“Lesona 8 Anomea mo le Sauniuniga o le Vasega: Saili ia Malamalama i le Tosina Atu i le Itupa Tutusa ma Alolofa i o Tatou Uso ma Tuafafine LGBT,” Anomea a le Faiaoga O Le Aiga e Faavavau (2022)
“Lesona 8 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 8 Anomea mo le Sauniuniga o le Vasega
Saili ia Malamalama i le Tosina Atu i le Itupa e Tasi ma Alolofa i o Tatou Uso ma Tuafafine LGBT
O i tatou uma o fanau faapelepele a ni matua faalelagi. O i tatou foi o tagata taitoatasi e i ai taleni, tomai, ma aafiaga tulaga ese. O nisi o fanau a le Atua e aafia i le tosina atu i le itupa e tasi pe ta’ua o se faafatama, faafafine, itulua, po o le suia o le itupa, lea e masani ona faapuupuuina o le LGBT. (O le autu o le suia o le itupa sa talanoaina i le lesona 7.) Na faapefea ona e tali atu i isi ua aafia i le tosina atu i le itupa e tasi pe faailoa mai o se LGBT? Afai e te aafia i le tosina atu i le itupa e tasi, o le a sou aafiaga na i ai i le aiga, uo, ma tagata o le Ekalesia? A o e suesue i lenei anomea, mafaufau po o le a se mea e mafai ona e faia ia avea atili ai e faapei o le Faaola ma taulima fanau uma a le Tama Faalelagi i le alofa, faaaofia ai, ma le faaaloalo.
Vaega 1
E faapefea ona fesoasoani le Faaola ia te au e faaali atu le alofa ma le faaaloalo mo i latou o e aafia i le tosina atu i le itupa e tasi?
Na aoao mai Peresitene Thomas S. Monson e faapea “o le alofa o le ute lea o le talalelei, ma o Iesu Keriso o lo tatou Faataitaiga” (“Alofa—o le Ute lea o le Talalelei,” Liahona, Me 2014, 91). Ina ua lata i le faaiuga o Lana galuega i le olaga nei, sa faamamafa mai ai e le Faaola le taua o le alofa moni i tagata uma e ala i le tuuina atu i Ona soo “o se poloaiga fou.”
Suesue e Sauniuni ai mo le Vasega
Faitau le Ioane 13:34–35, ma mafaufau loloto pe mafai faapefea e lenei poloaiga ona taialaina oe o se soo o Iesu Keriso.
E pei o isi tagata o le Ekalesia, o i latou o e aafia i le tosina atu i le itupa e tasi e i ai uo ma aiga, faamoemoega ma miti, ma malosiaga ma vaivaiga, ma o loo latou tauivi e faatautaia luitau o le olaga i le mea sili latou te mafaia. Ae paga lea, o nisi ua aafia i le tosina atu i le itupa e tasi pe ua faailoa mai o se LGBT ua lagona e leai so latou nofoaga i le Ekalesia a le Alii. Nai lo le lagonaina o le alofaina ma le lagolagoina, e toatele e lagonaina le teenaina, faaesea, le mautonu, ma le fefe.
A o auauna ai o se fesoasoani i le Au Peresitene Aoao o Tamaitai Talavou, sa aoao mai e Sister Carol F. McConkie le mea lenei:
E matua le mafai lava pe ta’ua foi i tatou lava o se soo o Keriso pe afai tatou te le fesoasoani i isi i luga o lena ala [o feagaiga]. E le ta’ufaatauvaaina e le talalelei a Iesu Keriso ia tagata. O tagata e ta’ufaatauvaaina tagata. …
Afai o le a tatou fauina le malo o le Atua i le lalolagi, tatou te manaomia tagata uma e o mai, ia o mai e fai la latou vaega. (“Siitiaina o Isi” [2:49], ChurchofJesusChrist.org)
Mafaufau mo se minute e uiga i le soifuaga o le Faaola. O anafea na Ia faaalia ai le alofa mo i latou o e na tauivi ia lagona le taliaina? Mafaufau pe faapefea e le faatinoina o fautuaga nei ona fesoasoani ia te oe e mulimuli atili ai i le faataitaiga a le Faaola o le alofa pe a talanoaina ma pe a fegalegaleai ma tagata taitoatasi o e aafia i le tosina atu i le itupa e tasi:
-
Tautala ma faatino ma le agalelei, popole, ma le agaalofa moni. Na aoao mai Elder Quentin L. Cook o le Korama a Aposetolo e Toasefululua: “I le avea ai ma se ekalesia, e leai se tasi e tatau ona sili atu ona alofa ma agaalofa. … Ia tatou taulamua i le faatinoina o le alofa, agaalofa ma le aapa atu.” (“Let Us Be at the Forefront” [0:59], ChurchofJesusChrist.org; matamata le vitio e aoao atili ai.)
-
Fausia le malamalama e ala i le faalogo e aunoa ma le faamasino atu. Na faasoa mai Peresitene Jean B. Bingham o le Au Peresitene Aoao o le Aualofa, “O se tasi o auala sili ona lelei e fatu ai se sootaga lelei, o le le o mai lea ma ni masalosaloga po o ni manatu faufau, ma faatumauina se mafaufau matala ma se loto matala.” (Ina ia aoao atili, matamata i le “Focus on the One” [2:32], ChurchofJesusChrist.org.)
-
Ia e iloa e moni lagona ma le tosina atu i le itupa e tasi. Na fautua mai Elder D. Todd Christofferson o le Korama a Aposetolo e Toasefululua: “O le mea e tasi e taua i taimi uma o le iloaina lea o lagona o se tagata, e faapea e moni. E moni lava. Tatou te le faafitia faapea e i ai lagona patino i se tasi.” (Ina ia aoao atili maimoa le “Feelings Are Real and Authentic” [0:47], ChurchofJesusChrist.org.)
-
Taulai atu i le faasinomaga e faavavau. Na saunoa Peresitene Russell M. Nelson: “E le tutusa uma le taua o faailoga. Ae afai e i ai soo se faailoga na te suitulagaina mea e sili ona taua e iloa ai oe, o taunuuga la e ono lamatia faaleagaga. … E leai se faailoaga e tatau ona aveesea, suitulaga, pe faamuamua i luga o nei tofiga tumau e tolu: ‘atalii o le Atua,’ ‘atalii o le feagaiga,’ ma le ‘soo o Iesu Keriso’” (“Choices for Eternity” [faigalotu mo talavou matutua i le lalolagi atoa, 15 Me, 2022], ChurchofJesusChrist.org).
-
Ia faamamalu i poloaiga ma feagaiga a le Atua. O le alofa atu i isi e pei ona alofa le Faaola ia i tatou e le faapea tatou te malilie faatasi, faamaonia, pe faalauiloa atu ai amioga e feteenai ma poloaiga a le Atua. Na aoao mai Iesu Keriso, “Afai tou te alofa mai ia te au, ia outou tausi mai i a’u poloaiga” (Ioane 14:15). Sa faamalamalama mai e Elder D. Todd Christofferson e faapea o le poloaiga muamua, ia alofa i le Atua, ua muamua mo se mafuaaga: “O le faamuamua o le poloaiga muamua e le faaitiitia ai pe faatapulaa ai lo tatou tomai e tausia le poloaiga lona lua [ia alofa atu i o tatou tuaoi]. I se isi itu, e faateleina ai ma faamalosia ai. … O lo tatou alofa i le Atua e siitia ai lo tatou tomai e alolofa atoatoa ai i isi ma le atoatoa ona ua tatou faipaaga i le ute ma le Atua i le tausiga o Ana fanau” (“The First Commandment First” [Brigham Young University devotional, Mar. 22, 2022], 2, speeches.byu.edu).
Tatou te faaalia le alofa mo le Atua ma isi pe a tatou fesootai manino atu Lana aoaoga faavae ma poloaiga i ni auala maaleale. E pei ona ta‘ua i punaoa o le Tosina Atu i le Itupa e Tasi na lolomiina e le Ekalesia:
E leai se suiga i le tulaga o le Ekalesia i le mea tonu mamā. Ae o le mea ua suia—ma le mea e manaomia ona sui—o le fesoasoani lea i tagata o le Ekalesia e tali atu ma le poto ma le faautauta pe a latou fetaiai ma le tosina atu i le itupa e tasi i o latou lava aiga, i isi tagata o le Ekalesia po o isi nofoaga. (I le Same-Sex Attraction: Church Leaders, “Communicate Doctrine with Love,” ChurchofJesusChrist.org; tagai foi Dallin H. Oaks, “What Needs to Change” [video], ChurchofJesusChrist.org)
Mafaufau Loloto e Sauniuni ai mo le Vasega
Faaalu ni nai minute e toe manatunatu ai i ou uiga faaalia ma faatinoga agai ia i latou o e aafia i le tosina atu i le itupa e tasi pe faailoa mai o LGBT. E mafai ona e fai atu o ou mafaufauga, upu, ma galuega sa ogatusa ma le poloaiga a le Alii ia “fealofani; faapei ona ou alofa atu ia te outou”? (Ioane 13:34). Afai e te lagonaina le tosina atu i le itupa e tasi, mafaufau pe faapefea ona e faaali atu le alofa ia i latou e le malamalama i ai ma le agaalofa mo lou aafiaga.
Vaega 2
O a nisi mea e tatau ona ou iloa e uiga i le tosina atu i le itupa e tasi?
O ia faaupuga e pei o le faafafine (o nisi taimi e masani ona faaaoga e faasino ai i se tasi e tosina atu i isi o a latou lava itupa, ma i se isi itu e faaaoga patino e faasino atu ai i se alii e tosina atu i alii), faafatama (o se tamaitai e tosina atu i tamaitai), po o le itulua (o se alii po o se tamaitai e tosina atu i itupa uma e lua) e mafai ona faaaoga e faailoa ai se lagona, se faasinomaga, po o se ituaiga olaga. Manatua e tusa lava po o le a le upu po o faaupuga e faaaoga e se tagata e faailoa ai ona lagona feusuai po o aoaoga faamasani, o lo tatou faasinomaga sili ona taua o se “atalii po o se afafine agaga faapelepele a ni matua faalelagi” (“O Le Aiga: O Se Folafolaga i le Lalolagi,” ChurchofJesusChrist.org).
O le atiina ae o o tatou tulaga feusuai e lavelave ma e faaosofia e le tele o mea moni. O lagona o le tosina atu i le itupa e tasi e mafai ona eseese le malosi, e mafai ona fesuisuiai i le aluga o taimi, ma e le tutusa mo tagata uma. E leai se tulaga aloaia a le Ekalesia i le pogai o le tosina atu i le itupa e tasi. (Tagai “Same-Sex Attraction: Individuals,” ChurchofJesusChrist.org.)
Ona o le alofa loloto mo Lana fanau, ua tuuina mai ai e le Tama Faalelagi ia i tatou le tulafono o le legavia ma poloaiina ai o sootaga feusuai e faia “na o le va lava o le alii ma le tamaitai ua faaipoipoina faaletulafono o se tane ma se ava” (“O Le Aiga: O Se Folafolaga i le Lalolagi”). O lenei tulafono e puipuia ai faamoemoega paia o feusuaiga i le fuafuaga a le Atua ma e faatatau i fanau uma a le Atua. Ua faauuina e le Tama Faalelagi sootaga faalefeusuaiga ina ia faia i le va o se alii ma se tamaitai i totonu o le feagaiga o le faaipoipoga “mo le foafoaga o fanau ma mo le faaalia o le alofa” (Autu o le Talalelei, “Ola Mama,” topics.ChurchofJesusChrist.org).
I le tali atu i uunaiga faaagafesootai e suia aoaoga e faatatau i le tulafono o le legavia, na saunoa ai Elder D. Todd Christofferson:
O le tulafono o le ola mama na faaaogaina talu mai lava le amataga. … O la tatou aoaoga faavae—e le na o le talitonu, ae o aoaoga faavae—e faapea o sootaga feusuai ua talafeagai ma faatulafonoina i le silafaga a le Alii i le va o le alii ma le tamaitai ua faaipoipoina faaletulafono e le suia ma o le a le suia lava. (I le Sarah Jane Weaver, “Church’s Doctrine on Chastity Will Never Change, Says Elder Christofferson,” Church News, Feb. 5, 2015, ChurchofJesusChrist.org)
E taua le iloa o le eseesega i le va o lagona ma amioga. O le lagonaina o le tosina atu i le itupa e tasi po o le avea o se faafafine, faafatama, pe itulua e le faia ai se tagata ia agasala, leaga, pe gauia; peitai, o le faatinoina o nei lagona e ala i le solia o le tulafono o le ola mama o se solia lea o poloaiga a le Tama Faalelagi.
I le saunoa ai e uiga i le tulaga o le Ekalesia i le tosina atu i le itupa e tasi, na aoao mai ai Peresitene M. Russell Ballard o le Korama a Aposetolo e Toasefululua:
E talitonu Le Ekalesia a Iesu Keriso o le Au Paia o Aso e Gata Ai e faapea “o le aafiaga o le tosina atu i le itupa e tasi o se mea faigata moni mo le toatele o tagata. O faatosinaga lava ia e le o se agasala, ae o le faatinoina o le agasala lea. E ui lava e le filifilia e tagata taitoatasi ina ia maua i ia faatosinaga, ua latou filifili pe faapefea ona tali atu ia i latou” [tagai Same-Sex Attraction: Individuals, i le vaega o le “Is Feeling Same-Sex Attraction a Sin?” ChurchofJesusChrist.org]. (”O Loo Manaomia Oe e le Alii i le Taimi Nei!,” Liahona, Sept. 2015, 29)
O loo avanoa le alofa mutimutivale o le Alii i soo se tasi ua solia le tulafono o le legavia. Afai latou te filifili e o mai ia te Ia ma salamo, o le a Ia faamagaloina i latou.
Afai o tagata o le Ekalesia ua aafia i le tosina atu i le itupa e tasi pe faailoa mai o LGBT e tausia a latou feagaiga, e mafai ona latou auai atoatoa i le Ekalesia, umia valaauga, ma tapuai i le malumalu (tagai D. Todd Christofferson, “LGBT People Who Live God‘s Laws Can Fully Participate in the Church” [0:48], ChurchofJesusChrist.org; tagai foi Mataupu Faavae ma Feagaiga 97:8).
Afai e te oo i le tosina atu i le itupa e tasi, mafaufau pe mafai faapefea e le punaoa o loo ta‘ua i le vaega o le “E te Fia Aoao Atili?” ona faamanuiaina lou olaga. Ma le isi, afai e te lagona le toafimalie, mafaufau e faasoa atu lou aafiaga i se tagata faatuatuaina o le aiga, uo, po o se taitai o le Ekalesia. Ia faaeteete e uiga i le faaigoaina o oe lava i nofoaga faitele i ni auala e mafai ona tataiese ai mai au sini e faavavau.
Mafaufau Loloto e Sauniuni ai mo le Vasega
E mafai faapefea ona faamanuiaina oe i le i ai o se malamalama sili atu i mea o loo aoao mai e taitai o le Ekalesia e uiga i le tosina atu i le itupa e tasi?
Vaega 3
E faapefea ona ou malamalama i manatu faatautava uma e uiga i le tosina atu i le itupa e tasi?
O le taimi nei ua tele vaaiga eseese e uiga i le faaipoipoga, aiga, tosina atu i le itupa e tasi, ma autu e faatatau i LGBT. A o tatou aoao e uiga i nei autu, e taua le saili ia malamalama atili i le vaaiga e faavavau a le Tama Faalelagi.
Na aoao mai e Peresitene Bingham le mea lenei:
O le vaaiga e faamanino ai mea uma o se vaaiga e faavavau: o le vaaiga atoatoa, ma le faatuaoia a lo tatou Tama Faalelagi. …
Mai Lona tulaga maualuga, e silasila mai le Atua ia i tatou ma mea uma o siomia ai i tatou “e pei ona i ai moni lava, ma … e pei o le a i ai moni lava” [Iakopo 4:13]. O Lana silasila e mo se taimi umi nai lo le faatapulaaina iinei ma le taimi nei, ua faatagaina ai o Ia e vaai i lo tatou gafatia paia nai lo le na o lo tatou tulaga i le taimi nei po o le taimi ua tuanai. Ma e silasila mai o Ia i Ana foafoaga uma e ala i tioata o le alofa. (“How to Be Happy Now—and Forever” [Brigham Young University devotional, Dec. 10, 2019], 2, speeches.byu.edu)
A o e faitau i upumoni nei ma saunoaga lagolago a perofeta ma aposetolo, mafaufau pe faapefea ona latou fesoasoani ia te oe e atiae atili se vaaiga e faavavau i le tosina atu i le itupa e tasi.
-
E alofa le Tama Faalelagi i Ana fanau uma (tagai 1 Nifae 11:17; 1 Ioane 4:9–10, 16).
Na aoao mai Peresitene Monson:
E alofa le Tama Faalelagi ia te outou—outou taitoatasi. E le suia lava lena alofa. … Ua i ai iina mo outou pe a outou faanoanoa pe fiafia, lotovaivai po o le tumu i le faamoemoe. Ua i ai le alofa o le Atua iina mo outou e tusa lava pe ua outou lagona lo outou manaomia pe leai foi se alofa. (“Ou te Le Tuua Lava Oe,” Liahona, Nov. 2013, 123–24)
-
Ua i ai i le Faaola se malamalama atoatoa i o tatou aafiaga ma e silafia le auala e fesoasoani ma faamalosia ai i tatou taitoatasi (tagai Alema 7:11–12).
Na faapea mai Peresitene Oaks:
Sa mafatia ma oo lo tatou Faaola i le atoaga o luitau uma faaletino. … O le mea lea ua Ia silafia ai o tatou faigata, o tatou lototiga, o tatou faaosoosoga, ma o tatou mafatiaga, aua na Ia loto e oo i ai i na mea uma e fai ma vaega taua o Lana Togiola. Ma ona o lenei mea, ua Ia maua ai le mana o Lana Togiola e fesoasoani mai ai ia i tatou—e tuu mai ia i tatou le malosi e onosaia ai ia mea uma. (“Faamalosia e ala i le Togiola a Iesu Keriso,” Liahona, Nov. 2015, 61–62)
-
E tofu i tatou uma ma se nofoaga i le Ekalesia a le Faaola ma i le fuafuaga e faavavau o le fiafia a le Tama Faalelagi (tagai Salamo 84:11–12; 1 Korinito 12:12–26; Mosaea 2:41).
Na faamatala mai e Peresitene Ballard:
Ou te manao i soo se tasi o tagata o le Ekalesia e faafafine pe faafatama ia iloa ou te talitonu o loo i ai sou nofoaga i le malo ma ou te iloa o nisi taimi atonu e faigata ia te oe ona vaai po o fea e te ofi ai i le Ekalesia a le Alii, ae o loo i ai. (“Fesili ma Tali” [Brigham Young University devotional, Nov. 14, 2017], 3, speeches.byu.edu)
O nisi ua oo i le tosina atu i le itupa e tasi ua taumanatunatu foi pe faapefea ona latou i ai i le fuafuaga o le fiafia a le Tama Faalelagi pe a mavae lenei olaga. Ua faamautinoa mai e perofeta ia i tatou o le a faamanuiaina e lo tatou Tama Faalelagi alofa i latou uma o e liliu atu ma tumau faamaoni ia te Ia. Na fautua mai Elder Ulisses Soares:
O mataupu faavae lava ia e tasi e faatatau ia te outou o loo aafia i le tosina atu i le itupa e tasi ma lagona ai le lotovaivai ma le leai o se faamoemoe. Ma e masalo ona o lenei mafuaaga, o loo lagona ai e nisi o outou ua lē toe aoga le talalelei a Iesu Keriso mo oe. Afai o le tulaga lena, ou te faamautinoa atu ia te oe o loo i ai pea le faamoemoe i le Atua le Tama ma i Lana fuafuaga o le fiafia, ia Iesu Keriso ma Lana taulaga togiola, ma i le ola ai i a Laua poloaiga alofa. I Lona poto atoatoa, mana, faamasinotonu, ma le alofa mutimutivale, e mafai ai e le Alii ona faamauina i tatou e fai Mona, ina ia mafai ona avatu i tatou i Lona afioaga ma maua le faaolataga e faavavau, pe afai tatou te mausali ma lē masi’iese i le tausiga o poloaiga [tagai Alema 1:25] ma o loo faatumulia pea i galuega lelei [tagai Mosaea 5:15]. (“Ave Lo Tatou Satauro,” Liahona, Nov. 2019, 114)
-
A o tatou taulai atu i le Tama Faalelagi ma Iesu Keriso ma tausia a tatou feagaiga ma i Laua, e mafai ona lagolagoina i tatou e le faamoemoe (tagai 2 Nifae 31:20).
Sa molimau mai Elder Dieter F. Uchtdorf, ao avea ma se tasi o le Au Peresitene Sili:
Tatou te faamoemoe ia Iesu le Keriso, i le agalelei o le Atua, i faaaliga a le Agaga Paia, i le malamalama e faapea, e faafofogaina ma tali mai ia tatou talosaga. … O lenei ituaiga faamoemoe … e faafouina ai i tatou i le lototele i taimi o luitau faigata, ma tuuina atu le malosi ia i latou o e lagona le faamata‘uina i le oo mai o puipui o le mata‘u, masalosalo, ma le leai o se faamoemoe. (“O Le Mana e Le Iu o le Faamoemoe,” Liahona, Nov. 2008, 23)
Talanoa e Sauniuni ai mo le Vasega
Faatasi ai ma se tagata o le aiga po o se uo faatuatuaina, talanoa i mea na e aoaoina ma lagonaina a o e faitauina lenei anomea. Sau sauni i le vasega e faasoa mai soo se malamalamaaga e te maua mai i lau talanoaga.