« មេរៀនទី ១០ ឯកសាររៀបចំសម្រាប់ថ្នាក់ ៖ សេចក្តីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍ » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )
« មេរៀនទី ១០ ឯកសាររៀបចំសម្រាប់ថ្នាក់ » ឯកសារគ្រូបង្រៀន គ្រួសារដ៏អស់កល្បជានិច្ច
មេរៀនទី ១០ ឯកសាររៀបចំសម្រាប់ថ្នាក់
សេចក្តីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍
នៅក្នុង មេរៀនទី ៦ យើងបានរៀនថា អាពាហ៍ពិពាហ៍ត្រូវបានតែងតាំងឡើងដោយព្រះ ។ ប្រធាន រ័សុល អិម ណិលសុន ក៏បានបង្រៀនផងដែរថា អាពាហ៍ពិពាហ៍សេឡេស្ទាលគឺជា « ប្រភេទអាពាហ៍ពិពាហ៍ដ៏ខ្ពស់បំផុត និងយូរអង្វែងបំផុត ដែលព្រះបង្កបង្កើតរបស់យើងអាចប្រទានដល់បុត្រាបុត្រីរបស់ទ្រង់បាន » ដើម្បីនាំឲ្យមាន « លទ្ធភាពទទួលបានសុភមង្គលកាន់តែខ្លាំងឡើង ជាងទំនាក់ទំនងណាៗផ្សេងទៀតទាំងអស់ » ( « Celestial Marriage » Ensign ឬ Liahona ខែ វិច្ឆិកា ឆ្នាំ ២០០៨ ទំព័រ ៩២, ៩៣ ) ។ នៅពេលអ្នកសិក្សាឯកសារនេះ សូមគិតពិចារណាពីអារម្មណ៍របស់អ្នកផ្ទាល់អំពីអាពាហ៍ពិពាហ៍ដ៏អស់កល្បជានិច្ច និងអ្វីដែលអ្នកអាចធ្វើបានដើម្បីរស់នៅឲ្យស័ក្ដិសមទៅនឹងអាពាហ៍ពិពាហ៍នេះ ។
ផ្នែកទី ១
ហេតុអ្វីខ្ញុំគួរតែខិតខំដើម្បីមានអាពាហ៍ពិពាហ៍ដ៏អស់កល្បជានិច្ច ?
នៅពេលអ្នកគិតអំពីអាពាហ៍ពិពាហ៍របស់មនុស្សដែលអ្នកស្គាល់ អ្នកអាចឆ្ងល់ថា តើអាពាហ៍ពិពាហ៍នៅក្នុងព្រះវិហារបរិសុទ្ធខុសពីអាពាហ៍ពិពាហ៍ស៊ីវិលយ៉ាងដូចម្ដេច ។
យើងជឿថា « ផែនការនៃសុភមង្គលដ៏ទេវភាពនេះអាចធ្វើឲ្យទំនាក់ទំនងក្រុមគ្រួសារចេះតែបន្តមានរហូតហួសពីសេចក្តីស្លាប់ » ( « The Family: A Proclamation to the World » នៅលើគេហទំព័រ ChurchofJesusChrist.org ) ។ ទំនាក់ទំនងគ្រួសារដ៏អស់កល្បជានិច្ចអាចកើតមានឡើងដោយសារព្រះយេស៊ូវគ្រីស្ទ ។ ប្រធាន ណិលសុន បានបង្រៀនថា « ដង្វាយធួនរបស់ព្រះយេស៊ូវគ្រីស្ទ … បានធ្វើឲ្យការរស់ឡើងវិញក្លាយជាការពិតចំពោះមនុស្សទាំងអស់ ហើយបានធ្វើឲ្យមានជីវិតអស់កល្បជានិច្ចចំពោះអស់អ្នកដែលប្រែចិត្តពីអំពើបាបរបស់ពួកគេ ហើយទទួលយក និងរក្សាពិធីបរិសុទ្ធ និងសេចក្ដីសញ្ញាសំខាន់ៗទាំងឡាយ » ( « Drawing the Power of Jesus Christ into Our Lives » Ensign ឬ Liahona ខែ ឧសភា ឆ្នាំ ២០១៧ ទំព័រ ៤០ ) ។ នៅជំនាន់ចុងក្រោយនេះ ព្រះអម្ចាស់បានស្ដារឡើងវិញនូវសិទ្ធិអំណាច ពិធីបរិសុទ្ធ និងសេចក្តីសញ្ញាទំាងឡាយ ដែលអាចស្ថាបនាអាពាហ៍ពិពាហ៍ដ៏នៅអស់កល្បជានិច្ចឡើងបាន ។
ការសិក្សានៅក្នុងការរៀបចំសម្រាប់ថ្នាក់រៀន
សូមអាន គោលលទ្ធិ និង សេចក្តីសញ្ញា ១៣១:១–៤ ដោយរកមើលអ្វីដែលយ៉ូសែប ស្ម៊ីធ បានបង្រៀនអំពីសេចក្ដីសញ្ញាអាពាហ៍ពិពាហ៍ដ៏អស់កល្បជានិច្ច ។ ( កំណត់ចំណាំ ៖ លំដាប់ខ្ពស់បំផុតនៃនគរសេឡេស្ទាលគឺជាជីវិតដ៏នៅអស់កល្បជានិច្ច ឬភាពតម្កើងឡើង ) ។
ដូចដែលបានប្រើនៅក្នុង ខទី ២ ពាក្យ ថ្មី មានន័យថា សេចក្ដីសញ្ញានេះត្រូវបានស្ដារឡើងវិញជាថ្មីនៅក្នុងគ្រាកាន់កាប់ត្រួតត្រារបស់យើង ។ សេចក្ដីសញ្ញានេះក៏អស់កល្បអស់កាលជានិច្ចផងដែរ ដោយសារវាអស់កល្ប ហើយវាមានវត្តមានតាំងពី « មុនកំណើតលោកិយមកម្ល៉េះ » ( គោលលទ្ធិ និង សេចក្ដីសញ្ញា ១៣២:៥ ) ។ វាគឺជាផ្នែកមួយនៃសេចក្តីសញ្ញា ដែលព្រះបានចុះជាមួយនឹងអ័ប្រាហាំ និងភរិយារបស់លោក សារ៉ាយ ជាយូរមកហើយ ។
យើងរៀនមកពីវចនានុក្រមព្រះគម្ពីរប៊ីបថា « ដំបូងឡើយ អ័ប្រាហាំបានទទួលដំណឹងល្អតាមរយៈពិធីបុណ្យជ្រមុជទឹក ( ដែលជាសេចក្ដីសញ្ញានៃសេចក្ដីសង្គ្រោះ ) ។ បន្ទាប់មក លោកបានទទួលបព្វជិតភាពជាន់ខ្ពស់ ហើយលោកបានចូលទៅក្នុងអាពាហ៍ពិពាហ៍សេឡេស្ទាល ( ដែលជាសេចក្ដីសញ្ញានៃភាពតម្កើងឡើង ) ដោយទទួលបាននូវការអះអាងដូច្នេះថា លោកនឹងមានការរីកចម្រើនដ៏អស់កល្បជានិច្ច [ កូនចៅដ៏ច្រើនរាប់មិនអស់ ] » ( Bible Dictionary « Abraham, covenant of » ) ។
ព្រះអម្ចាស់បានសន្យានឹងអ័ប្រាហាំថា « យើងនឹងចម្រើនពូជឯងឲ្យមានគ្នាសន្ធឹកដូចផ្កាយនៅលើមេឃ ហើយដូចខ្សាច់នៅមាត់សមុទ្រ » ( លោកុប្បត្តិ ២២:១៧ ) ។ អាពាហ៍ពិពាហ៍សេឡេស្ទាលរួមមាននូវពរជ័យនៃ « [ ការ ] មានកូនៗនៅក្នុង … សិរីល្អសេឡេស្ទាល » ( យ៉ូសែប ស៊្មីធ នៅក្នុង History, 1838–1856 [Manuscript History of the Church] វ៉ុល D-1 ទំព័រ ១៥៥១ [ នៅលើគេហទំព័រ josephsmithpapers.org ] ) ។
ព្រះអម្ចាស់បានបន្ដសន្យានឹងអ័ប្រាហាំថា រាល់ពរជ័យទាំងអស់នេះនឹងត្រូវបានប្រគល់ដល់កូនចៅខាងសាច់ឈាមរបស់លោកទាំងអស់ ( សូមមើល គោលលទ្ធិ និង សេចក្ដីសញ្ញា ១៣២:២៩–៣១; អ័ប្រាហាំ ២:៦–១១ ) ។ ចំណែកនៃសេចក្ដីសញ្ញាអ័ប្រាហាំដែលទាក់ទងទៅនឹងអាពាហ៍ពិពាហ៍ដ៏អស់កល្បជានិច្ច និងការរីកចម្រើនដ៏អស់កល្បជានិច្ច នោះគឺត្រូវបានរំឭកជាមួយនឹងបុគ្គលម្នាក់ៗដែលចូលទៅក្នុង « សេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ » ( សូមមើលគោលលទ្ធិ និង សេចក្ដីសញ្ញា ១៣១:២ ) ។ ឬនិយាយម្យ៉ាងទៀតថា តាមរយៈពិធីបរិសុទ្ធនៃការផ្សារភ្ជាប់អាពាហ៍ពិពាហ៍ នោះយើងទទួលបានការសន្យាពរជ័យដូចគ្នានឹងលោកអ័ប្រាហាំដែរ ។
នៅពេលបុរសម្នាក់ និងស្ត្រីម្នាក់បានផ្សារភ្ជាប់នៅក្នុងព្រះវិហារបរិសុទ្ធ នោះពួកគេបានចុះសេចក្ដីសញ្ញាដ៏ពិសិដ្ឋជាមួយនឹងព្រះ និងជាមួយគ្នាទៅវិញទៅមក ។ ការណ៍នេះរួមមានសេចក្ដីសញ្ញាដើម្បីបន្ដនៅស្មោះត្រង់ជាមួយគ្នាទៅវិញទៅមក និងជាមួយនឹងព្រះ ការរស់នៅតាមរបៀបដូចជាព្រះគ្រីស្ទ ការគោរពតាមសេចក្ដីសញ្ញាទាំងអស់នៃដំណឹងល្អដែលពួកគេបានចុះ ហើយនិងការបង្កើតកូនចៅឲ្យបានចម្រើនឡើងពាសពេញផែនដី ។
សូមពិចារណាពីអត្ថន័យនៃរូបភាពនេះ កាលដែលវាទាក់ទងទៅនឹងសេចក្ដីសញ្ញានៃអាពាហ៍ពិពាហ៍ដ៏នៅអស់កល្បជានិច្ច ។ ពាក់ព័ន្ធទៅនឹងទំនាក់ទំនងនៃសេចក្ដីសញ្ញានេះ អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់បានបង្រៀន ៖
ព្រះអម្ចាស់ព្រះយេស៊ូវគ្រីស្ទគឺជាចំណុចប្រសព្វគ្នា នៅក្នុងទំនាក់ទំនងអាពាហ៍ពិពាហ៍ដែលនៅក្នុងសេចក្ដីសញ្ញាមួយ ។ សូមកត់ចំណាំពីរបៀបដែលព្រះអង្គសង្គ្រោះមានទីតាំងគង់នៅចុងកំពូលនៃត្រីកោណនេះ ដោយមានស្ដ្រីម្នាក់នៅគល់នៃជ្រុងម្ខាង ហើយបុរសម្នាក់នៅគល់នៃជ្រុងម្ខាងទៀតនៃត្រីកោណនោះ ។ ឥឡូវនេះ សូមពិចារណាអំពីអ្វីដែលកើតឡើងនៅក្នុងទំនាក់ទំនងរវាងបុរសម្នាក់ និងស្ដ្រីម្នាក់ នៅពេលពួកគេ « មករកព្រះគ្រីស្ទ » រៀងៗខ្លួន និងដោយខ្ជាប់ខ្ជួន ហើយខិតខំដើម្បី « បានល្អឥតខ្ចោះនៅក្នុងទ្រង់ » ( មរ៉ូណៃ ១០:៣២ ) ។ ដោយសារតែ និងតាមរយៈព្រះដ៏ប្រោសលោះ នោះបុរស និងស្ដ្រីរូបនេះខិតជិតគ្នាកាន់តែខ្លាំង ។ ( « Marriage Is Essential to His Eternal Plan » Ensign ខែ មិថុនា ឆ្នាំ ២០០៦ ទំព័រ ៨៦ )
ពិភាក្សាក្នុងការរៀបចំសម្រាប់ថ្នាក់
ប្រសិនបើអាចធ្វើទៅបាន សូមពិភាក្សាសំណួរខាងក្រោមនេះជាមួយនរណាម្នាក់ ដែលបានផ្សារភ្ជាប់នឹងស្វាមី ឬភរិយារបស់គាត់នៅក្នុងព្រះវិហារបរិសុទ្ធ ដូចជាឪពុក ឬម្ដាយ ជីដូន ឬជីតា ថ្នាក់ដឹកនាំសាសនាចក្រ ឬមិត្តភក្ដិ ។ ប្រសិនបើអ្នកបានរៀបការរួចហើយ អ្នកអាចធ្វើការសន្ទនានេះជាមួយនឹងស្វាមី ឬភរិយារបស់អ្នកបាន ។ សូមមកកាន់ថ្នាក់រៀនដោយបានរៀបចំខ្លួន ដើម្បីចែកចាយអ្វីមួយដែលអ្នកបានរៀន ។
-
តើវាមានសភាពយ៉ាងណា សម្រាប់អ្នកពេលបានផ្សារភ្ជាប់នៅក្នុងព្រះវិហារបរិសុទ្ធ ?
-
តើការចូលទៅក្នុងសេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ បានផ្ដល់ពរជ័យដល់អ្នក និងគូស្វាមីភរិយារបស់អ្នកយ៉ាងដូចម្ដេចខ្លះក្នុងពេលកន្លងមក ?
-
តើកិច្ចខិតខំផ្ទាល់ខ្លួនរបស់អ្នកដើម្បីខិតទៅកាន់តែជិតព្រះបានជួយអ្នក និងគូស្វាមីភរិយារបស់អ្នក ឲ្យខិតទៅជិតគ្នាកាន់តែខ្លាំងឡើងតាមរបៀបណា ?
ផ្នែកទី ២
តើខ្ញុំត្រូវធ្វើការជ្រើសរើសអ្វីខ្លះ ដើម្បីធ្វើឲ្យអាពាហ៍ពិពាហ៍របស់ខ្ញុំបានអស់កល្បជានិច្ច ?
ព្រះអម្ចាស់បានបើកសម្ដែងថា ប្រសិនបើបុរសម្នាក់ និងស្ដ្រីម្នាក់មិនបានរៀបអាពាហ៍ពិពាហ៍ស្របតាមក្រឹត្យវិន័យរបស់ទ្រង់ ( ការចូលទៅក្នុងសេចក្តីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ ) និងដោយសិទ្ធិអំណាចរបស់ទ្រង់ទេ នោះអាពាហ៍ពិពាហ៍របស់ពួកគេ « គ្មានប្រសិទ្ធភាពឡើយ កាលណាពួកគេស្លាប់ទៅ » ( គោលលទ្ធិ និង សេចក្ដីសញ្ញា ១៣២:១៥ ) ។ ទោះជាយ៉ាងណាក៏ដោយ ការផ្សារភ្ជាប់នៅក្នុងព្រះវិហារបរិសុទ្ធតែម្យ៉ាង ក៏មិនធានាឲ្យបានអាពាហ៍ពិពាហ៍ដ៏អស់កល្បជានិច្ចបាន ដែរ ។
ការសិក្សានៅក្នុងការរៀបចំសម្រាប់ថ្នាក់រៀន
សូមអាន គោលលទ្ធិ និង សេចក្តីសញ្ញា ១៣២:១៩–២០ ហើយពិចារណាគូសចំណាំអ្វីដែលតម្រូវឲ្យមានលើសពីពិធីផ្សារភ្ជាប់នៅក្នុងព្រះវិហារទៅទៀត ដើម្បីមានអាពាហ៍ពិពាហ៍ដ៏អស់កល្បជានិច្ចមួយ ។
អ្នកអាចបានកត់សម្គាល់នៅក្នុង ខទី ១៩ ថា អាពាហ៌ពិពាហ៌នៅក្នុងព្រះវិហារបរិសុទ្ធត្រូវតែ « បានភ្ជាប់ … ដោយព្រះវិញ្ញាណបរិសុទ្ធនៃសេចក្ដីសន្យា » ដើម្បីបានអស់កល្បជានិច្ច ។ យើងរៀនមកពីសេចក្ដីណែនាំដល់បទគម្ពីរទាំងឡាយថា « ព្រះវិញ្ញាណបរិសុទ្ធគឺជាព្រះវិញ្ញាណបរិសុទ្ធនៃសេចក្ដីសន្យា ( កិច្ចការ ២:៣៣ ) ។ ទ្រង់បញ្ជាក់នូវសេចក្ដីសុចរិត ពិធីបរិសុទ្ធ និងសេចក្ដីសញ្ញានៃមនុស្ស ដែលរាប់ថាគួរសមដល់ព្រះ ។ ព្រះវិញ្ញាណបរិសុទ្ធនៃសេចក្ដីសន្យាធ្វើទីបន្ទាល់ដល់ព្រះវរបិតាថា ពិធីបរិសុទ្ធទាំងឡាយខាងការសង្គ្រោះនោះបានធ្វើដោយត្រឹមត្រូវ ហើយថាសេចក្ដីសញ្ញាដែលរួមនឹងពិធីទាំងនោះ ក៏បានកាន់តាម » ( « ព្រះវិញ្ញាណបរិសុទ្ធនៃសេចក្ដីសន្យា » នៅលើគេហទំព័រ scriptures.ChurchofJesusChrist.org ) ។
នៅពេលប្ដីប្រពន្ធ « នៅជាប់ក្នុងសេចក្ដីសញ្ញា [ នោះ ] » ( គោលលទ្ធិ និង សេចក្ដីសញ្ញា ១៣២:១៩ ) នោះព្រះវិញ្ញាណបរិសុទ្ធ ដោយនៅក្នុងតួនាទីរបស់ទ្រង់ជាព្រះវិញ្ញាណបរិសុទ្ធនៃសេចក្ដីសន្យា នឹងបញ្ជាក់ដល់ព្រះថា ពួកគេបានរក្សាសេចក្ដីសញ្ញារបស់ពួកគេ ហើយអាពាហ៍ពិពាហ៍របស់ពួកគេនឹងបានអស់កល្បជានិច្ច ។ ដើម្បីបាន « នៅជាប់ក្នុងសេចក្ដីសញ្ញា [ នោះ ] » នោះទាំងប្ដីទាំងប្រពន្ធត្រូវតែគោរពតាមលក្ខន្ដិកៈនៃសេចក្ដីសញ្ញាដែលបានផ្សារភ្ជាប់របស់ពួកគេដោយភាពស្មោះត្រង់ ។ អែលឌើរ រ៉ូបឺត ឌី ហែល នៃកូរ៉ុមនៃពួកសាវកដប់ពីរនាក់ បានបង្រៀនអំពីសារៈសំខាន់នៃការគោរពតាមសេចក្ដីសញ្ញាទាំងនេះ ៖
ដូចបានបង្រៀននៅក្នុងបទគម្ពីរនេះ [ គោលលទ្ធិ និង សេចក្ដីសញ្ញា ១៣២:១៩ ] ចំណងអាពាហ៍ពិពាហ៍ដ៏អស់កល្បជានិច្ចមិនកើតឡើង ដោយគ្រាន់តែជាលទ្ធផលនៃសេចក្ដីសញ្ញាដែលបានផ្សារភ្ជាប់ ដែលយើងបានចុះនៅក្នុងព្រះវិហារបរិសុទ្ធប៉ុណ្ណោះទេ ។ របៀបដែលយើងដឹកនាំជីវិតរបស់យើងនៅក្នុងជីវិតនេះ នឹងកំណត់ពីអ្វីដែលយើងនឹងប្រែក្លាយ នៅក្នុងភាពអស់កល្បទាំងពួងនៅឯបរលោកនាយខាងមុខ ។ ដើម្បីទទួលបានពរជ័យនៃការផ្សារភ្ជាប់ ដែលព្រះវរបិតាសួគ៌របស់យើងបានប្រទានដល់យើង នោះយើងត្រូវតែកាន់តាមបទបញ្ញតិ្តទាំងឡាយ ហើយដឹកនាំជីវិតរបស់យើងទៅតាមរបៀបមួយ ដែលក្រុមគ្រួសាររបស់យើងនឹងចង់រស់នៅជាមួយយើងនៅក្នុងភាពអស់កល្បជានិច្ច ។ ( « The Eternal Family » Ensign ខែ វិច្ឆិកា ឆ្នាំ ១៩៩៦ ទំព័រ ៦៥ )
នៅក្នុងការព្យាយាមដើម្បីធ្វើជាមនុស្សដ៏ល្អបំផុតដែលយើងអាចក្លាយទៅជា និងដើម្បីរក្សាសេចក្ដីសញ្ញារបស់យើង នោះយើងអាចមើលទៅគំរូរបស់ព្រះយេស៊ូវគ្រីស្ទបាន ។ ដូចដែលអែលឌើរ រ៉ូណល អេ រ៉ាសបាន នៃកូរ៉ុមនៃពួកសាវកដប់ពីរនាក់បានបង្រៀន ៖
ព្រះអង្គសង្គ្រោះរបស់យើង ព្រះយេស៊ូវគ្រីស្ទ គឺជាគំរូដ៏អស្ចារ្យរបស់យើង ពេលយើងនិយាយពីការចុះ និងការរក្សាសេចក្ដីសន្យា និងសេចក្ដីសញ្ញា ។ ទ្រង់បានយាងមកឯលោកិយ ដោយសន្យាថានឹងធ្វើតាមព្រះហឫទ័យនៃព្រះវរបិតា ។ ទ្រង់បានបង្រៀនគោលការណ៍នៃដំណឹងល្អតាមរយៈព្រះបន្ទូល និងតាមរយៈទង្វើ ។ ទ្រង់បានធ្វើដង្វាយធួនសម្រាប់អំពើបាបរបស់យើង ដើម្បីយើងអាចបានរស់ម្តងទៀត ។ ទ្រង់បានរក្សាសេចក្ដីសន្យារបស់ទ្រង់ទាំងអស់ ។
… ការរក្សាសេចក្ដីសន្យាមិនមែនជាទម្លាប់ទេ តែវាគឺជាចរិតលក្ខណៈនៃការក្លាយជាសិស្សរបស់ព្រះយេស៊ូវគ្រីស្ទ ។ …
សំណួរខ្ញុំនៅថ្ងៃនេះគឺថា តើយើងរក្សាសេចក្ដីសន្យា និងសេចក្ដីសញ្ញារបស់យើងឬទេ ឬវាជាការតាំងចិត្តមិនអស់ពីចិត្តពេលខ្លះ ដែលធ្វើដោយគាប់ជួន ហើយដែលងាយនឹងមិនធ្វើតាម ? ( « Standing by Our Promises and Covenants » Ensign ឬ Liahona ខែ វិច្ឆិកា ឆ្នាំ ២០១៩ ទំព័រ ៥៣, ៥៤ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នកអាចកាន់តែក្លាយដូចជាព្រះអង្គសង្គ្រោះ នៅក្នុងការកាន់តាមសេចក្ដីសញ្ញាដ៏ពិសិដ្ឋ និងការសន្យាទាំងឡាយ ដែលអ្នកបានចុះជាមួយព្រះដោយរបៀបណា ? តើអ្នកអាចធ្វើអ្វីខ្លះបន្ថែមទៀត ដើម្បីកាន់តាម ឬរៀបចំខ្លួនកាន់តាមសេចក្ដីសញ្ញាដែលបានផ្សារភ្ជាប់របស់អ្នក ?