Vahe 2

Ko e Palōfita Moʻuí: Ko e Palesiteni ʻo e Siasí

Talateu

‘Oku puleʻi ʻe he Palesiteni ʻo e Siasí ʻa e kōlomu kotoa ʻo e lakanga fakataulaʻeikí mo e kāingalotu fakalūkufua ʻo e Siasí. Naʻe fakamatala ʻa Palesiteni Sēmisi E. Fausi (1920–2007) ʻo e Kau Palesitenisī ʻUluakí ʻo pehē: “Ko e ʻAposetolo pule ia ʻi he māmaní. Kuo ʻosi fakanofo mo vaheʻi ia ko e palōfita, tangata kikite, mo e tangata maʻu fakahā ki he māmaní. Kuo poupouʻi ia ko e Palesiteni ʻo e Siasí. Ko ia ʻa e taulaʻeiki lahi pule ki he kotoa ʻo e lakanga fakataulaʻeikí ʻi he māmaní. ʻOkú ne maʻu toko taha mo ngāue ʻaki e ngaahi kī kotoa pē ʻo e puleʻangá ʻi he malumalu ʻo e ʻEiki ko Sīsū Kalaisí, ʻa ia ko e ʻulu ki he Siasí ni pea mo e fungani makatulikí” (“Continuing Revelation,” Ensign, Aug. 1996, 5).

Naʻe fakamoʻoni ʻa ʻEletā Maʻake E. Pitasoni (1900–1984) ʻo e Kōlomu ʻo e Kau ʻAposetolo ʻe Toko Hongofulu Mā Uá, ko e palōfita moʻuí ʻa e tangata lea ʻa e ʻEikí ki he Siasí mo e māmaní ʻo pehē: “Mahalo he ʻikai ongoʻi ʻe he kakai ʻoku ʻikai mēmipa ʻi he siasí ni ʻa e maʻongoʻonga ʻo ʻene ngāué. Naʻa mo e Kāingalotu ʻe niʻihi ʻo e Siasí kuo teʻeki ke nau ʻilo ia. Ka ko hono moʻoní, ko e palesiteni ʻo e Siasí ko ha palōfita ia naʻe fokotuʻu hake ʻi he ngaahi ʻaho fakaʻosí ni ke ʻomi ha tataki fakalaumālie, ʻo ʻikai ngata pē ki he Kāingalotu ʻo e Siasí, ka ki he faʻahinga kotoa pē ʻo e tangatá he feituʻu kotoa” (“A People of Sound Judgment,” Ensign, July 1972, 40).

ʻE fakalahi ʻe ha ako fakamātoato ʻo e vahé ni ʻa hoʻo houngaʻia ki he Palesiteni ʻo e Siasí mo e ngaahi kī ʻo e mafai ʻo e lakanga fakataulaʻeiki ʻokú ne maʻú pea ʻe tokoni ke mahino kiate koe e founga ʻoku malu ai ʻa kinautolu ʻoku fili ke talangofua ki heʻene faleʻí.

Fakamatalá

2.1

ʻOku Maʻu ʻe he Palōfita Moʻuí ʻa e Ngaahi Kī Kotoa pē ʻo e Lakanga Fakataulaʻeikí

Naʻe fakamatala ʻa Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, ki ha aʻusia ʻi he taimi naʻe fakahā ai ʻe Palesiteni Sipenisā W. Kimipolo (1895–1985) ko e Palesiteni ʻo e Siasí, ʻokú ne maʻu ʻa e ngaahi kī ʻo e lakanga fakataulaʻeikí ʻo pehē:

“Hili ha konifelenisi naʻe fai ʻi he 1976 ʻi Koupeniheikeni Tenimaʻake, naʻe fakaafeʻi kimautolu ʻe Palesiteni Sipenisā W. Kimipolo ke mau ʻaʻahi ki ha kiʻi falelotu, ke mau mamata ʻi he ngaahi ʻīmisi maka ʻo Kalaisi mo e Kau ʻAposetolo ʻe Toko Hongofulu Mā Uá ʻa ia naʻe tongitongi ʻe Pāteli Tovaluseni. Naʻe tuʻu ʻa e Christus (ʻīmisi maka ʻo Kalaisí) ʻi ha kiʻi loki ʻi mui ʻi he ʻōlitá. Naʻe tuʻu fakahokohoko ʻi he tafaʻaki ʻo e falelotú ʻa e ngaahi ʻīmisi ʻo e Toko Hongofulu Mā Uá, pea naʻe fetongi ai ʻe Paula ʻa Siutasi ʻIsikaliote.

“Naʻe fakahā ange ʻe Palesiteni Kimipolo ki he tangataʻeiki tauhi ʻo e falelotú, lolotonga hono tā tongitongi ʻe Tovaluseni ʻa e ngaahi ʻīmisi fakaʻofoʻofa ko ʻeni ʻi Tenimaʻaké, ne lolotonga fakahoko hono fakafoki mai ʻa e ongoongolelei ʻo Sīsū Kalaisí ʻi ʻAmelika, mo ha kau ʻaposetolo mo e kau palōfita ʻoku nau maʻu ʻa e mafai meiate kinautolu naʻa nau maʻu ia he kuonga muʻá.

“Naʻá ne fakatahatahaʻi mai ʻa kinautolu naʻe ʻi aí ke ofi ange kiate ia, peá ne pehē ange ki he tangata tauhí, ʻKo e Kau ʻAposetolo moʻui kimautolu ʻo e ʻEiki ko Sīsū Kalaisí,’ peá ne tuhu kia ʻEletā Pinekā, ʻo ne pehē ange, “Ko e Fitungofulu ʻeni ʻo hangē ko kinautolu naʻe fakamatala ki ai ʻa e Fuakava Foʻoú.’

“Naʻa mau tuʻu he tafaʻaki ʻo e ʻīmisi ʻo Pitá, ʻa ia naʻe tā ʻe he tangata tā tongitongí ʻokú ne pukepuke ʻa e ngaahi kī, ko e fakataipe ia ʻo e ngaahi kī ʻo e puleʻangá. Naʻe pehē ange ʻe Palesiteni Kimipolo, ʻʻOku mau maʻu ʻa e ngaahi kī moʻoní, ʻo hangē ko Pitá, pea ʻoku mau ngāue ʻaki ia ʻi he ʻaho kotoa pē.’

“Peá ne hoko leva ha meʻa ʻe ʻikai toe ngalo ʻiate au. Naʻe tafoki leva ʻa Palesiteni Kimipolo, ʻa e palōfita angaleleí ni, kia Palesiteni Siohani H. Penitini, ʻo e Siteiki Koupeniheikení, ʻo ne pehē ange kiate ia ʻi he leʻo mālohi, ʻʻOku ou loto ke ke fakahā ki he kau taki faka-siasi [fakalotu] māʻolunga kotoa pē ʻi Tenimaʻake, ʻoku ʻikai ke nau maʻu ʻa e ngaahi kií! ʻOku ou maʻu ʻe au ʻa e ngaahi kií’

“Naʻá ku maʻu ai ʻa e fakamoʻoni ko ia ʻoku maʻu ʻe he Kāingalotu ʻo e Siasí, ka ʻoku faingataʻa ke te fakamatalaʻi ki ha taha ʻoku teʻeki ke ne aʻusia iá—ko ha maama, ko ha mālohi ʻoku ongo moʻoni ki he loto ʻo ha taha—peá u ʻiloʻi fakapapau ai, ko e palōfita moʻui ʻeni ʻokú ne maʻu ʻa e ngaahi kií” (“The Shield of Faith,” Ensign, May 1995, 8).

ʻOku maʻu ʻe he palōfitá ʻa e ngaahi mālohi, meʻafoaki, mo e tāpuaki ʻokú ne malava ai ke pule ʻi ha faʻahinga lakanga pē ʻo e Siasí (vakai, T&F 46:29; 107:91–92). Naʻe fakamatalaʻi ʻe ʻEletā Pulusi R. Makongikī (1915–85) ʻo e Kōlomu ʻo e Kau ʻAposetolo ʻe Toko Hongofulu Mā Uá e ngaahi fatongia ʻo e Palesiteni ʻo e Siasí, ko e palōfita moʻuí ʻo pehē:

“Ko e ʻulu ia ʻo e puleʻanga ʻo e ʻOtuá he māmaní, ko e ʻōfisa lahi ia ʻo e Siasí, ko e ʻPalesiteni ʻo e Lakanga Fakataulaʻeiki Māʻolunga ʻo e Siasí; Pe, ʻi hono ʻai ʻe tahá, ko e Taulaʻeiki Lahi Pule ki he Lakanga Fakataulaʻeiki Māʻolunga ʻo e Siasí.’ (T&F 107:65–66.) Ko hono fatongiá ʻke pule ki he siasí kotoa. …’ (T&F 107:91.)

“Ko e tangata pē ia ʻe taha ʻi he māmaní ʻi ha taimi te ne lava ʻo fakatou maʻu mo ngāue ʻaki e ngaahi kī ʻo e puleʻangá ʻi hono kakató. (T&F 132:7.) ʻOku fakahoko e ngaahi ouau kotoa pē ʻo e ongoongoleleí pea fakamafaiʻi e akonaki kotoa pē ʻo e ngaahi moʻoni ʻo e fakamoʻuí, ʻi he mālohi kuo foaki kiate iá, pea ʻoku malava ke maʻu ʻe he tangata ʻi hono kuongá ʻa e fakamoʻuí ʻo fakafou ʻi he ngaahi kī ʻokú ne maʻú” (Mormon Doctrine, 2nd ed. [1966], 591–92; tānaki atu hono fakamamafaʻí).

ʻOku hokohoko atu he māmaní he ʻahó ni e ngaahi kī mo e mālohi tatau ʻo e lakanga fakataulaʻeikí naʻe maʻu ʻe he Palōfita ko Siosefa Sāmitá.

Naʻe fakamatalaʻi ʻe Palesiteni Kōtoni B. Hingikelī (1910–2008) e founga ʻoku hokohoko atu ai e ngaahi kī ʻo e lakanga fakataulaʻeikí mei he Palōfita ko Siosefa Sāmitá ki he palōfita moʻui lolotonga he kuonga ní ʻo pehē:

“Ko e mafai tatau ko ia naʻe maʻu ʻe Siosefá, ʻa e ngaahi kī mo e mālohi tatau ko ia ʻa ia ko e uho moʻoni ʻo ʻene totonu ne foaki fakalangi ke ne puleʻí, naʻá ne foaki ia ki he Kōlomu ʻo e Kau ʻAposetolo ʻe Toko Hongofulu Mā Uá pea mo Pilikihami ʻIongi ko honau takí. Talu mei ai ko e palesiteni kotoa ʻo e Siasí, kuo nau aʻu ki he lakanga māʻolunga mo toputapu taha ko ia mei he Fakataha Alēlea ʻo e Toko Hongofulu Mā Uá. Kuo tāpuekina e kau tangata takitaha ko ʻení ʻaki e laumālie mo e mālohi ʻo e fakahaá mei ʻolunga. Kuo ʻi ai ha fehokotaki hokohoko meia Siosefa Sāmita ko e Siʻí kia Sipenisā W. Kimipolo [ʻa ia naʻe hoko ko e palōfita lolotongá]. ʻOku ou fakamoʻoni mamalu ki ai ʻi homou ʻaó he ʻahó ni. ʻOku langa ʻa e Siasí ʻi he folofola pau ʻo e kikité mo e fakahā—ʻoku langa ʻo hangē ko e tohi ʻa Paula ki he kakai ʻEfesoó, ʻi ʻhe tuʻunga ʻa e kau ʻaposetolo mo e kau palōfita, ko hono fuʻu makatulikí ʻa Sīsū Kalaisi pē.’ ( ʻEfesō 2:20.)”(“The Joseph Smith III Document and the Keys of the Kingdom,” Ensign, May 1981, 22).

2.2

Ko e Palōfitá ʻa e Tangata Lea ʻa e ʻEikí

Naʻe maʻu ʻe he Palōfita ko Siosefa Sāmitá ʻa e fakahā mei he ʻOtuá.

Naʻe fakahā mai ʻe Palesiteni Hāloti B. Lī (1899–1973) he ʻikai teitei kākaaʻi e Kāingalotú he kuo fokotuʻu ʻe he ʻEikí ha founga makehe ʻo e fakahinohinó:

“ ʻI he taimi ko ia ʻoku ʻi ai ai ha meʻa kehe mei he meʻa kuo ʻosi fakahā mai ʻe he ʻEikí kiate kitautolú, te ne tala ia ki heʻene palōfitá kae ʻikai ko Tomu, Tiki, pe ko Hale ʻa ia ʻoku suto holo ʻi heʻene fonongá ʻo hangē ko ia kuo talanoa ʻe he kakaí; pea ʻikai fakafou ʻi ha taha, ʻo hangē ko ha talanoa ʻe taha, naʻe pongia pea ake hake ʻo ʻomi ha fakahā. Kuó u lea ʻaki, ‘ʻOku mou mahalo koā ko e taimi ʻoku ʻi ai ai ha palōfita ʻa e ʻEikí ʻi he māmaní, te Ne fakaʻaongaʻi ha ngaahi founga makehe ki hono fakahā e ngaahi meʻá ki Heʻene fānaú? Ko e ʻuhinga ia ʻoku ʻi ai ai ʻene palōfitá, pea ko e taimi ʻoku ʻi ai ai ha meʻa ke tala ki he Siasí ni, te ne ʻave ia ki he Palesitení, pea ʻe fakapapauʻi ʻe he Palesitení ʻoku maʻu ia ʻe he kau palesiteni fakasiteikí mo fakamisioná, fakataha mo e kau Taki Māʻolungá; pea te nau fakapapauʻi leva ʻoku ʻilo ʻa e kakaí ki ha faʻahinga liliu foʻou’” (“The Place of the Living Prophet, Seer, and Revelator” [lea ki he kau faiako fakalotu ʻa e Potungāue Ako ʻa e Siasí, July 8, 1964], 11; tānaki atu hono fakamamafaʻí).

Naʻe akoʻi ʻe Palesiteni ʻEselā Tafu Penisoni (1899–1994) ʻoku totonu ke tau mahuʻingaʻia ʻi he ngaahi lea ʻa e palōfitá ʻo lahi ange ʻi ha toe lea ʻa ha taha kehe:

“Ki he kakai matelie kotoa pē, ʻoku totonu ke tau tauhi maʻu ʻetau vakaí ki he ʻeikivaká, palōfita, tangata kikite, mo e tangata maʻu fakahā, mo e palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e tangata ʻeni ʻoku ofi taha ki he matavai mapunopuna ʻo e ngaahi vai ʻo e moʻuí. ʻOku ʻi ai ha ngaahi fakahinohino fakalangi maʻatautolu ʻa ia te tau lava pē ʻo maʻu fakafou ʻi he palōfitá. Ko ha founga lelei ke fakafuofuaʻi ai ho tuʻunga mo e ʻEikí ke vakai ki he anga hoʻo ongoʻi fekauʻaki, mo e ngāue ʻo fakatatau ki he ngaahi lea fakalaumālie ʻo hono fakafofonga fakaemāmaní, ko e palōfita-palesitení. ʻOku ʻikai totonu ke vaʻinga ʻaki ʻa e ngaahi lea fakalaumālie ʻa e palesitení. ʻOku maʻu ʻe he kakai kotoa pē ʻa e totonu ki he ueʻi fakalaumālié, pea ʻoku maʻu ʻe he kau tangata kehekehe ʻa e totonu ki he fakahā ki heʻenau ngāue kuo vahe angé. Ka ko e tangata pē ʻe taha ʻoku tuʻu ko e tangata lea ʻa e ʻEikí ki he Siasí pea mo e māmaní, pea ko e palesiteni ia ʻo e Siasí. ‘Oku totonu ke fua tautau e ngaahi lea ʻa e kau tangata kehe kotoa pē ki heʻene ngaahi lea fakalaumālié” (“Jesus Christ—Gifts and Expectations,” New Era, May 1975, 16).

2.3

ʻOku Tataki ʻe he ʻEikí ʻa e Siasí ʻaki e Fakahā Hokohoko ki Heʻene Palōfitá

ʻOku fakahā ʻe he ʻEikí ʻEne fakakaukaú mo e finangaló ki Heʻene palōfitá. Naʻe fakamoʻoni ʻa Palesiteni Sipenisā W. Kimipolo (1895–1985) ʻoku kei fakaava pē ʻa e ngaahi langí pea ʻoku tataki ʻe he ʻEikí ʻa Hono Siasí he ʻaho kotoa pē ʻo pehē:

“ʻOku ou fakamoʻoni ki he māmaní he ʻahó ni naʻe toe fakaava e ngaahi langí ʻi ha senituli ʻe taha mo e konga kuohilí, pea kuo hokohoko hono maʻu e ngaahi fakahaá talu mei ai. …

“Talu mei he ʻaho fakaofo ko ia he 1820, kuo hokohoko atu hono maʻu e folofola lahi ange, kau ai e ngaahi fakahā taʻefaʻalaua mo mahuʻinga ʻoku ʻikai hano ngataʻanga ʻene haʻu mei he ʻOtuá ki heʻene kau palōfita he māmaní. …

“… ʻOku mau fakamoʻoni ki he māmaní ʻoku kei hokohoko atu pē e fakahaá pea ʻoku ʻi he ngaahi tauhiʻanga lekooti mo e faile ʻo e Siasí ʻa e ngaahi fakahā ko ʻeni ʻoku maʻu he māhina mo e ʻaho takitaha. ʻOku mau fakamoʻoni foki ʻoku ʻi ai, talu mei he 1830 ʻi he taimi naʻe fokotuʻu ai e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea ʻe hokohoko atu pē ke ʻi ai ʻo aʻu ki he ngataʻanga ʻo taimí, ha palōfita, ʻoku ʻiloʻi ʻe he ʻOtuá mo hono kakaí, ʻa ia ʻe hokohoko atu ke fakaʻuhingaʻi e fakakaukau mo e finangalo ʻo e ʻEikí.

“Ko ha lea fakatokanga leva ʻeni: ʻOua naʻa tau toe fai e ngaahi fehalaaki ʻo e kuonga muʻá. ʻOku tui e kakai taʻetui tokolahi ʻi onopooni ki he kakai ne hangē ko ʻĒpalahame, Mōsese, mo Paulá, kae ʻikai ke nau tui ki he kau palōfita he ʻaho ní. ʻOku lava foki e kakai he kuonga muʻá ʻo tali e kau palōfita he kuonga muʻá, kae fakaangaʻi mo lea kovi ki he niʻihi kimui angé.

ʻOku ʻamanaki foki e kakai tokolahi ʻi hotau kuongá ʻo hangē ko e ngaahi taimi he kuohilí, kapau ʻe ʻi ai ha fakahā ʻe hoko mai ia ʻi ha ueʻi fakalaumālie fakaofo mo luluʻi e māmaní. ʻOku faingataʻa ki he tokolahi ke tali ko ha fakahā ʻa e ngaahi meʻa taʻefaʻalaua he kuonga ʻo Mōsesé, Siosefá, pea ʻi hotau kuongá—ʻa e ngaahi fakahā ko ia ʻoku maʻu ʻe he kau palōfitá, ko ha ngaahi fakakaukau loloto taʻefehuʻia ʻi he ʻatamai mo e loto ʻo e palōfitá ʻo hangē ha mana mei he langí pe ko e mafoa ʻo e atá.

“ʻI he ʻamanaki ki he taʻeʻiloá, he ʻikai ʻiloʻi kakato ʻe ha taha ʻa e ʻomi maʻu pē ʻo e fakahaá. ʻOku ou lea atu ʻi he loto fakatōkilalo moʻoni pea ʻi he mālohi mo e ivi ʻo ha fakamoʻoni mālohi ʻoku ʻi hoku lotó, kuo teʻeki ai motu ʻa e laine fetuʻutakí, talu mei he palōfita naʻe toe fakafoki mai ai ʻa e ongoongoleleí ʻi hotau kuonga ní, ʻoku kei hokohoko atu pē ʻa e mafaí, pea ʻoku kei ulo hokohohoko ai pē ha maama ʻoku ulo lahi mo ngingila. Ko e ongo ʻo e leʻo ʻo e ʻEikí ko ha foʻi fasi hokohoko taʻe motu ia he ʻikai toe ʻosi mo ha tautapa fakamātoato leʻolahi. Kuo teʻeki ha motuhia ʻi ha meimei senituli ʻe taha mo e konga” (“Revelation: The Word of the Lord to His Prophets,” Ensign, May 1977, 77–78; tānaki atu hono fakamamafaʻí).

2.4

Ko e Folofola ʻa e ʻEikí ki he Palōfita Moʻuí ʻOku Taimi Totonu mo Matuʻaki Mahuʻinga kiate Kitautolu he Taimí ni

ʻOku liliu maʻu pē ʻa e māmaní. ʻOku hokohoko atu hono ʻahiʻahiʻi kitautolu ʻe he ngaahi palopalema foʻou mo kehekehe mo e ngaahi tafaʻaki kehekehe ʻo e ngaahi palopalema motuʻa. ʻOku ʻafioʻi ʻe heʻetau Tamai Hēvani poto mo ʻofá e meʻa kotoa pē kimuʻa pea hokó, pea ʻokú Ne fakahā e ngaahi tali mo e ngaahi founga ʻo fakafou mai Heʻene palōfitá ʻi hono fie maʻú. Makehe mei hono fakaʻuhingaʻi mo fakapapauʻi e folofola kuo ʻosi ʻomí, ʻoku hoko ha palōfita ko e fakafofonga ʻa ia ʻe lava ʻe he ʻEikí ʻo ʻomi ai e folofola foʻou, ʻo fakatatau mo e ngaahi fie maʻu ʻa e kakaí. ʻI he lea ʻo fakatatau ki he fakahinohino ʻa e Laumālie Māʻoniʻoní, ʻoku mahuʻinga ange e lea ʻa e palōfita moʻuí ʻi ha toe fakamatala kehe ki he meʻa tatau. ʻOku fenāpasi ʻene ngaahi faleʻi fakalaumālié mo e ngaahi moʻoni taʻengata ʻi he folofolá pea ʻoku tokanga taha ki he ngaahi fie maʻu mo e tūkunga ʻo hono kuongá.

ʻOku taʻengata e ngaahi tokāteliné pea ʻoku ʻikai liliu; ka neongo ia, ʻe malava ke liliu ʻe he ʻEikí, ʻo fakafou ʻi Heʻene palōfitá ʻa e ngaahi foungá mo e polokalamá, ʻo fakatatau ki he fie maʻu ʻa e kakaí. ʻOku fakatātaaʻi ʻe he ngaahi sīpinga ko ʻení ʻa e tefitoʻi moʻoni ko ʻení:

1. Naʻe foaki e fono ʻa Mōsesé ki he fānau ʻo ʻIsilelí ke “takiakiʻi ʻa [kinautolu] kia Kalaisi” (Kalētia 3:24; vakai foki, Joseph Smith Translation, Galatians 3:24 [vakai, Galations 3:24, footnote b ʻi he pulusinga Faka-Pilitānia ʻo e Tohi Tapu ʻa e Siasí]) ka naʻe fakahoko ʻi hono ʻomi ʻe Sīsū Kalaisi e fono ʻo e ongoongoleleí (vakai, Kalētia 3:23–25; Mōsaia 13:27–35; 3 Nifai 9:15–20).

2. Ko e taimi naʻe ʻi māmani ai ʻa Sīsuú, naʻe angamaheni ʻaki hono akoʻi pē e ongoongoleleí ki he fale ʻo ʻIsilelí (vakai, Matiu 10:5–6; 15:24; Maʻake 7:25–27). Hili ʻEne Toetuʻú, naʻe fekauʻi ʻe he Fakamoʻuí e kau ʻAposetoló ke ʻave e ongoongoleleí ki he tokotaha kotoa (vakai, Maʻake 16:15; Ngāue 10).

3. Naʻe ʻave e Lakanga Taulaʻeiki Faka-Melekisētekí ʻi he kuonga ʻo Mōsesé mei he kakai fakalūkufua ʻo ʻIsilelí pea naʻe foaki pē e Lakanga Taulaʻeiki Faka-ʻĒloné ki he kau Līvaí (vakai, T&F 84:24–26; vakai foki, Nōmipa 8:10–22; Hepelū 7:5). ʻI he kuonga ʻo Kalaisi mo ʻEne kau ʻAposetoló, naʻe toe lava ke maʻu e Lakanga Taulaʻeiki Faka-Melekisētekí pea naʻe foaki e Lakanga Taulaʻeiki Faka-ʻĒloné ki he kakai tangata ne ʻikai ko e kau Līvaí (vakai, Luke 6:13–16; Filipai 1:1; Hepelū 7:11–12). ʻI he ʻahó ni, “ʻe lava ai ʻe he tangata tui faivelenga, mo feʻunga mo taau kotoa pē ʻi he Siasí ʻo maʻu ʻa e lakanga fakataulaʻeiki toputapú, fakataha mo e mālohi ke nau ngāue ʻaki ʻa hono mafai fakalangí” (Fanongonongo Fakamafaiʻi 2).

ʻOku ʻomi ʻe he kau palōfitá he ʻahó ni ha leʻo ʻo e fakatokanga ʻo hangē ko ia ʻi he kuonga ʻo Noá.

Naʻe fakamatala ʻa Palesiteni Sione Teila (1808–87) ki he kau palōfita ʻi he Fuakava Motuʻá ke fakatātaaʻi ʻa e fie maʻu e ngaahi fakahā foʻou ki he ngaahi toʻu tangata foʻoú ʻo pehē:

“ʻOku tau fie maʻu ha fuʻu ʻakau ʻoku moʻuí—ha matavai mapunopuna—ha poto ʻoku moʻuí ʻa ē ʻoku haʻu mei he lakanga fakataulaʻeiki moʻui ʻi he langí, ʻo fakafou ʻi he lakanga fakataulaʻeiki moʻui ʻoku ʻi māmaní. … Pea talu mei he taimi naʻe fuofua maʻu ai ʻe ʻĀtama ʻa e fetuʻutaki mei he ʻOtuá, ʻo aʻu ki he taimi naʻe maʻu ai ʻe Sione, ʻi he Motu ko Pātimosí, ʻa e fetuʻutakí, pe ko hono fakaava ʻo e langí kia Siosefa Sāmitá, naʻe fie maʻu maʻu pē ha ngaahi fakahā foʻou, ʻoku taau mo e ngaahi tuʻunga makehe kuo tuku ki ai ʻa e ngaahi siasí pea mo e kakaí fakafoʻituitui.

“Naʻe ʻikai fakahinohinoʻi ʻe he fakahā ia kia ʻĀtamá ʻa Noa ke foʻu ʻa e ʻaʻaké; pe talaange ʻe he fakahā kia Noá kia Lote ke ne siʻaki ʻa Sōtoma; pe ʻi ai ha lau ʻi he ongo fakahaá ni ki he mavahe ʻa e fānau ʻo ʻIsilelí mei ʻIsipité. Naʻa nau taki taha maʻu ha ngaahi fakahā fekauʻaki pē ko kinautolu, pea pehē pē kia ʻĪsaia, Selemaia, ʻIsikeli, Sīsū, Pita, Paula, Sione, pea mo Siosefa. Pea kuo pau ke pehē mo kitautolu” (Ngaahi Akonaki ʻa e Kau Palesiteni ʻo e Siasí: Sione Teila [2001], 184).

Naʻe lea ʻa Palesiteni Uilifooti Utalafi (1807–98) ki ha fakataha naʻe kau ki ai e Palōfita ko Siosefa Sāmitá mo Pilikihami ʻIongi ʻo pehē:

“Naʻe tafoki … ʻa Siosefa kia Pilikihami ʻIongi ʻo pehē ange, ʻʻE Pilikihami, ʻoku ou loto ke ke tuʻu ʻo fakahā mai hoʻo fakakaukau fekauʻaki mo e ngaahi mafai kuo hikí pea mo e folofola moʻui ʻa e ʻOtuá.’ Naʻe tuʻu leva ʻa Misa Pilikihami, ʻo ne toʻo ʻa e Tohi Tapú, ʻo hilifaki; naʻá ne toʻo mo e Tohi ʻa Molomoná, ʻo hilifaki mo ia; peá ne toʻo mo e Tokāteline mo e Ngaahi Fuakavá, ʻo hili ia ʻi muʻa ʻiate ia, peá ne pehē: ʻKo e folofola ʻeni ʻa e ʻOtuá kuo tohi maʻatautolu ʻo fekauʻaki mo e ngāue ʻa e ʻOtuá, talu mei he kamataʻanga ʻo māmaní, ʻo meimei aʻu mai ki hotau kuongá.’ Naʻá ne pehē leva, ʻKa ko ʻeni, ko e taimi ʻoku fakafehoanaki ai mo e kau maʻu mafai moʻuí [kau palōfita moʻuí], ʻoku taʻeʻaonga ʻa e ngaahi tohi ia ko ʻení kiate au; ʻoku ʻikai ke toe ʻomi fakahangatonu ʻe he ngaahi tohi ko iá he ʻahó ni kiate kitautolu ʻa e folofola ʻa e ʻOtuá, ʻo hangē ko ia ʻoku fakahoko ʻe he lea ʻa e kau Palōfitá pe ko ha tangata ʻokú ne maʻu ʻa e Lakanga Fakataulaʻeiki Māʻoniʻoní ʻi hotau kuongá ni pea mo hotau toʻu tangatá. ʻE sai ange kiate au ke u maʻu ʻa e kau maʻu mafai moʻuí ʻi hono toenga ʻo e ngaahi meʻa kuo ʻosi hiki ʻi he ngaahi tohí.’ Ko e taumuʻa ia naʻá ne tulifua ki aí. Hili iá, naʻe pehē leva ʻe Siosefa ki he fakatahaʻangá: ʻNaʻe toki fakahā atu ʻe Misa Pilikihami ʻa e folofola ʻa e ʻEikí, pea kuó ne fakahā atu ʻa e moʻoní’” (ʻi he Conference Report, Oct. 1897, 22–23; tānaki atu hono fakamamafaʻí).

Naʻe akoʻi ʻe Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku tuʻu maʻu pē e ngaahi tefitoʻi moʻoni mo e ngaahi tokāteline ʻo e ongoongoleleí, neongo kuo pau ke liliu e ngaahi founga ʻa e Siasí ʻi ha ngaahi taimi: “ʻE malava ke liliu e ngaahi founga ngāue, polokalama, ngaahi tuʻutuʻuni fakapule, naʻa mo e ngaahi meʻa ʻe niʻihi ʻo e kautahá. ʻOku tau matuʻaki tauʻatāina, ko hono moʻoní, ʻoku tau haʻisia ke liliu kinautolu mei he taimi ki he taimi. Ka ko e ngaahi tefitoʻi moʻoní, mo e ngaahi tokāteliné he ʻikai teitei liliu” (“Principles,” Ensign, Mar. 1985, 8).

2.5

He ʻIkai Teitei Tuku ʻe he ʻEikí ke Takihalaʻi e Siasí ʻe he Palōfita Moʻuí

Naʻe fakahā ʻe Palesiteni Uilifooti Utalafi (1807–98) te tau lava ʻo maʻu ha loto falala kakato ʻi he hala ʻoku tataki ki ai ʻe he palōfitá ʻa e Siasí ʻo pehē:

“ ʻE ʻikai tuku au ʻe he ʻEikí pe ko ha toe tangata kehe pē ʻa ia ʻoku hoko ko e Palesiteni ʻo e Siasí ni ke ne takihalaʻi ʻa kimoutolu. ʻOku ʻikai kau ia ʻi he palaní. ʻOku ʻikai ʻi he finangalo ia ʻo e ʻOtuá. Kapau te u feinga ke fai pehē, ʻe toʻo leva au ʻe he ʻEikí mei hoku tuʻungá, pea te Ne fai pehē ki ha toe tangata kehe pē ʻa ia ʻe feinga ke taki ʻa e fānau ʻa e tangatá ke nau hē mei he ngaahi fakahā ʻa e ʻOtuá pea mei honau fatongiá” (Fanongonongo Fakamafaiʻi 1), “Excerpts from Three Addresses by President Wilford Woodruff Regarding the Manifesto”; tānaki atu hono fakamamafaʻí).

Naʻe akoʻi ʻe Palesiteni Hāloti B. Lī (1899–1973) e tefitoʻi moʻoni tatau pē ko ʻení ʻo pehē:

“ʻOkú ke tokanga taha kiate ia kuo ui ʻe he ʻEikí, pea ʻoku ou talaatu ʻeni kiate kimoutolu, ʻi hono ʻiloʻi ʻoku ou ʻi he tuʻunga ko ʻení, ʻoku ʻikai fie maʻu ia ke mou hohaʻa fekauʻaki mo hano takihalaʻi ʻe he Palesiteni ʻo e Siasí ʻa e kakaí, koeʻuhí ʻe toʻo ia ʻe he ʻEikí mei hono tuʻungá kimuʻa peá Ne fakaʻatā ke hoko iá” (The Teachings of Harold B. Lee ed. Clyde J. Williams [1996], 533).

Naʻe fai ʻe Palesiteni Kōtoni B. Hingikelī (1910–2008) ʻa e fakapapau tatau ki he kāingalotu ʻo e Siasí ʻo pehē:

“ʻOku moʻoni ʻa e Siasí. ʻOku maʻu ʻe kinautolu ʻoku tataki iá ha holi pē ʻe taha, ke fai e finangalo ʻo e ʻEikí. ʻOku nau fekumi ki heʻene fakahinohinó ʻi he meʻa kotoa pē. ʻOku ʻikai ha fili mahuʻinga ʻe kaunga ki he Siasí mo hono kakaí ʻe fai taʻe fakakaukauʻi ʻi he faʻa lotu, ʻo kumi ki he matavai ʻo e poto kotoa pē ki ha fakahinohino. Muimui ki he kau taki ʻo e Siasí. He ʻikai tuku ʻe he ʻOtuá ke takihalaʻi ʻene ngāué” (“Be Not Deceived,” Ensign, Nov. 1983, 46; tānaki atu hono fakamamafaʻí).

2.6

ʻE Tui e Kakai ʻe Niʻihi ki he Kau Palōfita he Kuohilí kae Fakafisingaʻi e Kau Palōfita Moʻuí

ʻOku fakaʻapaʻapa e kakai tokolahi ki he kau palōfita ʻo e kuohilí kae fakafisi ke tali e palōfita kuo fekauʻi mai ʻe he ʻEikí ke tataki kinautolu ʻi honau kuongá (vakai, Hilamani 13:24–26). Naʻe vahevahe ʻe Palesiteni Hāloti B. Lī (1899–1973) ha aʻusia ʻokú ne fakatātaaʻi e fakahehema ko ʻení ʻo pehē:

“ʻOku ʻi ai haʻaku kaungāmeʻa ngāue pangikē ʻi Niu ʻIoke. ʻI heʻeku fetaulaki mo ia he ngaahi taʻu kuohilí fakataha mo Palesiteni Sēkopesoni, ʻa ia naʻá ne tokangaʻi e Misiona ʻo e Ngaahi Siteiti Fakahahaké, ne mālie ʻema pōtalanoá. Naʻe ʻoange ʻe Palesiteni Sēkopesoni ha tatau ʻo e Tohi ʻa Molomoná ʻa ia naʻá ne lau, peá ne talanoa vēkeveke ki he ngaahi meʻa naʻá ne ui ko e ngaahi fakakaukau fakaofó. ʻI he ofi ke ʻosi e houa ngāué, naʻá ne fakaafeʻi kimaua ke mau heka ʻi heʻene limó ki he ʻapi fakamisioná, pea naʻá ma tali lelei. Lolotonga ʻemau fonongá, ʻi heʻene talanoa kau ki he Tohi ʻa Molomoná mo ʻene ʻaʻapa ki hono ngaahi akonakí, naʻá ku pehē ange, ʻKo e hā ʻoku ʻikai te ke fai ai ha meʻa fekauʻaki mo iá? Kapau ʻokú ke tali e Tohi ʻa Molomoná, ko e hā ʻokú ne taʻofi koé? Ko e hā ʻoku ʻikai te ke kau ai ki he Siasí? Ko e hā ʻoku ʻikai te ke tali ai ʻa Siosefa Sāmita ko ha palōfitá?’ Naʻe kiʻi fakakaukau ʻa e tangatá peá ne tali mai: “Mahalo ko hono ʻuhingá pē ko e ngali fuʻu ofi mai ʻa Siosefa Sāmita kiate aú. Kapau naʻá ne moʻui ʻi he taʻu ʻe uaafe kuohilí, mahalo pē te u tui. Mahalo ko e ʻuhinga ia ʻoku ʻikai ke u tali ai [ia ko ha palōfitá] ko ʻene fuʻu ofi kiate aú.’

“Ko ha tangata ʻeni ʻokú ne pehē, ʻʻOku ou tui ki he kau palōfita kuo nau pekia ʻa ia ne nau moʻui ʻi he ngaahi taʻu ʻe tahaafe tupu kuohilí, ka ʻoku fuʻu faingataʻa ʻaupito ke u tui ki ha palōfita moʻui.’ ʻOku fakataumuʻa foki e tōʻonga fakakaukau ko iá ki he ʻOtuá. Ko e pehē ko ia ʻoku tāpuni e ngaahi langí pea ʻoku ʻikai ha fakahā he ʻaho ní ʻoku tatau ia mo e pehē ʻoku ʻikai ke tau tui ki ha Kalaisi moʻui he ʻahó ni, pe ko ha ʻOtua moʻui—ʻoku tau tui ki ha taha kuo fuoloa ʻene mamaʻo atu. Ko ia ʻoku ʻi ai ha mahuʻinga moʻoni ʻo e foʻi lea ko e ʻpalōfita moʻuí’” (“The Place of the Living Prophet, Seer, and Revelator,” [lea ki he kau faiako fakalotu ʻa e Potungāue Ako ʻa e Siasí, ʻaho 8 Siulai 1964], 2).

Ko ha palopalema motuʻa ʻaupito e fakahā ko ia e tui ki he kau palōfita kuo pekiá kae fakafisingaʻi e palōfita moʻuí. Naʻe fakafisingaʻi ʻe he kau Fālesi ʻe niʻihi he kuonga ʻo Sīsū Kalaisí ʻa e Kalaisi moʻuí kae tali e palōfita ko Mōsesé, ʻa ia naʻá ne tataki e kau ʻIsilelí ʻi ha taʻu ʻe 1,000 tupu kimuʻá. Naʻa nau lauʻikoviʻi ha tangata naʻe fakamoʻui ʻe Sīsū ʻo pehē:

“Ko ʻene ākonga ʻa koe; ka ko e kau ākonga ʻa Mōsese ʻa kimautolu.

“ʻOku mau ʻilo naʻe folofola ʻa e ʻOtuá kia Mōsese: ka ko e tangatá ni [Sīsū], ʻoku ʻikai te mau ʻilo pe ʻoku mei fē ia” (Sione 9:28–29; vakai foki, Mātiu 23:29–30, 34; Hilamani 13:24–29).

Ko hono ʻātakaiʻi ʻe he kau fakatangá e Fale Fakapōpula Kātesí

Naʻe akoʻi ʻe Palesiteni Hāloti B. Lī (1899–1973) kuo pau ke kau ʻi he tui ki he fakahaá ʻa e ngaahi akonaki ʻa hotau palōfita lolotongá ʻo pehē:

“Hili pē hono fanongonongo ʻe Palesiteni Tēvita O. Makei ki he Siasí naʻe fakanofo e kau mēmipa ʻo e Fakataha Alēlea ʻUluaki ʻo e Kau Fitungofulú ko e kau taulaʻeiki lahi ke fakalahi ʻenau malava ke ngāué mo ʻoange kiate kinautolu e mafai ke ngāue ʻi he taimi ʻoku ʻikai ʻi ai ai ha Taki Māʻolunga kehé, naʻe hohaʻa lahi … ha fitungofulu naʻá ku fetaulaki mo ia. Naʻá ne pehē mai kiate au, ʻʻIkai koā naʻe pehē ʻe he Palōfita ko Siosefa Sāmitá naʻe fehangahangai ʻeni mo e fokotuʻutuʻu ʻo e langí ke ui ha kau taulaʻeiki lahi ko e kau palesiteni ʻo e Fakataha Alēlea ʻUluaki ʻo e Kau Fitungofulú?’ Pea naʻá ku pehē ange, ʻKuo mahino kiate au naʻá ne fai ia, ka kuó ke fakakaukau nai ko e meʻa ko ia naʻe fehangahangai mo e fokotuʻutuʻu ʻo e langí ʻi he 1840 he ʻikai fehangahangai ia mo e fokotuʻutuʻu ʻo e langí ʻi he 1960?’ Naʻe ʻikai ke ne fakakaukau ki he meʻa ko iá. Naʻá ne muimui foki ʻi ha palōfita kuo pekia, pea naʻe ngalo ʻiate ia ʻoku ʻi ai ha palōfita moʻui he ʻahó ni. Ko e ʻuhinga ia ʻoku mahuʻinga ai ʻemau fakamamafaʻi e foʻi lea moʻuí.

“ʻI he ngaahi taʻu kuohilí ʻi heʻeku hoko ko ha faifekau kei siʻí, naʻá ku ʻaʻahi ki Nāvū mo Kātesi pea mo ʻeku palesiteni fakamisioná, pea naʻa mau fakahoko ha fakataha fakafaifekau ʻi he loki ko ia he fale fakapōpulá ne pekia ai ʻa Siosefa mo Hailamé. Naʻe fakamatala e palesiteni fakamisioná ki he meʻa fakahisitōlia naʻe hoko ʻo iku ki hono fakapoongi kinauá pea naʻá ne fakaʻosi ʻaki e fakamatala matuʻaki mahuʻinga ko ʻení: ʻKo e taimi naʻe fakapoongi ai e Palōfita ko Siosefa Sāmitá, naʻe ʻi ai e kāingalotu tokolahi ne nau mate fakalaumālie mo Siosefa.’ Naʻe pehē pē ʻi he pekia ʻa Pilikihami ʻIongí: pea mo e taimi naʻe pekia ai ʻa Sione Teilá. … Naʻe mate fakalaumālie e kāingalotu ʻe niʻihi ʻo e Siasí fakataha mo Uilifooti Utalafi, Lōlenisou Sinou, Siosefa F. Sāmita, Hiipa J. Kalānite, mo Siaosi ʻAlipate Sāmita. ʻOku ʻi ai ha niʻihi he ʻahó ni ʻoku nau loto fiemālie ke tui ki ha taha ʻoku mate mo puli atu pea ke tali ʻene ngaahi leá ʻo hangē ʻoku lahi ange hono mafaí ʻi he ngaahi lea ʻo ha maʻu mafai moʻui he ʻahó ni“ (Stand Ye in Holy Places [1974], 152–53; tānaki atu hono fakamamafaʻí).

Ngaahi Meʻa ke Fakalaulauloto ki Aí

• Ko e hā ʻoku mahuʻinga ai ke maʻu e mahino ʻoku maʻu mo fakahinohinoʻi e ngaahi kī kotoa pē ʻo e lakanga fakataulaʻeikí ʻe ha toko taha ʻi he māmaní?

• Ko e hā e ngaahi lelei ʻoku maʻu mei he ngaahi lea ʻa ha palōfita moʻui kapau kuo tau ʻosi maʻu e ngaahi lea ʻa e kau palōfita he kuonga muʻá?

• Kuo talaʻofa ʻe he ʻEikí he ʻikai ke Ne teitei tuku ʻEne palōfitá ke takihalaʻi ʻa e Siasí. Ko e hā e founga ʻe lava ke kaunga ai e moʻoni ko ʻení ki he anga hoʻo fanongo, lau, mo muimui ki he ngaahi akonaki ʻa e palōfita moʻuí?

Ngaahi Ngāue ke Faí

• Teuteu ha lēsoni efiafi fakafāmili nounou ʻi ʻapi ʻo fakaʻaongaʻi e (1) meʻa naʻá ke ako mei he vahe ko ʻení (2) ngaahi potufolofola ne hā ʻi he vahe ko ʻení (3) fakamatala ko ʻeni meia Palesiteni Kōtoni B. Hingikelií: “ʻOku tau maʻu ha palōfita pe ʻoku tau hala; pea ʻi hono maʻu ha palōfitá, ʻoku tau maʻu e meʻa kotoa” (“We Thank Thee, O God, for a Prophet,” Ensign, Jan. 1974, 122).

• Hili hono lau e ngaahi potufolofola ko ʻení, fakamatalaʻi ki ha kaungāmeʻa pe mēmipa ʻo e fāmilí e founga ʻoku hangē ai e palōfita moʻuí ko Mōsesé: Tokāteline mo e Ngaahi Fuakava 28:2; 107:91–92; Mōsese 1:3, 6.

Nāunau Fakatupulakí

Ngaahi Meʻa Mahuʻinga ʻe Hongofulu Mā Fā ki he Muimui ki he Palōfitá

Palesiteni ʻEselā Tafu Penisoni, 1980 Devotional Speeches of the Year (1981), 26–30; tānaki atu hono fakamamafaʻí.

Siʻoku kāinga ʻofeina, ʻoku ou lāngilangiʻia ke ʻi homou lotolotongá he ʻahó ni. Ko kimoutolu kau ako ko ha konga ʻo ha toʻu tangata kei siʻi kuo fili—ko ha toʻu tangata ʻe malava ke nau mātā tonu ʻi he toe hāʻele mai hotau ʻEikí.

ʻIkai ngata pē ʻi he tupulaki e tokolahi ʻo e Siasí he ʻaho ní, ka ʻoku tupulaki ʻi he faivelengá pea mahulu hake aí, ʻoku faivelenga ange hotau toʻu tangata kei siʻí ʻi he toʻu tangata matuʻotuʻa angé. Kuo fakatatali koe ʻe he ʻOtuá ki he houa fakaʻosí—ʻa e ʻaho lahi mo fakamanavahē ʻa e ʻEikí. ʻE hoko ia ko ho fatongia ʻo ʻikai ngata pē ʻi he tokoni ke tataki loto toʻa e puleʻanga ʻo e ʻOtuá ka ke fakahaofi foki ho laumālié pea fāifeinga ke fakahaofi e ngaahi laumālie ho fāmilí pea fakaʻapaʻapaʻi e ngaahi tefitoʻi moʻoni ʻo hotau kautaha ne ueʻi fakalaumālié.

“Ke tokoni atu ke lavaʻi ʻa e sivi mahuʻinga ʻoku hanganaki maí, te u ʻoatu kiate kimoutolu ha ngaahi tafaʻaki ʻo ha kī mahuʻinga, ʻa ia kapau te mou fakaʻapaʻapaʻi kinautolu, te ne fakakalauni kimoutolu ʻaki e nāunau ʻo e ʻOtuá mo fakahaofi lelei mai kimoutolu neongo e ʻita ʻa Sētané.

ʻE ʻikai fuoloa mei heni te tau fakalāngilangiʻi hotau palōfitá [Sipenisā W. Kimipolo] ʻi hono taʻu valungofulu mā nimá. ʻOku tau hivaʻi he Siasí ʻa e hiva, “Fakamālō ki he ʻOtuá.” Pea ko ʻeni leva ʻa e kī maʻongoʻongá—muimui ki he palōfitá—pea ko e ngaahi meʻa mahuʻinga ʻeni ʻe hongofulu mā fā ki he muimui ki he palōfitá, ʻa e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

ʻUluakí: Ko e palōfitá ʻa e tangata pē ʻe taha ʻoku lea maʻá e ʻEikí he meʻa kotoa pē.

ʻOku folofola ʻa e ʻEikí ʻi he vahe 132, veesi 7, ʻo e Tokāteline mo e Ngaahi Fuakavá fekauʻaki mo e Palōfitá—ʻa e Palesitení—ʻo pehē: “Ko e toko taha pē ʻi he māmani ʻi ha taimi ʻe taha ʻa ia ʻoku foaki ki ai ʻa e mālohí ni mo e ngaahi kī ʻo e lakanga fakataulaʻeiki ko ʻení.”

Pea ʻi he vahe 21, veesi 4–6, ʻoku pehē ʻe he ʻEikí:

“Ko ia, ko e lea ki he siasí, ke ke tokanga ki heʻene ngaahi lea kotoa pē mo e ngaahi fekau te ne fai kiate koé, ʻo ká ne ka maʻu ia, pea ʻaʻeva ʻi he māʻoniʻoni kakato ʻi hoku ʻaó;

“He ke mou tali ʻene leá, ʻo hangē ko e lea ia mei hoku ngutu ʻoʻokú, ʻi he kātaki mo e tui kotoa pē.

“Koeʻuhí ʻi hoʻomou fai ʻa e ngaahi meʻá ni ʻe ʻikai ikuna ʻa kimoutolu ʻe he ngaahi matapā ʻo helí.”

Naʻá ke fanongo ki he folofola ʻa e ʻEikí fekauʻaki mo e ngaahi lea ʻa e palōfitá? ʻOku fie maʻu ke tau “tokanga ki heʻene ngaahi lea kotoa pē”—ʻo hangē ʻoku haʻu mei he “ngutu” ʻo e ʻEikí.

Uá: ʻOku mahuʻinga ange e palōfita moʻuí kiate kitautolu ʻi he ngaahi folofola ʻoku fakaʻaongaʻi ʻe he Siasí.

ʻOku fakamatala ʻa Palesiteni Uilifooti Utalafi ki ha meʻa mālie naʻe hoko ʻi he ngaahi ʻaho ʻo e Palōfita ko Siosefa Sāmitá ʻo pehē:

“Te u talanoa ki ha fakataha ʻe taha naʻá ku kau ki ai ʻi he kolo ko Ketilaní ʻi hoku ngaahi ʻaho kimuʻá. Naʻe fai ha ngaahi lea ʻi he fakataha ko iá ʻa ia kuo fakahoko heni he ʻahó ni, ʻo fekauʻaki mo e folofola moʻuí mo e folofola ʻa e ʻOtuá kuo tohí. Naʻe tuku mai ai e tefitoʻi moʻoni tatau, neongo naʻe ʻikai fuʻu lōloa ʻo hangē ko ia ʻi hení, ʻi he taimi naʻe tuʻu hake ai ha tangata taki ʻi he Siasí pea lea ki he kaveingá ʻo pehē: ʻʻOku mou maʻu e folofola ʻa e ʻOtuá ʻi heni he Tohi Tapú, Tohi ʻa Molomoná, mo e Tokāteline mo e Ngaahi Fuakavá; ʻoku mou maʻu e folofola ʻa e ʻOtuá kuo tohí, pea ko kimoutolu ʻoku ʻomi e ngaahi fakahaá ʻoku totonu ke mou fai ia ʻo fakatatau ki he ngaahi tohí ni, he ko e meʻa kuo tohi ʻi he ngaahi tohi ko iá ko e folofola ia ʻa e ʻOtuá. ʻOku totonu ke tau tauhi pau ki ai.’

“Ko ʻemau tukú pē, naʻe tafoki leva ʻa Siosefa kia Pilikihami ʻIongi ʻo pehē ange, ʻʻE Pilikihami, ʻoku ou loto ke ke tuʻu ʻo fakahā mai hoʻo fakakaukau fekauʻaki mo e ngaahi mafai kuo hikí pea mo e folofola moʻui ʻa e ʻOtuá.’ Naʻe tuʻu leva ʻa Misa Pilikihami, ʻo ne toʻo ʻa e Tohi Tapú, ʻo hilifaki; naʻá ne toʻo mo e Tohi ʻa Molomoná, ʻo hilifaki mo ia; peá ne toʻo mo e Tokāteline mo e Ngaahi Fuakavá, ʻo hili ia ʻi muʻa ʻiate ia, peá ne pehē: ʻKo e folofola ʻeni ʻa e ʻOtuá kuo tohi maʻatautolu ʻo fekauʻaki mo e ngāue ʻa e ʻOtuá, talu mei he kamataʻanga ʻo māmaní, ʻo meimei aʻu mai ki hotau kuongá. Naʻá ne pehē leva, ʻKa ko ʻeni, ko e taimi ʻoku fakafehoanaki ai mo e kau maʻu mafai moʻuí, ʻoku taʻeʻaonga ʻa e ngaahi tohi ia ko ʻení kiate au; ʻoku ʻikai ke toe ʻomi fakahangatonu ʻe he ngaahi tohi ko iá he ʻahó ni kiate kitautolu ʻa e folofola ʻa e ʻOtuá, ʻo hangē ko ia ʻoku fakahoko ʻe he lea ʻa e kau Palōfitá pe ko ha tangata ʻokú ne maʻu ʻa e Lakanga Fakataulaʻeiki Māʻoniʻoní ʻi hotau kuongá ni pea mo hotau toʻu tangatá. ʻE sai ange kiate au ke u maʻu ʻa e kau maʻu mafai moʻuí ʻi hono toenga ʻo e ngaahi meʻa kuo ʻosi hiki ʻi he ngaahi tohí.’ Ko e taumuʻa ia naʻá ne tulifua ki aí. Hili iá, naʻe pehē leva ʻe Siosefa ki he fakatahaʻangá: ʻNaʻe toki fakahā atu ʻe Misa Pilikihami ʻa e folofola ʻa e ʻEikí, pea kuó ne fakahā atu ʻa e moʻoní.’” [ʻI he Conference Report, October 1897, pp. 22–23]

“Tolú: ʻOku mahuʻinga ange e palōfita moʻuí kiate kitautolu ʻi he palōfita kuo pekiá.

ʻOku maʻu ʻe he palōfita moʻuí ʻa e mālohi ʻo e “Ongoongo ʻo e ʻAho Ní.” Naʻe ʻikai fakahinohinoʻi ʻe he ngaahi fakahā ʻa e ʻOtuá kia ʻĀtamá ʻa Noa he founga foʻu ʻo e ʻaʻaké. Naʻe fie maʻu ʻe Noa ʻene fakahā pē ʻaʻana. Ko ia ai, ko e palōfita mahuʻinga taha kiate koe pea mo aú, ʻa ē ʻoku moʻui ʻi hotau ʻahó mo hotau kuongá ʻa ia ʻoku lolotonga fakahā ki ai ʻe he ʻEikí Hono finangalo kiate kitautolú. ʻI heʻene peheé, ko e laukonga mahuʻinga taha te tau lava ke faí ko ha taha ʻo e ngaahi lea ʻa e palōfitá … ʻoku ʻi he makasini ʻa e Siasí ʻi he māhina takitaha. ʻOku maʻu hotau tuʻutuʻuni ki he māhina ʻe ono kotoa pē ʻi he ngaahi lea konifelenisi lahí, ʻa ia ʻoku paaki ʻi he makasini ko e [Liahoná].

ʻOku ou houngaʻia moʻoni ʻoku ako e lipooti konifelenisi lolotongá ko ha konga ʻo e taha hoʻomou ngaahi kalasi fakalotú—ʻa e kalasi ʻoku ui ko e “Ngaahi Akonaki ʻa e Kau Palōfita Moʻuí,” fika 333. Tuku muʻa ke u fakahīkihikiʻi atu e kalasi ko iá pea fokotuʻu atu ke ke maʻu ha tatau ʻo e tohi lēsoni e kalasí ʻi hoʻomou fale naunaú tatau ai pē pe ʻokú ke lava ʻo toʻo e kalasí pe ʻikai. …

Tokanga telia ʻa kinautolu te nau ʻai ke fehangahangai ʻa e kau palōfita kuo pekiá mo e kau palōfita moʻuí, he ʻe pule maʻu pē ʻa e kau palōfita moʻuí.

Faá: He ʻikai teitei lava ke takihalaʻi ʻe he palōfitá ʻa e Siasí.

Naʻe pehē ʻe Palesiteni Uilifooti Utalafi: “ʻOku ou pehē ki ʻIsileli, He ʻikai teitei tuku ʻe he ʻEikí au pe ko ha toe tangata kehe ʻoku hoko ko e palesiteni ʻo e Siasí ke ne takihalaʻi kimoutolu. ʻOku ʻikai kau ia ʻi he palaní. ʻOku ʻikai ʻi he finangalo ia ʻo e ʻOtuá.” (The Discourses of Wilford Woodruff, naʻe fili ʻe G. Homer Durham [Salt Lake City: Bookcraft, 1946], pp. 212–213.)

ʻOku fakamatala ʻe Palesiteni Melioni G. Lomenī ʻa e meʻa ko ʻeni naʻe hoko kiate iá:

“ʻOku ou manatuʻi e ngaahi taʻu lahi kuo hilí ʻi he taimi naʻá ku hoko ai ko ha Pīsopé, naʻá ku maʻu ʻa Palesiteni [Hiipa J.] Kalānite ke lea ki homau uōtí. Hili e houalotú, naʻá ku ʻave ia he meʻalelé ki ʻapi. … Naʻe kiʻi tuʻu ʻo ofi mai pē kiate au pea hili mai hono nimá ki hoku umá pea pehē mai: ʻʻE hoku foha, tokanga maʻu pē ki he Palesiteni ʻo e Siasí, pea kapau ʻe faifai angé peá ne talaatu ke ke fai ha faʻahinga meʻa tatau ai pē pe ʻoku hala, kapau te ke fai ia, ʻe tāpuekina koe ʻe he ʻEikí.’ Naʻá ne sio fakamamaʻu kiate au mo ne pehē mai, ʻKa ʻoku ʻikai ha meʻa ia ke ke hohaʻa ai. He ʻikai teitei tuku ʻe he ʻEikí ʻene tangata leá ke takihalaʻi ʻa e kakaí.’ [ʻI he Conference Report, October 1960, p. 78]

Nimá: ʻOku ʻikai fie maʻu e palōfitá ke ʻi ai ha faʻahinga ako fakaemāmani pe tuʻunga fakaako kae toki lea ʻi ha faʻahinga kaveinga pe ngāue ki ha faʻahinga meʻa ʻi ha faʻahinga taimi pē.

ʻI he taimi ʻe niʻihi ʻoku ʻi ai ha niʻihi ʻoku nau ongoʻi tokua ko honau poto fakaemāmani ʻi ha kaveinga pē, ʻoku māʻolunga ange ia ʻi he poto fakalangi ʻoku foaki ʻe he ʻOtuá ki Heʻene palōfitá ʻi he kaveinga tatau. ʻOku nau fakakaukau kuo pau ke maʻu ʻe he palōfitá ʻa e ngaahi fakaʻilonga fakaemāmaní pe ako tatau mo ia kuo nau ʻosi maʻú ka nau toki fakahoko ha faʻahinga meʻa ʻe lea ʻaki ʻe he palōfitá ʻe tuʻu fehangahangai mo ʻenau ako fakaemāmaní. Ko e hā e lahi ʻo e ako fakaemāmani ne maʻu ʻe Siosefa Sāmitá? Ka naʻá ne ʻomi ha ngaahi fakahā ʻi he ngaahi kaveinga kehekehe kotoa pē. Kuo teʻeki ke tau maʻu ha palōfita naʻá ne maʻu ha mataʻitohi toketā ʻi ha faʻahinga lēsoni, kae hangē ko ia ne pehē ʻe ha taha, “Mahalo he ʻikai maʻu ʻe ha palōfita hono Toketā Filōsefá ka kuo pau ke ne hoko ko ha mēmipa ʻo e Siasí.” ʻOku tau poupouʻi ʻa e ʻilo fakaemāmaní ʻi ha ngaahi tafaʻaki lahi, kae manatuʻi kapau ʻe faifaiangé pea ʻi ai ha fepaki ʻi he ʻilo fakaemāmaní mo e lea ʻa e palōfitá, tuʻu fakataha koe mo e palōfitá pea ʻe tāpuekina koe mo fakatonuhiaʻi koe ʻi he kahaʻú.

Onó: ʻOku ʻikai fie maʻu ke toki pehē e palōfitá, ʻPea naʻe folofola pehē ʻa e ʻEikí’ kae toki lau ko e folofola.

Ko e taimi ʻe niʻihi ʻoku fakakikihi ha niʻihi ʻi ha ngaahi foʻi lea. Te nau ala pehē naʻe ʻomi ʻe he palōfitá kiate kitautolu ha faleʻi ka ʻoku ʻikai ke tau haʻisia ke muimui ki ai kae ʻoua ke ne pehē ko ha fekau ia. Ka ʻoku pehē ʻe he ʻEikí fekauʻaki mo e Palōfita ko Siosefá, “Ke ke tokanga ki heʻene ngaahi lea kotoa pē mo e ngaahi fekau te ne fai kiate koé” (T&F 21:4; tānaki atu e mataʻitohi fakahihifí).

Pea ʻi he lea ko ia kau ki he fanongo ki he faleʻi mei he palōfitá, ʻoku folofola e ʻEikí ʻi he T&F 108:1, ʻo pehē: “Ko e moʻoni ʻoku folofola peheni ʻe he ʻEikí kiate koe, ʻa ʻeku tamaioʻeiki ko Laimaní: Kuo fakamolemoleʻi ʻa hoʻo ngaahi angahalá kiate koe, koeʻuhi ko hoʻo talangofua ki hoku leʻó ʻi he haʻu ki heni ʻi he pongipongí ni ke maʻu ha akonaki meiate ia ʻa ia kuó u filí” (tānaki atu e mataʻitohi fakahihifí).

Naʻe pehē ʻe Pilikihami ʻIongi, “Ko e malanga kotoa pē kuó u fai pea ʻave ki he fānau ʻa e tangatá, ʻe malava ke lau ia ko e folofola” (Journal of Discourses, 26 vols. [London: Latter-day Saints’ Book Depot], 13:95).

“Fitú: ʻOku talamai ʻe he palōfitá e meʻa ʻoku fie maʻu ke tau ʻiló, kae ʻikai ko e meʻa ʻoku tau loto ke ʻiló.

Naʻe lāunga e ngaahi tokoua ʻo Nīfaí ʻo pehē, “Kuó ke fakahā mai kiate kimautolu ʻa e ngaahi meʻa ʻoku fefeka, ʻo lahi hake ʻi he meʻa ʻoku mau malava ʻo kātakiʻí.” Ka naʻe tali ʻe Nīfai ʻo pehē, “ʻOku lau ʻe he halaiá ʻoku fefeka ʻa e moʻoní, he ʻoku hokaʻi ai honau lotó” (1 Nīfai 16:1, 3). Pe ko hono fakalea ʻe ha palōfita ʻe taha, “ʻOku ngaʻuta e fanga lupé ʻi hono tāʻí.”

Naʻe pehē ʻe Palesiteni Hāloti B. Lī:

“Mahalo he ʻikai te ke saiʻia koe ʻi he meʻa ʻoku ʻomai mei he maʻu mafai ʻo e Siasí. Mahalo ʻe fepaki ia mo hoʻomou ngaahi fakakaukau fakapolitikalé. Mahalo ʻe fepaki ia mo hoʻomou ngaahi fakakaukau fakasōsialé. Mahalo ʻe ʻikai ke lelei ia ki ha niʻihi ʻo e ngaahi meʻa ʻi hoʻomou moʻui fakasōsialé. … ʻE makatuʻunga hoʻo haó mo ʻemau haó pe ʻoku tau muimui ai pe ʻikai. … Tau tukutaha ʻetau tokangá ki he Palesiteni ʻo e Siasí.” [ʻI he Conference Report, October 1970, p. 152–153]

Ka ko e palōfita moʻuí ʻokú ne fakaʻitaʻi ʻa e māmaní. Naʻe pehē ʻe Palesiteni Kimipolo, “Naʻa mo e Siasí, ʻoku ʻi ai pē ha tokolahi ai ʻoku nau fakasanisani ʻa e fonualoto ʻo e kau palōfita ʻo e kuo hilí ka nau tolomakaʻi ʻa e kau palōfita moʻuí ʻi heʻenau ngaahi fakakaukaú” (Instructor, 95:257).

Ko e hā nai hono ʻuhingá? Koeʻuhí he ʻoku lea ʻaki ʻe he palōfita moʻuí ʻa e meʻa ʻoku fie maʻu ke ʻiloʻi he taimi ní, ka ʻoku saiʻia ange ʻa e māmaní ke pekia ʻa e kau palōfitá pe tokanga pē ki heʻenau meʻa pē ʻanautolú. ‘Oku loto e kau fie mataotao he saienisi politikalé ke ʻoua naʻa lea e palōfitá ki he meʻa fakapolitikalé. ‘Oku loto e kakai ʻoku pehē ʻoku nau maʻu mafaí ke ʻoua naʻa lea e palōfitá ki he liliu ʻo e faʻahinga ʻo e tangatá. Pea ʻoku fai pehē atu ai e lisí.

Ko e anga ʻo ʻetau tali e lea ʻa ha palōfita moʻui ʻi he taimi ʻokú ne talamai ai e meʻa ʻoku fie maʻu ke tau ʻilo, kae ʻikai ke tau fie fanongo ki aí, ko ha sivi ia ʻo ʻetau tuʻunga faivelengá.

Naʻe pehē ʻe Palesiteni Melioni G. Lomenī, “Ko ha meʻa faingofua ia ke tui ki he kau palōfita kuo pekiá.” Pea naʻá ne ʻomi leva e fakatātā ko ʻení:

“ʻI ha ʻaho ʻe taha ʻi he kei moʻui ʻa Palesiteni Kalānité, naʻá ku tangutu ʻi hoku ʻōfisí mei he kauhala ʻe tahá hili ha konifelenisi lahi. Ne haʻu ha tangataʻeiki toulekeleka ke sio mai kiate au. Naʻá ne fuʻu lotomamahi ʻaupito ʻi ha meʻa naʻe lea ʻaki ʻi he konifelenisí ni ʻe ha niʻihi ʻo e Kau Taki Māʻolungá, ʻo kau ai au. Naʻe lava ke u tala mei heʻene leá naʻá ne haʻu mei ha fonua muli. Hili ʻeku feingaʻi ke kiʻi fakalongolongo hifo kae lava ke ne fanongó, naʻá ku pehē ange, ʻKo e hā naʻá ke haʻu ai ki ʻAmeliká?’ ʻʻOku ou ʻi hení koeʻuhí naʻe talamai ʻe ha palōfita ʻa e ʻOtuá ke u haʻu.’ Naʻá ku hoko atu, ʻKo hai ʻa e palōfitá.’ ʻUilifooti Utalafi.’ ʻʻOkú ke tui ko Uilifooti Utalafí ko ha palōfita ia ʻa e ʻOtuá?’ ʻʻIo, ʻoku ou tui ki ai.’ ʻʻOkú ke tui ko Palesiteni Siosefa F. Sāmitá ko ha palōfita ia ʻa e ʻOtuá?’ ‘ʻIo, tangataʻeiki.’

“Naʻe hoko atu leva ʻa e fehuʻi mahuʻinga tahá. ʻʻOkú ke tui ko Hiipa J. Kalānité ko ha palōfita ia ʻa e ʻOtuá?’ Ko ʻene talí, ʻʻOku ou tui ʻoku totonu ke ʻoua naʻá ne lea fekauʻaki mo e tokoni ki he kakai toulekeleká.’

“Ko ʻeni ʻoku ou talaatu ʻoku iku ha tangata ʻi he tuʻunga ko ʻení ki he hē mei he moʻoní. ʻOkú ne siʻaki hono ngaahi faingamālie ki he moʻui taʻengatá. ʻOku pehē foki ʻa e tokotaha kotoa pē ʻoku ʻikai lava ʻo muimui ki he Palōfita moʻui ʻa e ʻOtuá.” [ʻI he Conference Report, April 1953, p. 125]

Valú: ʻOku ʻikai fakangatangata e palōfitá ʻe he ʻuhinga ʻa e tangatá.

ʻE ʻi ai e e ngaahi taimi ʻe pau ke ke fili ai ʻi he vahaʻa ʻo e ngaahi fakahā ʻa e ʻOtuá mo e ʻuhinga ʻa e tangatá—ʻi he vahaʻa ʻo e palōfitá mo e taki fakapolitikalé pe palōfesá. Naʻe pehē ʻe he Palōfita ko Siosefa Sāmitá, “Ko e hā pē ha meʻa ʻoku fie maʻu ʻe he ʻOtuá ʻoku totonu ia, tatau ai pē pe ko e hā, neongo ʻe ʻikai ke tau sio ki hono ʻuhingá he taimi ko iá kae ʻoua kuo ʻosi ha taimi fuoloa hili hono ʻilo e meʻa ne hokó” (Scrapbook of Mormon Literature, vol. 2, p. 173).

ʻE ngali ʻuhinga lelei nai ki ha toketā mata ʻoku fekauʻi ke faitoʻo ha tangata kui ʻaki e ʻanuʻanu ʻi he efú, faʻu ha meʻi mota, pea vali ʻaki e mata ʻo e tangatá pea talaange leva ke ʻalu ʻo fufulu ʻi ha vai ʻuli? Ka ko e meʻa tofu pē ʻeni naʻe fai ʻe Sīsū ki ha tangata ʻe taha, pea naʻe fakamoʻui ia. (Vakai, Sione 9:6–7.) ʻOku ʻuhinga lelei nai ke faitoʻo e kiliá ʻaki hono talaange ki ha tangata ke kaukau tuʻo fitu ʻi ha vaitafe pau? Ka ko e meʻa tofu pē ia naʻe talaange ʻe ʻIlaisa ki ha tangata kilia ke ne faí, pea naʻe fakamoʻui ia. (Vakai, 2 Ngaahi Tuʻi 5.)

“He ʻoku pehē ʻe [he ʻEikí] ʻoku ʻikai ko hoʻomou ngaahi mahaló ʻa ʻeku mahaló, pea ʻoku ʻikai ko homou ngaahi halá ʻa hoku ngaahi halá. He ʻoku hangē ʻoku māʻolunga hake ʻa e ngaahi langí mei he māmaní, ʻoku pehē hono māʻolunga ʻo hoku ngaahi halá, pea mo ʻeku mahaló ʻi hoʻomou ngaahi mahaló.” [ ʻĪsaia 55:8, 9]

Hivá: ʻE lava ke maʻu ʻe he palōfitá ha fakahā ki ha faʻahinga meʻa pē—fakatuʻasino pe fakalaumālie.

Naʻe pehē ʻe Palesiteni Pilikihami ʻIongi:

“Naʻe fehangahangai lahi ha niʻihi ʻo e kau tangata taki ʻi Ketilaní mo Siosefa ko e Palōfitá, ʻi heʻene kau ʻi he ngaahi meʻa fakatuʻasinó. …

“Naʻá ku pehē ʻi ha fakataha fakakātoa ʻa e Kāingalotú, ʻʻE Kaumātuʻa ʻo ʻIsileli, … ʻe lava nai ha niʻihi ʻiate kimoutolu ʻo fakahā mai e ngataʻanga ʻokú ne fakamavahevaheʻi e meʻa fakalaumālié mo fakatuʻasinó ʻi he Puleʻanga ʻo e ʻOtuá koeʻuhí ke mahino kiate au?’ Naʻe ʻikai ha taha ʻiate kinautolu te ne lava ʻo fai ia. …

“ʻOku ou fakafepakiʻi ha tangata pē ʻi he māmaní te ne talamai e hala ʻoku totonu ke fononga ai ha Palōfita ʻa e ʻOtuá, pe fakahā mai hono fatongiá, mo e ngataʻanga kuo pau ke ne ngata aí, ʻi hono talamai e ngaahi meʻa fakatuʻasinó pe fakalaumālié. ʻOku fehokotaki ʻa e ngaahi meʻa fakatuʻasinó mo fakalaumālié ʻo ʻikai lava ʻo veteki, pea ʻe pehē maʻu ai pē.” [Journal of Discourses, 10:363–364]

Hongofulú: ʻE lava ke kau e palōfitá ʻi he ngaahi meʻa fakapuleʻangá.

Ko e taimi ʻoku angatonu ai ha kakai, ʻoku nau fie maʻu e lelei tahá ke tataki kinautolu ʻi he puleʻangá. Naʻe hoko ʻa ʻAlamā ko e taki ʻo e Siasí mo e puleʻangá ʻi he Tohi ʻa Molomoná, naʻe hoko ʻa Siosefa Sāmita ko e ʻōfisa kolo ʻo Nāvuú, pea kōvana ʻa Pilikihami ʻIongi ʻi ʻIutā. Naʻe kau ʻa Īsaia ʻi he faleʻi kau ki he ngaahi meʻa fakapolitikalé pea naʻe pehē ʻe he ʻEikí Tonu Pē fekauʻaki mo ʻene ngaahi leá, “ʻOku mahuʻinga ʻa e ngaahi lea ʻa ʻĪsaiá” (3 Nīfai 23:1). Ko kinautolu te nau fakamavahevaheʻi e kau palōfitá mei he ngaahi meʻa fakapolitikalé te nau taʻofi e ʻOtuá mei he puleʻangá.

Hongofulu mā tahá: Ko e ongo kulupu ʻoku faingataʻa taha ke muimui ki he palōfitá ʻa e kau hīkisia ʻoku potó mo e hīkisia ʻoku koloaʻiá.

Mahalo ʻe fakakaukau e kau potó ʻoku toki tataki fakalaumālie pē ʻa e palōfitá ʻi he taimi ʻoku loto tatau ai mo kinautolú, ka ʻikai ta ko e fakahā pē ʻe he palōfitá ia ʻene fakakaukaú—ʻo lea hangē ha tangatá. Mahalo ʻe fakakaukau ʻa e kau tuʻumālié ʻoku ʻikai ke nau fie maʻu ke maʻu faleʻi mei ha palōfita masivesiva.

ʻOku tau lau mei he Tohi ʻa Molomoná:

“ʻOiauē ʻa e palani olopoto ʻa e tokotaha angakoví! ʻOiauē ʻa e laukau mo e vaivai mo e vale ʻa e kakaí! ʻO ka nau ka akonekina, ʻoku nau pehē ʻoku nau poto, pea ʻoku ʻikai te nau tokanga ki he akonaki ʻa e ʻOtuá, he ʻoku nau leʻei ia ki he tafaʻakí, ʻo mahalo ʻoku nau ʻiloʻi ʻiate kinautolu pē; ko ia, ko e vale pē ʻa honau potó pea ʻoku ʻikai ʻaonga ia kiate kinautolu. Pea kuo pau ke nau mate.

“Ka ʻoku lelei ke akonekina, ʻo kapau te nau tokanga ki he ngaahi akonaki ʻa e ʻOtuá.

“Pea ʻilonga ia ʻoku tukitukí, te ne fakaava kiate ia; pea ko e kakai potó, mo e kau akonekiná, pea mo kinautolu ʻoku koloaʻiá, ʻa kinautolu ʻoku pōlepole koeʻuhi ko honau potó mo ʻenau ʻiló, pea mo ʻenau ngaahi koloá—ʻio, ko ia ia ʻa kinautolu ʻokú ne fehiʻa ki aí; pea kapau ʻe ʻikai te nau siʻaki ke mamaʻo ʻa e ngaahi meʻá ni, pea lau ʻa kinautolu ko e kau vale ʻi he ʻao ʻo e ʻOtuá, pea fakavaivai ʻi he fuʻu loto-fakatōkilalo lahi, ʻe ʻikai te ne fakaava kiate kinautolu.” [2 Nīfai 29:28, 29, 42; tānaki atu e mataʻitohi fakahihifí.]

Hongofulu mā uá: ʻOku ʻikai manakoa e palōfitá ʻe he māmaní pe kau anga fakamāmaní.

ʻI hono fakahā ʻe ha palōfita ʻa e moʻoní, ʻokú ne fakamavahevaheʻi ʻa e kakaí. ʻOku tokanga e kau loto faitotonú ki heʻene ngaahi leá, ka ko e kau anga taʻe māʻoniʻoní ʻoku nau tukunoaʻi e palōfitá pe fakafepakiʻi ia. ʻI he taimi ʻoku fakahaaʻi ai ʻe he palōfitá e angahala ʻa e māmaní, ʻoku feinga ʻa e māmaní ke taʻofi e ngutu ʻo e palōfitá, pe ʻai ke hangē ʻoku ʻikai ʻi ai ha palōfitá, kae ʻikai fakatomalaʻi ʻenau ngaahi angahalá. ʻOku ʻikai teitei hoko e manakoá ko ha meʻafua ʻo e moʻoní. Kuo lahi fau e kau palōfita kuo fakapoongi pe siʻaki. Te mou lava ʻo ʻamanaki heʻetau fakaofi atu ki he hāʻele ʻangaua mai ʻa e ʻEikí, ko e taimi ʻe fakaʻau ʻo fai angahala lahi ange ai e kakai ʻo māmaní, ʻe siʻi ange ʻenau manakoa e palōfitá.

Hongofulu mā tolú: Ko e palōfitá mo hono ongo tokoní ʻa e Kau Palesitenisī ʻUluakí—ko e kōlomu māʻolunga taha ia ʻi he Siasí.

ʻOku ui ʻe he ʻEikí e Kau Palesitenisī ʻUluakí ʻi he Tokāteline mo e Ngaahi Fuakavá “ko e fakataha alēlea māʻolunga taha ʻo e Siasí” (107:80) pea folofola ʻo pehē, “pea ko ia ia ʻokú ne tali aú, ʻokú ne tali ʻa kinautolu, ko e Kau Palesiteni ʻUluakí, ʻa ia kuó u fekauʻi atú” (112:20).

Hongofulu mā faá: Muimui ki he palōfitá mo e kau palesitenisií—ʻa e palōfita moʻuí mo e Kau Palesitenisī ʻUluakí—pea te ke monūʻia, fakafisingaʻi kinautolu pea te ke faingataʻaʻia.

ʻOku fakamatala ʻa Palesiteni Hāloti B. Lī ki he meʻa ko ʻeni mei he hisitōlia ʻo e Siasí ʻo pehē:

“ʻOku fai e talanoá ʻi he ngaahi fuofua ʻaho ʻo e Siasí—ʻoku ou tui ʻi Ketilani—naʻe fakataha fakafufū ai ha niʻihi ʻo e kau taki ʻi he ngaahi fakataha alēlea pule ʻo e Siasí pea feinga ke aleaʻi e founga te nau lava ʻo tukuange ai e Palōfita ko Siosefá mei hono tuʻunga fakatakimuʻá. Naʻa nau fai ha fehalaaki ʻi hono fakaafeʻi ʻa Pilikihami ʻIongi ki ha taha ʻo e ngaahi fakataha fakafufū ko ʻení. Naʻá ne valokiʻi kinautolu hili ʻene fanongo ki he taumuʻa ʻo ʻenau fakatahá. Ko e konga ʻeni ʻo ʻene leá: He ʻikai ke mou lava ʻo fakaʻauha e fokotuʻu ʻo ha palōfita ʻa e ʻOtuá, ka te mou lava ʻo motuhi hoʻomou fehokotaki ki he palōfita ʻa e ʻOtuá pea mou ʻalu hifo ki heli.’” [ʻI he Conference Report, April 1963, p. 81]

Naʻe pehē ʻe Palesiteni N. ʻElitoni Tena ʻi ha konifelenisi lahi ʻa e Siasí:

“Naʻe lea mahino e Palōfitá ʻi he pongipongi Falaité, ʻo talamai hotau ngaahi fatongiá. …

“Naʻe pehē mai ʻe ha tangata kiate ia hili iá, ʻʻOkú ke ʻilo ʻoku ʻi ai e kakai ʻi homau siteití ʻoku nau tui ki he muimui ki he Palōfitá ʻi he meʻa kotoa pē ʻoku nau pehē ʻoku totonú, ka ko e taimi ʻoku nau pehē ʻoku hala ai ha meʻa, pea ʻikai lelei ai kiate kinautolú, ʻoku kehe leva ia.’ Naʻá ne pehē, ʻʻOku nau hoko leva ko e palōfita ʻiate kinautolu pē. ʻOku nau fili e meʻa ʻoku finangalo mo ʻikai finangalo ki ai e ʻEikí.’

“Naʻa ku fakakaukau ki hono moʻoni, mo hono mamafa ʻi heʻetau kamata ke fili pe ko fē ʻi he ngaahi fuakavá mo e ngaahi fekaú te tau tauhi mo muimui ki aí. Ko e taimi ʻoku tau fakapapauʻi ai he ʻikai ke tau tauhi pe muimui ki ha niʻihí, ʻoku tau toʻo leva ʻe kitautolu e fono ʻa e ʻEikí kiate kitautolu pea hoko ko e kau palōfita ʻiate kitautolu pē, pea ʻoku ou talaatu, ʻe takihalaʻi kitautolu, koeʻuhí ʻoku tau hoko ko e kau palōfita loi ʻiate kitautolu ʻi he taimi ʻoku ʻikai ke tau muimui ai ki he Palōfita ʻa e ʻOtuá. ʻIkai, ʻoku ʻikai totonu ke tau teitei fakafaikehekeheʻi e ngaahi fekau ko ʻení, ki he meʻa ʻoku totonu mo ʻikai totonu ke tau tauhí.” [ʻI he Conference Report, October 1966, p. 98; tānaki atu e mataʻitohi fakahihifí]

“Naʻe pehē ʻe he Palōfita ko Siosefa Sāmitá, “Falala ki he Kau Palesitenisií pea maʻu e fakahinohinó” (Teachings of the Prophet Joseph Smith, filifili ʻe Siosefa Filitingi Sāmita [Salt Lake City: Deseret Book Co., 1938], p. 161). Ka naʻe ʻikai fai ia ʻe ʻAlamoni Papiti, pea ʻoku folofola ʻa e ʻEikí ʻi he Tokāteline mo e Ngaahi Fuakava vahe 124, veesi 84, ʻo pehē: “Pea ko ʻeku tamaioʻeiki ko ʻAlamoni Papití, ʻoku ʻi ai ʻa e ngaahi meʻa lahi ʻa ia ʻoku ʻikai te u loko leleiʻia ai, vakai, kuó ne feinga ke ne fokotuʻu ʻene akonakí kae ʻikai ko e akonaki kuó u tuʻutuʻuní, ʻa ia ko e akonaki ʻa e Kau Palesiteni ʻo hoku Siasí.”

ʻI hono aofangatukú, tau fakamatalaʻi fakanounou muʻa e kī maʻongoʻonga ko ʻení, ʻa e “Ngaahi Meʻa Mahuʻinga ʻe Hongofulu Mā Fā ki he Muimui ki he Palōfitá,” he ʻoku makatuʻunga ai hotau fakamoʻuí.

ʻUluakí: Ko e palōfitá ʻa e tangata pē ʻe taha ʻoku lea maʻá e ʻEikí he meʻa kotoa pē.

Uá: ʻOku mahuʻinga ange e palōfita moʻuí kiate kitautolu ʻi he ngaahi folofola ʻoku fakaʻaongaʻi ʻe he Siasí.

Tolú: ʻOku mahuʻinga ange e palōfita moʻuí kiate kitautolu ʻi he palōfita kuo pekiá.

Faá: He ʻikai teitei lava ke takihalaʻi ʻe he palōfitá ʻa e Siasí.

Nimá: ʻOku ʻikai fie maʻu e palōfitá ke ʻi ai ha faʻahinga ako fakaemāmani pe tuʻunga fakaako kae toki lea ʻi ha faʻahinga kaveinga pe ngāue ki ha faʻahinga meʻa ʻi ha faʻahinga taimi pē.

Onó: ʻOku ʻikai fie maʻu ke toki pehē e palōfitá, ʻPea naʻe folofola pehē ʻa e ʻEikí’ kae toki lau ko e folofola.

Fitu: ʻOku talamai ʻe he palōfitá e meʻa ʻoku fie maʻu ke tau ʻiló, kae ʻikai ko e meʻa ʻoku tau loto ke ʻiló.

Valú: ʻOku ʻikai fakangatangata e palōfitá ʻe he ʻuhinga ʻa e tangatá.

Hivá: ʻE lava ke maʻu ʻe he palōfitá ha fakahā ki ha faʻahinga meʻa pē— fakatuʻasino pe fakalaumālie.

Hongofulú: ʻE lava ke kau e palōfitá ʻi he ngaahi meʻa fakapuleʻangá.

Hongofulu mā tahá: Ko e ongo kulupu ʻoku faingataʻa taha ke muimui ki he palōfitá ʻa e kau hīkisia ʻoku potó mo e hīkisia ʻoku koloaʻiá.

Hongofulu mā uá: ʻOku ʻikai manakoa e palōfitá ʻe he māmaní pe kau anga fakamāmaní.

Hongofulu mā tolú: Ko e palōfitá mo hono ongo tokoní ʻa e Kau Palesitenisī ʻUluakí—ko e kōlomu māʻolunga taha ia ʻi he Siasí.

Hongofulu mā faá: Muimui ki he palōfitá mo e kau palesitenisií—ʻa e palōfita moʻuí mo e Kau Palesitenisī ʻUluakí—pea te ke monūʻia, fakafisingaʻi kinautolu pea te ke faingataʻaʻia.

ʻOku ou fakamoʻoni ʻoku moʻoni ʻa e ngaahi meʻa mahuʻinga ʻe hongofulu mā fā ko ʻení ʻi he muimui ki he palōfita moʻuí. Kapau ʻoku tau fie ʻilo pe ʻoku fēfē hotau tuʻunga mo e ʻEikí, tau fehuʻi hifo leva kiate kitautolu hotau tuʻunga mo ʻEne kapiteni fakamatelié. ʻOku fenāpasi vāofi fēfē ʻetau moʻuí mo e ngaahi lea ʻa e pani ʻa e ʻEikí—ʻa e palōfita moʻuí, ʻa e Palesiteni ʻo e Siasí, pea mo e Kōlomu ʻo e Kau Palesitenisī ʻUluakí?

Ko ʻeku lotú ke faitāpuekina kotoa kitautolu ʻe he ʻOtuá ke tau falala ki he palōfitá mo e kau palesitenisií ʻi he ngaahi ʻaho matuʻaki faingataʻa mo mahuʻinga ʻoku hanganaki maí. ʻI he huafa ʻo Sīsū Kalaisí. ʻĒmeni.