Wase 14

Na iSolisoli ni Yalo Tabu

“Sa rawa meda na veitokani kei na Yalo Tabu ni oti na papitaiso kei na veivakadeitaki ka na vakatavulici keda ena sala ni Turaga, vakayadrata na noda vakanananu ka vukei keda meda kila deivaki na ka dina.”

Na Bula nei Joseph Fielding Smith

A vakatavulica o Peresitedi Joseph Fielding Smith ni o ira kece na lewe ni Lotu yalodina “e tu vei ira na dodonu mera ciqoma na ivakatakila ka veiganiti kaya na nodra tuberi yadua.”.”¹ E dau qara tu ga o koya na veituberi oqo, vakabibi ena nona sasaga ni vakatavulici ka taqomaki ira matua na luvena tagane kei na yalewa. O Elder Francis M. Gibbons, ka a veiqaravi vaka-vunivola ki na Mataveiliutaki Taumada, e wasea na veika a sota kaya, me vaka a tukuna vua o Reynolds (yacabuli Reyn) na luvei Peresitedi Smith.

“A tukuna vakaidina o Reyn ni a biuta ga vakadua na tavako ki gusuna ena nona bula, ka qai dua ga na gauna lekaleka. E yaco ni a gonevuli voli ena Roosevelt Junior High School e Salt Lake City. [Na icurucuru] ni koronivuli a toka ena dua na yasa ni gaunisala vagagalu ka lailai sara na kena lori veitosoyaki. Ena siga oqo, a se qai curu ga yani kina e tuba o Reyn ena icurucuru eliu ni koronivuli vata kei na dua na itokani ka dau vakatavako ka sagai koya, me vaka a dau vakayacora wasoma, me ‘tovolea mada ga e dua.’ A vakayacolomana na itokani ena gauna oqo. E taura cake o Reyn e dua na tavako ka waqaca. E vica tale na iceru emuri, sa cabe cake mai ena ilesu ni sala na motoka nei tamai Reyn. E wirica sobu na iloilo o Elder Smith ka tukuna vua na luvena veilecayaki, ‘Reynolds, au via vosa vei iko ni oti na vakayakavi ena bogi nikua’ ka mani gole sara. E kaya o Reyn, ‘Ni dau kacivi au o tamaqu, Reynolds, au sa kila sara ni sa dua na ka bibi saraga vua oya.’ A vakalaiva o Elder Smith me vakasamataka toka o Reyn na nona cala ena vo ni yakavi kei na gauna ni vakayakavi, ka lailai sara na ka e kaya rawa. Vakalailai emuri, nona sega ni dabe dei toka ena rumu ni vuli nei tamana, … sa donuya na veilewai o Reynolds. Na ka e a ciqoma sa dua dina na ivakatavuvuli ni veikauwaitaki kei na loloma me baleta na ka vakatani ni ‘itovo vakasisila oya’ kei na dua na veivakananumi me baleti koya kei na iwalewale e rokataka kina na matavuvale taucoko na nona ivalavala. A mai vakacavari ena kerekere ka me na yalataka o Reyn ni na sega tale ni biuta ki gusuna e dua na tavako. A bubuluitaka o Reyn. ‘E sega ni qai yaco tale,’ a tukuna o koya. Ena loma taucoko ni yabaki veitarovi, vakakina e dua na gauna vakacakacaka ena Mataivalu-e-Wai ni Amerika ena iKarua ni Valulevu ka a vakaiyanaqa kina na vakatavako, e a rokova o koya na yalayala a cakava vei tamana.”

Ni raici lesu na ka a sotavi oqo, e tukuna kina o Elder Gibbons: “Na kena sega ni nanumi ni na basika mai ena gaunisala tuvakatikitiki oya o Joseph Fielding Smith, ka veitaudonui vata na gauna a waqaca kina na nona gonetagane na imatai ka iotioti ni tavako, esa ka vakaitamera vakaidina. Dina ga ni a sega ni tukuna vakakina, na ivakarau kei na rorogo ni vosa nei Reyn a vakadeitaka ni veika a yaco e vakadinadinataka vua na duatani ni vakatagedegede kei na kaukauwa ni vakilai ni veika vakayalo i tamana, vakabibi ena kena semati ki na tiko vinaka ni nona matavuvale.”²

iVakavuvuli nei Joseph Fielding Smith

Na ilesilesi ni Yalo Tabu sai koya me vakadinadinataki rau na Tamana kei na Luvena kei na dina ni veika kecega.

Na Yalo Tabu sa ikatolu ni Lewetolu Vakalou. O koya e dua na Yalo, ena ituvaki ni dua na tamata. Na Tamada kei na Luvena erau vakayago vakatamata; erau taukena na yago e vakalewe ka vakasui. Na Yalo Tabu e sa ituvaki ni tamata vakayalo, ka taukena ga na yago vakayalo [raica na V&V 130:22]. Na nona ilesilesi sa ikoya mena vakadinadinataka na Tamada kei na Luvena kei na dina ni veika kecega [raica na 2 Nifai 31:18; Moronai 10:5].³

E vakayagataka o koya na veika ni Tamada kei na Luvena ka vakatakila kivei ira era qarava na Turaga ena yalodina. Mai na ivakavuvuli ni Dauveivakacegui, se Yalo Tabu, a yaco mera nanuma lesu kina na iapositolo na ivakavuvuli i Jisu Karisito [raica na Joni 14:26]. E dau yaco mai na parofisai mai na ivakavuvuli ni Yalo Tabu [raica na 2 Pita 1:21].⁴

Na vosa ni Yalo ni Kalou ki na yalo ni tamata e tiko kina na kaukauwa me vakatikora na dina ena kena kaukauwa duadua kei na kena kilai vakavinaka ni vakatauvatani kei na dina e vakatikori mai na veisotari kei ira na kai lomalagi. Mai na Yalo Tabu sa yaco kina me co-ri na dina ki na loma ni ua kei na viciko ni yago me kakua kina ni guilecavi.⁵

Na Yalo Tabu e vakatakila na dina kivei ira na tamata yalodina ena veivanua kecega.

Eda vakabauta na Yalo Tabu ni sa daunivakatakila ka ni na wasea na ivakadinadina kivei ira na tamata yalodina ena veivanua kecega ni o Jisu Karisito esa Luve ni Kalou, ni o Josefa Simici e parofita, kei na lotu oqo “na lotu dina duadua ga e vuravura.” (V&V 1:30.)

E sega ni gadrevi e dua mena tikoga ena butobuto, na rarama ni kosipeli tawamudu esa tu oqo; ka na rawa ni rawata o ira na dauvakatataro gugumatua e vuravura e dua na ivakadinadina vakayago mai vua na Yalo Tabu ena dina kei na bula vakalou ni cakacaka ni Turaga.

A kaya o Pita: “… Sa sega ni digitaki ira vakailoa na tamata na Kalou; ia ena veivanua kecega sa vinaka vua ko koya sa rerevaki koya, ka caka dodonu” (Cakacaka 10:34–35), sa kena ibalebale ni Turaga ena sovaraka mai na nona Yalotabu kivei ira na yalodina ka mera na qai kila vakataki ira na dina ni lotu oqo.⁶

Na Yalo Tabu ena vakatakilai koya kivua e dua ga na tamata ka vakataroga na dina, me vaka ga a cakava o Koya vei Konilio [raica na Cakacaka 10]. E tiko vei keda na itukutuku oqo ena iVola i Momani mai vei Moronai, ena nona mai vakacavara tiko kina na nona ivolatukutuku, wase 10, tikina 4:

“Ia ni dou sa wilika na itukutuku oqo, mo dou kerea vua na Kalou, na Tamada Tawamudu, ena yaca i Jisu Karisito, me vakatakila vei kemudou se dina se sega; ia kevaka dou sa kerea ena yalodina ena lomamudou taucoko ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina.”

E rawa ni ciqoma na ttamata kecega na veivakatakilai ni Yalo Tabu, vakakina ke sa tiko ena taudaku ni lotu, kevaka esa vakasaqara vagumatua tiko na rarama kei na dina. Ena lako mai na Yalo Tabu ka solia vua na tamata oya na ivakadinadina e vakasaqara tiko, ka qai vakasuka.⁷

Salamuria na papitaiso, na isolisoli ni Yalo Tabu sa na soli mai ena veitabaki ni liga.

Na yalayala a caka ena gauna makawa ni lotu i Jisu Karisito ni o ira kece era na veivutuni, ka papitaiso me bokoci kina na ivalavala ca ka yalodina tiko, sa na rawa ni ciqoma na isolisoli ni Yalo Tabu mai na veitabaki ni liga. Na yalayala vata ga oya esa caka vei ira kecega era na vakadonuya na Kosipeli ena itabagauna oqo, ni a kaya na Turaga:

“Ia, ko ira kecega sa vakabauta mo drau vakadeitaka sara me lewe ni noqu lotu, io mo drau tabaka na uludra, kau na qai vakatikora na isolisoli ni Yalo Tabu kivei ira.” (V&V 33:15)]⁸

Paiting of the Apostle Paul conferring the Gift of the Holy Ghost . — “Ia ni sa tabaki ira ko Paula ena ligana, sa yaco kivei ira na Yalo Tabu” (Cakacaka 19:6).

Ena sega ni rawa ni o rawata na isolisoli ni Yalo Tabu ena nomu masuta, ena saumi ni nomu ikatini, ena nomu muria na Vosa ni Vuku—ka sega mada ga mai na papitaiso ena wai me bokoci kina na ivalavala ca. Sa dodonu mo na vakacavara na papitaiso oya ena veipapitaisotaki ni Yalotabu. A tukuna na Parofita ena dua na gauna ni na yaga cake mo na papitaisotaka e dua na taga nuku mai na nona sega ni vakadeitaki e dua na turaga ka soli vua na isolisoli ni Yalo Tabu, mai na veitabaki ni liga. Ena sega ni rawa ni o rawata ena dua tani tale na sala.⁹

Au vakabauta na ivunau ni veitabaki ni liga ena isolisoli ni Yalo Tabu, ka vakavuna meda kau vakavoleka kina vua na Tamada mai lomalagi ka vulica na Nona sala, ka meda na lako ena Nona salatu.¹⁰

Mai na isolisoli ni Yalo Tabu, sa na rawa kina vei ira na lewe ni Lotu mera taura na Yalo Tabu me nodra itokani tudei.

Na Yalo Tabu sa Daunivakauitukutuku, se Dauveivakacegui, ka a yalataka na iVakabula me tala vei ira na nona tisaipeli ni oti na nona lauvako. Na Dauveivakacegui oqo, mai na nona veivakayarayarataki, sa dua na itokani tudei kivei ira na tamata kecega e papitaiso, ka me veiqaravi vei ira na lewe ni Lotu ena vakatakila kei na veituberi, kila-ka ni dina ni ra lako ena kena rarama. Sa ikoya na Yalo Tabu ka vakararamataka na vakasama ni lewenilotu ka papitaiso vakaidina. Ena vukuna e dau lako mai kina na ivakatakila yadua, kei na rarama ni dina sa vakataudeitaki ki na lomada.¹¹

Ni oti na noda papitaiso, eda sa vakadeitaki. Na cava na inaki ni veivakadeitaki oya? Me vakaveitokanitaki keda kei na Yalo Tabu; me solia vei keda na dodonu ni veituberi ni ikatolu ni Lewetolu Vakalou—vakaitokani, me rawa kina ni vakararamataki na noda vakasama, ka me rawa ni da vakusai ena Yalo Tabu meda vakasaqara na kila-ka ena kilai deivaki ni veika taucoko e okati kina na noda rawata na bula vakalagilagi.¹²

Sa rawa meda na veitokani kei na Yalo Tabu ni oti na papitaiso kei na veivakadeitaki ka na vakatavulica vei keda na sala ni Turaga, vakusa na noda vakasama ka vukei keda meda kila deivaki na ka dina.¹³

A yalataki vei keda ni gauna eda papitaiso kina, kevaka eda dina ka yalodina, ena tiko vata kei keda na veituberi ni Yalo Tabu. Na cava beka na kena inaki? Me vakatavulici keda, me dusimaki keda, me wase ivakadinadina vei keda ena ivakavuvuli ni veivakabulai ni kosipeli i Jisu Karisito. O ira na gone taucoko era sa qase mera papitaiso, kei koya sa papitaiso, sa vakadonui me nona na veituberi ni Yalo Tabu. Au sa rogoca ni ra kaya na tamata ni na sega ni rawa vua e dua na gone lailai yabaki walu me kila vinaka na ka. Au kila vinaka mai na ka oya. A tiko vei au e dua na ivakadinadina ni dina oqo niu a sa yabaki walu, ka lako curuma yani na Yalo Tabu. E se tiko vata kei au mai na gauna oya.¹⁴

Sa dua dina na dodonu lagilagi oqo meda tuberi wasoma mai vua na Yalo Tabu ka me yaco me vakatakilai na veika vuni ni matanitu ni Kalou.¹⁵

Na veitokani ni Yalo Tabu ena rawa ga ni tiko vei ira era sa vakarautaki ira mera ciqoma.

Sa noqu vakatulewa ni sa tiko e levu sara na lewe ni Lotu oqo ka ra sa papitaisotaki me savai na nodra ivalavala ca, ka sa tabaki na uludra me baleta na isolisoli ni Yalo Tabu, ia ka ra sega ni ciqoma na isolisoli—oya, na kena veivakatakilai. Na cava na vuna? Baleta ni ra a sega ni vakarautaki ira vakavinaka me rawa ni ra ciqoma kina na veivakatakilai oqo. Era a sega ni vakayalomalumalumutaki ira. Era a sega ni cavuikalawa mera vakarautaki ira ki na veitokani ni Yalo Tabu. Sa ra qai mai lako curuma tu na bula ena nodra lecaika; na nodra kila deivaki na ka e lailai sara. Ni ra lako mai vei ira na dauveivakaisini kei na daunakica ka vosavakacacataki ira na vakatulewa ena Lotu kei na ivunau ni Lotu, o ira na lewenilotu malumalumu oqo e sega vei ira na kila deivaki vakarauta, vakarauta ni itukutuku, kei na vakarauta ni veituberi ni Yalo ni Turaga mera vorata kina na ivunau kei na ivakavuvuli vakailasu. Era vakarorogo ka nanuma de ra sa cakava beka e dua na cala, kei na imatai ni ka era kila na nodra sa raica rawa na nodra igolegole yani ki na taudaku ni Lotu, baleta ni malumalumu na nodra kila deivaki na ivakavuvuli.¹⁶

Sa ivakaro mai vua na Turaga oya na nodra saga na lewe ni Lotu mera gugumatua ena nodra itaviqaravi kei na vulici ni veika dina ni kosipeli me vaka na kena sa vakatakilai. Na Yalo ni Turaga ena sega ni tomana me tiko vata kei ira na vakaduiduile, o ira na daulako vakatani kei na dauvakacaca ka ra sega ni rawata mera bula maliwana na rarama ni dina vakalou. Sa nodra dodonu o ira kece na tamata ka sa papitaiso mera taukena e dua na ivakadinadina vakamareqeti ni veivakalesuimai ni kosipeli, ia na ivakadinadina oqo ena luluqa ka vakavuna sara me na yali vakavo kevaka eda sa ciqoma tiko vakawasoma na ka vinaka vakayalo mai na vuli, talairawarawa kei na vakasaqarai vagumatua ni kena kilai deivaki na ka dina.¹⁷

A man sitting at a table with his scriptures open looking out the window. — “Sa ivakaro mai vua na Turaga oya mera na gugumatua o ira na lewe ni Lotu ena nodra itaviqaravi kei na vulici ni dina ni kosipeli ka na yaga vakalevu.”

Sa noda na dodonu ki na veituberi ni Yalo Tabu, ia ena sega ni noda na veituberi oya kevaka eda sega ni vakadonuya vakarawarawa me vakasamataki na ivakatakila ka ra sa soli me vukei keda meda kila deivaki ka me tuberi keda ena rarama ni dina ni kosipeli tawamudu. Ena sega ni rawa ni da nuitaka me tiko vata kei keda na veituberi oya ni da sega ni vakadonuya me vakasamataki na ivakatakila levu oqo ka vakaibalebale vakalevu vei keda vakayago ka vakayalo. Ia ke meda na kunei keda ena ituvaki ni tawavakabauta se tawaduavata ni kena vakasaqarai na rarama kei na kila ka sa solia nai na Turaga meda rawata, sa da na qai vakatautaki se tiko vakarerere ni vakaisini mai na yalo ni vunica, na ivunau ni tevoro, kei na ivakavuvuli vakatamata [raica na V&V 46:7]. Ia na gauna esa na tuvani kina e matada na veivakayarayarataki vakailasu oqo, ena sega ni tiko vei keda na veivakatauvatani ni yalomatua me rawa kina ni da wasei ira ka kila ni ra sa sega ni lako mai vua na Turaga. Ka sa rawa meda ka wale vei ira na tawavakabauta, vei ira na itovo kaukauwa, vei ira na dauveivakaisini, vei ira na daunakica vakatamata.¹⁸

Na Yalo ni Turaga ena sega ni tiko ena yago tawasavasava, ia na gauna e vuki kina e dua na tamata mai na dina ki na itovo vakasisila, na Yalo oya ena sega ni vakamuri koya ka qai yali, ia sa na kena isosomi na lako mai ni yalo ni veivakacalai, na yalo ni talaidredre, na yalo ni itovo vakasisila, na yalo ni rusa tawamudu.¹⁹

Ni da yalodina ki na vakabauta, na Yalo Tabu ena solia vei keda na ivakatakila me liutaka ka dusimaka na noda bula ni veisiga.

Na Turaga e sa cakava e dua na yalayala vei ira kece era na veivutuni ka yalodina vakabauta, ena cakacakataki ni yalo malumalumu kei na gugumatua, ka mera na vakadonui ki na veituberi ni Yalo ni Kalou. Na Yalo oqo ena liutaki ira ka dusimaka na nodra bula ni veisiga.²⁰

Na lewe ni Lotu taucoko esa tabaki na uludra me baleta na isolisoli ni Yalo Tabu. Sa tu vua na dodonu me ciqoma na ivakatakila ka veiganiti ki na nona tuberi vakatakikoya; sega ni baleta na Lotu, ia vei koya saraga. Sa tu vua na dodonu ena nona talairawarawa, mai na nona yalomalumalumu, me ciqoma na rarama kei na dina me vaka ena vakatakilai mai na Yalo ni ka Dina, ka ni o koya ka na vakatudaliga ki na Yalo oya ka vakasaqara na isolisoli ni Yalotabu ena yalomalumalumu kei na vakabauta ena sega ni vakaisini.²¹

Sa dodonu sara meda na lako ena vakarokoroko ni bula ena rarama kei na dina vata kei na kila deivaki maqosa ka lako mai ena isolisoli kei na kaukauwa ni Yalo Tabu ka yalataki kivei ira kece ka ra na vakabauta ki na veivutuni ka ciqoma na vosa ni bula tawamudu. Kevaka eda sa veitokani vata na Yalotabu oqo eda sa na lako ena rarama ka veitokani vata kei na Kalou.²²

Sa nodra dodonu na lewe ni Lotu yadua mera kila na ka dina, mera vosa ena ka dina, me tiko vei ira na veivakauqeti ni Yalo Tabu; sa noda dodonu, vakayadua, … meda ciqoma na rarama ka lako ena rarama; ia kevaka eda tomana tiko na noda veimaliwai kei na Kalou, oya na, muri taucoko ni Nona ivakaro, eda na ciqoma na rarama e levu cake sara me yacova ni sa na lako mai vei keda na siga lagilagi ni kila-ka. [Raica na V&V 50:24.]²³

Me kena itinitini, eda lako tale mai ki na iserau ni Kalou na Tamada, mai na veituberi ni Yalo Tabu.²⁴

Vakatutu ni Vuli kei na Veivakavulici

Taro

Na itukutuku cava “Na Bula nei Joseph Fielding Smith” e vakatavulica me baleta na Yalo Tabu? Ena gauna cava a sa bau vakauqeti iko kina na Yalo Tabu mo vukea kina e dua tale?
O Peresitedi Smith a goleva “na Yalo ni Kalou ka veivosaki tiko kei na yalo ni tamata” (iwasewase e 1). Ena sala cava e duidui kina na veivosaki ki na yaloda mai na veivosaki ki na daligada se matada? Na cava e kaukauwa cake kina?
Na cava eso na duidui mai na ciqomi ni ivakatakila ni Yalo Tabu, ka yaco vei Konilio, ki na ciqomi ni isolisoli ni Yalo Tabu? (Raica na iwasewase e 2.)
A vakatavulica o Peresitedi Smith ni na sega ni taucoko na papitaiso kevaka e sega na isolisoli ni Yalo Tabu (raica na iwasewase e 3).. Ena sala cava ena sega ni taucoko kina na nomu bula kevaka e sega na isolisoli ni Yalo Tabu?
Vakasamataka vagumatua na ivakavuvuli nei Peresitedi Smith ena iwasewase e 4 me baleta na cava e vakaibalebaletaka na kena tikori wasoma na veitokani ni Yalo Tabu. Ena sala cava o sa bau vakalougatataki kina mai na veitokani oqo?
Na cava e rawa ni da cakava me vakarautaka na ciqomi ni veitokani ni Yalo Tabu? (Me baleta eso na ivakaraitaki, raica na iwasewase e 5.)
Ena nomu railesuva na iwasewase e 6, taura matua na veituberi e rawa ni da ciqoma mai na Yalo Tabu. Era na rawa ni vakatavulici vakacava na gone mai vei ira na itubutubu mera vakila ka ciqoma na veituberi oqo?

iVolanikalou Veisemati

Joni 16:13; Cakacaka 19:1–6; 1 Koronica 12:3; 1 Nifai 10:17–19; 2 Nifai 31:15–20; 3 Nifai 19:9; V&V 46:13; Yavu ni Vakabauta 1:4

Veivuke ni Veivakavulici

“Mo kua soti ni lomaleqa ke balavu na gauna era na taura na nomu lewenikalasi ena gauna era na tarogi kina. Tovolea mo kua ni dau sauma ga vakataki iko na nomu taro;solia vei ira na nomu lewe ni kalasi na gauna mera sauma mai kina na nomu taro. Io, ena gauna era dau vagagalu kina, eso na gauna e rawa ni kena ivakaraitaki ni ra sega ni taura vinaka na taro, ka na gadrevi mo na vukica na kena itautau me matata.” (Veituberi, Me iLutua ni Noda Bula [1999], 79).