O le a se mea e mafai ona ou faia e faailoa atu ai le alofa faaKeriso?

E taua le malamalama faapea “o loo i ai tagata uma i se nofoaga e ese i luga o le ala.” E ao ona tatou iloa manaoga o isi o loo siomia ai i tatou. E tofu tagata uma ma mea o latou tauivi. O nisi e ogaoga mea o latou tauivi tatou te le iloaina. E alofagia i tatou uma e le Atua. E manaomia ona tatou taumafai e vaai atu i isi e ala i fofoga e faapei o Keriso. E le tatau ona tatou “faatagaina le faamasino atu e faumalo i le ala tatou te fegalegaleai ai ma tagata.” O le olaga ua le “na o lo tatou lava alualu i luma ae e uiga i le fesoasoani i isi ia agai i luma” foi i latou. “Ua tuuina i tatou i nofoaga ua tatou i ai ina ia mafai ai ona tatou alolofa ma si’i a’e isi i luga.”

Ina ia avea ma soo o Keriso o lona uiga e tatau ona tatou fesoasoani i isi i luga o le ala. “E le ta’ufaatauvaaina e le talalelei a Iesu Keriso ia tagata. O tagata e ta’ufaatauvaaina tagata. Ma e tatau ona tatou faaleleia lena mea. E ao ona tatou nofouta ma alolofa ia i latou ma tuu atu ia i latou le avanoa e tuputupu a’e ai ma ia fuga mai ma avea ma ni tagata aupito sili o i latou lava. E i ai a latou taleni ma tomai ma [uiga o loo] manaomia i le malo o le Atua.” Pe a oo ina o mai tagata i le lotu, “e tatau ona vave ona latou lagonaina le opoina ma le alofagia ma le siitia, ma musuia.” Ona, a oo foi la i le taimi latou te savavali atu ai i fafo o le faitotoa, ua sili atu i latou, “aua ua latou iloa e alofa le Alii ia te i latou. [Ma ua latou iloa] e i ai ni a latou uo i lo latou faatuatuaga” (Carol F. iMcConkie, “Lifting Others,” ChurchofJesusChrist.org).