Wase 7

Na Domo Malua ni Yalotabu

“Au sa vakamamasu meda sa dauvakasaqara na veivakauqeti ni Turaga kei na veitokani ni Nona Yalo Tabu me vakalougatataki keda meda tomana tiko na noda sasaga ena dua na yavu cecere vakayalo.”

Na Bula nei Gordon B. Hinckley

Ena 24 ni June, 1995, a vosa o Peresitedi Gordon B. Hinckley ena dua na nodra soqoni na peresitedi vou ni kaulotu kei na dui watidra, ka solia na ivakasala mera dusimaki kina ena tolu na yabaki ni veiqaravi e tarava. A kaya kina na ivakasala a taura mai vei Peresitedi Harold B. Lee, ni se lewena kina na Kuoramu ni iApositolo Le Tinikarua, ka vakatikori koya me peresitedi ni iteki.

“Au nanuma rawa ga e dua na ka a kaya: ‘Vakarorogo ki na domo malua ni Yalotabu ena loma ni bogi, ka vakaio ki na domo malua oqori.’ Au sega ni kila na vuna e dau yaco mai kina ena so na gauna na ivakatakila ena bogi, ia e dau yaco. Io, e dau yaco talega mai ena siga. Ia mo vakarorogo ki na domo malua ni Yalotabu, na isolisoli ni ivakatakila, ka sa dodonu me nomu.”¹

Ni tukuna na ka a yaco ka muria na ivakasala oqo, a kaya kina: “Sa mai vosa vakamalua na Turaga. … Ena lomaloma ni bogi, era sa yaco mai vei au eso na vakasama, kau nanuma ni sa vakaparofita na kedra ituvaki.”² Me vakataka, ena Julai ni 1992 au a tiko mai Hong Kong kei na so tale na iliuliu ni Lotu, mera vakaraica e dua na vanua me tara kina e dua na valetabu. Ena dua na bogi a laki moce ka lomaleqataka tiko na vakatulewa me na cakava. A qai vakayadrati koya na domo malua ni Yalotabu ena mataka lailai e tarava.

“Sa yaco mai ki na noqu vakasama e dua na ka taleitaki,” a vola vaqo ena nona ivolaniveisiga. “Au a sega ni rogoca e dua na domo e daligaqu dina. Ia a yaco mai ki na noqu vakasama na domo ni Yalotabu. E tukuna mai, ‘Na cava o lomaleqataka tiko kina na ka oqo? Sa tu oqori e dua na tiki ni qele totoka sara sa tu kina na itikotiko ni kaulotu kei na valenilotu lailai. E rau tu sara ga ena loma kei Kowloon, ena vanua e totoka vakaoti na veilakoyaki ni motoka. … Tara e dua na vale e taba [vica] vata. Sa rawa me oka kina e dua na valenilotu kei na rumu ni kalasi ena imatai ni rua na tabavale kei na valetabu ena taba rua se taba tolu e cake.’” Ni sa mai ciqoma na ivakatakila o ya, a kaya o Peresitedi Hinckley, “Au sa yalovakacegu ga ka moce tale.”³

Nikua e Kowloon, e dua vei ira na yasai Hong Kong osooso sara, sa mai tu kina e dua ga na valelevu a tu taumada kina e liu na valenilotu kei na veivakavaletaki ni kaulotu. Na valelevu o ya, sa tiko kina e dua na valenilotu, na veivakavaletaki ni kaulotu, na valenivolavola ni kaulotu, kei na dua na valetabu vakalou, sa ivakadinadina ni domo malua ni Yalotabu vua e dua na parofita ni Kalou.

iVakavuvuli nei Gordon B. Hinckley,

Na Yalo Tabu sai koya na Dauveivakacegui ka iVakadinadina ni ka dina.

Na Yalo Tabu sai koya na ikatolu ni Lewetolu Vakalou, na Dauveivakacegui a yalataka na iVakabula ka na vakavulici ira na Nona tisaipeli ena veika kecega ka nanuma na veika kecega, a kaya kivei ira (raica na Joni 14:26).⁴

Na Yalotabu sa dau vakadinadinataka ki yaloda baleta na Tamana kei na Luvena.⁵

Na [noqu] ivakadinadina baleti [Jisu Karisito] e yaco mai ena kaukauwa ni Yalo Tabu. Sa isolisoli tabu, ka totoka, e tadu mai ena ivakatakila mai vua na ikatolu ni Lewetolu Vakalou.⁶

Na Yalotabu sa Dauvakadinadinataka na ka Dina, ka sa rawa me vakavulici [keda] ena veika [eda] sega ni veivakavulici rawa kina. Mai na malanivosa cecere ka veibolei nei Moronai, sa yalataki kina na kena kilai ni dina na iVola i Momani ena “kaukauwa ni Yalo Tabu.” A qai vakaraitaka o Moronai, “Ia na kaukauwa ni Yalo Tabu ena vakatakila vei kemudou na dina ni veika kece ga” (Moronai 10:4–5).

Au vakabauta ni kaukauwa oqo, na isolisoli oqo, sa tu vei keda ena gauna nikua.⁷

Eda gadreva na Yalo Tabu me dusimaki keda ena noda veiqaravi e vale kei na loma ni Lotu.

E sega tale e dua na veivakalougatataki cecere me yaco, ki na noda bula me vakataka na isolisoli ni Yalo Tabu—na veitokani kei na Yalotabu me dusimaki keda, taqomaki keda, ka vakalougatataki keda, ka gole yani, me vaka oya, me duru e matada ka bukawaqa me liutaki keda ki na salatu ni ivalavala dodonu kei na dina. Sa rawa me noda na kaukauwa veidusimaki oqo ni ikatolu ni Lewetolu Vakalou kevaka eda sa bula kilikili kina.⁸

Eda gadreva na Yalotabu ki na vuqa na noda ilesilesi vakacakacaka. Eda gadrevi koya ni da vakavulica na kosipeli ena noda kalasi vakakina ki vuravura. Eda gadrevi koya ena kena cicivaki ka vakavulici na noda matavuvale.

Ni da veidusimaki ka veivakavulici ena veivakauqeti ni Yalotabu, eda na kauta mai na bula vakayalo ki na nodra bula o ira era sa noda ilesilesi. …

… Sa kamica dina na vua ni veivakavulici e vakayacori ena veivakauqeti ni Yalotabu. Era vakania na yalo kei na loma ni tamata.

Meu vakasala mada vei ira na itubutubu era sa liutaka tiko na matavuvale: eda sa gadreva na veidusimaki ni Yalo Tabu ena noda ilesilesi dredre ka levu ena kena vaqaqacotaki na bula vakayalo ki na noda itikotiko.⁹

Vakarorogo ki na veivakauqeti ni Yalotabu. Mo yalomalua. Ena rawa mo vagolei vua e dua ena liga ni Turaga ena vuku ni yalomu, nomu ivakarau, lomamu, kei na nomu yalomalumalumu.¹⁰

Na ivakatakila ena rawa me yaco mai vakawasoma mai na dua na domo lailai, e vinaka—na domo malua ni Yalotabu.

Ena veigauna eso, au a dau vakatarogi mai vei ira na dauvolaitukutuku. Voleka ni veigauna kece era na taroga tiko, “E dau yaco mai vakacava na ivakatakila vua na parofita ni Lotu?”

Au dau sauma ni dau yaco mai nikua me vaka a yaco mai e liu. Me baleta oqo, au dau tukuna tiko vei ira na dauvolaitukutuku na veika a yaco vei Ilaija ena vuku ni veibolebolei kei ira na bete ni Peali:

“Ka raica sa lako voli ko Jiova, a sa dua na cagi levu ka kaukauwa sa sea na veiulunivanua, a sa vorolaka na veiuluvatu e na mata i Jiova, ia sa segai ena cagi ko Jiova: ni sa oti na cagi, sa qai tavuki na vanua; ia sa segai ena tavuki ni vanua ko Jiova:

“Sa oti na tavuki ni vanua, sa qai dua na bukawaqa; ka sa segai ena bukawaqa ko Jiova: ia sa oti na bukawaqa, sa qai rogo mai e dua na domo lailai e vinaka” (1 Tui 19:11–12).

Sai koya qo na kena ivakarau. E tiko e dua na domo lailai, e vinaka. E yaco mai me sauma na masu. E yaco mai ena domo malua ni Yalotabu. Ena rawa ni yaco mai ena vakanomodi ni bogi.

Au lomatarotarotaka beka na ka oqo? Sega vakadua. Au sa raica na kena yaco ka yaco tikoga.¹¹

Sa vakakina ena veigauna kece ki na vosa ni Kalou ni dau yaco mai vei keda, sega ena biukila, sega mai na olo ni matabose ni vuku, ia mai na domo lailai e vinaka ni ivakatakila. Ni da vakarogoci ira era vakasaqaqara matewale mera kunea na vuku ka vakaraitaka ena domolevu na nodra ituvatuva [se iwali] me baleta na leqa ni vuravura oqo, sa rawa vua e dua me sauma ena Same, “Dou tiko lo, mo dou kila niu sa Kalou: …” (Same 46:10) vakakina ena iVakabula, “O koya sa vakadaligana me rogoca, me mani rogoca sara.” (Maciu 11:15.)¹²

Na veika ni Yalotabu sa na vakararamataka, tara cake, ka laveti keda cake.

Eda na kila vakacava na veika ni Yalotabu? Eda na kila vakacava ni sa mai vua na Kalou? Mai na vuadra. Kevaka e veimuataki ki na tubu kei na torocake, kevaka e veimuataki ki na vakabauta kei na ivakadinadina, kevaka e veimuataki ki na sala vinaka cake ni vakayaco-ka, kevaka e veimuataki ki na savasava vakalou, sa qai mai vua na Kalou. Kevaka ena ravuti keda, kevaka ena kauti keda ki na butobuto, kevaka eda na veilecayaki ka lomaleqataki keda kina, kevaka e veimuataki ki na tawavakabauta, sa qai mai vua na tevoro.¹³

Ko na kila na veivakauqeti ni Yalotabu mai na vua ni Yalotabu—sai koya e veivakararamataki, e buli keda cake, na veika e nuideitaki ka dodonu ka veilaveti ka muataki keda meda vakanananu vinaka cake ka vosa vinaka cake ka veiqaravi vinaka cake sa qai mai vua na Kalou. Na kena e veiravuti, e muataki keda ki na sala tani—oqo sa mai vua na vu-ni-meca. Au vakabauta ni sai koya oqo, ka rawarawa sara.¹⁴

A vakamacalataka e dua na vuku vakaivolatabu ni Lotu sa meca ni kila vakatamata. Kevaka e tukuna o koya ni kila vakatamata na tabana ni filosofi ka vakavulica “na vunau ni kila sa taucoko se vakatabakidua mai na inaki savasava” kei na “inaki o ya sa iotioti ni ivakavuvuli ni ka dina,” sa qai, io, eda sa saqata na vakavakadewa qiqo baleta na lotu. (Vosalaveti mai na Random House Dictionary of the English Language, t. 738.) Na vakavakadewa vakaoqo e vakuwai kina na kaukauwa ni Yalo Tabu ena nona vosa kivei keda ka vosa mai vei [keda].

E dina eda vakabauta na kena susugi cake na vakasama, ia na kila vakatamata e sega walega ni ivurevure ni kila-ka. E tiko e dua na yalayala, e soli ena veivakauqeti ni Kalou Cecere Sara, e tuvanaki ena malanivosa totoka oqo: “Raica ena solia vei kemudou na Kalou na nona Yalo Tabu mo dou vuku kina, io, ena isolisoli ni Yalo Tabu e sega ni vakamacalataki rawa.” (V&V 121:26.)

O ira na tamata era vosavakacacataka na cakacaka ni Turaga, o ira sa vakatokai na daunikila vakatamata era veivakatorosobutaki, era vosa mai ni ra sega ni kila na ituvaki dina ni veika vakayalo. Era se bera mada ni rogoca na domo ni Yalotabu. Era se bera mada ni rogoca baleta ni ra sega ni vakasaqara ka vakarautaki ira mera kilikili kina. Oti o ya, meda qai kaya ni lako ga mai na kila-ka ena inaki kei na cakacaka ni vakasama, era sa cakitaka na veika e yaco mai ena kaukauwa ni Yalo Tabu.

Na veika ni Kalou ena rawa walega ni kilai ena Yalo ni Kalou. Na Yalo oqo e bula tiko. Kivei ira sa raica dina na nona cakacaka, na kila-ka e rawati mai kina sa ka bula me vaka ga na kena e rawati mai na yalo ni kila e lima. Au sa vakadinadinataka oqo. Kau sa yalonuidei ni vuqa na lewe ni Lotu era sa na vakadinadinataka vakakina. Au vakamasuti kemuni yadua mo ni tomana na kena teivaki na yalomuni me duabau kei na Yalotabu. Kevaka meda na cakava oqo, ena vakabulabulataki na noda bula. Eda na vakila ni da sa kawa vata kei na Kalou na Tamada Tawamudu. Eda na tovolea na kamica ni reki e sega ni tauri mai na dua tale na sala.

Meda sa qai kakua ni coriti ena veicavilaki ni vuravura oqo, ni vuqa vei ira e vosa rusa ka vuqa na gauna e wiwi na vuadra. Meda sa qai lako ena vakabauta ki na veisiga ni mataka, ka vosa nuidei ka teivaka e dua na ivakarau ni yalonuidei. Ni da cakava oqo, na noda kaukauwa ena vakaukauwataki ira na tamata.¹⁵

Au sa vakamamasu meda sa dauvakasaqara na veivakauqeti ni Turaga kei na veitokani ni Nona Yalo Tabu me vakalougatataki keda meda tomana tiko na noda sasaga ena dua na yavu cecere vakayalo. Na masu kece oqori ena saumi mai.¹⁶

era vulica na ivolanikalou na matavuvale — “Na veika ni Kalou ena rawa walega ni kilai ena Yalo ni Kalou. Na Yalo oqo e bula tiko.”

Ena yaco me dau noda itokani na Yalo Tabu ni da bula tiko ki na veivakalougatataki oqo.

A kaya kina na Turaga ni kevaka meda na maroroya na ivakaro, “ena sala vata voli ga kei [keda] na Yalo Tabu” (V&V 121:46) me laveti keda cake, me vakavulici keda, me liutaki keda, vakacegui keda, ka tokoni keda. Ni gadrevi meda rawata na veitokani oqo, meda sa na kerea yani, meda na bula kina, meda sa dina vua na Turaga.¹⁷

“Mo na maroroya tiko vakacava na Yalo ni Turaga ena veigauna kece?” Io, mo bula kilikili tiko kina, mo bula kilikili ki na Yalo ni Turaga. Oqo na ka mo cakava. Ko sa na rawata. … Mo bula dodonu ga. Drotani mai na veika vakatani. Drotani mai na iyaloyalo vakasisila. Drotani mai na veika vakaoqo e dreti iko sobu. Na ivola o wilika, na mekasini o wilika, na vidio o sarava, na parokaramu ni tivi o raica, na iyaloyalo o laki sarava, era sa na vakayaco-ka vei iko ka na yaco vakakina kevaka o sa soli iko ki na veivakauqeti ni veika e veirawai era sa tuvanaki tu mai mo dravudravua ka vutuniyau kina eso. Drotani mai kina.¹⁸

Ko sa vakayacora vei iko ena vei-Sigatabu na nomu vakavouya nomu bubului kei na veiyalayalati mo taura na yaca ni Turaga o Jisu Karisito. O sa vakasamataka beka o ya, na kena rui bibi, na ibalebale mo taura vei iko na yaca ni Turaga o Jisu Karisito ena bubului kei na dua na yalayala mo maroroya na Nona ivakaro? Ka sa bubului o koya ka yalataka vei iko ni na solia na Nona Yalotabu me tiko vata kei iko. Sa dua dina na ka totoka oqo.¹⁹

Sa qai dua dina na veivakalougatataki cecere ni veivakauqeti veiqaravi ni dua na Lewetolu Vakalou, ka ciqomi na isolisoli oqo mai na ligadra sa tu vei ira na lewa vakalou. Kevaka meda lako tikoga ena caka dodonu, eda na rekitaka na vakavotukana mai ni yalayala a cakava na Turaga ena Nona kaya: “Ena sala vata voli ga kei iko na Yalo Tabu, ia na nomu ititoko sa ititoko ni yalododonu kei na dina sa tudei sara; raica na nomu lewa sa lewa e sega ni mudu; ia kevaka sa sega ni taurivaki vakatani sa na tudei tu ga me tawamudu.” (V&V 121:46.)²⁰

Vakatutu ni Vuli kei na Veivakavulici

Taro

Na cava eda gadreva kina na Yalo Tabu? (Raica na iwasewase e 1 kei na 2.) Na gauna cava beka o a vakila ni ko dusimaki ka vakavulici iko na Yalo Tabu? Na cava o vulica rawa mai na veika sotavi oqo?
Na cava eda rawa ni vulica mai na ivakamacala nei Peresitedi Hinckley me baleta na sala e dau yaco mai kina na ivakatakila vua na parofita? (Raica na iwasewase 3.) Na cava e bibi kina meda kila ni Yalo Tabu e dau vosa mai ena “domo lailai, e vinaka”? Na cava o sa vulica mai na veigauna o a vakila kina ni sa vosa mai na Yalo Tabu?
Raicalesu na “vua ni Yalotabu” a vakamacalataka tiko vakalekaleka o Peresitedi Hinckley ena iwasewase 4. Ena rawa vakacava me vukei keda na ivakavuvuli oqo meda kila na veivakauqeti ni Yalotabu? Na cava e rerevaki kina meda vakabauta ni “vuku vakatamata … sa ivurevure duadua ga ni kila-ka”? Na veigauna cava eso o sa rawata kina na kila-ka vakayalo?
Na cava o vakila ni ko vakasamataka vakatitobu na ivakavuvuli nei Peresitedi Hinckley ena iwasewase 5 me baleta na veitokani ni Yalo Tabu? Ena sala cava o sa bau vakalougatataki kina mai vua na Yalo Tabu?

iVolanikalou Veisemati

1 Korinica 2:9–14; 1 Nifai 10:17; 2 Nifai 31:17–18; Mosaia 3:19; Moronai 8:25–26; V&V 11:12–14

Veivuke ena Vuli

“Ni da lomani ira eda vakavulica, meda dau masulaki ira yadudua. Meda dau tovolea meda kila na veika era dau taleitaka e lomadra, na veika era sa dui rawata, na ka era vinakata, kei na veika era dui gadreva. Eda vakarautaka me sota kei na veika era gadreva, ke mani levu sara na gauna o vakayagataka kina se cakacaka. Dau raica mera daunanumi ena gauna era dau yali kina kei na gauna era dau tiko kina ena kalasi. Eda soli veivuke ke gadrevi” (Veituberi, Me iLutua ni Noda Bula [1999], 37).