Sot Toktok blong Ol Papa, Mama mo Ol Lida

Stamba Tingting blong Progres blong Miwan

Ol Yang Woman Progres blong Miwan i wan ajivmen program we oli bin planem blong i helpem ol yang woman blong oli:

Mekem ol testemoni blong olgeta abaot Jisas Kraes i kam moa strong.
Mekem tugeta famle blong naoia mo fiuja i kam moa strong.
Rere blong stap klin inaf blong mekem mo kipim ol tabu tempol kavenan.
Rere long ol fiuja rol mo responsabiliti blong olgeta.

Ol yang woman oli mas wok wetem ol papa mo mama blong olgeta, ol lida blong ol Yang Woman, mo ol narafala gudfala woman blong setemap mo kasem ol gol we i kamaot long ol eit valiu blong ol Yang Woman. Progres blong Miwan i save helpem ol papa mo mama mo ol lida blong oli save kam antap long ol rilesensip blong olgeta wetem ol yang woman taem oli wok tugeta.

Responsabiliti blong Ol Papa, Mama mo Ol Yang Woman Lida

Statem Program

Ol Yang Woman lida oli mit wetem wanwan yang woman we i kam insaed long program blong ol Yang Woman wetem papa mo mama blong hem. Wan memba blong klas blong ol yang woman presidensi i save kam tu long taem ia. Ol lida oli prisentem yang woman ia wetem wan buk blong Ol Yang Woman Progres blong Miwan, wan jenol blong Progres blong Miwan, mo wan toj medol blong ol Yang Woman. Bae oli eksplenem program ia long yang woman ia mo leftemap tingting blong papa mo mama blong hem blong wok wetem gel blong tufala blong hem i jusum mo komplitim ol eksperiens mo projek long Progres blong Miwan. Ol lida oli mas invaetem tu ol papa mo mama long evri spesel taem we bae ol gel blong olgeta i tekem pat long hem.

Mekemsua se I Gat Inaf Sapot

Wan yang woman i nidim sapot mo ol toktok blong leftemap tingting blong hem oltaem blong hem i save komplitim Progres blong Miwan blong hem. Sapot ia i save kam long ol papa o mama, ol lida, mo ol olfala woman we oli bin komplitim Progres blong Miwan. Sapos yang woman i bin gat smol sapot nomo long hom blong helpem hem blong komplitim Progres blong Miwan blong hem, oli save invaetem wan nara sista blong i stap olsem wan tija mo helpem hem, long kaonsel wetem ol prishud lida. Adalt sista ia i save givim raet long ol valiu eksperiens mo projek mo saenem Progres blong Miwan blong yang woman ia taem tufala i komplitim tugeta. Oli save invaetem tu wan nara yang woman we i bin komplitim Progres blong Miwan blong hem blong i save givim help mo leftemap tingting blong yang woman ia.

Rekodem mo Luksave Progres

Ol papa, mama mo ol lida oli mas givim ol janis oltaem long ol yang woman blong oli ripotem progres blong olgeta. Taem wan yang woman i ripot oltaem, hem i save mekem wan akaon blong ol hadwok blong hem mo serem wanem hem i bin lanem mo olsem wanem testemoni blong hem i bin kam moa strong. Ol papa, mama mo ol lida oli mas luksave ol samting we yang woman ia i stap kasem, konfemem save blong hem mo olsem wanem hem i yusum ol gospel prinsipol, mo givim ol toktok blong leftemap tingting blong hem i gohed blong progres. Ol kaen rilesen olsem ia bae i help blong developem ol gudfala rilesensip.

Ol Responsabiliti blong Ol Prishud Lida

Taem wan yang woman i komplitim ful program blong Progres blong Miwan, bisop i intaviu long hem, mo i yusum ol standet we oli stap insaed long buk ia, Blong Ol Yut Oli Kam Strong olsem wan gaed. Hem i jekem se yang woman ia i stap go long sakramen miting oltaem, i stap tekem pat long seminari, mo i stap ridim Buk blong Momon. Hemia i save kam pat blong intaviu blong hem blong yia o wan blong sikis manis. Bisop i traem faenemaot sapos yang woman ia i klin inaf blong i save kasem Rekonisen Olsem Wan Yangfala Woman mo i saenem buk blong Progres blong Miwan blong hem blong i luksave se yang woman ia i bin komplitim ol samting we hem i mas mekem. Bisop i save prisentem long hem Rekonisen Olsem Wan Yangfala Woman long wan sakramen miting o wan nara miting.

Oli save luksave tu sakses blong wan yang woman long Progres blong Miwan, taem hem i kasem ol setifiket blong hem blong Bihaev, Maea Med, mo Lorel taem hem i stap muv long wan klas i go long wan narafala klas.

Ol memba blong bisoprik oli save yusum intaviu blong olgeta wetem ol yang woman blong oli luksave mo leftemap tingting blong wanwan progres blong ol yang woman. Progres blong Miwan-Yang Woman Rekod Pepa blong Ol Lida, we Yang Woman presidensi oli kipim, i save helpem tu ol memba blong bisoprik. Oltaem ol stek presiden oli mas askem ol bisop abaot welfea mo progres blong ol yang woman long ol wod blong olgeta.

Ol Gaedlaen

Ol gol mo ol samting we oli mas mekem blong program oli talemaot long fored blong buk ia. Hemia sam moa gaedlaen we i save givim help long ol lida.

Ol Valiu Eksperiens

Wan yang woman i save wok long ol valiu long eni oda:
Wetem valiu blong klin fasin we i no gat yet, oli leftemap tingting blong ol yang woman blong oli komplitim ol valiu eksperiens we oli mas mekem bifo oli mekem projek blong valiu ia.

Ol Valiu Projek

Wan valiu projek oli mekem blong i helpem wan yang woman blong i yusum wanem hem i bin lanem long ol valiu eksperiens.
Wan yang woman i mas spendem ten aoa long wanwan valiu projek. Be ten aoa ia oli no save yusum blong mekem moa bitim wan valiu projek.
Ol yang woman oli save wok tugeta long ol projek. Be, wan yang woman i mas spendem ten aoa long taem blong hem sapos hem i stap yusum projek ia blong fulfilim wan samting we hem i mas mekem blong hemwan long Progres blong Miwan blong hem.
Wetem ol raet we oli kasem fastaem long papa, mama o ol Yang Woman lida, ol gudfala samting we ol yang woman oli mekem long hom, Jos, skul, seminari, mo long komuniti i save help blong fulfilim ol samting we oli mas mekem long Progres blong Miwan.

Taem Yu Komplitim Progres blong Miwan

Taem wan yang woman i komplitim ol samting we hem i mas mekem long Progres blong Miwan bifo hem i save livim Yang Woman, oli mas invaetem hem blong helpem ol nara yang woman we oli stap wok yet long Progres blong Miwan blong olgeta. Oli mas leftemap tingting blong hem blong hem i mas kasem wan Ona Bi o statem program bakegen.
Sapos wan yang woman i no komplitim evri samting we hem i mas mekem long Progres blong Miwan bifo hem i livim Yang Woman, oli mas leftemap tingting blong hem, blong hem i gohed blong wok blong kasem Rekonisen Olsem Wan Yangfala Woman. Oli save invaetem ol mama, lida, mo ol nara gudfala woman blong oli sapotem hem blong hem i save kasem samting ia.

Rekod mo Spid

Rekod Pepa blong Progres blong Miwan, we i stap long pej 77 blong buk ia, i tokbaot smol wok blong wanwan yang woman long Progres blong Miwan.
Wan Progres blong Miwan-Yang Woman Rekod Pepa blong Ol Lida i stap tu olsem wan seperet pepa blong helpem ol lida blong redokem progres blong wanwan yang woman (36655 852). Oli save yusum tu blong helpem tugeta ol Yang Woman mo ol prishud lida blong oli wok wetem mo luksave wanwan yang woman.
Ol yang woman oli save wok long spid blong olgetawan long program blong Progres blong Miwan; be, hem i gud se wan yang woman i komplitim wan valiu eksperiens evri manis mo wan valiu projek evri sikis manis tu (2) valiu projek long wan yia). Sapos hem i stat blong wok long Progres blong Miwan taem hem i joenem Yang Woman taem hem i gat 12 yia mo i gohed blong wok long kaen spid ia, bae hem i komplitim Progres blong Miwan taem bae hem i kasem 16 yia. Bae hem i gat tu yia blong hem i save kasem wan Ona Bi o statem program bakegen olsem we oli givim tingting long pej 83.

Luksave Wanwan Progres

Taem wan yang woman i komplitim ol eksperiens mo ol projek blong wanwan valiu, hem i kasem wan stika (36654) mo wan skripja riben we i kam wetem valiu ia. Hem i putum stika blong hem long pej blong Progres blong Miwan Valiu Ajivmen, insaed long buk blong hem (pej 78). Hem i yusum riben olsem wan buk mak long ol skripja blong hem. Rekonisen ia long progres blong hem, oli save givimaot long wan miting blong ol Yang Woman.
Evri yia, long wan selebresen blong Bes blong Ol Yang Woman, bae oli mas luksave ol yang woman from ol samting we oli kasem.
Oli save luksave tu sakses blong wan yang woman long Progres blong Miwan, taem hem i kasem ol setifiket blong hem blong Bihaev, Maea Med, mo Lorel taem hem i stap muv long wan klas i go long wan narafala klas. Ol setifiket ia (Bihaev, 08563; Maea Med, 08565; Lorel, 08564) oli stap givimaot anda long daereksen blong bisop. Oli luksave muvmen blong yang woman ia aot long wan yia grup i go long narawan.

Rekonisen Olsem Wan Yangfala Woman

Taem wan yang woman i komplitim wok blong hem long evri eit valiu mo bisop i bin intaviu long hem finis, hem i save kasem Rekonisen Olsem Wan Yangfala Woman. Rekonisen ia i gat wan setifiket (36651 852) mo wan medol long gol o silva (gol, 08602; silva, 08603). Wan memba blong bisoprik i save prisentem Rekonisen Olsem Wan Yangfala Woman ia long wan sakramen miting.
Afta wan i komplitim Rekonisen Olsem Wan Yangfala Woman, wan yang woman i save gohed blong progres taem hem i kasem wan smol medol blong Ona Bi (gol, 08562; silva, 08578; luk long pej 83. Rekonisen blong progres blong hem ia, oli save givimaot long wan miting blong ol Yang Woman.
Oli save kasem ol awod mo setifiket tru long wan Jos distribusen senta wetem ol mane blong wod, be i no mane blong yang woman o papa o mama blong olgeta.

Progres blong Miwan - Ol Samting we Ol Lida Oli Mas Mekem

Oli leftemap tingting blong ol lida blong oli wok long Progres blong Miwan wetem ol yang woman. Olgeta we oli bin tekem pat long program blong Progres blong Miwan olgetawan oli save gud program ia mo setem wan gudfala eksampol blong ol yang woman oli save folem. Oli save kasem Rekonisen Olsem Wan Yangfala Woman afta we oli:

Givim seves blong wan ful yia olsem wan Yang Woman lida.
Komplitim ol valiu eksperiens we oli mas mekem long wanwan long ol eit valiu.
Komplitim tri valiu projek, mo tu projek blong klin fasin.

Patisipesen blong Ol Mama

Ol mama oli welkam blong tekem pat wetem ol yang woman blong kasem Rekonisen Olsem Wan Yangfala Woman. Ol mama oli wok long buk blong Progres blong Miwan blong olgetawan mo oli save kasem rekonisen tugeta wetem ol gel blong olgeta. Hem i gud se wan gel i kasem rekonisen blong hem bifo, o, long semtaem wetem mama blong hem.

Ol mama oli save komplitim ol sem samting we oli mas mekem olsem ol gel blong olgeta, we i gat:

Go long sakramen miting oltaem (taem i posibol).
Laef folem ol standet we i stap long buk ia, Blong Ol Yut Oli Kam Strong.
Komplitim ol valiu eksperiens mo valiu projek blong wanwan long ol eit valiu ia.
Kipim wan jenol blong yuwan.
Ridim Buk blong Momon oltaem.
Rekodem testemoni blong hem abaot Sevya Jisas Kraes.

Ol mama oli save jusum ol defren samting olsem ol valiu eksperiens mo ol valiu projek long hemia blong ol gel blong olgeta. Ol gel blong olgeta, hasban blong olgeta, wan Yang Woman lida, o wan nara adalt i save saen mo putum deit long ol eksperiens mo projek blong olgeta. Bisop i mas jekem se mama ia i bin komplitim evri samting we hem i mas mekem. Rekonisen mo taem blong pem ol tul blong rekonisen ia, ol Yang Woman lida mo bisoprik nao oli mas lukluk long hem.

Ol Samting we Ol Narawan we Oli Wantem Wok long Program blong Progres blong Miwan Oli Mas Mekem

Ol nara woman we oli wantem blong tekem pat long mo komplitim Progres blong Miwan oli save mekem taem oli komplitim ol sem samting we ol yang woman oli mas mekem mo taem oli helpem wan yang woman wetem pat blong Progres blong Miwan blong hem. (Luk long ol samting we ol mama oli mas mekem long pej 92.)

Yusum Progres blong Miwan long Ol Sandei Lesen mo long Miutuol

Blong wok tugeta long wan eksperiens blong Progres blong Miwan olsem pat blong wan Sandei lesen, i save givim ol lida mo ol yang woman wan janis blong toktok raon long ol prinsipol we oli stap tijim mo olsem wanem oli yusum long ol laef blong ol yang woman. Ol refrens long Progres blong Miwan, yu save faenem tu long ol tul blong kurikulum blong Yang Woman.

Ol aktiviti blong Progres blong Miwan oli save kam pat blong Miutuol. Olsem eksampol, evri yang woman oli save helpem wan yang woman wetem wan valiu projek blong hem. Blong wok tugeta long wan projek i save helpem ol yang woman blong oli gohed blong progres. Ol grup aktiviti olsem ia oli mas planem wetem prea mo i klia gud blong mekemsua se program blong Progres blong Miwan i stap olsem blong wanwan yang woman nomo.

Stretem Folem Wanwan mo Ol Lokol Nid

Ol valiu eksperiens mo projek oli save stretem folem wanwan o ol lokol situesen, intres, mo ol nid mo oli mas kasem raet fastaem we i kam long papa, mama mo ol lida. Taem yu mekem eni jenis o tekemaot samting blong wan, ol lida oli mas tingting long wanem nao ol jenis ia bae oli mekem long ol nara yang woman. Afta we papa, mama mo ol lida oli tingting gud long hem, oli save stretem ol samting blong oli mitim ol nid blong ol yang woman we oli disebol, o oli no gat gudfala edukesen, blong mitim ol wanwan nid o nid long saed blong kalja, o blong letem ol yang woman we oli no memba blong oli tekem pat.

Sapos wan yang woman i joenem Jos o i kam aktiv long Yang Woman afta hem i kasem 16 yia, ol samting we hem i mas mekem blong komplitim program blong Progres blong Miwan oli blong:

Go long sakramen miting oltaem (taem i posibol).
Laef folem ol standet we i stap long buk ia, Blong Ol Yut Oli Kam Strong.
Komplitim ol valiu eksperiens ia we hem i mas mekem long wanwan long ol eit valiu ia. (Hem i no nidim blong komplitim ol eksperiens ia we hem i bin jusum hemwan.)
Komplitim wan valiu projek long wanwan long ol eit valiu ia.
Go long seminari (taem i gat).
Ridim Buk blong Momon oltaem.
Rekodem testemoni blong hem abaot Sevya Jisas Kraes.

Ol samting ia i save aplae tu long ol yang woman long ol nara situesen folem wanem we ol lokol Yang Woman lida oli talem.