mau taata atoa.4
Aita e faaûruraa ê atu tei faatupu i te ohipa rahi a‘e i ni‘a i te fenua nei, maori râ te ora o Iesu Mesia. Eita ta tatou e nehenehe e feruri i to tatou oraraa aita ta’na mau haapiiraa. Aita ana‘e oia, ua moʻe ïa tatou i roto i te tahi mau ti‘aturiraa e te tahi mau haamoriraa haavarevare, ua fanauhia tatou i roto i te taiâ e te poiri, i reira te arearea tino e te materia te puairaa. E mea atea roa tatou i te fâ ta’na i tuu mai no tatou, atira noa’tu, eiaha roa’tu tatou e haamoʻe i te reira ; eiaha atoa tatou e haamoʻe e, eita ta tatou paʻumaraa rahi i te maramarama, i te maitai-roa-raa, e manuïa maori râ, na roto ana‘e i ta’na mau haapiiraa, to’na ora, to’na pohe e to’na ti‘a-faahou-raa
… Titauhia ia tatou ia haapii e ia haapii faahou â e, na roto ana‘e i te fariiraa e te oraraa i te evanelia no te here mai, tei haapiihia e te Orometua, e na roto ana‘e i te raveraa i to’na hinaaro, te mau taamu o te poiri e te feaa e taamu nei ia tatou e mutu ai. Titauhia ia tatou ia haapii i teie parau mau ohie e te hanahana, ia ti‘a hoʻi ia tatou ia farii i te oaoa mărû o te Varua i teie nei e a muri noa’tu. Titauhia ia tatou ia haamoʻe ia tatou iho i roto i te raveraa i to’na hinaaro. Titau-roa-hia ia tatou ia tuu ia’na i mua roa i roto i to tatou oraraa.5
I roto i te pene 14 no Ioane, te parau nei Iesu i to’na aroha i ta’na mau pĭpĭ i muri mai i te tamaaraa hopea. Te parau nei oia ia ratou e, te haere nei oia no te faaineine i te hoê vahi no ratou i roto i te fare o to’na Metua ; ia riro te vahi tei reira oia, ei vahi atoa no ratou. Parau a‘era Toma ia’na :
« E te Fatu, aita matou i ite i tena’na vahi ta oe e haere na ?
« Na ô atura Iesu ia’na, o vau te e‘a, te parau mau, e te ora: aore roa e taata e tae i te Metua ra, maori râ ei ia‘u ». (Ioane 14:5–6). Tei mua ia tatou te puromu. Ua papû maitai te mau tapa‘o.6
2
Te haere nei tatou i te Mesia ra ia fariu ana‘e tatou i ni‘a Ia’na i roto i to tatou mau mana‘o atoa e ia pee ana‘e tatou i To’na huru hiroʻa.
Mai ta te Buka a Moromona e parau nei, titauhia ia « faaroo… i te Mesia ma te huna ore ia’na ». (2 Nephi 25:28). Titauhia ia tatou ia ti‘aturi i roto i te Mesia eiaha râ i roto i te rima tahuti nei. (Hi‘o 2 Nephi 4:34). Titauhia ia tatou ia « haere mai i te Mesia ia maitai roa outou ia’na ». (Moroni 10:32). Titauhia ia tatou ia haere mai « ma te aau marû e te varua haehaa » (3 Nephi 12:19), ma te poʻia e ma te pô’iha i te parau-ti‘a ra (hi‘o 3 Nephi 12:6). Titauhia ia tatou ia haere mai « ma te oaoa i te ite i te parau a te Mesia » (2 Nephi 31:20), a farii ai tatou i te reira na roto i Ta’na mau papa‘iraa mo‘a e Ta’na i faatahinu e To’na Varua Mo‘a.
Ei haapotoraa, titauhia ia tatou ia « [onoono] atu i te hi‘oraa o te Tamaiti a te Atua ora » (2 Nephi 31:16).7
Ua parau te Fatu, « A hi‘o mai ia’u nei i to mau mana‘o atoa na ». (PH&PF 6:36). Te hi‘oraa i te Fatu i to tatou mau mana‘o atoa na, o te reira ana‘e ïa te raveʻa e au ai to tatou huru ei tane e ei vahine.
Ua ui te Fatu i teie uiraa i Ta’na mau pĭpĭ, « Eaha to outou huru e au ai ? » Pahono a‘era Oia i Ta’na iho uiraa i te na ôraa e, « Mai to‘u nei ïa ». (3 Nephi 27:27). No te riro mai Ia’na ra te huru, titau-roa-hia ia vai Oia i roto i to tatou feruriraa—tamau noa i roto i to tatou mau mana‘o. I te mau taime atoa e rave ai tatou i te oro‘a, te fafau nei tatou ia « haamana‘o noa ia’na ». (Moroni 4:3; 5:2; PH&PF 20:77, 79).
Mai te peu e, na te mau mana‘o e faataa i to tatou huru, e o te riroraa mai te Mesia te huru ta tatou fâ, titau-roa-hia ïa ia tatou ia feruri i te mau mana‘o mai to te Mesia ra te huru. E faahiti faahou atu vau : Mai te peu e, na te mau mana‘o e faataa i to tatou huru, e o te riroraa mai te Mesia te huru ta tatou fâ, titau-roa-hia ïa ia tatou ia feruri i te mau mana‘o mai to te Mesia.
… Ei niʻa i te Fatu to tatou manaʻo e vai ti‘a’i. E ti‘a ia feruri tatou i te Mesia.8
A vaiiho i to tatou oraraa, to tatou utuafare, e te faito o ta tatou ohipa, ia faaʻite atu i to tatou huru Mesia. E no reira, e ora na outou ia parau mai te tahi mau puʻeraa e, « e keresetiano mau oia ! »
Oia mau, te ti‘aturi nei tatou ia Iesu Mesia, hau atu râ—te hi‘o nei tatou Ia’na, te ti‘aturi nei tatou Ia’na e te tutava nei tatou ia pee i To’na huru hiro‘a.9
O te Mesia to tatou hi‘oraa maitai roa a‘e. O Oia to tatou hi‘oraa maitai. … Te faito tano roa a‘e no to tatou rahi mau, e au ïa te reira i to tatou huru Mesia.10
Ia riro mai te Faaora ra te huru—auê ïa opuaraa rahi no te taata tata‘itahi ! E melo Oia no te Atuaraa. O Oia to tatou Faaora e ta tatou Taraehara. I maitai noa na Oia i roto i te mau tuhaa atoa o To’na oraraa. Aita e hapehape e aita e ohipa manuïa ore i roto Ia’na. E nehenehe anei ta tatou… ia riro roa mai Ia’na ra te huru ? Teie te pahonoraa, e. E ere noa e nehenehe ta tatou, tera râ, na tatou te reira faaueraa, te reira hopoi‘a. Eita Oia e horo‘a mai i teie faaueraa mai te peu eita Oia e titau ia tatou ia rave i te reira [a hi‘o Mataio 5:48; 3 Nephi 12:48].
Te aposetolo Petero i piha‘i iho ia Iesu Mesia tei ti‘afaahou mai, e haapiiraa na tatou no te pee i te huru hi‘oraa o te Faaora.
Ua parau te aposetolo Petero no te huru faanahoraa e riro ai te hoê taata ei taata apo i « te huru Atua » (2 Petero 1:4) E mea faufaa te reira, i te mea e, ia apo papû tatou i te huru Atua, e riro mai ïa tatou mai Ia’na ra te huru. E hi‘o maite na tatou i ta Petero e haapii mai nei no ni‘a i teie faanahoraa. Teie ta’na i parau :
« E ia tupu te reira, e faaitoito hua i te apiti atoa to outou faaroo i te [peu mâ] ; te [peu mâ] hoʻi, e te ite ;
« Te ite hoʻi, e te hitahita ore ; te hitahita ore hoʻi, e te faaoroma‘i ; te faaoroma‘i hoʻi e te paieti ;
« Te paieti hoʻi, e te [marû] taea‘e ; e te [marû] taea‘e hoʻi, e te aroha i te taata’toa » (2 Petero 1:5–7).
Te mau peu mâ ta Petero i faahiti, e tuhaa atoa ïa te reira no te huru Atua, e aore râ te huru o te Faaora. Teie te mau peu mâ e ti‘a ia tatou ia pee atu, no te riro rahi atu â mai Ia’na ra te huru. E paraparau na tatou no ni‘a i te tahi o teie mau huru.
Te tapa‘o matamua roa, i ni‘a i te reira tatou e tuu ai i te tahi atu mau huru peu, te faaroo. O te faaroo te păpă, i reira te huru Atua e patuhia ai…
E te parau faahou nei Petero e, e ti‘a ia tatou ia puoi i te peu mâ i ni‘a i to tatou faaroo. … Te huru peu mâ, te auraa ra, te vai ra ïa te mau mana‘o viivii-ore e te mau ohipa mâ [i roto i tera taata] Aita e hinaaro faufau i roto i to’na aau, no te mea hoʻi e au te reira i te « faaruʻe[raa] i te faaroo » e te faaoreraa i te Varua (PH&PF 42:23)—e aita e mea faufaa roa a‘e i roto i teie ohipa maori râ te Varua…
E au te peu mâ i te moʻaraa, e tuhaa hoʻi no te hiroʻa Atua. Titauhia [ia tatou] ia imi itoito i te mea no te peu mâ e no te here eiaha râ te mea faahaahaa’tu e aore râ te mea haʻiriiri. E faaunauna te taiata ore i to tatou mau mana‘o (hi‘o PH&PF 121:45). Nahea te hoê taata e nehenehe ai e faanavenave ia’na i roto i te mau ino no te hoho‘a faufau, te paieti ore e aore râ te peu haʻiriiri ma te faariro ia’na ei taata peu mâ ?
Te taahiraa no muri iho, o ta Petero e faataa mai nei i roto i te faanahoraa o te tupuraa, o te puoiraa ïa i te ite i to tatou faaroo e te peu mâ. Ua parau mai te Fatu ia tatou e, « e ore roa’tu e ti‘a ia faaorahia mai te taata i roto i te ite ore » (PH&PF 131:6). I te tahi atu vahi ua faaue te Atua e, « A imi na outou no roto i te mau buka maitai a‘e i te mau parau no te paari ; a imi hoʻi i te ite, oia ïa na roto hoʻi i te haapii e na roto atoa i te faaroo » (PH&PF 88:118) … E mea faufaa te mau tuatapaparaa o te parau mau atoa, areʻa râ, e mea faufaa a‘e ia haapii mai te hoê taata i te mau parau mau no ni‘a i te faaoraraa. Teie te uiraa a te Fatu, « Eaha ta te taata faufaa i noaa, ia noaa ia’na te tao‘a’toa o teie nei ao, ia ere oia i to’na ora ? » (Mataio 16:26) o te nehenehe e faa‘ohipa i roto i te imiraa i te ite e te imiraa i te mau maitai o teie nei ao. E riro atoa te Fatu i te ui e, « Eaha ta te taata faufaa i noaa, ia haapii oia i te mau mea’toa o teie nei ao, ma te ore oia e haapii i te mea e ora ai oia ? » …
Na roto i te apitiraa i to tatou ite pae varua e to tatou ite pae tino nei, e tutonu atu tatou i ni‘a i te mau mea faufaa roa a‘e o teie oraraa…
Te tahi atoa tuhaa hiro‘a ta Petero e faataa mai nei ei tuhaa no te huru Atua, o te hitahita ore ïa. [Teie te taata hitahita ore], o te haavî ia’na, i to’na manava e i ta’na mau parau. E rave oia i te mau mea i to’na faito tano e eita oia e topa i roto i te faaʻuʻanaraa. Hoê parau no te reira, e mea haavî oia ia’na iho. E mea haavî oia i to’na manava, e e ere na te manava e haavî mai…
I to tatou hitahita ore e puoi tatou i te faaoroma‘i … Te faaoroma‘i, o te tahi ïa huru no te haavîraa ia’na iho. O te aravihi ïa no te faataime rii i te hinaaro au e no te tavaha i te mau orohea. I roto i to’na auraa e te feia herehia, eita te hoê taata faaoroma‘i e faa‘ite i to’na hitahita e tatarahapa atu ai i muri iho. Te faaoroma‘i, o te faaea-hau-noa-raa ïa i roto i te taime ru. E mea farii te taata faaoroma‘i i te mau hapehape a te tahi.
E mea tia‘i atoa te taata faaoroma‘i i te Fatu. I te tahi mau taime, te tai‘o nei tatou e te faaroo nei i te parau o te taata e imi ra i te haamaitairaa no ô mai i te Fatu, ei reira e tupu mai to’na faaoroma‘i ore ia ore te reira e tae vave mai. Te hoê tuhaa o te huru Atua, ia navaʻi ïa te ti‘aturiraa i te Fatu no te « faaea noa na ma te hau e a ite mai e o [oia] te Atua » (PH&PF 101:16).
Te [taata] faaoroma‘i, e farii ïa oia i te mau hapehape e te mau manuïa-ore-raa o te feia ta’na i here. No to’na here ia ratou, eita oia e imi i te hape e aore râ e faahiti ino atu i to’na i‘oa e aore râ e faahapa’tu.
Te tahi atoa tuhaa hiro‘a ta Petero i faahiti, o te marû ïa… Te taata e marû to’na, e mea au ïa i te taata e te hamani maitai atoa. E mea feruri oia i te mana‘o o te tahi atu taata e e mea au to’na huru. E natura tauturu to’na. E faaore te marû i te mau paruparu e te mau hapehape o te tahi atu taata. E itehia teie marû e te taatoaraa—te taata paari e te mea apî, te mau animara, te taata ti‘araa haehaa e te mea teitei.
Teie te mau tuhaa hiro‘a o te natura Atua. Te ite nei anei outou nahea i te riro mai te Mesia ra te huru, a faarahi noa ai tatou i te peu mâ, te marû, te faaoroma‘i e a haavî rahi ai tatou i to tatou manava ?
Ua faahiti te aposetolo Paulo i te mau parau papû no te faahoho‘a i te mea e tiʻa i te hoê melo no te Ekalesia ia faataa ê ia’na i to te ao. Ua aʻo oia ia tatou ia « mau… i ta te Mesia ra » (Galatia 3:27), ia « haapae… i te taata tahito » e ia « faa taata apî hoʻi » (Ephesia 4:22, 24).
Te peu hopea e te korona hoʻi o te huru Atua, o te aroha ïa, e aore râ te hinaaro mau i te Mesia (hi‘o Moroni 7:47). Mai te peu e imi papû tatou ia riro mai to tatou Faaora, to tatou Fatu te huru, e riro ïa te haapiiraa ia here mai Ta’na i here ei fa rahi hope no tatou. Te parau nei Moromona no te aroha, o « tei hau i te mau mea atoa ra » (Moroni 7:46).
Te atutu nei te parau no te here i roto i te ao, e e rave rahi te imi nei i te reira. E mea taa ê râ te hinaaro mau i te Mesia i te huru here ta to te ao e mana‘o nei. Eita roa te aroha e haapa‘o i to’na hinaaro au e te pipiri. E haapa‘o te hinaaro mau i te Mesia i to vetahi ê tupuraa mure ore e popou…
Ua parau te Faaora e, te ora mure ore, o te iteraa ïa i te Atua mau ra e Ta’na Tamaiti ia Iesu Mesia (hi‘o Ioane 17:3). E mai te peu noa’tu e parau mau te reira, e no’u teie iteraa papû roa e, e parau mau te reira, e ti‘a atura ïa ia tatou ia ui nahea tatou e ite atu i te Atua. E riro atura ïa te faanahoraa no te puoiraa i te hoê tuhaa no te hiro‘a Atua i ni‘a i te tahi, mai ta Petero i faa‘ite mai, ei taviri ia noaa mai te ite e arata‘i ia tatou i te ora mure ore. A hi‘o maitai na i te parau fafau a Petero, i muri noa mai i teie huru faanahoraa nei :
« E tei ia outou te reira mau mea, e te rahi ra, na te reira e faa‘ite e, aore outou e toaruaru e te hotu ore i te ite i to tatou Fatu ia Iesu Mesia ra » (2 Petero 1:8; ua apitihia’tu te papa‘i faaopa)
… Te pure nei au ia rahi mai teie mau maitai e teie mau tuhaa no te hiro‘a o te Faaora i roto ia tatou, ia ti‘a’tu tatou i mua i te Haavâraa e ia ani mai Oia ia tatou tata‘itahi, « Eaha to outou huru e au ai ? » e hi‘o atu to tatou mata, ma te mauruuru e te popou e ma te parau e, « Mai ia oe na ».11
3
E tamahanahana te Faaora ia tatou e e faateitei Oia ia tatou i roto i ta tatou mau tautooraa no te faaea i ni‘a i te eʻa Ta’na i faatarava no tatou.
E i te faito tatou e faaatea’tu ia tatou mai teie eʻa tei faataravahia na tatou e te Taata ra no Galilea, i tera faito tatou e manuïa ore ai i roto i ta tatou iho mau aroraa …Eita râ tatou e vai rave‘a ore noa. Ua parau tamau Oia i ta’na mau pĭpĭ, e ia tatou paatoa hoʻi, « Eiaha e horuhoru to outou aau…
« O ta outou i ani ma to’u ra i‘oa, na’u ïa e rave ».
« Eita vau e vaiiho otare noa ia outou…
« E hau ta’u e vai iho ia outou nei, o to’u nei hau ta’u e ho atu no outou… » (Ioane 14:1, 14, 18, 27).12
E hi‘o faahou na tatou i te Buka a Moromona… no te haapii i te tahi mau parau tumu no te haereraa i te Mesia ra, no te fafauraa ia tatou Ia’na ra, no te faatumuraa i ni‘a Ia’na e no te pauraa Ia’na. E tape‘a mai tatou i te tahi rii noa mau tuhaa no ni‘a i te reira.
A tahi, titauhia ia tatou ia ite e, te ani manihini nei te Mesia ia tatou ia haere Ia’na ra. « Inaha, te hapono maira oia i te parau i te mau taata atoa, te faatorohia ra te rima o te aroha i te mau taata atoa… Oia ïa, e te na ô maira oia e : « A haere mai outou ia’u nei e rave outou i to te raau ora ra » (Alama 5:33–34)
E haere mai, te ti‘a nei hoʻi oia « ma te rima faatoro-noa-hia e ite mai ia outou ra e » (Moromona 6:17).
E haere mai, no te mea hoʻi « na’na… e faaherehere mai ia outou i to outou mau ati, e na’na hoʻi e tauturu mai ia outou » (Iakoba 3:1).
« E haere mai ia’na, a pûpû mai ai i to outou aau atoa ei ô na’na » (Omoni 1:26).
I te opaniraa Moroni i ta’na mau papaa parau no ni‘a i te mau ati Iareda, ua papa‘i oia, « E te parau atu nei au ia outou, ia titau outou i teie nei Iesu, i ta te mau peropheta e te mau aposetolo i papa‘i ra » (Etera 12:41).
I roto i ta’na mau parau opaniraa i te fatataraa te haamouraa o te mau ati Nephi, ua parau Moroni e, « Oia mau, e haere mai i te Mesia ia maitai roa outou ia’na… e ia faarue outou i te mau mea paieti ore ra, e ia aroha atu i te Atua ma to outou aau atoa, e te mana‘o atoa, e te puai atoa, ei reira e navai ai to’na aroha » (Moroni 10:32).
Ratou te fafau ia ratou i te Mesia ra, e « ti‘a [atu ratou] ei ite o te Atua i te mau mahana atoa, e i te mau mea atoa, e i roto i te mau vahi atoa ta outou e parahi ra » e « tae noa’tu i te poheraa » (Mosia 18:9). E « tamau [ratou] i te i‘oa », o te Mesia ma te « papa‘i-mau-hia » i roto i to ratou aau (Mosia 5:12). E rave ratou i ni‘a iho ia ratou i « te i‘oa o te Mesia… ma te opuaraa papû e, e tavini ia’na e tae noa’tu i te hopea ra » (Moroni 6:3).
Ia ora ana‘e tatou i te hoê oraraa tei faatumuhia i ni‘a i te Mesia, e « [paraparau tatou] i te Mesia, [e oaoa tatou] i te Mesia, [e aʻo tatou] i te parau a te Mesia » (2 Nephi 25:26). E « noaa [ia tatou] te parau mauruuru a te Atua ra, ia faaîhia i to’na ra aroha » (Iakoba 3:2). I te taime atoa ua oto te varua o Nephi i ta’na iho mau hape, ua parau oia e, « Ua ite au ia’na ta’u i ti‘aturi ra. O ta’u Atua tei tauturu mai ia’u ra » (2 Nephi 4:19–20).
Te haamana‘o nei tatou i te parau a‘o a Alama : « E te mau mea atoa ta oe e rave ra, ia ravehia no te Fatu ra, e te mau vahi atoa e haere, ia haerehia no te Fatu ra : e ia vai maite to oe mana‘o i te Fatu ra ; e ia tuuhia te aroha o to aau i ni‘a i te Fatu ra e a muri noa’tu. E ui atu i te Fatu i te mau mea atoa ta oe e rave ra » (Alama 37:36–37).
« A haamana‘o, a haamana‘o », te parau ïa a Helamana, « e ia haamau i to orua niu i ni‘a i te papa ra o to tatou Ora, o te Mesia… e ia hapono mai te diabolo i to’na ra matai uʻana… e ere [te reira] i te mana i ni‘a iho ia [outou] e putôhia’i [outou] i raro i te abuso » (Helamana 5:12).
Ua parau Nephi no ni‘a i te Fatu, « ua faaî oia ia’u i to’na ra aroha, e ia paruparu to’u nei tino » (2 Nephi 4:21). Ratou tei pau i te Mesia ra, « ua faaorahia [ïa] i te Mesia ra » (2 Nephi 25:25). E ia « ore ratou ia roohia i te hoê ati, maori râ o tei horomiihia i roto i te oaoa i te Mesia ra » (Alama 31:38). Ua « faahereherehia [ratou] e te rima o Iesu » (Moromona 5:11). Ua parau o Nephi, « Te oaoa nei au i to’u ra Iesu, no te mea ua faaora oia i to’u varua » (2 Nephi 33:6). Ua parau Lehi, « ua ati-noa-hia vau e te rima o to’na ra aroha » (2 Nephi 1:15)
… [Ua papa‘i] taua taata iti rahi ra o Moromona i te hoê rata i ta’na tamaiti here, o Moroni, e teie ta’na mau parau :
« E ta’u tamaiti, e haapa‘o maitai i ta te Mesia ra ; e ia ore oe ia oto i ta’u i papa‘i ra, e tae atu oe i raro i te pohe, ia faateitei râ te Mesia ia oe i ni‘a, e ia vai noa te manaʻonaʻoraa i to’na mamae, e te poheraa, e ta’na faa‘iteraa mai i to’na tino i to tatou mau tupuna ra, e to’na aroha, e te faaoroma‘i roa ra, e te tia‘iraa i to’na hanahana e te ora mure ore, ia vai noa te reira i roto i to oe aau e a muri noa’tu.
« Ei ia oe te aroha o te Atua Metua tei te raʻi teitei to’na ra terono, e o to tatou Fatu ra o Iesu Mesia, o te parahi i te rima atau o to’na ra mana, e ia auraro te mau mea atoa ia’na, ei ia oe te reira i te vairaa e a muri noa’tu » (Moroni 9:25–26).
O ta’u nei pure no tatou paatoa, ia pee atoa tatou i teie parau aʻo e te faaûru : « E haapa‘o maitai i ta te Mesia ra ». Ei reira Oia e faateitei ai ia tatou e e vai tamau noa To’na aroha ia tatou nei e a muri noa’tu.13
Te mau mana‘o tauturu no te tuatapaparaa e te haapiiraa
Uiraa
-
Ua parau te peresideni Benson, « Aita e faaûruraa ê atu tei faatupu i te ohipa rahi a‘e i ni‘a i te fenua nei, maori râ te ora o Iesu Mesia » (tuhaa 1). Eaha te ohipa ta te oraraa o te Faaora i faatupu i ni‘a i te fenua nei ? Nahea To’na oraraa i te faaûruraa ia outou ?
-
Nahea to tatou oraraa e taui ai ia « feruri tatou i te Mesia » ? Nahea to tatou mau mana‘o i te tuʻati i niʻa iho i to tatou mau tuhaa hiroʻa ? A tuatapapa ai outou i te tuhaa 2, a feruri eaha ta outou e nehenehe e rave no te faatupu hope atu â i te mau tuhaa hiro‘a a te Mesia tei faahitihia na.
-
Nahea te mau haapiiraa i roto i te tuhaa 3 e nehenehe ai e horo‘a mai ia tatou i te ti‘aturiraa, a tutava noa ai tatou ia riro mai te Faaora ra te huru ? Nahea te Faaora i te tautururaa ia outou i roto i ta outou mau tautooraa no te pee Ia’na ?
Te mau papa‘iraa mo‘a
Mareko 8:34; Philipi 4:13; 1 Ioane 3:23–24; 2 Nephi 25:23, 26; Mosia 3:19; Alama 7:11–13; Moroni 7:48
Tauturu no te tuatapaparaa
« A faanaho i te mau ohipa haapiiraa o te patu i to oe faaroo i roto i te Faaora » (Ia Poro Haere i Ta‘u nei Evanelia [2004], 24) Ei hi‘oraa, ia tuatapapa outou i te haapiiraa e ui outou i te mau uiraa mai teie i muri nei : « Nahea teie mau haapiiraa e nehenehe ai e faarahi i to’u haroʻaroʻa i ni‘a i te Taraehara a Iesu Mesia ? Nahea teie mau haapiiraa e nehenehe ai e tauturu ia’u ia riro mai te Faaora te huru ? »