Pene 12

Te parau-ti‘a

E faatupu na tatou i roto ia tatou iho te parau-ti‘a—taua maitai ra o te varua ta tatou e haafaufaa rahi nei i roto ia vetahi ê.

No roto mai i te oraraa o Spencer W. Kimball

Hou to’na piiraahia ei Aposetolo, ua rave itoito na o Spencer W. Kimball i te ohipa i roto i te oraraa o te tereraa faufaa e o te huiraatira i Arizona. Ua riro oia ei fatu e te tahi atu taata no te hoê ohipa no te parururaa e te hooraa fenua e ua rave oia i te ohipa i roto i te mau taatiraa i roto i to’na ihoa oire e i roto i te tuhaa fenua ato‘a. Ua matauhia oia i roto i teie nei mau ohipa no to’na haavare ore e ton‘a parau-ti‘a. Teie tei papa‘ihia no ni‘a ia’na: « Ua riro te parau-ti‘a ei tapa‘o tumu tei itehia e te mau taata i roto ia Spencer W. Kimball… Ua riro noa oia ei taata parau-ti‘a i te mau taime ato‘a, e taata tei rave i te mea ta’na i fafau e rave oia, e tei tau‘a parau ma te parau-ti‘a e ma te mana‘o taviri ore ».¹

Ua riro te parau-ti‘a ei tuhaa no to’na huru mai te tau mai â o to’na apî-roa-raa ra, mai ta teie nei aamu e faaite nei: « Ua rave o Spencer e te tahi o te mau tamaroa i te hoê puaahorofenua e te hoê pereoo huti tahito no te faaohipa i roto i te hoê tere mata‘ita‘i no ta’na piha haapiiraa. Ua mutu te hoê niuniu o te pereoo huti i ni‘a i te poromu ofafai. I te mahana i muri iho ua parau o Spencer i to’na mau hoa e, ‘E ti‘a ia tatou paato‘a ia tauturu i te aufaaraa no te niuniu tei mutu, aita roa’tu râ te hoê i hinaaro i te tauturu. Ua taparu oia ia ratou, ma te parau atu e, ‘E ti‘a ia aufauhia teie niuniu, mai te mea e ti‘a ia‘u iho ia aufau i te reira ».²

I roto i te hoê a‘oraa i te amuiraa rahi a te Autahu‘araa i te ava‘e atopa 1974, ua faahiti te peresideni Marion G. Romney, te Tauturu Piti i roto i te Peresideniraa Matamua i te hi‘oraa maitai o te peresideni Kimball: « Ua riro oia na roto i te mau matahiti e rave rahi ei hoho‘a no te parau-ti‘a. Aita roa e taata i feââ e e rave faaoti oia i te ti‘aturiraa mo‘a ta te Fatu i tuu atu i ni‘a iho ia’na noa’tu e e fifi to’na oraraa… Auê te hanahana e, e te mau taea‘e no te autahu‘araa, ahani ua noaa ia tatou paato‘a te parau-ti‘a o te hoê peresideni Kimball ».³

Te mau haapiiraa a Spencer W. Kimball

Ua riro te parau-ti‘a ei tuhaa faufaa-rahi-roa no te huru maitai i roto i te taata nei.

Ua riro te parau-ti‘a (te hinaaro e te aravihi i te ora mai te au i to tatou mau ti‘aturiraa e ta tatou mau fafauraa) te hoê o te mau ofa‘i niu no te huru maitai i roto i te taata, aita ana‘e teie huru maitai eita ia e nehenehe i te hoê taata ia ti‘aturi i te oaoa i te parahiraa i mua i te aro o te Atua i ô nei e a muri noa’tu.⁴

Te parau-ti‘a o te hoê ïa huru aore râ te hoê maitai no te hoê mea tei hope roa, tei vahi-ore-hia aore râ tei ore i ofatihia. O te taato‘araa ïa e te hoê mea tei ore i parari. O te mâ ïa e te paari i te pae morare. O te parau mau ïa tei ore i haaviiviihia e te aau tae mau. O te itoito ïa, te hoê ïa maitai taata faufaa roa o te ore roa e hope i te tai‘o. O te haavare ore ïa, te afaro, e te ti‘a. A rave ê atu teie nei mau mea e vai noa mai ia te apu aore e maa i roto…

Te parau-ti‘a i roto i te mau taata e te mau taiete ohipa e ere ïa i te aniraa e, « Eaha ïa ta vetahi ê e feruri ra no‘u e ta‘u mau ohipa e rave ra ? » o teie râ, « Eaha ïa ta‘u feruriraa no ni‘a ia‘u iho mai te mea e rave au i te reira aore râ ia ore au e rave i te reira ? » E mea au anei ? E mea ti‘a anei ? E faati‘a anei te Fatu ?

E ti‘a i te parau-ti‘a i roto i te taata ia faahaere mai i te hau i roto i te taata iho, te papûraa o te opuaraa, e te parururaa i roto i te ohipa. Ia ore râ te parau-ti‘a e tupu mai ïa te: amahamaharaa, te măta‘u, te oto, e te papû-ore-raa.⁵

E ohipa maitai roa mai te mea e e hiopo‘a tatou paato‘a i to tatou mau oraraa mai te mea te vai nei te tahi toe‘a no te aau haavare e te ohipa iino aore râ te hape tei hunahia. Aore râ te vai ra anei i raro a‘e i te mau tapo‘i no te otoheraa e te feruriraa te tahi mau hara e te tahi mau ohipa hape tei hunahia ? Te vai ra anei te tahi mau hara tahito ta outou i mana‘o e ore roa e itehia ? Te tamata ra anei tatou i te huna i te mau mana‘o au ore e to tau mau haamauruuraa i to tatou mau hiaai rii—ma te feruri e mau mea ha‘iha‘i e aita e hopea to te reira mau hara ha‘iha‘i ? Te vai ra anei te mau vahi i roto i to tatou mau mana‘o e ta tatou mau ohipa e to tatou mau huru o ta tatou e hinaaro ra i te huna i mua i te feia ta tatou e faatura rahi nei ?

E faaite tatou i te parau-ti‘a na roto i te haapa‘oraa i ta tatou mau fafauraa ma te hanahana.

Ia rave tatou i te hoê fafauraa aore râ te hoê faaauraa e te Atua, e ti‘a ia tatou ia tape‘a i te reira noa’tu eaha te mea e titauhia ia tatou ia rave. Eiaha tatou ia riro mai te piahi tei farii i te ora mai te au i te tahi mau ture no te oraraa e o te ofati i ta’na tapuraa e o te tamata i te hi‘o eaha te maororaa e nehenehe ia’na ia huna i ta’na ohipa hape. Eiaha tatou ia riro mai te misionare o tei farii i te tavini i te Fatu no na matahiti e piti, e o te haamau‘a i to’na taime na roto i te faatau e te imiraa i te mau otoheraa. Eiaha tatou ia riro mai te melo no te Ekalesia o te amu i te oro‘a i te po‘ipo‘i e o te ofati i te ture no te mahana Sabati i taua avatea ra.⁷

Na roto i te rave tapetepeteraa i ta tatou mau fafauraa e e tuino ïa tatou i to tatou iho mau oraraa mure ore… E mea ohie te faati‘araa ia oe iho e e mea au roa te imiraa i te mau otoheraa, ua haamaramarama mai râ te Fatu i roto i te heheuraa apî e « ia tamata tatou i te tapoi mai i ta tatou mau hara, e a ore râ ia haamauruuru i to tatou teoteo, to tatou ho‘i opuaraa hahavai ra… e faananaue atu te mau ra‘i ia ratou iho, e oto te varua o te Fatu; e ua vai ihohia’tu ai [te taata] ia’na iho ra, ia tue atu i te mau tara ra » (PH&PF 121:37–38).

Oia mau, e nehenehe ta tatou e ma‘iti; e ti‘amâraa to tatou, eita râ e nehenehe ia tatou ia horo ê atu i mua i te mau hopea no ta tatou mau ma‘itiraa. E mai te mea te vai nei te hoê paruparu i roto i to tatou huru parau-ti‘a, i reira ïa te diabolo e haapu‘ai ai i ta’na aroraa.⁸

Tei roto i te mau fafauraa ta tatou e rave e te Atua te mau parau faaau no te rave, eiaha noa no te haapaeraa i te rave, ia rave i te parau-ti‘a e ia ape ato‘a i te ino. Ua rave te mau tamarii no Iseraela i taua mau huru fafauraa ra na roto i te parauraa’tu ia Mose e, « Te mau parau ato‘a ta Iehova i parau, e rave ïa matou » (Exodo 19: 8; ua amuihia’tu te reta opa), e noa’tu e aita o Mose i atea maoro atu, ua ofati ratou i ta ratou fafauraa na roto i te raveraa i te ohipa hape. Te na reira ato‘a nei tatou i roto i te pape no te bapetizoraa e e fafau faahou tatou i roto i te raveraa i te pane e te pape. Ia ore tatou e faatura i teie nei mau fafauraa, ia pato‘i tatou i te tavini aore râ i te farii i te hopoi‘a e ia rave iti noa tatou mai te au i to tatou puai, e hara ïa te reira no te rave oreraa…

Ua rave te mau taata tei mau i te Autahu‘araa a Melehizedeka e te feia ato‘a tei farii i to ratou mau oro‘a hiero i te tahi atu â mau fafauraa taa ê no te rave, no te rave i te ohipa parau-ti‘a. Ua faaau te Fatu te mau faaauraa i rotopu i to tatou Metua i te Ao ra e te mau taata tei mau i te autahu‘araa i « te tăpŭraa e te fafauraa » [PH&PF 84: 39]. E ofati te taata i te fafauraa no te autahu‘araa na roto i te ofatiraa i te mau faaueraa—e na roto ato‘a ra i te rave oreraa i ta’na ohipa. E no reira, ia ore te taata e rave i te hoê noa‘e ohipa, te ofati ra ïa oia i teie nei fafauraa.⁹

A tape‘a i ta outou mau fafauraa. A tape‘a i to outou parau-ti‘a. A haapa‘o i ta outou mau fafauraa. A horo‘a’tu i te Fatu i teie matahiti e i te mau matahiti ato‘a i to outou haapa‘oraa rahi e te faaiteraa hopea roa‘e no to outou faaroo. A rave i te reira « ma to outou hanahana » e e haamaitaihia ïa outou i teie nei e a muri noa’tu.

Mai te mea e taata parau-ti‘a ore tatou, te haavare ra ïa tatou ia tatou iho.

Te mau ohipa parau-ti‘a ore ato‘a e haamata e e tupu mai ïa te reira mai roto mai i te ohipa hape ta tatou e parau nei e, te imiraa i te mau otoheraa. Teie te huru matamua e te hau roa‘e i te ino no te haavare. Te haavare nei tatou ia tatou iho.¹¹

Te faati‘araa ia’na iho e enemi ïa no te tatarahaparaa. E tamau noa te Varua o te Atua i te haapuai, i te tauturu, i te faaora i te feia parau-ti‘a, tera râ e faaea vave te Varua o te Atua i te mârô i te taata o te imi i te mau rave‘a no te faati‘a ia’na iho i roto i ta’na ohipa hape.¹²

Ua parau to tatou Rahunui i roto i te parau tei nana‘ohia i ni‘a i te mou‘a no Sinai, « Eiaha roa oe e eiâ ». [Exodo 20: 15]. Ua faahiti-faahou-hia mai te reira i roto i te parau no te Faaho‘iraa-hiamai, « Eiaha oe e eiâ » (PH&PF 59: 6).

I roto i te oraraa politita e i roto i te oraraa o te taata iho, te haruru nei te parau a te Fatu: « Eiaha oe e eiâ… eiaha ato‘a e rave i te hoe mea mai te reira te huru » (PH&PF 59: 6).

Te itehia nei tatou i te faati‘araa ia tatou iho i roto i te mau huru ato‘a no te parau-ti‘a ore, mai te eiâraa i roto i te fare toa, tei riro ei ohipa ino e ravehia nei e rave rahi mau milioni taata o te parau hua nei e e feia maitai ratou e te tura.

E itehia te parau-ti‘a ore i roto i te mau huru ê atu e rave rahi… na roto i te haavare hereraa ia roaa te moni, na roto i te eiâraa i te mau afata moni a ore râ te eiâraa i te mau tauhaa a te mau fatu ohipa, na roto i te faahaperaa i te mau tabula faufaa… na roto i te aniraa na roto i te haavare ia faaorehia te mau tute, na roto i te aitarahuraa i te hau fenua aore râ i te fare moni ma te ore e opua i te faaho‘i; na roto i te faaite haperaa i te topatariraa no te ape i te aufau i te mau tarahu, na roto i te eiâraa i te moni e te tahi atu mau taoa faufaa rahi ê atu i roto i te mau aroa poromu aore râ i roto i te mau fare, na roto i te eiâraa i te taime, te rave itiraa i te hora ohipa e a farii noa’i i te moni ohipa no te taato‘araa o te mahana; na roto i te tereraa na ni‘a i te mau pereoo uta taata ma te aufau ore i te titeti; e te mau huru ohipa parau-ti‘a ore ato‘a i roto i te mau vahi ato‘a e te mau tereraa ohipa ato’a…

Ua riro te parau e « Te na reira nei te mau taata ato‘a » ei rave‘a no te faati‘a i te mau ohipa ti‘a ore. E ore roa te hoê sotaiete e maitai mai te mea aita e parau-ti‘a, aita e ti‘aturiraa e e haavîraa i roto ia’na.¹³

E taata parau-ti‘a ore te taata o tei hoo rahi mai i te tauhaa e o tei ore ho‘i e nehenehe mau ia’na ia aufau atu i te reira. E eîa te reira. Aita rea to te taata hanahana mai te mea eita oia e aufau i ta’na mau tarahu. E au ra ia‘u nei e te mau mea maitai ato‘a ta te taata e oaoa nei ma te aufau ore i te taata fatu e ere roa ïa te mea parau-ti’a… E ere i te mea haamâ i te mau taime ato‘a ia aitarahu tatou, e mea haamâ râ ia haamo‘e tatou i te aufau i te mau tarahu.¹⁴

E haaveve paha te eiâraa i te mau toata aore râ te mau tara aore râ te mau tauhaa i te taata na’na teie nei mau mea, e rave‘a râ teie o te faafaufaa ore e o te tuino i te taata o te eiâ.

E haamaitai to tatou faito parau-ti‘a i to tatou mau utuafare e i te tahi atu mau taata.

Te metua o te faaiti i te faito matahiti o te tamarii ia ore oia e aufau i te titeti taata paari no te mau ha‘utiraa, no te mau tere manureva, no te mau tere na ni‘a i te pereoo auahi e no te tere na ni‘a i te mau pereoo utaraa taata, te haapiiraa ïa oia i te tamarii ia rave i te ohipa parau-ti‘a ore. Eita oia e haamo‘e i teie nei mau haapiiraa. Te faati‘a nei te tahi mau metua i te tamarii ia ofati i te ture no ni‘a i te mau heitiri, te faaohiparaa i te mau pupuhi, te tai‘araa e te pupuhiraa i te animala ma te parau-faati‘a ore. Te faati‘ahia ra te mau tamarii ia faahorohoro i te pereoo ma te parau faati‘a ore no te faahoro e aore râ ia haavare i to ratou faito matahiti. O ratou o te rave i teie nei mau mea ha‘iha‘i ma te ore e faaite i te reira, mai te raveraa i te maa hotu no roto mai i te aua o te taata tupu, te hoê penitara i ni‘a i te hoê iri amuraa maa, te hoê puohu monamona i ni‘a i te iri faaiteiteraa, ua haapiihia ïa ratou paato‘a na roto i te mărû e, e ere ia te mau eiâraa riirii noa e te mau ohipa parau-ti‘a ore i te mea ino roa.¹⁶

Te mau metua o te « huna i te hape a ta ratou mau tamarii », o te tatarahapa no ratou e o te aufau no ta ratou mau eiâraa, te ere nei ïa ratou i te hoê rave‘a faufaa rahi roa no te haapii i te tahi haapiiraa e te tu‘ino rahi nei ïa ratou, ma te ite ore, i ta ratou mau tamarii. Mai te mea ua titauhia i te tamarii ia faaho‘i i te toata aore râ te peni tara aore râ te maa hotu ma te tatarahapa ti‘a, e mea papû roa ïa e faaea to’na mau hinaaro ia eiâ. Mai te mea râ ua haafaufaahia oia e ua faarirohia oia mai te hoê aito, e mai te mea e faarirohia te eiâraa ei ohipa ha‘uti, e mea papû roa ïa e tamau noa oia i te eiâ.¹⁷

E nehenehe ta te mau metua e faatupu i roto i ta ratou mau tamarii te faatura i te tauhaa e te mau ti‘araa taata a te tahi atu mau taata na roto i te hi‘oraa maitai e na roto i te haapiiraa. Te mau metua o te titau i ta ratou mau tamarii ia tatarahapa e ia aufau e ia faaho‘i—penei a‘e ta piti aore râ e ta toru atu i te faaho‘i—i te mea ta ratou i rave, i vavahi, aore râ i tu‘ino—e riro mai ïa taua mau tamarii ra ei mau taata roo maitai o te faahaere mai i ni‘a i to ratou mau metua te tura e te hanahana. Taua mau metua ra o te faatura ratou iho i te ture e te faanahoraa e o te haapa‘o i te mau ture ato‘a, e nehenehe ïa ta ratou, na roto i te hi‘oraa maitai e na roto i to ratou faaiteraa i to ratou faariiraa aore râ to ratou pato‘iraa, e haavî e e paruru i ta ratou mau tamarii i te haapa‘o ore e te orurehau.¹⁸

Te a‘o nei matou ia outou ia haapii i ta outou mau tamarii i te faatura, i te parau-ti‘a e te haavare ore. E nehenehe anei i te tahi o ta tatou mau tamarii ia ore e ite e e hara te eiâ ? E mea maere roa te reira—te u‘anaraa o te ohipa vavahi tauhaa e te eiâraa. A paruru i to outou utuafare i te reira mau mea na roto i te haapii maitairaa.¹⁹

A ara e ia tuu atu tatou i roto i ta tatou mau pureraa pô utuafare i te hoê haapiiraa no ni‘a i te haavare oreraa e te parau’tia.²⁰

Te aro nei paha tatou i te hoê peu ino no te sotaiete e ti‘a râ ia tatou ia haapii i ta tatou mau tamarii e te hara e hara ïa. Te faati‘ahia nei ta tatou mau tamarii ia ore e faautu‘ahia no te mau ohipa tano ore e te haavareraa i roto i te mau ohipa tuaro. Te tupu noa ra teie nei haavareraa i roto i te fare haapiiraa tua rua e i roto i te mau ohipa e te mau vahi imiimiraa moni. Taa ê noa’tu i te hape, ua riro teie nei peu e haaparuparuraa i te niu mau o to ratou taere e to ratou mau huru taata.²¹

I roto i te pereoo auahi mai New York e tae atu i Baltimore ua parahi matou i roto i te piha tamaaraa i mua noa‘e i te hoê fatu ohipa e ua parauparau matou, « E mea varavara te ua mai teie te huru i Roto Miti ».

Ua haere tia’tu te aparauraa i te uiraa maitai: « Eaha te rahiraa o to oe ite no ni‘a i te Ekalesia ? »

« E mea iti roa to‘u ite no ni‘a i te Ekalesia » ua parau maira oia, ua matau râ vau i te hoê o to’na mau taata ». Te faaineine ra oia i te tahi mau fenua hoo no te paturaa fare i New York. « Te vai ra te hoê taata e rave nei i te ohipa na‘u », te parau nei oia. « No to’na huru haavare ore e to’na parau-ti‘a rahi aita roa’tu vau i titau noa‘e ia’na ia faa ô i roto i te tatauraa no te hi‘o mai te mea e mea mâmâ a‘e ta’na tabula haamau‘araa. E hoho‘a maitai mau oia no te hanahana. Mai te mea e mai to teie taata te huru o te mau taata Momoni, te hinaaro nei au ia ite no ni‘a i te Ekalesia o te faatupu i teie mau huru taata roo maitai ». Ua vaiiho atu matou ia’na ra te mau buka e ua tono atu matou i te mau misionare no te haapii atu ia’na.²²

Te horo‘a mai nei te mau papa‘iraa mo‘a i te mau hoho‘a no te itoito e te parau-ti‘a rahi.

Auê ïa te rahi o to tatou faahiahiaraa ia Petero… a ti‘a atu ai oia ma te măta‘u ore e te puai i mua i taua mau haava ra e te mau faatere o te nehenehe e tape‘a ia’na i te fare auri, e hui ia’na, e rave ato‘a paha i to’na oraraa. E au ra te faroo nei tatou i taua mau parau ri‘ari‘a ore ra a ti‘a’tu ai oia i mua i to’na mau enemi e a parau atu ai e, « O te Atua ta matou e faaroo e tia‘i eiaha te taata » (Te Ohipa 5: 29).

Ua hi‘o tia’tura o Petero i roto i te mata o te mau taata e faaite ihora ia ratou i to’na iteraa papû no ni‘a i te Atua ta ratou i faasatauro [a hi‘o Te Ohipa 3: 13–15]

O ratou o tei faaroo i teie iteraa e teie faaueraa, e 5000 taata tei ite i teie nei itoito rahi e teie nei parau-ti‘a faahiahia. E 5000 taata tei ti‘aturi.

E hi‘o na tatou ia Daniela, te hoê taata tei tape‘ahia e tei faatitihia o te hoê ato‘a râ peropheta na te Atua tei ineine no te pohe no to’na mau ti‘aturiraa. Ua faarirohia anei te parau-ti‘a mai te hoê tao‘a faufaa rahi roa ? Te evanelia o te oraraa iho ïa o Daniela… I roto i te aora’i o te arii, e faahapa-rii-hia paha oia, area râ noa’tu e no te hoê faatere, eita oia e inu i te uaina a te arii e eita ato‘a oia e amu rahi i te i‘o e te mau maa maitai. Na to’na haavîraa ia’na iho e te mâ o to’na faaroo i horo‘a ia’na te ora maitai e te paari e te ite e te aravihi e te maramarama, e ua tu‘ati atu to’na faaroo ia’na i to’na Metua i te ao ra, e ua tae pinepine mai te mau heheuraa ia’na mai te au i ta’na titauraa. Na ta’na heheuraa e ta’na mau tatararaa i te mau orama a te arii i faahaere atu i ni‘a ia’na te faatura e te haapoupouraa e te mau tao‘a aroha e te ti‘araa teitei o ta te mau taata e rave rahi e hoo nei i to ratou varua no te titau i te reira mau mea. A tuuhia’tu ai i mua ia’na te ma‘itiraa ia faaea i te pure a ore râ a taorahia’tu ai oia i roto i te ana liona, ua pure oia i mua i te taata e ua auraro i te faautu‘araa. [A hi‘o Daniela 1–2, 6].

Te faahaamana‘o nei tatou ia tatou iho i te parau-ti‘a o na taata Hebera e toru, o Sadaraka, o Meseka, e Abede-nego tei ti‘a’tu mai ia Daniela i mua i te mau taata e te mau faatere, tei haapa‘o i ta ratou parau e tei tape‘a noa i to ratou faaroo. Ua titauhia ratou na roto i te faaueraa a te emepera ia tuturi i raro e ia haamori i te hoê tii rahi auro ta te arii i faati‘a. Taa ê noa’tu i te ereraa i to ratou ti‘araa teitei, i te ereraa i to ratou ti‘araa, e te faaririraa i te arii, ua faaruru atu ratou i te umu auahi ura aita râ i huna i to ratou Atua.

… A faaroohia’i te oto faanaho-atea-hia o te pû, o te vivo, o te tinura, e te tahi atu mau mauhaa na ni‘a i te fenua e a haere atu ai te mau naho‘a tane e vahine i te mau vahi ato‘a i to ratou mau fare e i te mau aroa poromu no te tuturi e no te haamori i te tii rahi auro, ua pato‘i na taata e toru i te faaino i to ratou Atua mau. Ua pure ratou i te Atua, e a faaruru ai ratou i te emepera tei î te hae e te riri, ua ti‘a atura ratou ma te itoito i mua i te pohe papû:

« Ia hinaaro oia iho, e tia ïa i to matou Atua e haamori nei ia faaora oia ia matou i te umu auahi ura ra, e tia ïa ia’na ia faaora ia matou i to rima, e te arii.

« Ia ore râ oia ia hinaaro, e ore â matou e haamori i to oe ra mau atua, ia ite mai oe, e te arii, e ore ho‘i e haamori i te tii auro i faati‘ahia e oe ra.

Te parau-ti‘a ! Tei ni‘a a‘e te mau fafauraa a te Atua no te ora mure ore i te mau fafauraa ato‘a a te taata no te ti‘araa teitei, te oraraa maitai e te parururaa. Te parau ra teie nei mau taata itoito e, « Aita matou i titau i te ora, ua ti‘a râ ia matou ia tape‘a i ta matou parau e ia vai parau-ti‘a noa i te Atua » …

Aita’tu e mau maitai i roto i te maitai-roa-raa ta tatou e tutava nei tei hau atu i te faufaa mori râ te parau-ti‘a e te haavare ore. Ia vai hope roa tatou, ia vai fati ore tatou, ia vai mâ noa tatou e te aau tae, no te faatupu i roto ia tatou iho taua maitai o te aau ra o ta tatou e haafaufaa nei i roto ia vetahi ê.

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v–xi.

A tai‘o i te paratarafa piti i te api 151. Eaha te mau maitai no te huru taata ta te huru o Spencer i faaite mai i to’na apîraa ra ? Eaha te mau ohipa mai te reira te huru ta tatou e farii nei i teie nei mahana ?
A tuatapapa i na paratarafa e maha matamua i te api 152, ma te imi i te mau parau ta te peresideni Kimball i faaohipa no te tatararaa i te auraa no te parau-ti‘a. I teihea taime to outou iteraa i te parau-ti‘a i te afa‘iraa mai i te « hau i roto i te taata, te papûraa o te opuaraa e te parururaa i roto i te ohipa » ? Afea to outou iteraa e e faatupu mai te parau-ti‘a ore i te amahamaharaa, te măta‘u, te oto e te papû ore » ?
Eaha te tahi o te mau huru no ni‘a i te mau fafauraa e faataupupu nei i te hoê taata ia riro ei taata parau-ti‘a ? (No te tahi mau hi‘oraa, a hi‘o i te mau api 153–55. Nahea e nehenehe ai ia tatou ia upooti‘a i ni‘a i teie nei mau huru ? A feruri i te huru parau-ti‘a no ta outou haapa‘oraa i ta outou mau fafauraa.
Nahea tatou e « haavare ai ia tatou iho » mai te mea e haavare tatou ? (No te tahi mau hi‘oraa, a hi‘o i te mau api 155–56.
A tai‘o i te mau hoho‘a no ni‘a i te parau-ti‘a ore e te haavare ore i roto i te mau metua (a hi‘o i te mau api 156–58). A feruri i te mea ta outou e rave nei no te haapii i ta outou mau tamarii te parau no te parau-ti‘a.
A tai‘o i te aamu o te haamata i te paratarafa hopea i te api 158. Nahea to outou oraraa i haamaitaihia’i e te parau-ti‘a o te tahi atu mau taata ?
A tuatapapa i te paratarafa pae i te api 152. A feruri i te rave i te hoê hi‘opo‘araa no to outou oraraa, mai ta te peresideni Kimball i a‘o mai. A ui atu ia outou iho te mau uiraa ta’na i ani.

Te mau papa‘iraa mo‘a: Ioba 27:5–6; Maseli 20:7; Alama 53:20–21; PH&PF 97:8; 136:20, 25–26

Daniel in lion‘s den — Daniela, te hoê ïa taata tei tape‘ahia e tei faatitihia e te hoê ato‘a râ peropheta na te Atua tei ineine no te pohe no to’na mau ti‘aturiraa. Ua faarirohia anei te parau-ti‘a mai te hoê tao‘a faufaa rahi roa ?

members partaking of sacrament — Tei roto i te mau fafauraa ta tatou e rave e te Atua te mau parau faaau no te rave, eiaha noa no te haapaeraa i te rave, ia rave i te parau-ti‘a e ia ape ato‘a i te ino.

men in fiery furnace — Ua ti‘a atu o Sadaraka, o Meseka e Abede-nego « i te umu auahi rahi » aita râ i huna i to ratou Atua. Ua faaora te Fatu ia ratou mai roto mai i te auahi.