Xtikib’ankil xb’aan li Xb’eenil Awa’b’ejil

Oxib’ pohaq xk’uub’lajik chaq li Iglees naq li Qaawa’, rik’in xtz’uumal re li profeet aj Jose Smith, kixk’e xna’leb’ li xEmma Smith, rixaqil li profeet, re naq tixsik’i chaq ru li loq’laj b’ich choq’ re li Iglees: “Xb’aan naq nasaho’ li waam rik’in lix b’ichahom li aamej; relik chi yaal, lix b’icheb’ li tiikeb’ xch’ool a’an jun li tij chiwu, ut sumenb’ilaq rik’in jun osob’tesink sa’ xb’een lix jolomeb’” (Tz. ut S. 25:12).

Anajwan, lajeeb’ waqxaqk’aal chihab’ naq li xb’eenil b’ichleb’aal kipuktesiik xb’aan li Iglees, sa qach’ool chixq’axtesinkil li tasal a’in. Jwal naab’al li b’ich li wan sa’ li xb’eenil b’ichleb’aal ut eb’ lix tz’aqob’ k’eeb’il moqon wankeb’ chi sa’ a’in, jo’kan ajwi’ jun ch’uut rajlil li ak’ b’ich xk’eeman chi sa’. Chixjunileb’ xe’sik’man ru re naq te’k’anjelaq re li jalan jalanq ajom re li komon sa’ li Iglees sa’ chixjunil li ruchich’och’ sa’ li kutan wanko wi’.

Li b’ich sa’eb’ li qach’utam re li Iglees

Li b’ich li nawaklesin musiq’ej a’an jwal aajel ru sa’eb’ li qach’utam re li Iglees. Eb’ li b’ich neke’xk’e xb’oqb’al chaq lix Musiq’ li Qaawa’ sa’ qayanq, neke’xk’e chiqeek’a li oxloq’ink sa’ qach’ool, nokohe’xtenq’a chi wank sa’ junajil jo’ komon sa’ li Iglees, ut nokohe’xkanab’ chixnimankil xk’aba’ li Qaawa’.

Wan li aatin q’axal nim li najultikaman rik’in xb’ichankileb’ li b’ich. Eb’ li b’ich neke’xtoch’ li qach’ool re naq taqajal qak’a’uxl ut re naq chaab’ilaq qab’aanuhom, neke’xkawob’resi lix nawom qach’ool ut li qapaab’aal, neke’xk’ojob’eb’ xch’ool li ani lub’luukeb’, neke’xwaklesi xch’ooleb’ li ani wankeb’ sa’ rahilal, ut nokohe’xtenq’a sa’ musiq’ej chi kuyuk toj sa’ roso’jik.

Naqoyb’eni rilb’al xk’iijik lix b’ichankileb’ li b’ich sa’eb’ li qach’utam. Naqak’e xb’oqb’aleb’ chixjunil li komon, us ta wankeb’ xseeb’al rik’in li b’ich malaj ink’a’, re naq te’xjunaji rib’ qik’in sa’ xb’ichankileb’ li b’ich. Naqoyb’eni naq eb’ laj k’amol b’e, laj k’utunel, ut eb’ li komon li b’oqb’ileb’ chi aatinak te’sik’oq chi kok’ aj xsa’ sa’ li b’ichleb’aal re xtawb’al li k’utum jultikanb’il rik’in wankilal ut ch’ina-usal sa’ li utz’u’ujinb’il aatin.

Eb’ laj Santil Paab’anel sa’ Roso’jikeb’ li Kutan wan k’iila chihab’ rokikeb’ chi b’ichank sa’ ch’uut aj b’ichanel. Li junjunq teep malaj uq’ej sa’ li Iglees tento raj naq taawanq jun ch’uut aj b’ichanel li nab’ichan jo’q’ehaq. Naqak’e xb’oqb’aleb’ li ch’uut aj b’ichanel naq te’roksi li b’ichleb’aal jo’ li xb’eenil xk’anjeleb’aaleb’ aajel ru.

Li b’ich sa’ li qajunkab’al

Li b’ichank k’a’jo’ naq wan xwankil chireek’asinkileb’ li junkab’alej re naq te’ok sa’ xnimal chik li musiq’ejil wank ut naq te’xq’axtesiheb’ xch’ool chi tz’aqal wi’chik choq’ re li evangelio. Eb’ laj Santil Paab’anel sa’ Roso’jikeb’ li Kutan tento raj naq te’xnujob’resi li rochocheb’ rik’in xyaab’ li b’ich re tiikilal.

Li qab’ichleb’aal naxk’e rib’ chi oksiik sa’ xsutam li qajunkab’al jo’ ajwi’ sa’ li ch’utleb’aal. Naqoyb’eni naq li b’ichleb’aal tixtaw xna’aj aajel ru sa’ xyanqeb’ li loq’laj hu ut xkomon chik li hu re paab’ank sa’ li qajunkab’al. Eb’ li b’ich naru neke’xk’am chaq sa’eb’ li junkab’al jun musiq’ej re ch’ina-usil ut tuqtuukilal, ut naru neke’xwaklesi li rahok ut li junajil sa’ xyanqeb’ li komon sa’ li junkab’al.

K’utumaq chiruheb’ lee ralal eek’ajol xraab’aleb’ li b’ich. B’ichahomaq sa’ li hilob’aal kutan, sa’ lee q’ojyin re junkab’al, sa’ xtzolb’aleb’ li loq’laj hu, sa’ xhoonalil li tijok. B’ichanqex naq yookex chi k’anjelak, chi b’atz’unk, ut naq nekexxik chi b’eek sa’ komonil. B’ichahomaq li b’ich re xwartesinkileb’ li k’uula’al, re naq te’waklesiiq xpaab’aal ut xnawomeb’ xch’ool lee kok’al.

Li b’ich sa’ li qayu’am chijunjunqalo

Jo’ naq nokohe’rosob’tesi jo’ komon sa’ li Iglees ut sa’ li junkab’al, eb’ li b’ich neke’ru ajwi’ chiqatenq’ankil chi jwal nim sa’ li qayu’am chi junjunqil. Eb’ li b’ich neke’ru chixwaklesinkil li qamusiq’, xk’eeb’al xkawilal qach’ool, ut qeek’asinkil chixb’aanunkil li k’a’ru tiik. Neke’ru chixnujob’resinkil li qaam rik’in choxahil k’a’uxlej ut chixk’amb’al chaq qe jun musiq’ej re tuqtuukilal.

Eb’ li b’ich neke’ru ajwi’ chiqatenq’ankil chixnumsinkil li raalehom laj tza. Naqak’e xkawil eech’ool naq teekanab’ sa’ lee k’a’uxl eb’ li b’ich neke’wulak cheru ut teetzoleb’ li kok’ raqal sa’eb’ li loq’laj hu li neke’xk’am rib’ rik’ineb’. Aran ut, wi wan li maa’us aj k’a’uxlej na’ok sa’ laa k’a’uxl, taab’icha junaq li b’ich choq’ aawe aajunes, re xjalb’al li ink’a’ us rik’in li k’a’ru us.

Ex qas qiitz’in, chiqoksiheb’ li b’ich re xk’eeb’al xb’oqb’al lix Musiq’ li Qaawa’ sa’eb’ li qach’utam, sa’eb’ li qajunkab’al, ut sa’ li qayu’am chijunjunqalo. Chiqakanab’ sa’ qak’a’uxl, chiqak’oxla sa’ qach’ool, chiqanumsi li raatinul rik’in xtz’uumal qe, chiqab’icha, ut chiqak’ul qamusiq’ejil ch’olaninkil rik’ineb’. Chenawaq naq lix b’icheb’ li tiik xch’ool a’an jun li tij chiru li qaYuwa’ sa’ choxa, ut naq “sumenb’ilaq rik’in jun li osob’tesink sa’ xb’een [lee jolom]”.

Li Xb’eenil Awa’b’ejil